الخيط الأبيض من الإسود

 #الخيط_الأبيض_من_الاسود !!

هشتاج باقي القصص 👇

#قصص_واقعيه_لهدير_ابراهيم 💌

🎀🎀🎀

قصتي غريبة شويه وعلشان غرابتها قررت اشارك معاكوا...

انا بسمة عمري الحالي 38 سنة..

ترتيبي التانيه بين اخواتي .. اكبر مني ولد واصغر مني ولد وبنت..

كلهم بفضل الله تزوجوا قبلي بما فيهم اختي الصغيره ودي تحديدا جوازتها كانت سبب جبري وفي نفس الوقت كسري.. وهفهمكوا ازاي ..

يوم فرح أختي كنت بحاول اتماسك ع اد م اقدر مش لاني غيرانه او زعلانه.. بس كنت بحاول اهرب م كلام الناس ونظراتهم..

وفجأه حسيت بفراشات بترفرف حواليا ودا اول م شوفت شخص عرفت بعدين انه قريب والدة جوز اختي..

كملت باقي اليوم لآخره وانا ف عالم تاني عماله احلم بفرحي انا وهو..

طبعا لما فوقت لنفسي قولت اكيد عقلي الباطن حاول يهرب بالتخيل دا عن الناس اللي حواليا والموقف اللي كنت فيه..

ورجعت لارض الواقع م تاني.. وسنه بتمر ورا التانيه وانا حالي زي م هو مفيش جديد ومقابلتش الشخص دا تاني خالص..

وفي يوم طلبت والدتي مني اني اروح اودي حاجات لاختي اللي كانت والده طفلها التالت.. ولما عرفت ان حمات اختي هتكون هناك قولتلهم لا هروح يوم تاني لانؤ مبسلمش م لسانها وسؤالها كل مره هتجوز امتى وهل في حد بيتقدملي او لا واني احاول انزل اشتغل يمكن اقابل حد وكمان قال تنصحني مدققش ع اي حد يتقدم علشان العمر بيجري..

ف كنت بتخنق م كلامها وكل مره يضيق نفسي وابكي بسبب كلامها.. بس والدتي اصرت عليا اني اروح.. ف قولت طيب هروح بس هودي الحاجه وهنزل ع طول..

وفعلا روحت.. ودي استقبلتني م ع الباب بكلامها اللي زي السم وخلاص جبت اخري منها ولسه هستأذن وانزل.. جرس الباب رن..

فتحت حماة اختي الباب وانا استغليت الفرصه وقولت لاختي اني همشي واجيلها يوم تاني 

بَدَيَر وشي لقيته قدامي !!

نفس الشخص وبعد سنيييين شوفته تاني وكأني لسه شايفاه امبارح مفيش حاجه ف شكله اتغيرت..

قلبي دق جدا اول م شوفته مش فاهمه ليه اصلا.. طيب م انا طول عمري م بشوف ناس كتير اشمعنى دا تحديدًا !!

كان جاي يوصل والدته اللي جايه زياره لاختي بمناسبة المولود الجديد..

قومت اضايفهم واقدملهم حاجه يشربوها وف راجعتي م المطبخ لقيت حماة اختي بتتكلم عني وبتقولهم دي بسمه اخت نرمين الكبيره بس لسه متجوزتش !

هو م امتى الجواز م عدمه بقى صيغة للتعريف بالناس !!

حطيت الحاجه ع الترابيزه ومقدرتش اتمالك نفسي وطلعت خرجت ف البلكونه وقعدت اعيط..

واول م سمعت انهم مشيوا دخلت وخلاص هاخد شنطتي وهمشي لقيت حماة اختي بتقولها ان مدام سهام بتدور ع عروسة لمحمد ابنها وانها رشحتلهم بنت اخوها اللي هي عندها 19 سنه في حين ان الشخص دا وقتها كان ماشي في ال 37 سنه !!

رجعت البيت وانا قلبي مكسور.. يأس بيحاول يوصل لقلبي ويتمكن منه وكنت عارفه اني هنهار تماما ف روحت اتوضيت علشان جسمي يهدى م انتفاضته والغضب اللي كان متمكن منه..

وقفت بين ايدين ربنا ودعيته وقولتله يارب انا عمري ما يئست ولا بطلت ادعي بالزوج الصالح..

بس يارب انت عالم باللي فيا واني بشر ف لو كاتلي اني هتجوز ابعتلي اي اشاره..

وقد كان والاشاره ومعاها البشاره جاتلي بعد يومين بس كان معاهم كسر !

بعد يومين م دعائي راجعه م بره لقيت والدتي بتتكلم في الموبايل وعماله تقول طيب اهدي متقلقيش مش هيحصل حاجه..

وكان ف دخلت اخويا ووقفنا نسألها في ايه ؟!

قالتلنا ان نرمين كانت بتكلمها وقالتلها ان محمد ابن مدام سهام قريبة حماتها متقدملي وعاوز رقم والدي .

ولسه هفرح بقى وهيغمى عليا م الفرحه اتحولت الفرحه لكسره لما لقيت والدتي بتقول ان حصل مشكله مع حماتها ان ازااااي يرفضوا بنت اخوها الصغيره ف السن ويتقدمولي انا اللي داخله ع اربعين سنه.. واني اكيد نزلت م هناك عملت عمل ليه وسحرتله..

ما شاء الله عمل مفعوله سريع جابه ع ملا وشه ف يومين !

اللي يقهر بقى ان اختي الصغيره كلمت والدتي اننا نرفضه علشان ميحصلش بينها وبين حماتها وجوزها مشاكل وانه مش اخر راجل يعني واستنى اشوف غيره !

اشوف غيره ايه دا انا اتمنيته م سنين وم صدقت استجاب !! وكمان واحد متجوزش قبل كدا وبيني وبينه شهور مش كبير عني ولا اد ابويا !!

منطقتش بولا كلمه بس اخويا ربنا يباركله قام بالواجب وزياده ورد ع والدتي بإن لو الشخص دا كويس ف ليه لا؟ وايه اللي يخلينا نرفضه لمجرد ان حمات اختي قالت لا ؟!!!

واتقدملي محمد فعلا بس للأسف والدي ووالدتي قابلوه ببرود وفتور في المعامله.. وهو كان عارف السبب م غير م نقول لان حمات اختي قلبت عليهم هما كمان..

وكنت مرعوبه ان الموضوع ميتمش ف عملت استخاره ويوم الاتفاق والدي كان بيغالي عليهم اوي في الطلبات ف قولت الموضوع كدا اكيد مش هيكمل بس كانت دهشتي لما عرفت ان محمد ووالده وافقوا ع كل حاجه وفوق كل دا طلبوا يبقى خطوبة وعقد ف يوم واحد لان محمد هيرجع شغله بما انه مسافر وحابب يكون ع راحته لما نيجي نتكلم ..

وسبحان من هدى قلب والدي ووافق ..

والدي ووالدتي كانوا في وضع لا يُحسدوا عليه..

م ناحيه حابين يتطمنوا عليا قبل م يقابلوا وجه كريم خاصة وان محمد شخص مهذب ومحترم جدا وشاريني وم ناحيه تانيه اختي هددتهم ان لو الجوازه دي استمرت ي هتطلق وترجعلهم بال3 عيال.. ي مش هيشوفوا وشها لا هي ولا ولادها تاني وكل دا ارضاءً لجوزها وحماتها !

والدتي بسبب الضغط كانت ايام تكون كويسه معايا وايام تبكي وتقولي اني السبب انها اتحرمت تشوف احفادها.. وايام تقولي افركش الخطوبه.. ف كنت بحمد ربنا انه كتب كتاب مش مجرد خطوبة.. وكمان انه قرر هينزل اجازه ع حسابه علشان نتجوز اسرع..

كانت فتره مؤلمه جدا مقدرتش اتهنى بفرحتي.. ولا اختي كانت جنبي في كتب كتابي ولا فرحي.. ووالدتي كانت بتبكي يوم فرحي مش م الفرحه او اني هبعد عنها.. لا كانت بتبكي انها قعدت 6 شهور متشوفش اختي.. كسرولي فرحتي في اليوم اللي فضلت سنين احلم بيه واستناه 💔

وم مميزات اننا عاقدين ان محمد كان مجهز ورق سفري وسافرت معاه .. فكرت يمكن بعد م خلاص يتم الجواز وكمان ابعد فتره الامور تهدى 

وكلمت اختي اللي مكنتش بترد عليا خالص وعملالي بلوك.. فرحت جدا انها شالته وردت عليا بس لاقيتها قالتلي كلام زي السم واني انانيه ومش بفكر غير في نفسي وشيلتني ذنب لو جرالها حاجه هي او طفلها بسبب الزعل..

قالتلي بشع وسئ جدا.. حاولت اتكلم معاها بهدوء واحايلها واقولها ان بالعقل انا معملتش حاجه غلط وانه ف الاول والاخر نصيب.. بس قالتلي كلام صعب جدا اني اقوله.. وختمت كلامها بإنها شمتانه فيا ان فات 3 شهور ومخلفتش ومش هخلف وبكره جوزي يزهق ويندم هو وامه ويعرفوا انه ذنب البنت التانيه ف يطلقني ويتجوزها !!

مكنتش مصدقه ان الكلام دا طالع م اختي شقيقتي !

ولما كلمت والدتي يمكن تطيب خاطري قالتلي انتِ مش عملتي اللي ف دماغك خلاص بقى

واهو اتكتب عليا مشوفش احفاد م بناتي الاتنين !

اللي هو ايه دا حتى أمي فاقده الامل في حملي !

تخيلي والدتي كانت تقولي انتِ لو اتطلقتي هترجعي بطولك لكن اختك ليه يتخرب بيتها هي وعيالها ال3 !!

كنت اقول لا هو اكيد شيطان وداخل بينا.. اصل مفيش اهل ف الدنيا كدا وفجأه بين يوم وليلة يتبدل الحال بالشكل دا !

مكانش عندي حد اتكلم معاه وكنت محرجه ومكسوفه احكي لجوزي عن كلام اهلي..

انا جوزي دا بفضل الله ولا مره نيمني وانا زعلانه ودايما يطيب خاطري ولو شافني زعلانه ممكن يعمل اي حاجه لمجرد اني ابتسم..

وقالي اني خطفته م يوم م شافني عند اختي ووالدته كان كل همها انه يتجوز ف مدققتش ع سني او غيره.. وانه اتأخر طول السنين دي في الجواز بسبب انه كان عاوز يتجوز وهو محقق وضع معين وكمان كانت جات الكورونا ف قعد كذا سنه مينزلش مصر اجازه وع حظي انه شافني لانه نصيب !

معاه حسيت بدفا وأمان وراحه بس قلبي فيه كسر مش عارفه اداويه ف

 لجأت لربنا وقعدت ادعيله يريح ويطمن قلبي.. وسألته هل ياربي انا كدا كنت ظالمه فعلا وانانيه ف هتحرمني بسبب كدا م الخلفه ؟!

بس الحمد لله بعدها بأيام محمد بشرني بإننا #هنحج !!

اللي هو ايه دا ؟ دا انا معملتش عمره قبل كدا حتى ف هروح بجد احج ؟!!

حسيت انها اشارة ربنا ليا واهو السنادي هقف ع عرفات وهدعي ب استماته ان عرفات الجاي يكون معايا ابني 💔

ادعولي يستجيب وبإذن الله هدعيلكوا معايا..

وقولولي هل انا فعلا ظالمه وانانيه ؟!

واعمل ايه مع اختي ووالدتي..

وبعتذر لو طولت عليكوا ...

#حكاوي_هدير

#هدير_ابراهيم