صدفة وكتاب

 #صدفة_وكتاب !!

هشتاج باقي القصص👇

#قصص_واقعيه_لهدير_ابراهيم 💌

🎀🎀🎀🎀🎀

مبدأياً انا متابع لحضرتك بشدة بسبب زوجتي.. اللي هو تقريبا انا بدخل ع الأكونت بتاعك يومياً اكتر منك انتِ شخصياً ادور لو في قِصة جديدة نزلت علشان نشوفها سوا 

وبما ان زواجنا مر عليه عشر سنين ف حبيت تكون مفاجئتي ليها ان القِصة اللي هتسمعها عندك هي #قِصتنا ❤️

معذرة لو طولت في المقدمة ونبدأ سرد أحداث القِصة..

عارفه انتِ الشباب اللي تلاقيهم مطلعين عين أهاليهم وشايفين نفسهم ع كل بنات الناس ومفيش ولا واحده عجباه

الشباب اللي كل الاهل والقرايب والجيران بيفضلوا يرددوا ان اخرتهم هيقعوا ع وشهم في بنت هتطلع كل القديم والجديد عليهم

اهو انا بقى كنت من النوعية دي من الشباب😃

ممكن بسبب الوسط اللي اتربيت فيه كونت نظرة عن ان معظم البنات تافهين وتفكيرهم كله في تفاهات.. ونكون مثلا قاعدين جروب مختلط تلاقي كل كلام البنات ع مين صاحبت فلان ومين خان فلانه مع صاحبتها وهكذا مفيش في كلامهم اي حاجه تانيه بجانب اللبس والميك-اب وكدا

فوق كل دا كنت شايف نفسي بزيادة اللي هو كل البنات بيحاولوا يتقربوا مني ف دا كان بيكرهني اصلا فيهم اكتر

وفي يوم كنت المفروض هقابل واحد صاحبي عديت عليه في الفندق اللي فيه المؤتمر اللي هو هيحضره..

قولت هدخل اشرب اي حاجه لحد م يخلص وينزلي

مجرد م دخلت لقيت المكان زحمه جدا بس لقيت كام ترابيزه شبه فاضيين عليهم بنات قاعده لوحدها

لمحت بعيني في مكان منفصل نسبياً بنت #منتقبة ف قولت بااااس هروح استأذن دي اقعد معاها وكان سبب اختياري ليها انها مش هتحاول تتعرف عليا ولا تفتح معايا كلام زي اي بنت تانيه(عارف ان الكلام ممكن يدي صورة سيئه عني بس صدقيني اكتشفت بعدين ان تفكيري دا سببلي احلى حاجة حصلت في حياتي وانه كان من عند ربنا)

روحت فعلا ووقفت قدام الترابيزة لقيتها قاعدة بتقرأ كتاب.. استئذنتها لو ينفع اقعد بما ان المكان كله زحمه وكدا ..

النتيجة كانت صمت تااام واللي هو ولا بصتلي اصلا !! كررت كلامي كذا مره لحد م وقفت قدامها وفضلت اشاورلها واعمل حركات بإيدي اللي هو في ايه الدنيا دوشه اه بس مش للدرجة !

وحتى لما انتبهت لوجودي مبصتش ناحيتي اصلا هي كل اللي عملته بصت حواليها وبعدين رجعت تبص للكتاب وقالتلي اه تمام اتفضل...

قعدت وانا عمال أردد في سري اللي هو يخربيت أم البرود اللي في الدنيا بس كعادة القاعدة العظيمة الممنوع مرغوب ولأن كان حازز في نفسي اوي ان في بنت عاملتني بكل التجاهل دا ولاول مره تقريبا في حياتي اتعامل المعامله دي ورغم اني اصلا اخترت اقعد ع نفس ترابيزتها لنفس السبب الا اني بقدرة قادر قعدت اتشقلب حرفيا علشان تنتبه لوجودي متفهميش بقى ايه اللي حصلي بس اللي هو تحدي بقى وخلاص

والنتيجه الحمد لله كانت ولااا الهوا ولا كأنها شيفاني ولا سمعاني.. دي كانت ولا كأنها قاعده في المكان اللي كله دوشه دا اصلا راشقه عنيها في قلب الكتاب وتحسي انها في عالم تاني..

شويه وقولت خلاص ايه اللي انا بعمله دا ومين دي اصلا وهما شويه صغيرين وصاحبي هينزل ونمشي

بس معرفتش بردو

كنت بحاول افتح معاها كلام بأي طريقه ودي مش سمعاني اساسا

ف قولت لا بجد خلاص وبصيت ع اسم الكتاب اللي بتقرأه وقولت في واحده منقبه بتقرأ عن #الفراعنة

اقسملك بالله  قولت الجمله وكان صوتي يعتبر مش مسموع اصلا،كمان انا الكرسي بتاعي بعيد شويه عنها بس لقيت عنين اترفعت م ع الكتاب وبتبرألي اللي هو حرفيا ياما

ولقيتها بتقولي مبدأيا لما توصف حاجه في حد اوصفها صح اسمها #منتقبة مش منقبه..

منقبه دي من معانيها #مخرمه ف هل انت شايفني قدامك مخرمه مثلا!!

قولت ف سري هو ايه الهبل دا وع ايه الحمقه دي كلها وكأنها قرأت أفكاري ف قالتلي وقبل م تقول إن الموضوع تافه ف اسمحلي اوضحلك ان الحرف اللي انت كلته دا كفيل يعصب بنات كتير منتقبة..

الحاجة التانية هو نزل امتى في المقرر ان المنتقبات ممنوع يقرأوا عن اي حضارة عامةً مش فاهمه دا باستثناء انها اصلا حضارة بلدي ؟!

كمان مفيش حاجه اسمها فراعنة اسمهم المصريين القدماء وتاريخ مصر القديمه..

انا حسيت اني في موقف محرج جدا لا أحسد عليه بصراحه بس قولت بما ان ابو الهول اصلا نطق ف استغل دا ولقيت نفسي بقولها معلومات تاريخيه غلط وهي اسم الله عليها بلعت الطعم وقعدت تصلحلي معلوماتي الغلط وانها كارثه ان شخص يكون جاهل أو معلوماته مغلوطه عن تاريخ بلده...

كانت بتتكلم بحماس جدا وكأنها حامي حما الحضارة المصرية ورغم اني مكنتش فاهم اوي معظم اللي بتقوله الا اني كنت مشدود ومنتبه لكل حرف بتردده.. وجات عند نقطة معينه وقالت إنها نفسها تقرأ فيها بتوسع اكتر وكانت بتتكلم بحزن ان تخيل معظم اللي مهتمين وبيكتبوا عن تاريخ مصر القديمة والقدماء المصريين هما أجانب وان في كتاب بتدور عليه ومش لقياه لأن الكاتب مش مصري وانها نفسها تقرأه

في اللحظة دي صاحبي كان خلص وبيرن عليا رديت عليه وكنت بوصفله مكاني بالظبط واتحركت م الترابيزة بدور عليه لقيته بس رجعت لقيتها #اختفت !!!

في اللحظه دي كنت كاره نفسي وصاحبي والناس كلها مش عارف ليه بصراحه وكنت كارهها هي نفسها وأن ازاي يعني تمشي من غير م تقول انها ماشيه وكأننا بقى معرفة سنين مثلا مش ساعه الا عشرة !

لقيت نفسي ماشي زي الاهبل عمال ادور عليها ودي ولا كأنها كانت موجوده اصلا.. اتبخرت لدرجة اني شكيت انها كانت من خيالي

صاحبي كان قاعد بيضرب كف ع كف من تصرفاتي ف سألني اسمها ايه وهي منين اخدت رقمها طيب ولا ايه

اكتشفت اني ولا اعرف اي حاجه عنها اطلاقا

ف قولتله ولا اي حاجه م دي..

قالي ولا اي حاجه نهائي ؟

رديت بسرعه وبحماس انه لا افتكرت في اسم هي قالته..

صاحبي رد: طيب الحمد لله

قولتله: قالتلي ع اسم كتاب بتدور عليه ومش لقياه

رد عليا : منك لله

انا بصراحة قولت شوية وقت وهنسى الموقف كله اصلا وعادي يعني بنت زي غيرها دا انا حتى مش بس معرفش اسمها لا وكمان معرفش شكلها ف هي مسألة وقت مش اكتر

بس دا محصلش ولقيت نفسي كل م بتمر الايام كل م بفكر فيها اكتر

بتخيلها وهي بتتكلم وحركة ايديها مع كلامها.. بتخيلها ومندمجه جدا في الكلام ونبرة صوتها فيها حماس ورغم انها كانت بتبص ع اي حاجه وهي بتتكلم إلا عليا الا انها كانت شداني اكون منتبه لكلامها اكتر..

دورت ع الكتاب اللي هي كانت بتدور عليه لدرجة أن اي حد اعرفه مسافر أو نازل م السفر أقوله يدورلي عليه.. اي حد اعرفه ليه في القراءه حتى لو بسيط كنت بقوله يدورلي ع الكتاب دا

كنت عامل زي المجنون وانا بدور ع الكتاب وكأني لو لقيته هلاقي البنت دي..

انتشر بين الكل اللي حصل معايا وكل القعدات بقى محور الكلام فيها البنت دي والكتاب، وكل اصحابي كانوا بينقلوا الكلام لاي حد يقابلوه يسألوه عن الكتاب ويحكولهم قصة البنت والكتاب وطبعا قصص كتير اتألفت وضحك كتير في النص 

ولا بقى لحظة م حد لقى الكتاب تحسي ان كأننا كنا في حرب وانتصرنا وعملوا احتفال في اليوم دا 😃

ممكن يكون الموضوع بالنسبة لحد تافه بس صدقيني انا نفسي لحد دلوقتي معرفش ازاي كل دا حصل

ازاي اتشديت اوي كدا لوحده عكس كل بنات الفئه اللي انا عايش فيها.. كنت بقول يمكن دا السبب بس لا بردو مش لدرجة كل اللي حصل معايا

انا م وقت م لقيت الكتاب وهو بقى ملازمني طول الوقت.. انا كنت بروح دايما نفس المكان اللي شوفتها فيه وفي نفس التوقيت لعل وعسى تظهر وم وقت م لقيت الكتاب وانا بقيت كل م المح واحده منتقبه اروح رافعه بحيث يكون اسمه ظاهر

الكل بلا استثناء من اللي حواليا كانوا بيرددوا ان #النداهه ندهتني واني بقيت عايش في عالم موازي..

مكنتش عارف اعمل ايه دا انا زي بالظبط اللي بيدور ع ابره في كوم قش..

اصحابي كانوا بيتريقوا عليا اللي هو في مجنون ليلى وأنا بقى مجنون اللي معرفلهاش اسم !

وفي مره حد اتريق وقال الطلعه دي محتاجه #عُمره تقف كدا قدام الكعبه وتقول يارب اقابل -وقف في نص الكلام وقال دا انت اصلا متعرفش اسمها كدا الدعاء باطل- وقعد يضحك والكل قعدوا يضحكوا بس انا كأن لمبة نورت في دماغي

قررت فعلا اني اعمل كدا واخدت خطوات جادة في وسط دهشة أمي قبل كل اللي حواليا بما انها اكتر واحده مكانش عاجبها حالي وكانت دايما تدعيلي ربنا يهديني ويبعد عني صُحبة السوء

هي طبعا كانت عارفه بردو قِصة البنت.. كل اللي حواليا كان بيقولي اني عامل بالظبط زي الطالب اللي مفتحش كتاب طول السنه وجاي ليلة الامتحان يصلي ويدعي وكانوا يضحكوا ويتريقوا

الا أمي الوحيده اللي قالتلي لعل ربنا حط البنت دي في طريقك علشان تغيرك.. والحقيقة ان بسببها مش بس طريقي اتغير لا وحياتي كلها..

سافرت العمرة مع والدتي وأخواتي البنات اللي بالمناسبه كلهم مش محجبات يعني لا والدتي ولا اخواتي

وكانت السفريه دي وش الخير علينا كلنا وبدأ كل واحد مننا يتغير من جواه وتفكيرنا بدأ يتغير اها لسه ملبسوش الحجاب بس بدأت أول خطوة في الطريق وهي الالتزام بالصلاة...

والدتي الوحيده اللي رفضت تخلع الحجاب من أول م حطته ع شعرها هناك وهي الوحيده اصلا فينا اللي كانت ملتزمه بالصلاة..

سنة وشهرين مروا ع يوم م قابلت البنت دي كل حاجه في حياتي حرفيا اتغيرت الا حاجه واحده هي تفكيري وتعلقي بيها

متخيله يعني ايه اكون واقف في صلاة القيام ادعي بحرقه ان بنت انا معرفش اسمها ولا اي حاجه عنها نهائي ان ربنا يجعلها من نصيبي !

مازلت بروح نفس المكان اللي شوفتها فيه ومعايا طبعا الكتاب اللي كنت حفظت كل حرف فيه م كتر م قرأته..

انا الشاب اللي كنت م بصدق نظبط ولو حتى يوم نبعد فيه عن خنقة القاهره بقيت لازق ومتبت ومش عاوز اسافر خايف اضيع فرصة اني اشوفها

لحد م أهلي قرروا هنسافر ولقيت اختي جايه بتتكلم معايا وعماله ترغي في مقدمة طويلة جداً علشان تقنعني اسافر معاهم وبتتكلم ع سفريه م الواضح أنها كانت بتتأجل كل سنه بسببي ف فهمت انها تقصد سفرية الاقصر وأسوان

انا فعلا كنت شايف انها سفريه كلها فرهده ع الفاضي ف كنت بختار مكان مختلف نسافر فيه كل سنه

لكن اختي دخلتلي م حتت ان المكان كله آثار ومعابد وتاريخ مصر القديمة كله واهي حاجه م ريحة البنت #بتاعت_الكتاب -نسيت اقولك ان الاسم دا كان طلع عليها لأننا منعرفش اسمها-

اول م قالتلي كدا تحسي كأني طفل صغير حد قاله هننزل نشتري لبس العيد

قولتلها تفتكري ممكن اقابلها هناك.. تقريبا اختي لقت أن في امل اوافق نسافر ف مصدقت وقالت لي طبعا طبعا وانها مش عارفه انا ازاي كل دا م فكرتش اروح أماكن تاريخية واني اكيد كنت ممكن اشوفها هناك.. حسيت شويه أن اختي بتسرح بيا بس عجبتني الفكره وقولت مش هخسر حاجه بالعكس أنا كدا هكون فعلا شاركت البنت دي في حاجه هي بتحبها...

سافرنا فعلا وطبعا كان مسافر معانا الكتاب.. مر اول اسبوع وكنت بدأت اندمج وانبهر بكل الآثار والجمال اللي حوالينا وقدرت كمية الحماس والانبهار اللي كان في صوتها والفخر وهي بتشرحلي

وصلنا لاخر الاسبوع التاني وخلاص باقي ع سفرنا ورجوعنا للقاهره يومين

كنا قاعدين في الفندق تحت وانا قاعد بقرأ في الكتاب للمره المليون تقريبا ومركز وفجأه اختي صرخت وقالتلي هقولك حاجه بس متبصش جانبك وطبعا قبل م تكمل انا كنت بصيت جنبي خبطتني ع كتفي قولتلها بلا مبالاه في ايه جنبي قالتلي البنت اللي جنبك عماله كل شويه تبص علينا انا كنت مستغربه هي مركزه معانا اوي كدا ليه لحد م لقيتها بتتكلم في الموبايل وقالت اسم الكتاب..

قولتلها وانا مالي اعملها ايه يعني؟ قالتلي م يمكن هي البنت دي

بصيت عليها تاني قولتلها مفيش حد ع الترابيزة اللي جانبنا لابس نقاب

بدأ اخواتي كلهم يسألوا اسئله لوزعيه واللي هو م يمكن قلعت النقاب م يمكن اختها م يمكن قريبتها

فضلوا زن زن ومفيش اي كلام قالوه منطقي خالص..

لحد م لقينا البنت اللي جنبنا جات وقفت قدامنا واتكلمت بكل احراج وسألتني انا جايب الكتاب منين لأن صاحبتها بتدور عليه وهتموت وتلاقيه بقالها كذا سنه.. اخواتي بصوا لبعض وبصولي وغمزوا وانا بتعامل بلا مبالاه بردو لقيت اختي بتسألها هي صاحبتك دي منتقبة؟ هنا انا ودني اتحولت ستالايت وجسمي كله مشدود ومستني الاجابه

لقيتها هي نفسها سكتت شويه وقالتها انا مش عارفه ايه العلاقه بس هو اه صاحبتي منتقبه..

هنا اخواتي قاموا وقفوا وشدوا كرسي للبنت وقعدوها واتلموا حواليها

البنت وشها جاب ألوان حرفيا من الخضه.. سألوها لو كانت صاحبتها دي موجوده هنا

ف قالت إنه لا بس هي كلمتها وقالتلها يعني أنها شافت الكتاب معانا وعاوزه تعرف اشتريناه منين لو م هنا م مصر..

اخواتي قالولها اننا راجعين القاهره ولو كدا نقابلها بعد م نرجع وممكن نخليها تستعير الكتاب

لكن هي قضت ع كل آمالنا لما قالت إن البنت مش م القاهره ف صعب تقابلنا هناك لأنها م #الصعيد

كلنا فقدنا حماسنا وسكتنا لحد م هي قالت انها ممكن تسألها لو هتنزل القاهره قريب بما انها بتنزل كل كام شهر علشان تشتري كتب..

وهنا رجع الأمل نور م تاني اختي كتبتلها رقمها وقالتلها وقت م تنزل القاهره خليها ترن ونقابلها..

رجعنا في نفس اليوم القاهرة وكأننا برجوعنا بدري يعني هنشدها تيجي😃

وم يومها قعدنا نستنى يوم ورا التاني كل م حد فينا يشوف التاني يسأله لسه البنت مرنتش والاجابه دايما كانت لا فات كام شهر ومفيش بردو لدرجة ان حماسنا طبعا بدأ يقل وندمنا اننا مأخدناش رقمها

وفي يوم لقيت رقم غريب بيرن كنت سايق ومش مركز وصوت دوشه لحد م لقطت كلمة كتاب

كنت هعمل حادثة ركنت ع جنب وقفلت الشباك وبدأت اتكلم بهدوء وسألت مين معايا؟

قالتلي ان صاحبتها شافتنا في أسوان وبعتتلها الرقم دا تتواصل معانا علشان الكتاب لما تنزل القاهرة..

كنت عمال اركز في نبرة صوتها علشان اعرف هي نفس البنت ولا لا بس طبيعي الصوت بيختلف احيانا م الطبيعه وع الموبايل كمان واحده مشوفتهاش من اكتر م سنه ونص ومسمعتش اصلا صوتها غير مره واحده وفوق كل دا كنت متوتر جدا

سألتها لو هي خلاص يعني موجوده في القاهره..

ردت انه اه ونشوف معاد نتقابل فيه تاخد الكتاب

سألتها لو كانت تعرف الفندق كذا -اللي كنت شوفتها فيه- قالت تمام ممكن نتقابل هناك سألتني امتى؟ قولتلها لو ينفع دلوقتي وكانت الساعه تسعه ونص بالليل -مكنتش قادر بصراحه استنى لسه لتاني يوم- بس طبعا هي اعتذرت ان الوقت متأخر وإن ممكن تاني يوم لأنها نازله أربع أيام بس وراجعه

قولتلها تمام وحددنا الوقت وقفلنا.. وانا ضربات قلبي كانت سريعه جدا انا اه مش عارف هي نفس البنت ولا لا بس كان عندي أمل في ربنا جدا ان بعد كل المده دي وبعد العذاب دا تطلع هي نفس البنت..

وصلت البيت واول م دخلت سألت اختي هو انتِ كتبتي للبنت رقمي ولا رقمك؟ قالتلي طبعا رقمك بس انت بتسأل ليه؟ سكتنا شويه وبعدين لقيتها مركزه في ملامح وشي وصرخت كعادتها يعني لما الحماس بياخدها وسألتني ان اكيد البنت كلمتني..

البيت كله اتجمع ع صريخها ولما عرفوا السبب بدأ مشهد غريب كدا عمالين يحضنوا في بعض وينطوا ويصوتوا مش عارف علاقة الصريخ مع البنات وقت الفرحه أو الحماس وكل دا اصلا ولسه منعرفش هي نفس البنت ولا لا.. واصلا م التوتر كنت بردو نسيت اسألها ع اسمها..

المشهد اللي بعد كدا اخواتي التلاته محتلين الاوضه بتاعتي وعمالين يختاروا اللبس اللي هلبسه وبيتناقشوا وكأنهم بيتناقشوا في جامعة الدول العربية وواخدين الموضوع بجدية رهيبه

وانا في وسط كل دا حاسس اني مش مجمع اصلا ومتوتر جدا مش قادر احدد السبب...

المشهد اللي بعده اتقلب حرفيا عرض ازياء خلصوا معايا انا الاول وبدأوا هما كمان يشوفوا هيلبسوا ايه؟

ف سألتهم مين فيكوا هتيجي معايا لقيت التلاته ف صوت واحد ان كلهم اصلا جايين وانه يوم تاريخي..

كنت حاسس انهم واخدين الموضوع ضحك وهزار وتسليه ومفيش حد فيهم مقدر الموقف اللي انا فيه

لقيتهم قعدوا حواليا وقالوا انهم بيدعوا اكتر مني انها تكون نفس البنت لمجرد اني كدا اخيرا هفرح وان حتى لو البنت دي كرهتهم هيحبوها بردو لمجرد اني بسببها اتغيرت معاهم

سألتهم باستغراب يعني ايه اتغيرت معاهم؟

لقيت ان أحداث كتير حصلت وان م ضمن اللي اتغير في شخصيتي اني بطلت أخرج كتير مع اصحابي ف بقيت موجود في البيت اكتر وقربت م عيلتي اكتر وسافرنا سوا وبقيت بسمعلهم وقريب منهم

وبما أن بابا الله يرحمه متوفي وانا مش بس الأخ الكبير لا انا كمان الولد الوحيد ف هما كانوا مفتقدين وجودي في البيت وان وجودي فرق وأثر معاهم كتير علشان كدا هما كمان مستعدين يعملوا اي حاجه علشان يفرحوني...

اعتقد م الحماس مفيش حد فينا نام اليوم دا وكنت سامع اخواتي قاعدين في الصاله يتكلموا لحد الفجر..

جهزنا كلنا ونزلنا قبل المعاد بحيث نوصل قبلها..

ومن جمال بقى ان عندي اخوات بنات وبيحبوني لقيتهم بيسألوني أي ترابيزه كنا قاعدين عليها ولما شاورت ولقينا قاعد عليها ناس بدأت انا اشوف مكان تاني لقيتهم قالولي لااا طبعا لازم كل حاجه تتم زي م خططنا اتاريهم طول الليل قاعدين بيخططوا ويدبروا وحسيت انهم عصابه😃

لقيت اتنين منهم راحوا عند الترابيزة وبيتكلموا مع الناس اللي قاعدين وشويه ولقيت الناس بيتحركوا واخواتي بيشاوروا اللي هو تعالى

روحتلهم وانا مستغرب أن الناس قاموا وعمالين يبصولي وهما ماشيين وبيبتسموا

سألت اخواتي ايه اللي حصل قالولي متشغلش بالك انت بس وركز

كانت الاخت التالته واقفه بره وقاعدين مستنيين رنه منها لو وصلت اي بنت لابسه نقاب علشان لو وصلت يتنقلوا هما لترابيزه تانيه

وفعلا دا حصل وبمجرد م اختي رنت لقينا نفس الرقم بيرن عليا.. رديت ووصفتلها الترابيزه انا كنت مديها ضهري بس ضربات قلبي كانت سريعه جدا

شويه ولقيت بنت واقفه جانبي قالتلي سلام عليكم انا اللي كلمت حضرتك علشان الكتاب..

م اول سلام عليكم وانا بدأت أحس انها هي بس لسه مش متأكد

لكن اول م اخدت الكتاب م ايدي وقعدت تتكلم عنه بحماس افتكرت ان الحماس دا مش جديد عليا واتأكدت انها هي

طبعا كل دا اخواتي ع ترابيزه تانيه مستنيين اشارتي

بعتلهم رساله انها فعلا هي لقيتهم فجأة التلاته هجموا ع الترابيزة وقالولها اخيراً انتِ بقى البنت!! كلهم عمالين يتكلموا في وقت واحد لدرجة ان البنت اتخضت ومكانتش فاهمه منهم حاجه وشويه وبدأت تستوعب وحكولها كل المغامرات والتفاصيل والاحداث اللي حصلت خلال السنه ونص اللي فاتت ورنوا ع والدتي علشان تكلمها والبنت ي عيني ف النص محتاسه مش فاهمه حاجه وبعدين طلبوا منها رقم والدها وعنوانها واخيرا بقى عرفنا اسمها #هدى ❤️ وكان م اسمها نصيب لينا كلنا بصراحه..

المهم بعد م عرفنا كل المعلومات عنها وتحسي انها ي عيني كانت بترد كأنها تحت تهديد السلاح 😂

الموبايل بتاعها رن واستأذنت انها لازم تمشي بس اخواتي كانوا اتفقوا معاها انهم لازم يتقابلوا تاني قبل م تسافر ودا فعلا حصل..

رجعنا البيت ومكانتش في سيرة في بيتنا غير عنها

وصفوها لأمي طبعا ك مظهر خارجي يعني بالنقاب وطريقة كلامها واحترامها وادبها وخفة دمها

كنت مبسوط بصراحه جدا ان اخواتي حبوها لأنهم شويه بيكشوا من المنتقبات لانهم مش محجبات زي م قولتلك...

المهم كلمت والدها عرفته بنفسي وحددت معاه معاد.. كنت قلقان بصراحه جدا بسبب بُعد المسافه أن يحصل اعتراض من والدتي أو م أهلها

بس والدها الحمد لله رحب جدا واتفقنا ع معاد

بدأوا اخواتي يخططوا كالعاده للسفر وهنسافر بالعربيه ولا قطر ويدوروا ع اقرب فندق لبيتها وهنقعد كام يوم لدرجة عملوا قُرعه ع الحاجه اللي هناخدها للناس واحنا رايحين 😃

حسيت بكل تصرف ليهم معايا هما أو والدتي انهم حقيقي في ضهري وهما اللي سندي واني افتقدت حنان وحب واهتمام كتير اوي في فترة بُعدي عنهم...

وحصل والحمد لله روحنا الزياره دي.. مش عارف هتصدقيني ولا لا لو قولتلك اني مكنتش مركز اوي ف اني هشوف شكلها اد م كنت مشتاق لطريقة كلامها وحركات اديها وهي بتتكلم وحماسها

ولما شوفتها حبيت فوق كل دا كل ايموشنات وشها اللي كانت متلازمه مع حركة ايديها...

كنت رايح انا ووالدتي بس وكنا متفقين ان اخواتي هيقعدوا في الفندق علشان مش منظر يعني نهجم ع الناس كلنا...

واحنا قاعدين وقبل م نمشي لمحت نظرة في عين والدتي حسستني براحه واتأكدت انها الحمد لله معندهاش مشكلة ومرتاحة...

رجعنا الفندق بعد م بلغتهم اننا قاعدين هنا كذا يوم ومستنيين ردهم بعد م هي قالت انها هتصلي صلاة استخاره

انا طبعا مكنتش محتاج لسه اصليها لاني م اول م بدأت التزم بالصلاة وانا يوميا بصلي استخاره فيها...

يومين ولقيت والدها بيكلمني وكانت الصدمه أنه اعتذر !!

انا كنت عامل زي المجنون واللي هو ازاي طيب بعد كل دا وبعد م حصلت المعجزه ووصلتلها الموضوع ميتمش !!

ولما ألحيت اعرف سبب الرفض قالي ان والدتها رافضه بسبب بُعد المسافة خاصة انها بردو البنت الصغيره وكمان بسبب الخوف الأزلي م كوني الولد الوحيد ع بنات طلبت منه اني أقابله بره البيت واتكلم معاه حسيت بشوية أمل لمجرد أنه وافق ع طول

قابلته واتكلمنا اكتر وحكيتله كل حاجه حصلت من وقت م قابلت بنته واد ايه انها كانت سبب في تغيير حياتي وقولتله مشاعري كلها وان مامتها في أي وقت تحب تشوفها هنجيلها وان اخواتي ووالدتي اتعلقوا بيها م قبل م يشوفوها اصلا.. وتقريبا صعبت عليه ف قالي انه هيحاول تاني مع والدتها وان تعلقها بيها اكتر سببه بردو انها ووالدتها متخرجين م كلية علوم وانها بتشتغل في نفس معمل والدتها ف يومهم وحياتهم كلها مع بعض وان مش بالسهل تبعد عنها بس كرر انه هيحاول...

وبعد م كنت حاسس ان ايه دا انا حصل معايا بجد #معجزة رجعت أحس باليأس م تاني وفضلت في كل سجده ادعي ربنا بمعجزة تانيه وهي موافقة والدتها وان ربنا يجعلها من نصيبي...

وربنا الحمد لله مخيبش ظني وحصلت المعجزة التانية ووافقت والدتها بعد م والدها شرح كل التفاصيل اللي انا حكيتها وحست اني بحب فعلا بنتها ومتعلق بيها واللي عرفته بعدين ودي كانت مفاجأة بالنسبالي ان هدى هي كمان كانت حاسه براحه م ناحيتي ف قدرت مع والدها يقنعوا والدتها واللي طبعا رمتلنا جملة يوم الاتفاق ان الخطوبة هتكون طويله بس الحمد لله حصلت المعجزه التالته واتخطبنا 4 شهور بس وكانت في بيتي وبقت قدام عيني ع طول❤️

وبعد م الكل كان بيقولي اني هقع ع وشي الكل بقى يقولي اني وقعت واقف

وقدرت هي بخفة دمها وروحها الحلوه تخلي كل اللي حوالينا يتعلق بيها وفضل اسمها يتردد بردو عند الكل ب -البنت بتاعت الكتاب-

وربنا يارب يجعل كل حاجه عملتها سواء ليا أو لأخواتي في ميزان حسناتها وانها كانت من ضمن أسباب لبس اخواتي للنقاب مش بس الحجاب بسبب ارتباطهم وتعلقهم بيها وهي بصراحه ذكية عارفه مدخل كل واحد فينا وربنا يباركلي في عمرها هي وأطفالنا يارب..

وبتمنى ان اللي يشوف القِصة دا لو قدر يوصل اصلا للجمله دي بسبب طولها😃 يدعيلها حبيبتي ان ربنا يحفظها لينا وتفضل منوره حياتنا ومصدر الفرحه والسعاده لقلوبنا❤️

#حكاوي_هدير

#هدير_ابراهيم