عوض اللطيف

 #إلف_النعمة !

هاشتاج باقي القصص 👇

#قصص_واقعيه_لهدير_ابراهيم 💌

🎀🎀🎀🎀

من سنه ولا كان يخطر ع بالي اني ممكن ابعتلك قِصتي ولا كنت شايفاها قِصة اصلا ممكن تفرق أو تأثر ف حياة حد.. بس رمضان قبل اللي فات حصل موقف قلب حياتي تماماً وبسببه اهو جيت بنفسي احكيلك القِصة بس مش زي م كان ممكن يخطر ع بالي ف يوم وهتفهمي لما احكيلك اكتر...

انا بنت عاديه جدا فوق م تتصوري.. عادية ف الشكل.. ف التعامل ف التعليم ف كل حاجه يعني ولا كنت شاغله بالي ف الدراسة بإني ادخل كليه معينه ولا اي حاجة.. 

وحتى لما اتخطبت كان عادي بردو اللي هو مفيش عندي صفات معينه للشخص اللي عاوزه ارتبط بيه.. اللي هو عاوز اتجوز لمجرد الجواز وبس.. ف بمجرد م أهلي وافقوا وافقت عادي خالص.. ورغم اني كرهته كره لا تتخيليه طول فترة الخطوبه الا ان دا ممنعش اهلي انهم يكملوا لحد م اتكتب كتابي وسبحانك ي ربي الجوازه اتفركشت ع سبب تافه جدا قبل الفرح بأيام بسيطة...

كنت مبسوطة اني اخيرا خلِصت.. ف مفرقش معايا كلام الناس ولا قلق اهلي م اني بقيت بحمل لقب مطلقة قبل فرحي بأيام..

 وسمعت كل الكلام المقرف اللي بيتقال ع البنت المطلقه سواء هي كويسه او لا..

كنت انا اول واحده ف اصحابي تتخطب ومع ذلك م بعد طلاقي كل اللي حواليا اتخطبوا واتجوزوا وخلفوا وانا م وقت طلاقي مفيش حد دخل بيتي نهائي.. كانوا بيترفضوا م بره لان كلهم تقريبا كان سبق ليهم الزواج وعندهم اطفال ومنهم اللي كان عاوزني زوجه تانيه.. بس والدي هو اللي كان بيرفض...

كنت بسمع كلام زي السم م اصحابي اللي هما المفروض مقربين ليا.. بس كنت بقول عادي وبردد زي ناس كتير م بيرددوا ان اللي بيرموا دبش دول مفيش اطيب م قلبهم..

 بس الكلام كان بدأ يزيد عن حده ف بدأت شويه بشويه اتجنبهم.. بس مجرد م واحده منهم تكلمني ارجع اتكلم معاها طبيعي زي الاول ولا كأنها هانتني قبل كدا ولا اي حاجه خالص..

ومنهم واحده كانت بتشتغل ف صيدلية قريبه م بيتي.. كنت بنزل كل يوم آخد منها بنتها اللي لسه عندها شهور تقعد عندي بدل م تتمرمط مع صاحبتي ف الصيدلية خاصة ان جوزها نفسه رافض انها تقعد م الشغل بحجة ان المصاريف والحِمل تقيل عليه.. وعادي مش فارق معاه بنته..

وولا والدته ولا والدتة صاحبتي كانوا بيساعدوا معاها.. ف كانت الطفله تصعب عليا وبقيت اخدها عندي وانزلهالها اخر اليوم..

وفي مره كنت واقفه معاها ف الصيدلية لقيت الدكتور صاحب الصيدلية هناك ومعاه واحد كمان.. وقفت اتكلمت معاها شويه لقيت الشخص التاني دا خارج ف قال سلام عليكم.. هي ردت قالت وعليكم السلام يا دكتور بسام.. ف انا قولتلها هو داااا بقى دكتور بسام اللي انتِ بتتكلمي عليه ع طول وان مفيش ف جماله و..و...و..الخ

بس تصدقي طلع عندك حق.. وهو بقى لسه مخطبش ولا اتجوز ولا ايه؟

انا كل دا بهزر بس لقيتها بصتلي بطريقه وحشه جدا وقالتلي عينك والراجل ي حبيبتي ومتفكريش ولا تحلمي اصلا.. قولتلها ليه يعني ان شاء الله😏

قالتلي: لانه ابن ناس أوي وعمره م يبص لاشكالك..

عاوزه اقولك بقى ان الكلام فعلا كان طالع بغل وضيق بس انا مكانش ليا رد فعل غير اني قولتلها ع اساس اني بنت ايه يعني؟ وقولت يارب لو ليا نصيب فيه هاته وعرفها اني بنت ناس بردو

 حاولت افك الجو وشويه ومشيت(ولو هتلومي عليا في تصرفي احب اقولك ان دا كان رد فعلي مع اي حد بيحصل معاه تصرف بيضايقني مش عارفه دا تسامح مني ولا دي سلبيه وعبط وهبل)..

وتاني يوم كالعاده نزلت ف نفس المعاد اخد منها البنت.. بس بعد 3 ايام لقيتها بترن عليا وبتقولي متعديش عليا ف الصيدليه تاني..

 ولما سألتها ليه ؟ قالتلي كدا وخلاص.. وقفلت ف وشي..حاولت ارن تاني مردتش.. فضلت اسأل اصحابنا هي مالها ؟ بس مفيش حد منهم رد عليا.. نزلت الصيدليه وانا هتجنن وعماله اسأل نفسي هو انا عملت ايه؟! بس للأسف اول م شافتني اتكلمت بإسلوب سئ جدا ومفهمتش منها حاجه..بس قولت يمكن متخانقه مع جوزها ف بتطلعه عليا ومش مشكله هسيبها كذا يوم وابقى اكلمها تاني.. بس ع اخر الاسبوع كنت فهمت سبب قلبانها عليا !!

متفهميش بقى ليه وازاي وايه اللي حصل بس دكتور بسام دا اتقدملي..

 طبعا اهلي كانوا طايرين بيه ومش مصدقين اصلا.. والأعجب بقى واللي بسببه ببعتلك قِصتي دلوقتي اني مشوفتش خالص ان ياااه بقى ربنا كريم وفرجها عليا واني المفروض احمد واشكر.. لا خالص ولا اي حاجه الامور مشيت طبيعي جدا وكانت فترة خطوبه صغيره جدا لان كل حاجتي كانت جاهزة م وقت ارتباطي اللي فات...

ف اتجوزنا بسرعه وبمعاشرتي ليه اكتر عرفت ليه كانت صاحبتي دايما مبهوره بيه ودايما تتكلم عنه.. وطلع فعلا ابن ناس ومتربي واهله نفسهم كويسين فوق الوصف...

ربنا كرمني وحملت ع طول بس كان حملي صعب جدا ف هو كان ع طول بيساعدني ف ترتيب الشقة وكان هو اللي يقف يغسل الاطباق وينشر الغسيل وولا مره حسسني انه بيعمل جمايل مثلا.. لا خالص كان بيتصرف وكأن دي طبيعته ومكانش بيعرف يعمل أكل ف كان يقولي اقعدي بس ع الكرسي معايا في المطبخ وقوليلي احط ايه ع ايه وبس..

 ووالدته ربنا يكرمها كانت ع طول تبعتلي اكل مع حد او معاه او تيجي بنفسها وتقولي: لا طبعا اهون عليا اني اجي.. ولا تاكلوش اكل بايت وانتِ حامل يعني اتنين في بعض ولازم تتغذوا كويس..

انا والدتي معملتش معايا اللي حماتي عملته ولا حتى نصه والله..

 جوزي دا بقى شاف مني ايام صعبه جدا وكان يفضل يدادي ويحايل واتحمل كتير جدا وشاف مني كتير ولا عمره اشتكى بالعكس كان بيصد اهلي ف الكلام لما يقولوا عليا بتدلع..

ورغم كا دا كنت بتكلم عليه وع اللي بيعمله قدام اصحابي وكأنه حاجه عاديه جدا وبردو لا كنت بحمد ولا بشكر وولا حتى كان عندي احساس بقيمة النعمه اللي ربنا رزقني بيها م غير حول مني ولا قوه..

هو حذرني قبل كدا م اصحابي خاصة صاحبتي بتاعت الصيدليه وحكالي انه كان سألها عني بعد المره اللي شافني فيها وهي صدته وقالتله كلام سئ واني مطلقه وبلا بلا بلا ولولا الدكتور الله يباركله صاحب الصيدليه اللي هو ف نفس الوقت صاحبه قاله متسألش بنت ع بنت زيها حتى لو هما اصحاب.. لان سهل الشيطان يدخل بينهم...

انا للأسف مكنتش بسمع كلامه ومكمله ف معرفتي ب اصحابي ومكنتش اعرف ان هو معاه كل الحق وان في ناس بقى ف قلوبهم مرض اسمه الغيره والحقد ناتجين عن حسد...

لحد رمضان اللي قبل اللي فات كنت انا واصحابي بنفضل كتير نتفق هنتجمع كلنا امتى وكل م نتفق ع يوم يحصل حاجه ومننزلش لحد م اتفقنا نتقابل بعد صلاة التراويح وياريتنا م كنا اتفقنا وياريتني لا كلمتهم ولا شوفتهم !!

اتفقت مع جوزي ف قالي تمام انا هقعد مع اصحابي وانتِ براحتك مع اصحابك ووقت م تخلصي رنيلي بس وهعدي عليكي..

اتقابلت معاهم فعلا وكان كل اللي فات بنتكلم في جروب شات واتساب واول مره نتقابل م فتره كبيره..

ف كالعاده كانوا بيشتكوا م ازواجهم وانا كعادتي بتكلم عن تعامله معايا وخوفه عليا لدرجة انه لو في الشغل ورن اكتر م مرتين ومردتش ي بيكلم حد م جيراني ي بيرجع بسرعه م الشغل يطمن عليا لاني زي م قولتلك حملي متعب وكتير كان بيحصلي اغماء..

ف واحده صاحبتي قالتلي مش بناخد منك غير كلام واستحاله يبقى في راجل ف الدنيا ربنا خلقه ع وجه الارض بيعمل كل اللي بتحكي فيه دا.. ولما قعدت احلف واحده تانيه قالتلي طيب يلا اثبتي كلامك..

 وكانت فكرتهم اني ارن عليه واقوله اني تعبانه ومقولش حتى انه ييجي وواثقه انه هيجي بسرعه.. ف واحده قالت لا لو سمع صوتك ممكن يحس انك مش تعبانه ولا حاجه احنا واحده منا تكلمه من عندك وتقوله انك اغمى عليكي ف انا قولتلها اه ماشي تمام وبصي قوليله هي اغمى عليها ومش عارفين مالها وشكلها #بتسقط!!

متسألنيش ازاي قولت حاجه بشعه زي دي ولا ازاي طاوعتهم اصلا..

عملنا كدا فعلا وي حبيبي اتخض جدا وفضل يكلم صاحبتي ويقولها طيب في مستشفى قريبه منكوا؟ طيي روحوا هاتوا دكتور او اتصرفوا !!

وبقى يصرخ وقالها خليكي معايا ع الخط لحد م اوصلكوا

وانا صاحبتي فاتحه الاسبيكر وكله كاتم نفسه انه يضحك وشويه والخط قطع

استنينا انه ييجي مجاش قعدوا يتريقوا شويه ف برن عليه مش بيرد فضلت ارن لحد م حد رد وقال ان صاحب الموبايل دا عمل #حادثة بالعربية !!

ربنا اداني نعم كتيييير لدرجه لا تتخيليها انا حياتي حرفيا كانت عباره عن نعم م ربنا كنت كل م اقع ف حاجه يخرجني منها برحمته ولطفه وكان كريم معايا فوق الوصف ولاني لا عمري شكرت ولا حمدت كان لازم واقفه ورادع ليا وبدأت الاقلام تنزل ع وشي تفوقني ع شكل ابتلاءات وحياتي اخدت منحنى تاني خالص!!

جوزي دخل في غيبوبه.. وكملِت بإني اجهضت جنيني..

ف في لحظة وبكذبه بسيطه لمجرد اني ارضي غرور بنات الغيره عمتهم وبجهل وغباء مني ضيعت اغلى اتنين ف حياتي زوجي وجنيني 💔

لما كنت بشوف والدته وهي عماله تحضن وتصبر فيا ببقى عاوز اصرخ واقولها انا مجرمه انا السبب في كل اللي حصل دا انا اللي مستحقش اني اعيش اصلا..

انا كنت م زمان ي مبصليش ي بصلي متقطع بس طول م جوزي في البيت اتعودت معاه ع الصلاه بس مكنتش لسه اتعلقت بيها كانت زي الروتين

لحد م كل دا حصل بقيت اتمنى ان اليوم كله يكون صلاه واسجد واتذلل لربنا يردلي جوزي م تاني واني خلاص اتعلمت الدرس..

انا لما واحده قريبتي عملتلي منشن عندك قبل كدا وقالتلي اللي في القصه دا ما شاء الله شبه جوزك في تصرفاته.. قرأت الكومنتات بلا مبالاه وقولت كل دي بنات منبهرة بشويه حاجات عبيطه ممكن اي راجل يعملها..مكنتش اعرف ان انا اللي عندي عمى قلب وبصيره لدرجة ملاحظتش الجوهرة والكنز اللي ربنا رزقني بيه...

عارفه اني شخصيه مش كويسه ومستاهلش ضفره حتى.. 

واصحابي اللي ميستاهلوش الكلمه دي كانوا ييجوا المستشفى وجوزي بين الحياه والموت ويقفوا قريب م والدته ويحاولوا يعلوا صوتهم ويقولوا ياريتك ما عملتي كدا.. كانوا بيحاولوا يوقعوا الدنيا بيني وبين حماتي..

متخيله احنا ف ايه وهما ف ايه.. اعوذ بالله..

كنت بعتلك القصه لحد هنا ونزلتيها عندك والبنات الله يكرمهم فضلوا يدعوا لجوزي لحد م بفضل الله بعتلك الكِماله وهي ان ربنا كان كريم واداني فرصة تانيه وبعد شهور من الغيبوبه جوزي فاق الحمد لله ..

ولما سألتك اعرفه اللي حصل ولا لا نصحتيني اصلي استخاره لاني كنت مرعوبه انه يعرف اللي حصل م اصحابي وعلاقتنا تنهار خاصة بعد م عرفت قيمته خلاص..

 ولما قولتله اني عاوزه احكيله ع حاجه بس متردده.. قالي لو حاجه هتخلي حد فينا يشيل م التاني ويزعل منه بلاش..

قولتله اني خايفه انه يعرف م حد تاني..

 قالي انه مش بيدي ودنه لحد واياً كان اللي حصل ف هو بيتمنى اني ابطل عادتي ف اني بمشي ورا كلام اصحابي...

وخرجنا بعدها م المستشفى وبعتلك تطمني البنات يدعولنا ربنا يعوضنا خير عن طفلنا اللي فقدناه..

ولحد هنا كانت الدنيا تمام وعملت بنصيحتكوا وحذفتهم من عندي وبطلت اكلمهم او اعرف حد حاجه عني.. بس بعد م نزلتيها عندك واحده فيهم شافتها وعملت للباقي منشن وكلموني بهدلوني وقالولي اني شهرت بيهم وطلعت نفسي الملاك البرئ.. وصمموا انهم لازم يحكوا لجوزي واهله اللي حصل واني كذابه وكنت بشتغلهم اني مغمى عليا وكلام كتير كدا..

ف كنت مرعوبه وقعدت اعيط.. طبعا جوزي لاحظ ف حكيتله كل حاجه بالتفصيل واعتذرتله وقولتله اني راضيه بأي عقاب الا انه يبعد عني..

بس هو كان رد فعله انه قالي بلاش تجهدي نفسك ف التفكير والقلق والزعل علشان منفقدش ابننا مره تانيه لاني بفضل الله حامل دلوقتي..

وقالي ردي عليهم انك معرفاني كل حاجه م اول م فتحت عيني م الغيبوبه.. وانهم يبعدوا عنا..

بس هما مستمرين ف انهم يبعتولي كل شويه كلام يحرق الدم غيرت رقمي والاكونت بتاعي وبحاول اتجاهلهم بس شوفتهم معلقين عندك يا هدير في الكومنتات ف مش قادره ابطل اني اقول حسبي الله ونعم الوكيل فيهم..

وبالله عليكِ نزلي القصه ويارب يسمعوها ويتقوا الله ويبطلوا يخوضوا في عرضي ويطلعوني انا وزوجي من دماغهم..

وتحذير لكل بنت شخصيتها سلبيه زيي بقولها فوقي قبل م تضيعي نفسك وحياتك بسبب ناس متسواش..

وبعتذر ع الاطاله وادعولي حملي المرادي يتم ع خير ويارب ما تفقدوا اي عزيز ابدا ❤

#حكاوي_هدير

#هدير_ابراهيم