استجابة بعد صبر

 #استجابه_بعد_صبر !!

هشتاج باقي القصص 👇

#قصص_واقعيه_لهدير_ابراهيم 💌

🎀🎀🎀🎀🎀🎀🎀🎀🎀🎀🎀🎀🎀

السلام عليكم..

محتاره بصراحه ابدأ احكي منين بس هعمل زي باقي بطلات قصصكوا وهبدأ ب اني اعرفكوا ع نفسي..

اسمي أميره وقصتي متأكده انها هتكون رساله لبنات كتير وهتجدد الأمل في قلوبهم م تاني..

وهتتأكدوا منها ان المستحيل فعلا بيتحقق..

بس لان ربنا هو بس اللي قادر يحقق المستحيلات ف صدقوني الجبر مبهر وبيكون غير متوقع نهاااائي ودا الجميل فيه..

انا قصتي دي شوفت أحداثها بتحصل مع ناس كتير بس للأسف النهايات بتكون مختلفة...

ف لكل بنت قلبها اتعلق بحب شخص ومش عارفه ترتبط بيه.. هتلاقي الحل في قصتي..

ولكل بنت اتأخرت في الحمل والخلفه بردو هتلاقي حلك في قصتي

اما بقى البنت اللي اهل جوزها خيروها يا تطلق ي توافق ان جوزها ي تجوز عليها

ف باااردو حلك هتلاقيه في قصتي..

م الاخر جيالكوا بقصه كومبو شامله ومتكامله 😃

كفايه رغي بقى ويلا بينا نبدأ..

انا بنت عاديه فوق م تتخيلوا..

عايشه حياه روتينيه جداا ومكنتش اتوقع في يوم ان حياتي الممله دي هتقلب ف ثانيه وتتحول لأكشن واثاره ومغامرات ودا تحديدا ابتدا وانا في اولى جامعة ..

كنت في فرح وهناك شوفت شخص لفت نظري جداً وبالصدفه طلع قريبي او مش صدفه هو كان قدر وترتيب ربنا..

 الفكره اني كنت لسه صغيرة يعتبر..

ف اول م جه يكلمني كلمته عادي وكل واحد اخد رقم التاني وبدأنا نتكلم ..

ولان دي كانت أول مره يحصل معايا كدا ف كنت مرعوبه وخايفه جدا وحاسه اني بعمل حاجه غلط..

 ف رنيت عليه وقولتله: انا مش هعرف اعمل كدا من ورا أهلي وكمان اللي بنعمله دا حرام.. وانا م اهلي مربونيش اني اعمل حاجه حرام..

هو اكبر مني بسنتين بس فكان لسه معملش اي حاجة تساعد انه يتقدملي..

بس لما اصريت اني مش هينفع اكمل ع الوضع دا واني مش مرتاحه.. قررت اني هبعد عنه وتركته لله

علشان الاقيه بعد ٣ شهور بالظبط جه يتقدملي..

 وهنا بقى حصل اللي مكناش عاملين حسابه ابداااا

اكتشفنا ان اهلي واهله مابيحبوش بعض اصلا رغم اننا زي م قولتلكوا قرايب..

ف لا انا كنت سمعت م اهلي حاجه وحشه قبل كدا عن اهله ولا هو كمان سمع م اهله حاجه..

ف كنا مصدومين..

باباه كان جاي معاه بعد زن والحاح منه بس اكتشفنا انه اصلا جاي علشان يبوظ الجوازه..

 وابويا كان في نيته هو كمان الرفض من غير حتى مايسمعهم.. دا مجرد م سمع اسمهم اصلا ركبه ميت عفريت ووافق ع انهم ييجوا لمجرد انه يوصلهم رساله انهم يطلعوا الموضوع دا م دماغهم وانه مرفوض تماااما ..

 وللاسف الموضوع الموضوع متمش

 ومش بس كدا دي كانت المرة الأولى اللي ابويا يمد ايده فيها !!

انا كنت مصدومه م الحاله اللي هو كان عليها..

واسأله طيب هي الناس دي مش كويسه او فيهم حاجه مش كويسه ؟ 

يقول لا بس هي مشاكل قديمه بين الاسرتين م زمن وبيتواراثوها وخلاص..

 ف فضلت انا مُصره على الشخص دا ووالدي ع اصراره ان الناس دي مش شبهنا ومش عاوزين حاجه تربط بينا وبينهم...

بس ع الجانب التاني ف أحمد ميأسش وفضل يكلم والدي ع التليفون كل شويه

ويقوله : قولي بس اللي انت عاوزه واللي يرضيك وانا هنفذه..

كان والدي يرد ويقوله : اللي يرضيني انك تطلع موضوع ارتباطك ببنتي م دماغك علشان الموضوع دا مستحيل يحصل مهما حصل.. ومتتصلش هنا تاني..

وكان يقفل ف وشه..

بس أحمد بردو ميأسش وحاول يكلم كل قرايبنا 

وبردو مفيش فايده...

والدي حلف ان رجله مش داخله بيتنا تاني..

ووالد احمد هو كمان حلف انه مش هيسمح للجوازه دي تتم مهما حصل وان كرامتهم اتهانت ع نسب هو اصلا مش عاوزه ولا موافق عليه !

قلبي كان بيتقطع وبيتعصر م الألم..

شايفه قدامي شخص صادق في حبه ليا لأقصى حد.. بس الدنيا كلها متقفله ف وشنا ومعانده معانا..

حاولت انساه علشان رغبة اهلي وعلشان كنت خلاص اتأكدت ان فكرة ارتباطنا دي بقت م سابع المستحيلات..

 بس هو كان اول حد ف حياتي وأول شخص ف الدنيا قلبي يدق ليه..

 وشوفت فيه الشخص اللي بتمنى اكمل معاه اللي جاي م عمري كله..

ف مقدرتش ابداً اخرجه من قلبي ولا م عقلي رغم كل محاولاتي..

في الوقت دا كان بيتقدم عرسان وانا ارفض، لحد م اتقدم واحد من وجهة نظر اهلي انه مينفعش يترفض وصمموا عليه..

 مكنتش عارفه اعمل ايه !

محتاره وقلبي مقبوض وواجعني جدا

لاقيت نفسي بمسك التليفون وبرن ع احمد..

بس اتصدمت لما لاقيته قالي: وافقي يا أميره..

 احنا حكايتنا محكوم عليها بالفشل وانا والدي حلف بالطلاق اني مش هاخدك دا غير رد فعل اهلك وتصميمهم ع رفضي !!

اتضايقت من كلامه وظنيت انه بكدا بيتخلى عني..

وطبعا كنت في لحظة غضب ف الشيطان اتمكن م عقلي وخلاني نسيت كل المحاولات اللي عملها أحمد علشاني ..

الشيطان اتمكن م قلبي وعقلي وخلا اليأس يسيطر عليا ف مصليتش استخاره حتى وف لحظة غضب وافقت ع العريس !

عشت اسوأ شهرين ف حياتي كلها ف الشهرين دول..

 انا قلبي وعقلي مع شخص وايدي فيها دبلة واحد غيره ..

صراع نفسي رهيب كنت عايشه فيه ومش لاقيه اي مخرج ولا حل ولا عارفه ارتاح ..

حاولت اتعايش وبقيت اقول لنفسي : خلاص ارضي بحالك واللي مكتوبلك ودا نصيبك وقسمتك.. وانسي أحمد لانه اصبح م الماضي وبقى مستحيل ترتبطي بيه لانه اكيد خرجك م حياته وم قلبه خلاص..

واكيد عنده حق ف خرجيه انتي كمان..

حاولت بكل الطرق اني اشغل نفسي بأي حاجه تخليني ميبقاش عندي وقت افكر في الحال اللي وصلت ليه حياتي..

 جات الامتحانات وشلت المواد كلها تقريبا وكدا هعيد السنة وكان فاضل ع جوازي تقريبًا ٤ شهور..

وقدراً كنت انا وخطيبي بنشتري حاجات وشوفت أحمد

مجرد م لمحته رجع من تاني صحا فيا كل حاجه كنت فاكرة انها ماتت او ع الاقل جزء منها،

 بس لقيت العكس تماما واكتشفت اني كل دا كنت بضحك ع نفسي..

فضلت اعيط عياط هيستيري.. ورغم اني عرفت بعدها ان هو كمان ارتبط الا اني م اللحظة اللي شوفته فيها اتأكدت ان كل مشاعري ليه م اتغيرتش وباللي حاسه بيه دا ف صعب ان مشاعري في يوم تتغير واتأكدت ان مستحيل قلبي يدق لحد غيره ع الاقل لفتره.. واني محتاجه وقت وفترت نقاهه اتعافى فيها انا وقلبي..

 اخدت قرار اني مش هكمل مع خطيبي بحيث لا اظلم نفسي ولا اظلم حد معايا ..

قررت اني هركز ف دراستي لحد م الاقي شخص ارتاحله ويكون أحمد خلاص خرج م حياتي..

 وفعلا فسخت الخطوبه وقفلت الصفحة دي من حياتي...

مكنتش بعرف حاجة عن أحمد خالص غير بالصدفة علشان صلة القرابة اللي بينا ف كان ممكن اسمع عنه بالصدفه م قريب مشترك بينا

 ف عرفت انه سافر بره مصر وعرفت انه انفصل عن خطيبته هو كمان..

 فضلت ٧ سنين اعرف اخباره م بعيد لبعيد..

 بس ولا بكلمه ولا اي حاجه غير اني بدعي ربنا انه يجمعني بيه - مقدرتش ابداً اخرجه لا م عقلي ولا قلبي رغم كل السنين دي-

انا الجامعة بتاعتي المفروض ٤ سنين بس انا اخدتهم في ٧ م اعرفش ازاي مع اني كنت شاطرة يُعتبر بس نفسياً كنت تحت الصفر بمراااحل ..

وبعد ال٧ سنين عرفت انه خطب تاني.. 

قلبي رجع يتكسر م تاني اكتر م هو كان مكسور اصلا..

 بس وقتها اتفاجئت لما لقيت رسالة منه ع الموب مكتوب فيها

" أميره ازيك..

مش عارف فاكراني لسه ولا نسيتيني..

 ولا عارف مشاعرك ناحيتي اتغيرت ولا لا..

بس حبيت اعرفك اني طول السنين اللي فاتت مقدرتش انساكي ابدا رغم اني حاولت كتير بس مقدرتش اتخيل نفسي مع حد غيرك ولا ان يكون ليا زوجه غيرك..💔

انا حاولت اكلم والدك كتير لكن والدك كان مصمم بردو ع رفضي ..💔

لو لسه ليا مكان في قلبك ولو بسيط جدا ياريت تعرفيني لاني يئست م انك تكوني لسه فاكراني اصلا..

مستني ردك ولو بكلمه واحده بس تديني أمل..

ولو مردتيش هعرف انك خلاص طلعتيني م حياتك فعلا وكملتي حياتك.. ووقتها اوعدك اني عمري م هتعرضلك ابدا تاني.. ودايما هفضل مكمل في اني اتمنالك كل الخير والسعاده"..

شوفت الرساله وفضلت اعيد وازيد في قرائتها ولا الف مره..

بقرأها وانا بعيط وقلبي بيبكي مع عنيا..

 أحمد كان خايف اني اكون نسيته.. بس ميعرفش ان عمري اصلا مافكرت غير فيه وولا قلبي ولا عيني شافوا غيره..

كنت برفض ناس كتير جدا علشان مش مرتاحه..

طول ال٧ سنين حياتي كلها واقفه تماما

 ولا بنجح في الجامعة ولا بتخطب زي اصحابي ولا بنات عيلتي اللي كلهم اصغر مني واتجوزوا..

 انا كان أملي في ربنا كبير أوي انه مخبيلي فرحة كبيرة تنسيني كل اللي مريت بيه..

بس للاسف في الوقت اللي أحمد بعتلي فيه الرسالة كان جالي شخص مناسب طبعا م وجهة نظر اهلي كالعاده..

بس انا مكنتش عارفه اعمل ايه ؟!

 اخواتي الأصغر مني اتجوزوا وأمي بتعيط كل م تشوفني علشان مش عارفه أنا فيا ايه !

كمان اهو الشخص اللي قلبي متعلق بيه ارتبط للمره التانية .. ف خلاص انا فعلا كنت بتمناله انه يستقر ويرتاح خاصةً وان والدي مصمم ع رفضه..

 ف خلاص مفيش أمل ورجعت افكر نفسي م تاني ان موضوع ارتباطنا اصلا مستحيل..

 بس كنت نسيت ان مع ربنا مفيش حاجه اسمها مستحيل !!

انا كنت رديت ع الرسالة بتاعته قولتله ع العريس اللي متقدم وانه خلاص هيجي يوم الجمعة نقرا الفاتحة.. وان اهلي قرروا دا ومش مستنيين مني رد اصلا لا بموافقه ولا غيره..

بعتله اني بتمناله كل خير واني بعتذرله ع اي وجع سببتهوله وع كرامته اللي اتهانت كتير م والدي..

وقولتله ان موضوع ارتباطنا مستحيل ومحكوم عليه بالفشل م سنين ف عيش حياتك وانساني..

بس اللي حصل بقى ان قبل يوم الجمعه لقيت والدتي بتبلغني ان اهل أحمد جايين يتقدمولي 😳

 وقتها ابويا قالي: تاااااني هنعيده تاااااني؟!!

 لا بردو مش موافق..ولو عاوزه تتجوزيه خلاص استني بقى لما اموت وساعتها ابقي اتجوزيه!!

 بس انا فعلا مكنتش اعرف ان اهله جايين بيتنا وانه اصلا امتى لحق يسيب خطيبته؟!!!

 اها كان قال انهم مش متوافقين بس معرفش ازاي حصل ونهوا بالسرعه دي ازاي اصلا !

ساعتها امي بقى قالت لابويا: سيبها هي بقت كبيرة مش صغيرة كل اللي حوالينا وحتى اخواتها الصغيرين اتجوزوا 

 وقالتله تتحمل هي بقى نتيجة اختيارها..

واللي حصل بقى ان سبحان الله كبر سني اتقلب منحه بعد م كان محنه ووجع قلب ليا ولأمي وشماته م كل اللي حوالينا..

 والدي فضل يحاول يقنع فيا اني ارفض بس انا كنت بقابل كل دا بإصرار وتصميم ع موافقتي ع الشخص دا تحديداً..

 لحد م ربنا هداهولي الحمد لله ووافق..

 وفي كل دا طبعا كنت بعمل استخاره ويمكن هي اصلا كانت سبب ثباتي وتمسكي..

ركزوا معايا بقى علشان داخلين في مرحلة تانية خالص وشائكه طبعا واكثر اثاره 😂

انا كنت نسيت اقولكوا ان كل دا كان بيحصل وأحمد مسافر اصلاً ومش موجود في مصر..

 انا في الشكل مش جميلة..عادية يعني

 بس وقتها م التفكير والزعل والنفسية السيئة كنت خسيت جدا وطبيعي شكلي كان متغير..

المهم اهله كانوا عندنا في البيت وبعد شويه باباه استأذن وطلع بره كلمه قاله: بقى دي اللي انت عامل كل دا عليها دي وحشه اووووي..

 وكان مصورني وانا قاعده ومش واخده بالي وبعتله الصوره وقال في حقي كلام صعب جدا والكلام دا عرفته بعد الخطوبة اصلا ..

بس المهم ان الخطوبة تمت الحمد لله.. رغم ان اهله بيكرهوني جدا وانا مش عارفه ليه بس كانوا بيرددوا ان ابنهم زي القمر وانا وحشه 😃

بس صراحةً لما هو لقى المشاكل بتكبر نزل من السفر بعد شهرين م الخطوبة وكتبنا الكتاب ❤️❤️

اللي هو اعملوا اللي تعملوه انا م صدقت اصلا دبلتها بقت ف ايدي ف نزل ع طول علشان يخلي اسمي كمان يبقى ع اسمه ويبقى في بينا ميثاق غليظ.. وانه بكدا يخلي الكل يشيل م دماغه فكرة انهم ممكن يقدروا يفرقوا بينا م تاني مهما حصل..

أحمد اصلا كان سافر علشان يجمع فلوس يقدر بيها يرجع يتقدملي م تاني م غير م اهله يكونوا كاسرين عينه بمساعدتهم ليه في مصاريف جوازه..

بس بعد كتب كتابنا بفترة بسيطة حصل ظروف في شغله واضطر انه ينزل مصر نهائي..

 وقتها كان يُعتَبَر كل الفلوس اللي جمعها م سفره خلصت لانه بنى بيت دور واحد وجوز اخواته البنات.. والباقي مش هيقدر بيه يكمل بُنا البيت للأسف..

 ووقتها كان فاضل ع معاد جوازنا اللي حدده مع بابا وقت بسيط ومفيش اي فلوس ومفيش شقة كمان !!

قالي نعمل مشروع ونقف ع رجلينا..

ف لحظتها قلعت دهبي كله وقولتله يبيعه..

 وبدأنا مشروع كنا بنقف فيه سوا بس قدر الله وماشاء فعل والمشروع خسر..ورجعنا لنفس النقطة م تاني هنتجوز ازاي؟!

 ف قولنا هنتجوز في شقة باباه ومامته وهما هيقعدوا في الشقه اللي فوق وهنجيب عفش مستعمل ع ادنا لحد م ربنا ييسر والحال يظبط

وعملنا كده واتجوزنا الحمد لله ❤️❤️

طبعا وسط خناق م اهلي وتلميز والدي عليا بالكلام اني اتبطرت ع اللي احسن منه ف اديني اهو هتجوز في شقه قديمه وع عفش مستعمل !

وطبعا طبعا أهل أحمد هما كمان عملوا فيها م بنها ومحاولوش انه يساعدوه بمليم واحد رغم ان هو اللي كان اتكفل بكل تجهيزات اخواته البنات..

ف نقطة اننا كنا كتبنا الكتاب كانت في صفنا الحمد لله..

ف اتجوزنا وبدأنا مع بعض نأسس لحياتنا..

بس مكناش عارفين ان الابتلاءات لسه مخلصتش..

انا لبست النقاب بعد الفرح بإسبوع تقريب..

وطبعا اهله قعدوا يقولوله: ملبسها النقاب ع ايه ؟!😏

م الناس كلها عارفه انك متجوز واحده وحشه وكمان النقاب دا للحلوين مش ل دي 😏

كانوا هيتجننوا انه ازاي بيغير للدرجادي ع واحده زيي !!

بس تعرفوا سبحان الله مكانش عندي أي ميل أو رغبة في النقاب بس هو صمم..ف قولتله هروح اجيب واحد بس و يا البسه يا مش هلبسه..

روحت المحل اشتريت واحد وقولت لصاحب المكان هلبسه اقيسه عليا.. ومجرد م حطيته ع وشي حسيت بكميه راحه رهيبه معرفش كان ايه سببها اصلا !

ف في لحظه قررت وقولتله :خلاص انا هروح بيه وانا لبساه..

 بس كنت لابسه لبس ماينفعش للنقاب فخلعت النقاب ومش عارفه ازاي حسيت اني مكسوفه ان الراجل شاف وشي تاني..

بس رجعت البيت وغيرت لبسي ونزلت الشارع وانا لبساه والحمد لله مكمله عليه للنهارده واللهم ثبات يارب..

المهم اني حاولت بعد الجواز اكتر مع اهله وبكل الطرق اني اقرب منهم بس هما مكانوش متقبلين مني أي حاجه خالص وكرههم ليا كان بيزيد لدرجة ان بعد شهرين م زواجي لقيت حمايا جالي وكلمني بعصبيه وقالي : روحي اكشفي شوفي انتِ بتخلفي ولا لا !!!

طريقة الكلام كانت صعبه جدا ولسه اصلا مفاتش غير يادوب شهرين ع جوازنا

ومع ذلك روحت كشفت والحمد لله الدكتور قالي ان مفيش عندي م يمنع الحمل..

بس فضلوا ضاغطين ع اعصابي بطريقة بشعة وجوزي شوية يطبطب وشوية يقولي معلش استحملي علشان خاطري.. انتي عارفه ان انا الولد الوحيد ع بنات ف هما مستنيين م زمان خَلَفي !

متخيلين الضغط اللي مرينا بيه ؟!

احنا مكناش عارفين نستمتع بحياتنا نهائي وضغط ضغط ضغط م كل ناحيه..

أحمد كان بيصعب عليا جدا انه يا حبيبي طلعان عينه في شغله ويرجع م شغله يلاقي والده ووالدته مقابلينه ويفضلوا يحاولوا يقوموه عليا ويكرهوه فيا بأي طريقه..

انا اصلا كنت مستغربه هو ازاي سامع كل الكلام دا ومتحمل كل الضغط دا ورغم كل اللي هو فيه اول م بيدخل م باب شقتنا وبيشوفني بتبقى ابتسامته دايما ع وشه وبيعاملني بكل حب وموده.. ومشوفتش منه حاجه وحشه ابدا ولا عمره زعلني في يوم ولا قالي مجرد كلمه تزعلني..

بالعكس كان دايما يقولي اني المستحيل اللي ربنا حققهوله وان وجودي جنبه تحت سقف بيت واحد معجزه..

كان يفضل يقولي ان مهما حصل ف هو عمره م هيبعد عني ابدا حتى لو انا حاولت ابعد عنه مش هيسمحلي بكدا ابدا..

كان يقولي اني أميرته وتاج راسه وان عمر عينه م هتشوف حد غيري ولا قلبه هيدخله حد بعدي..

قلبي كان بيتقطع وبيتعصر م الحزن عليه وانا مش عارفه اخفف عنه ضغط اهله او اواسيه ازاي ؟

لحد م قررت اني اعمل منظار ودا كان بعد 6 شهور م زواجنا..

تخيلوا بقى رايحه اعمل منظار علشان ارضي اهل جوزي ف الاقي واحدة قابلتني وقالتلي : دا اهل جوزك اتقدمولي بس انا قولتلهم لو طلقها هوافق..

مُتخيلين الموقف يا جماعه !!

 راحوا يخطبوله بعد جوازنا بحَوالي 6 شهور بس ورغم اني معنديش حتى م يمنع الخلفة اصلا !!!

دا اييييه الجبروووت دااا !!!!

بس هما كانوا بيتعاملوا معايا ع اني #عاقر اصلا ومش معترفين بأي نتايج كشف ولا تحاليل !

 افتكر مره كنا رايحين اسكندرية ف حمايا بيقولي :هتيجي معانا؟

 قولتله :هشوف يمكن اطلع حامل ف هيبقى سفري صعب علشان الطريق وكدا..

 قالي لا يبقى هتيجي 🙂

عملت المنظار واستنيت ٣ شهور بس مفيش جديد.. قررت هعمل حقن مجهري م كتر م انا خايفة ان تصرفات وضغط اهله يأثروا عليه ف يتجوز ويسيبني رغم انه كان بيطمني ان عمره م يقدر يبعد عني واني حب حياته وانه مستحيل ومهما حصل انه يلمس واحده تانيه غيري حتى لو انا وافقت بكدا..

بس كنت بردو مرعوبة من ضغط اهله..

وعملت فعلا حقن مجهري وفشل قدر الله وماشاء فعل..

بس انا ميأستش وقولت هعمل تاني رغم ان الكل كان بيقولي اصبري.. بس كنت خايفه وكمان حمايا ناداني في يوم وحلِّفني ع المصحف اني مش عامله لابنه #عمل علشان يفضل متمسك بيا للدرجة دي!

 وقالي : انا معنديش غيره انا عاوز اشوف عيل من ابني بأي طريقة !!

حمايا مرة اصلا عايرني ان الاتنين اللي زوجي خطبهم قبلي بشرتهم بيضا كده وجسمهم حلو وزي القمر وقالي م اعرفش انتِ عملتيله ايه منك لله !

حماتي نفسها كانت عاملة عملية وكنت معاها في المستشفى تحت رجليها ف اخوها بيقولها: انتِ كبرتي هتطلعي ع المعاش امتى؟

 قالتله: اما اجوز أحمد الأول 

اللي هو جوزي وانا قاعده معاهم عاااادي جدااا !!

قررت اني اعمل حقن تاني بعد سنتين ونص م الجواز..

سنتين ونص اتحملت فيهم اللي محدش يتحمله بس كان وجود زوجي جانبي وقربه مني بيهون عليا..

عملت الحقن وحصل حمل الحمد لله بس نزل بعد ٤٠ يوم قدر الله وماشاء فعل 😔

بعدها ع طول قالولي: لااااا احنا هنجوزه خلاص

وخيروني بين طلاقي أو استمر ع الوضع دا وانا قررت هفضل مش همشي واهلي زعلانين عليا ومني بيقولولي سيبيهم وتعالي..

 بس درجة حبي ليه وتعلقي بيه خياليه ف مقدرتش اسيبه

 خاصةً وانا شايفه ولامسه مدى تعلقه بيا وحبه ليا هو كمان وان احنا الاتنين ضحايا لضغط اهله وكلام الناس..

ورضيت بالامر الواقع...

بس وقتها أحمد مكانش مستسلم وكان بيحاول بأي طريقه اننا نسيبهم ونبعد تماما..

 بس هما ولا هنا اصلا واتعاملوا وكأنه مش موجود وراحوا شافوله عروسة .. 

وتخيلوا بقي ان البنت هي اللي وافقت بس اهلها رفضوا علشان هتبقى زوجة تانية !!

في الوقت دا انا كنت تعبت نفسياً جداً وكنت بعت رسالخ لهدير صاحبة القناه دي

 اتكلم معاها علشان عاوزه اعرف اللي بعمله دا صح ولا غلط وكنت متوقعه ان ردها سواء هي او غيرها هيكون قولا واحدا وهو اتطلقي !

 بس هدير مشافتش الرسالة وانا مبعتهاش لحد غيرها وفضلت اصبر نفسي بإن اللي ربنا كاتبه هو اللي هيكون وفضلت ع حالي..

تخيلوا ان أحمد بيعافر اننا نمشي ونسيبهم خالص وانا احساسي بالذنب ناحيته كان قاتلني خاصةً ان وقت الخطوبة كان دايما يقولي: انا عيشت لوحدي.. كان نفسي يكون ليا أخ ألعب معاه ونكون سند لبعض.. ف كان دايما يقولي هنجيب عيال كتير بقى ان شاء الله يسندوني ويعوضوني..

 كنت كل م افتكر كلامه دا احس بالذنب اكتر رغم انه مش بإيدي..💔

كنت بصلي وادعي ربنا ان زي م حصل المستحيل وجمعنا بيت واحد.. لو لينا خير في بعض المستحيل التاني يتحقق وميحرمناش م بعض ويرزقنا الذرية الصالحة ويسعد قلوبنا..

لحد م فجأة تعبت جدا وروحت كشفت ف لقيت الدكتور بيقولي مبروك انتِ حامل !!

تخيلوا بعد م كنت قربت اهو ع 3 سنين زواج ورغم كل الابتلاءات اللي مرينا بيها

بس كان ربنا مقدر كل دا وفي التوقيت دا بالذات..

منها كل واحد فينا يتأكد م صدق مشاعر التاني..كمان علشان ظروفنا المادية بفضل الله كانت اتحسنت جداً...

وسبحان الله حصل مستحيل المستحيلات وأهل زوجي اتغيروا معايا جداً في المعاملة وسبحان الله مكانش الحمل سبب تغييرهم

 لا اتغيروا لما بنتهم اتطلقت !!

 تقريبا بدأوا يحسوا ان اللي بيعملوه في بنات الناس اتردلهم في بنتهم..

بس ع فكره انا بحب اخواته البنات جدا وهما كمان الحمد لله بيحبوني وكانوا بيدافعوا عني ودايما واقفين في صفي..

في وسط كل دا اكيد ولأني بشر كان في لحظات بتمر عليا بزعل فيها وبقول: ليه يارب بيحصل معايا كدا ؟ 💔

بس الحمد لله بالصبر والدعاء صمدنا لحد م الحمد لله #استجاب..

بتمنى من كل اللي بيسمع كلامي دلوقتي يدعيلي ربنا يكمل حملي ع خير ويحفظلي زوجي ويهديلنا أهله اكتر واكتر ويبعد عنا أي شر أو وجع قلب تاني...

واتمنى لو قصتي تكون فرقت مع اي حد او كانت رساله او اشاره او طبطبه ع قلب حد..

واتمنى اكون جددت الأمل م تاني لقلوبكوا واكدتلكوا ان الحمد لله مفيش مع ربنا حاجه اسمها مستحيل ابدا..

المهم بس متغضبوش ربنا

ولو قلبكوا متعلق بحد اتركوه لله وبإذن الله رب

نا قادر يجمع بينكوا في حلاله..

انا واحده احسبني صدقت في حبي ودعائي وصبرت ف ربنا كافئني الحمد لله في النهاية وجزاني خير ع صبري وحققلي كل مستحيلاتي وكل اللي كنت بتمناه..

ف ربنا يجبركوا ويراضي قلوبكوا يارب..

ودُمتم بخير ❤

#حكاوي_هدير

#هدير_ابراهيم