مدام إيفي

 #مدام_ايفي !!

تدبير ربنا ولطفه عجيب وخاصة في قصة النهارده.. مر عليا قصص كتير لكن القصه دي فعلا تفاصيلها عجيبه..

ف يا ملاذ التائهين ويا أمان الخائفين يا لطيف يا الله 💙

هشتاج باقي القصص 👇

#قصص_واقعيه_لهدير_ابراهيم 💌

🎀🎀🎀🎀🎀🎀🎀🎀🎀🎀🎀

كنت فاكره ان ابتلائي اصعب ابتلاء ف الدنيا لحد م قدراً دخلت صفحتك وقرأت القصص اللي عندك.. سلمت وقتها ان حقيقي ربنا بيبعت لكل انسان ابتلاء هو بس اللي يقدر يتحمله...

بس في قِصة قرأتها عندك دي بالذات شجعتني ابعتلك انا كمان لان فيها اجزاء معينه حصلت معايا انا كمان...

أنا بنت وحيده ع أربع ولاد.. انا الصغيره وفرق السن بيني وبين اصغرهم 10 سنين.. اللي اعرفه ان البنت اللي ف ظروفي دي بتكون دلوعة البيت والعيله لكن معايا مشوفتش اي دلع ولا حنان خالص..

والدتي تعبت واتوفت وانا في أولى اعدادي وكانت معاملتها ليا مش أحسن حاجه الله يرحمها..

أهلي بيفرقوا ف المعاملة بين البنت والولد.. والدي وممكن شويه كنت افهم سبب كرهه ليا ك بنت بس مقدرتش اتقبله ولا افهمه هو سبب كره والدتي لكوني بنت ! كانوا دايما يفضلوا اخواتي الصبيان وعملوا حاجز كبير بينا ف طبيعي مفيش ولا واحد فيهم كان بيتعامل معايا كويس..

اخواتي كلهم متفوقين دراسياً ومنهم الطبيب والمهندس.. والدي كان طبيب ووالدتي كانت مديرة مدرسة..

م بره تقولي عنا عيلة غنيه وكلاس والمستوى الاجتماعي عالي جدا+ عيله مثقفة جدا أهلي فعلا كانوا بيحبوا القراءه بس الحقيقة ان انا مشوفتش اي نوع م انواع الثقافة ف بيتنا.. ابسط مثال مين يبقى انسان مثقف ويفرق بين البنت والولد ويرجع بتفكيره لأيام الجاهليه !! ف متفرقش بقى هما قرأوا كام كتاب المهم تصرفاتهم عامله ازاي..

كنت بكره حياتي جدا ف الوقت دا بس مكنتش اعرف اني لسه مشوفتش م قسوتهم الا القليل...

اتوفى والدي وانا ف نص امتحانات الثانوية العامة.. كنت حاسه اني زي التايهه واعصابي كلها متوتره ومشدوده ومش فاهمه ولا مدركه ايه اللي بيحصل ومش متخيله ابدا انا ازاي قدرت اخلص امتحاناتي ع خير وكل م اتذكر اردد انه اكيد دا بلطف الله...

خلصت امتحانات وانا لسه بردو ف صدمة وفاة والدي لقيت صدمه تانيه مستنياني وهي ان اخواتي قرروا بينهم وبين بعض اني ماليش أي حق في الميراث.. لا اخدت م ميراث والدتي حاجه ولا كدا هاخد م ميراث والدي ولأن كلهم متزوجين قرروا يبيعوا العماره اللي كنا ساكنين فيها كلنا وكل واحد يستقر في مكان لوحده مع زوجته واطفاله..

وأنا !! أنا اختهم البنت الوحيده الصغيره اللي ملهاش ف الدنيا غيرهم قرروا يودوني عند خالتي الوحيده وقالولها بالنص لو عاوزاها تكمل جامعه اصرفي انتِ عليها احنا مش معترفين بتعليم البنات اصلا !

دا البيت المثقف اللي اتربيت فيه 🙂

م استغربتش ع فكره لما انكروا حقي ف الميراث حد هيقول ازااااي دا شرع ربنا

بس انا مشوفتش حاجه ف بيتنا لا م أمي ولا أبويا ليها علاقه بربنا اصلا.. مفيش حد اتكلم معايا منهم قبل كدا ع صلاة ولا صيام... مشوفتش حد ف بيتي قبل كدا واقف بيصلي ولا كان لينا طقوس ف رمضان ونفطر سوا زي اي اسره طبيعية مسلمة.. مجربتش تجربة الصيام قبل كدا اصلا رغم اننا كنا نتعزم او نعزم ناس ع فطار رمضان بس كنت ببقى عارفه ان كلنا فاطرين عادي..

مكنتش بشوف والدي كتير اصلا ي ف المستشفى ي العياده ي مسافر.. والدتي رغم انها ف الاساس كانت مدرسة لغة عربية لكن انا واخواتي تعليمنا كان لغات وكانت بتعاقبنا خاصة انا لو اتكلمت عربي ف البيت..

تحسي ان احنا بيت حقيقي ملهوش اي علاقه بالإسلام اصلاً حتى الفاتحة مكنتش حفظاها..

بصي حاجات كتير لو حكيتها مش هتتخيليها بس علشان م اطولش عليكِ دا اختصار البيت اللي عشت فيه...

روحت اعيش عند خالتي وانا لسه بردو مش فاهمه ايه اللي بيحصل دا وازاي اخواتي وصل بيهم الجحود لانهم يخرجوني م شقتنا ويودوني اعيش عند راجل غريب حتى لو هو جوز خالتي !

تخيلت للحظة بعد وفاة والدي انهم هيبدأوا يغيروا طريقتهم ف التعامل معايا بما ان مبقاش ليا غيرهم وهما سندي بس هما اول حد كسرلي ضهري...

ظهرت نتيجة الثانوية العامة وقررت ادخل كلية الصيدلة وزوج خالتي كان بيشجعني وكان دايما يقولي انتِ بقيتي بنتي خلاص لان ولاده كلهم متجوزين ومسافرين..

صدقت وقولت يااه اخيرا لقيت بيت فيه حنان واهتمام وتفاهم..غبيه.. مكنتش بردو لسه اعرف اللي فيها..

بعد م قدمت خلاص ف الكلية والدنيا كانت ماشية كويسة جدا بدأت الاحظ تصرفات غريبه م جوز خالتي وهزاره الخفيف بقى اغرب وبدأت ملامسته ليا تبقى بطريقة غريبه.. كنت بكذب نفسي لحد م حصل منه موقف كانت خالتي نزلت تشتري حاجات وفضلنا انا وهو لوحدنا.. حاول يعتدي عليا فضلت اصوت وفقدت اعصابي جريت ع الباب وانا عماله بصوت الجيران اللي ف العماره اتلموا وخالتي كانت جات فضل يقول عليا اني مجنونه وحراميه وانه دخل لقاني 

بحاول اسرق فلوس م اوضتهم وحلف م انا داخله بيته تاني ولو خالتي اتكلمت تبقى طالق.. وهي م غير حتى م تبص ف وشي دخلت شقتها وخذلتني 💔

واترميت للمره التانيه بره بيت ناس المفروض هما أهلي !

رمالي جوز خالتي كل حاجتي ع السلم.. قعدت وانا مش عارفه اتصرف انا م امتلكش جنيه واحد حتى.. وماليش غير خالتي دي م عيلة والدتي وعيلة والدي ولا اعرف عنهم حاجه..

الجيران اللي كانوا موجودين اتجمعوا واخدوني نزلنا كلنا شقة الجار اللي ف الدور التاني.. كنت صعبانه عليهم جدا خاصة ان الفتره اللي قعدتها عند خالتي اتعاملت مع كتير منهم وكانوا عارفين اللي حصل ن اخواتي ف كنت صعبانه عليهم.. كمان هما اتجمعوا ع صوت صريخي وشافوا فزعي ولبسي اللي كان متبهدل وكان واضح لهم جدا كذب زوج خالتي..

فضلوا يتناقشوا شويه لحد م 3 منهم خرجوا شويه وبعدين رجعوا تاني وقالوا تمام الحمد لله وافقت يلا طلعوا الحاجه معاها..

مكنتش فاهمه هما بيتكلموا ف ايه لحد م الجاره اللي شقتها قصاد شقة خالتي قالتلي يلا يا ريم تعالي معانا هتطلعي شقة مدام إيفي..مدام إيفي دي هي مدام إيفيلين.. ولا مره شوفتها بس سمعت اسمها كذا مره م بنت بواب العمارة وكل معلوماتي عنها انها ست مسيحية عندها حوالي 60 سنه عايشه لوحدها جوزها اتوفى ومعندهاش اطفال..

اعتقد علشان كدا سكان العماره اتوصلوا لحل اني اعيش معاها لحد م اشوف هعمل ايه ف اللي جاي...

استغربت ان مدام ايفي وافقت ببساطه اني اعيش معاها.. بس استغرابي الاكبر انها اول م شافتني قالتلي ايه دا مش محجبه ف سنك دا ليه مش انتِ داخله اولى جامعة بردو !

معرفتش ارد عليها اقول ايه.. ولا مره اتسألت السؤال دا م حد مسلم ف يوم م اتسئله يكون م مسيحية !!

تاني تعليق منها كان ع طريقة كلامي واني اتكلم عدل وابطل كلام بالانجليزي وع طريقتها اعدلي لسانك دا بدل العوجه دي.. ف حسيت ان ايامي الجايه مش هتكون ألطف حاجه واني داخله ع معاناه جديده..

مجرد م دخلت شقتها اصلا كنت حاسه برهبه ناحيتها.. انا اه لا انا ولا اهلي نعرف عن الاسلام حاجه بس كنت اسمع دايما والدي واخواتي يتكلموا ع كرههم للمسيحين ودايما اخويا كان يتريق ع طبيب مسيحي معاه ويقول انه ريحته وحشه وان كلهم ليهم ريحه معينه..

دخلت شقتها ملقيتش فيها لا صليب متعلق ولا اي حاجه.. شقه زي اي شقة حد مسلم دخلتها عادية جدا..

بس اللي مكانش عادي اني اسمع صوت قرآن ف بيت مسيحي ! 

اول م سمعته قولت يمكن بتطمني م اول ليله ليا عندها وبتعمل بمبدأ الوحده الوطنيه ويحيا الهلال مع الصليب وكدا.. بس لا الموضوع بقى يتكرر ف اللي هو مش فاهمه في ايه لحد اليوم الرابع جاتلي الشجاعه وسألتها ليه بتشغل قرآن كل ليلة وقت النوم !! سألتني بكل براءه وتلقائيه لو الصوت عالي وبيضايق نومك عرفيني اوطيه !

توطيه هو انتِ اصلا مشغلاه ليكِ !!

اكتشفت حاجات كتير غريبه ف تصرفاتها بس اغربهم هو اكتشافي ان مدام ايفي مش بتنام غير والقرآن شغال !!

قالتلي ان جات عليها فتره كانت بتحلم بكوابيس وبتخاف تنام لوحدها ف كانت بتاخد بنت بواب العماره تنام عندها وفي يوم سمعتها بتقرأ حاجه ف سألتها بتقرأي ايه؟ قالتلها دا انا عندي بكره مراجعة سورة مريم عند الشيخ.. قالتلها طيب كملي اللي بتعمليه وقعدت تسمعلها وم وقتها الكلام فضل معلق معاها ف جابت السورة وشغلتها لقت نفسها كل م تسمعها تهدى وتطمن لحد م تنام ف بقت تشغلها ع طول قبل م تنام وحتى لو صاحيه بردو واتعلقت بالسورة.. وانها مؤمنه بالرسايل والاشارات ف شافت انه مش طبيعي ان اول سورة تسمعها تكون سورة مريم بالذات..

ف انا سألتها بكل تلقائيه: يعني اللي بتشغليه كل يوم دا نفس السورة !

تقريبا وقتها كل واحده فينا شكت مين فينا المسلمة ومين المسيحية !

أول ليلة ف بيت مدام إيفي كنت مقرره الانتحار وكنت شايفه الدنيا سودا جدا واضيق م خرم الإبره ومفيش حل خالص ولا مخرج.. بس مكنتش اعرف ان حياتي تتقلب 180 درجة ويكون سبب تغييري دا ست ع غير ديني !

مدام إيفي كانت سألتني انا مقرره اعمل ايه ف الجامعة قولتلها مش هحضر اول سنه ولسه مش مقرره حاجه لحياتي ومعرفش اي حاجه..

وكتر خيرها مدام ايفي بنام وباكل واشرب عندها ببلاش ف اكيد مش هروح اقولها ادفعيلي كمان مصاريف دراستي.. كنت فقيره جدا رغم ان ليا حق وميراث يتقدر بملايين !

وكان في جاره ليها ابن بيشتغل محامي ف مكتب محاماه كبير ومشهور.. وقالولي هرفع قضيه لما اتم سن الرشد المهم م امضيش ع اي ورق لاخواتي ولا احتك بيهم نهائي علشان يحسوا اني سلمت امري وتعايشت مع وضعي..

كنت متخيلة ان حياتي مع مدام إيفي هتكون ممله بس ف الحقيقة كان العكس تماما..

بدأت تشجعني ع القراءه وقالتلي اول حاجه لازم تثقفي نفسك فيها هي معرفة دينك كويس..

هي كانت شايفه اني شخص فضولي ف كانت بتتعامل معايا بذكاء وهو انها تسألني عن موقف مثلا او حاجه ف الاسلام تتكلم عنها بطريقة تثير فضولي ف اروح اقرأ عنها واجمع معلومات كتير عنها..

شويه شويه بدأت افهم واتعلم حاجات كتير ف الدين وهي كانت بتتناقش معايا دايما..

وفي مره كنا واقفين مع بعض ف المطبخ وهي مشغلة سورة مريم كالعاده ف بكل تلقائيه هي رددت قبل الشيخ آيه ف انا كملت بكل تلقائيه بردو باقي الآيه وبصينا لبعض وضحكنا..

لقيتها عدلت وقفتها وقالتلي ايه رأيك لو تبدأي تحفظي القرآن !

للحظة افتكرتها بتهزر بس لا طلعت بتتكلم جد وكانت متحمسه جدا للفكره..

قالتلي ان م اكتر الحاجات اللي كانت بتستغربها فينا ك مسلمين ان عندنا كتاب واحد بس وهو ذات نفسه الكتاب متغيرش خالص ع مر السنين والاعجب ان ناس تكون حفظاه بالكامل ومش مختص بحفظه ناس معينه مثلا لا دا لكل الناس..

وهي كانت شايفه ان علشان اعرف ديني صح لازم اعرف الكتاب اللي فيه كل م يخص ديني الأول..

بدأنا نحط مع بعض خطه ازاي هبدأ احفظ القرآن.. قولتلها ان ساره بنت عمو مسعد البواب بتحفظ عند الشيخ ف المسجد لكن انا هروح مسجد ازاي ! ف خطرت ع بالنا نفس الفكره وهي ان ساره هي اللي هتحفظني "ساره في 3 اعدادي" بس ماشاء الله عليها كانت اد المسؤلية..

كنا حاسين بحماس غير طبيعي لمجرد التفكير اننا بنعمل حاجه مجنونه بالنسبالنا ومش منطقيه وزاد الحماس اكتر لما قولنا ل ساره ووافقت بس شرطنا عليها يفضل سر بينا واني هقول لمامتها انها هتطلع فوق اذاكرلها بما انها شهاده..

ف كات في تبادل منفعه انا بذاكرلها وهي بتحفظني القرآن..

هي مكانتش دارسة تجويد بس كانت حافظة بالتجويد ف كنت فرحانه اوي لما اكتشفت ان مش الكل بيحفظ بالتجويد لكن انا ربنا كان ميسر الدنيا معايا جدا..

شجعتني مدام ايفي ع اني اعتبر السنه اللي قعدت منها م الكليه انها سنة دراسة بردو بس دراستي للدين..

حضرنا ورق واقلام وبدأنا مع كل سورة نكتب ع الورق اللي فهمناه وطلعنا بيه م السوره دي..

ومجرد م كنا نقرأ اسم نبي كنا ندور ع كل المعلومات عنه ومدام ايفي تخليني اكتبها مره بالعربي علشان تقوي اللغه عندي ومره بالانجليزي وقالتلي يمكن ف المستقبل تحتاجيه..

م قبل م ابدأ حفظ القرآن كنت بدأت اقرأ ف الدين بس مفيش حاجه هزت قلبي بجد ولا غيرتني إلا القرآن...

كان هو الخطوه اللي بدأ بعدها كل شئ لطيف في حياتي وبدأ معاها أمان واطمئنان ولا مره كنت اتخيل اني اوصله..

مدام إيفي كان ليها دور كبير جدا وكنت بعتبرها ملاك م عند ربنا بعتهولي يعلمني.. مكانتش طبيعيه ابدا

بمجرد م حفظت سورة الفاتحة وعرفنا تفسيرها وانها اساسية ف الصلاة بدأت مدام إيفي تشجعني اتعلم الوضوء والصلاه.. وكانت تفضل مستنياني اول م اخلص صلاه احكيلها عن احساسي وقت الصلاه.. بس انا كنت بستغرب سؤالها لاني فعلا مكنتش لسه حسيت بحاجه..

تعرفي ان اول حاجه لمست جسمي بفلوس مدام إيفي كان اسدال الصلاه !

كان عندها اهتمام تعرف ايه اللي اتفرض ع المسلمين بالترتيب.. وم غير م احس كانت بتخليني اعمله..

هي قالتلي انها كانت متخيله ان لبسي للحجاب هيكوت اصعب خطوه بس سبحان الله اللي وصلني انا وهي لكل اللي فات دا اكيد كان لين قلبي للحظة م لبست الحجاب..

كنا شبه معتكفين ف البيت احنا الاتنين.. كل يومنا عن القرآن وتفسيره ومجرد م نصحى م النوم يبقى عندنا شغف نعرف ايه اللي هنعرفه جديد النهارده وكأننا بنعيش كل يوم مغامره جديده..

مدام إيفي كانت بتتأثر جدا بنهاية الآيات اللي كان بيتذكر فيها اسماء الله الحسنى..

ف قررت نعمل بحث جديد عن كل اسم لوحده.. ف اخدنا اسم اسم وكل صفه لله وبدأنا ندور ونكتب معلومات عنها..

قرأنا وكتبنا معلومات عن كل رسول ونبي.. وكنا متعودين بعد م نخلص كل واحده تتكلم عن ايه اكتر حاجه اثرت فيها ف قصة النبي دا..

ومستحيل مستحيييل انسى لحظة م كنا بنقرأ عن أهل الطائف واللي عملوه مع الرسول صلى الله عليه وسلم لما حدفوه بالطوب وبكاء مدام ايفي بحرقه كنت اول مره اشوفها تبكي بالشكل دا..

يعني اوقات لما كانت تتأثر بحاجه كانت عنيها تدمع او تبكي بكاء خفيف مثلا لكن بالشكل دا كانت اول مره..

اوقات كتير كنت بشك ان مدام إيفي مسلمة بس لا هي مكانتش بتصلي صلاتنا.. كانت بس تدعي وتقول يارب العالمين دلني على طريقك وخدني ليه..

أول مره ف حياتي كنت اشوف معنى ان ربنا يبارك لحد ف شئ معين..

انا ربنا باركلي ف شهور قليلة بمعرفة كتيير ف ديني والأهم والأعجب اني ختمت القرآن.. متخيلة انا ختمته اصلا قبل ساره ذات نفسها !

مفيش رسول ولا نبي الا وقرأت وجمعت معلومات عنه.. حاجات كتيييير اعتقد لو عشت عمري كله مكنتش هقدر اوصل لاي حاجه منها بس كل دا كان بفضل ربنا وم بعده مدام إيفي وسارة ربنا يباركلها ويجعل حفظي وحفظ كل شخص حفظ ع ايدي ف ميزان حسناتها..

كل دا اخدني م الدنيا كلها بقسوتها وكل الغدر اللي موجود فيها.. كنت حاسه اني عايشه مع مدام إيفي ف قِصة اسطوريه واننا مستحيل نكون ع الأرض..

علاقتنا حلوووه جدااا بحبها حب مستحيل حد يتخيله.. لقيت فيها الأم والأب والأخ والأخت والجده والصديقه.. هي العالم كله بالنسبالي وكأني اتولدت يوم م دخلت بيتها...

نسيت اخواتي واهلي وكل اللي شوفته منهم..

بدأت اتعلق بربنا جدا..

مدام إيفي كانت دايما تقولي ف البدايه هتحسي انك بدأتي توصلي فعلا لما تحسي جمله سمعتها م حد مسلم قبل كدا وهي انك لما تبقي عاوزه تتكلمي مع ربنا رجلك تاخدك للصلاه ولما تبقي عاوزاه يكلمك ايدك تفتح المصحف..

مركزتش مع الجمله دي اوي وكنت نسيتها لحد م في يوم مدام إيفي قالتلي مبروك وصلتي لأول الطريق اهو..

بس اللي هي متعرفهوش اني كنت بروح جري اصلي علشان ادعي ربنا انه يباركلي ف عمرها وانه ميحرمنيش منها ابدا.. كنت بخاف لمجرد التخيل انها ممكن ف وقت متكونش موجوده !

ودا كان زاد لما هي تعبت في يوم كنت ف الترم التاني تانيه صيدلة رجعت م الجامعة لقيتها واقعه ع الارض حسيت روحي بتروح مني وفضلت اصرخ وكلمت عمو مسعد البواب يجيب دكتور بسرعه..

اول م وصل الدكتور صرخت ف وشه وقولت لعمو مسعد دا صغير انا عاوزه واحد كبير ف رد عليا الدكتور ب استهزاء ليه هو انتِ بتقيسي جزمه !

بصيت لعمو مسعد بغيظ ف قالي والله دا اللي لقيته قدامي قومت جايبه وجاي..

بصلنا هو كأننا اتنين مجانين وسأله فين المريضه ودخل.. اكتشفنا للأسف ان عندها سكر والدكتور دا قال انه هيتابع معانا قولتله شكرا مش عاوزين ومشوفتش وشه م وقتها..

مش عارفه ليه كنت قليلة الذوق معاه كدا مش هبرر واقول ضغط وتوتر وخوف ع مدام إيفي دا مش مبرر اني اقلل م شخص لمجرد انه صغير ف السن..

مرت سنه ونص ولا ليله مرت فيها م غير م اكون لازقه لمدام إيفي حتى ف السرير ولما كنت بضطر انزل او اروح الجامعة كنت بطلع ساره او مامتها يفضلوا جنبها وكل شويه اكلمهم اطمن عليها..

صاحبت بنات ف الجامعه اكيد بس فضلت مدام إيفي هي صديقتي المخلصة وكاتمة اسراري ومفيش حد عرف خالص قصتي ولا اي حاجه مريت بيها وتفاصيل حياتي غيرها..

هي بالنسبالي الكون باللي فيه..

ولا مره مثلا دعيت اني اتجوز ولا فكرت ف اني احب او ادخل علاقة مع حد او اتمنيت حاجه معينه خالص..

هي كانت مدياني حب واهتمام وحنان يكفي الكون كله ويفيض ف محستش وانا معاها ب احتياجي لحد تاني..

مر ع وجودي ف بيتها اكتر م 4 سنين وكأنهم أربعين سنه واكتر.. تعلقي بيها كان بيزيد اكتر واكتر وكل دعواتي لربنا كانت متعلقه بيها..

وفي ليلة تعبت جدا وبعتنا تاني نجيب دكتور وكان الوقت متأخر ف جالنا نفس الدكتور.. حاولت اكون لطيفه ف التعامل مش زي اول مره بس في ناس كدا تحسي انها هي اللي بتجر شكلك وخلاص.. طمني ع مدام إيفي وهو عند الباب وخارج قالي م انتِ بتعرفي تدخلي لسانك جوه بؤك اهو

روحت رازعه الباب ف وشه وقولتله وقولتله متجيش هنا تاني 🙂

بس هو فضل متابع معانا م بعدها لان مدام إيفي كانت بدأت تتعب اكتر ومحتاجه رعاية طبية..

بدأ يعلمني اتعامل انا ازاي م غير م احتاج للمرضه مقيمه خاصة ان دراستي للصيدله كمان هتساعدني..

عرفت بعدين انه عرف معلومات عنا م عمو مسعد البواب بس مكانتش معلومات كتير بس كانت كافيه انها تثير فضوله وهو ان ازاي مسلمه م وجهة نظره ملتزمه زيي عايشه مع واحده مسيحية.. بس مكانش بيعلق كتير لانه عارف اني بنت يتيمة الأب والأم..

عرفت ان مدام إيفي هي اللي اتواصلت معاه وخلته يجي عندنا ويتعامل معايا اكتر.. كان عندي شك بس كنت بكذبه لحد م هي بنفسها قالتلي انها ايوه بتحاول تجمعنا مع بعض خاصة انها خلت عمو مسعد سأل عنه والمعلومات اللي قالها عنه كلها كويسه جدا + انها حست انه منجذب ناحيتي ويمكن علشان كدا كتير بيفضل يرخم عليا..

حسيت وقتها كأنها بتحاول تظبطلي حياتي م بعدها.. دخلت ف مرحلة خوف رهيبة حاولت هي تخرجني منها بأي طريقة بس انا كان تعلقي بيها بقى مرضي..

لقيتها بتجيبلي آيات م القرآن وأحاديث وتقولي ان دا حال الدنيا وحرام جدا نعترض ع امر ربنا..

قالتلي اللي جمعنا م غير حول ولا قوه منا ف الدنيا قادر يجمعنا للابد وفي مكان افضل ف الجنه..

سألتها ليلتها طيب ازاي مش انتِ حفظتي معايا القرآن قالتلي كل حرف منه محفور ف قلبي.. قولتلها طيب مش انتِ عارفه ان الدين عند ربنا الإسلام وان لازم الموت ع الشهاده ! قالتلي ايوه عارفه..

بس ونمنا ومتكلمناش ف حاجه تاني..

تاني يوم قالتلي انتِ مستغربه اني ازاي عرفت كل دا عن الإسلام وحبي وتعلقي وتأثري بيه ومغيرتش ديني صح ؟! قولتلها بصراحه صح..

قالتلي انها بردو كانت بتسأل نفسها كتير نفس السؤال وان امتى هيجي الوقت اللي تنطق الشهاده وكل م الوقت كان يعدي كانت بتحس ان ربنا مش عاوزها ف الدين دا بس لانها زي م قولت قبل كدا مؤمنه بالرسايل والاشارات شافت ان اكيد ل ربنا حكمه وان ربنا كان بيبعتلها كل شويه حاجه جديده تخليني انا وهي نروح ندور ع اي معلومات عنها.. وان زي م ربنا قدر ليا وقت معين للهدايه كاتبلها هي كمان وقت معين للدخول ف الاسلام وانها حاسه انه خلاص هو الوقت دا وقررت هنروح الازهر وتغير ديانتها ونحاول نغير بطاقتها والورق وكل حاجه لانها كانت خايفه وعاوزه تندفن في مقابر المسلمين..

لكن للأسف وبدون دخول ف تفاصيل كتير الموضوع اتعقد ومعرفتش تغير الدين.. واول مره كنت احس بمعاناة الناس اللي بتغير م ديانه لديانه تانية..

بس هي قالتلي ان الحمد لله ان ربنا اللي بيحكم ف الاخره مش البشر..

رجعنا البيت اتوضت ونطقت الشهاده ودخلنا ف الصلاه هنصلي جماعه سوا سجدنا وكانت أول وآخر سجده ف حياتها...........

مدام إيفي راحت عند ربنا..

كملت انا السجده التانيه مبكيتش دعيت بس يارب اجمعني بيها وخليها تستناني في مكان جميل زيها وخليها تزورني دايما..

مقدرتش اكمل صلاه وقطعت.. كلمت دكتور شريف طلع جري م المستشفى وفضل معايا ع التليفون يقولي احاول بكل الطرق اني اسعفها لعل وعسى.. حاولت بس كان جوايا يقين ان دي النهايه لانها فعلا تستحق خاتمه جميلة زي دي.. كانت دي النهاية ليها ع الارض لكن البدايه ليها ف العالم الأبدي زي م كانت بتقولي...

حاول دكتور شريف معايا بكل الطرق انه يخليني ابكي بس انا معرفتش اسبوع كامل مر وانا مفيش دمعه نزلت مني الكل حاول معايا كانوا خايفين ان يحصلي حاجه..

بس انا كنت شايفه روحها حواليا ف كل مكان وبشم ريحتها الجميله حواليا دايما وبصحى م النوم ع صوتها تقولي يلا بسرعه الفطار جاهز هتتأخري..

حضنها وبوستها اللي قبل النوم احساسهم ولا مره فارقني.. بس بمجرد م جاتلي ف الحلم فضلت أبكي وقتها اعترفت بإنها خلاص راحت.. بس متأكده انها هتفضل ساكنه وعايشه في قلبي...

آسفه مش قادره اسيطر ع مشاعري دلوقتي بس عاوزه اكملك القصه للاخر.. ف سامحيني لو كانت مختصره او متلخبطه..

بعد وفاة مدام إيفي ب اقل م شهر طلب مني شريف اني اروح اعيش مع والدته علشان م افضلش لوحدي وهو هيقعد ف شقة مدام ايفي..

مدام إيفي كانت بتحاول ف موضوع جوازنا م وهي عايشه لسه بس انا كنت رافضه اني اعيش ف مكان هي مش فيه كمان كان بيواجهنا مشاكل كتير منها ان حتى بعد بلوغي سن الرشد مش هعرف اتجوز م غير ولي ف لازم تدخل حد م اهلي اللي معرفش منهم حد غير اخواتي اللي المفروض شويه وهدخل ف قضايا بيني وبينهم..

مكنتش اعرف ان مدام إيفي مرتبه مع شريف بما ان والده بره مصر ان بمجرد م اخلص جامعه اسافر ع طول ويسافر هو كمان معايا ونتجوز هناك واعمل توكيل ل محامي يخلص موضوع ميراثي علشان لو كنت هنا ف مصر كان ممكن يقتلوني عادي او يعملوا فيا أي حاجه وهي وصتني كتير اني اتمسك ب اني اخد ميراثي بالكامل مهما القضايا طولت في المحاكم وقد كان..

قبل سفرنا بيعنا ارض مدام إيفي واتبرعنا بفلوسها زي م طلبت وسيبنا الشقة اللي لقيتها كتبهالي وقالتلي لو حصل ونزلتي مصر انتِ او ولادك تبقى دي شقتكوا اقعدوا فيها...

مدام إيفي كانت كتير تهزر معايا وتفضل تختار لاسم اطفالي سواء ولاد او بنات.. ودا اللي عملته فعلا لما ربنا رزقني ب بولدين وبنت رغم اني كان نفسي اسمي اسمها هي💔

لما روحت سواء عمره او حج عملتلها معايا وكنت بتذكر كل كلامنا وقت م كنا بنكتشف اسرار العمره والحج ف الاسلام..

كل حرف كتبته بايديها لازم تشوفه عيني كل يوم.. نفس الوقت اللي كنا مخصصينه لمراجعة القرآن بعمل كل حاجه فيه بالتفصيل وبقعد اسمع وكأنها قدامي واتخيلها بتردني او بتقولي اد ايه الآيه دي معناها جميل كرريها تاني بصوت اهدى..

كل تفصيله عشتها معاها محفوره ف عقلي وقلبي وابدا م هنسى ان ربنا كتب ل بنت مسلمة الهداية ع ايد ست مسيحية كانت م انقى القلوب اللي ممكن اقابلها ف حياتي...

طول فترة حياتي معاها كانت بتخاف عليا وبتخطط لتفاصيل يومي ومكنتش اعرف انها مخططه كمان لحياتي م بعدها...

حاليا احنا مستقرين مع اطفالنا في كندا وعرفت ان كان ليها بعد نظر اني اتعلم واكتب كل المعلومات اللي عرفتها بالانجليزي بردو لانها الحمد لله ساعدت ناس كتير.. ف اصبحت مش أنا لوحدي اللي ربنا قدر هدايتي ع ايديها.. ورغم وفاتها ورغم انها عاشت بعد الشهاده اقل م ساعه الا ان ربنا قدر انها تكون سبب في هداية ناس كتير وكتير وكتير ولله الحمد..

عارفه يا هدير اللطيف ف كل دا ان م لطف ربنا فعلا انه حقق امنيتي وخلاها تزورني ب استمرار💙

وبطلب منكوا لو في حد اتأثر بحكايتها يكتب ويفرحني ويدعيلها.. ولو قابلكوا ناس بالجمال دا ف حياتكوا حتى لو ف موقف واحد اتكلموا عنهم..

ومتحكموش ع حد م بره..

ومتيأسوش م لطف ورحمة ربنا...

🎀🎀🎀🎀🎀🎀🎀🎀🎀🎀

ربنا قادر ف لمح البصر يغير حالنا م حال لحال الفكره كلها ف التسليم والاستسلام ليه... الفكره دي نفسها كفيلة تطمن قلوبنا تماما وتملاها رضا ويقين بس للأسف مش أي حد يقدر يتغلب ع شيطان نفسه ويوصل لمرحلة الاستسلام دا علشان كدا نهايتنا كلنا مش واحده.. طبيعي يعني🤷‍♀️

+++بطلوا تحكموا ع شخص سواء هو عايش او ميت انه داخل الجنه او النار انتوا شاغلين بالكوا ليه اصلا م كل واحد يركز ف ورقته اللي هيتحاسب عليها لوحده🤦‍♀️

لو كل شخص فينا اخد دقيقة مع نفسه وفكر ف كم الرسايل والاشارات اللي ربنا بيبعتهاله وهو بكل بساطه بيتجاهلها وبكل بساطه بردو بيجي عند كل ابتلاء ويقول ليه رب !

هتفوق امتى وتبطل تقول ليه يارب وتفهم ؟!!

ربنا يحسن ختامنا جميعاً يااااارب.. واشوفكوا ع خير ف قِصة جديده 💙

#حكاوي_هدير

#هدير_ابراهيم....