اقرب طريق لقلب الراجل !!

 #اقرب_طريق_لقلب_الراجل .. ! 🤷‍♀️

هشتاج باقي القصص 👇

#قصص_واقعيه_لهدير_ابراهيم 💌

🎀🎀🎀🎀

نصيحة بسيطة جدا ولما عملت بيها غيرت حياتي تماما !!

اسمي ليلى.. كنت زي معظم البنات بقرأ روايات كتير ومتعلقه بيها وكل رواية بقرأها كنت بتخيل نفسي مكان البطلة وعايشة فوق السحاب بخيالي.. والروايات كانت هي العالم بتاعي وبهرب بيها من الواقع.. لحد م الواقع اداني بالقلم ع وشي ومفيش اي حد اتقدملي كنت برتاحله ولا مشدوده ليه واكتشفت ان الروايات خلقت جوايا حالة من عدم الرضا.. ولما لقيت نفسي مطوله وسني بيكبر وكل اللي حواليا بيتخطبوا ويتجوزوا بقيت اوافق ع اي حد يتقدم هربًا م شبح العنوسه ومع ذلك ولا موضوع كان بيتم.. 

حالتي النفسية اتدهورت جدا ووقتها مفعول الرويات السحري بِطِل ومبقتش مُتقبله اقرأ حرف في روايه ..

 دخلت في حالة يأس وعدم رضا واكتئاب لحد م في يوم كنت عند الدكتور وقابلت بنت صاحب المكتبه اللي كنت دايما ببدل منها الروايات.. سألتني ليه بقالي فتره مختفيه وبطلت اشتري روايات؟!

ولأن وقت الانتظار ف عيادة الدكتور بيكون طويل ف قعدنا نتكلم.. ولما حكيتلها قالتلي طيب م تجربي مره تنزلي ع ارض الواقع بس المرادي دوري جواكي ع موهبة شايفه نفسك فيها..

يعني لو بتحبي تكتبي مثلا خرجي اللي جواكي ف الكتابه او الكروشيه او الهاند ميد عامة المهم اني اشغل عقلي وفي نفس الوقت اصنع حرفة لنفسي تدخلي عائد مادي !!

كشفت ورجعت البيت وخلص اليوم بس صدى كلامها كان لسه مسمع ف وداني ومعرفتش انام ف قومت جبت ورقه وقلم وبدأت اكتب ايه الحاجات اللي بحب اعملها او شايفه نفسي فيها.. وكنت قربت ايأس لان مش لاقيه عندي ولا موهبه لحد م نورت لمبة ف دماغي لما افتكرت ان كذا حد كان لما يدوق أكلي ينصحني اعمل اكل بيتي وابيعه.. كل مره كنت باخد الكلام ع انه مجرد مدح ومجامله بس المرادي قولت وليه لا م اجرب مش هخسر حاجه.. ومقدرتش استنى للصبح علشان اقول لماما ف استنيت لوقت الفجر واول م صحيت علشان تصلي قولتلها.. بس هي للأسف رفضت..

رجعت لليأس من تاني بس قومت اتوضيت وصليت ودعيت ربنا يصلح حالي ويرزقني أي رزق المهم يرزقني ويفرح قلبي وقد كان؛

صحيت من النوم ع صوت ماما العالي خرجت م اوضتي.. لقيتها كانت بتكلم اخويا في الموبايل.. ولما قفلت معاه لقيتها بتقولي شوفي مشروعك دا محتاج ايه وكام وناويه تبدأي من امتى ؟

سألتها باستغراب: هو اخويا اللي اقنعك وخلاكي توافقي؟

قالتلي: بالعكس دا رفض وقعد يتخانق ويزعق وكلم اخوكي التاني والاتنين رافضين.

فسألتها باستغراب اكبر: مش فاهمه اومال وافقتي ليه ؟!

قالتلي: اخواتك رافضين علشان شكلهم قدام الناس وقدام نسايبهم وان ازاي اختهم هتعمل اكل وتبيعه.. يعني اخواتك مش فارق معاهم حد غير نفسهم..

 ولا واحد فيهم بيبص في وشنا لا هو ولا مراته الا لو احتاجوا حاجه.. واحنا عايشين يا دوب ع معاش ابوكي بس مضمنش بعد م اموت يعملوا معاكي ايه.. ف انصحي لنفسك وحطي رجلك في حاجه تدخلك فلوس وربنا يا بنتي ما يحوجك لا ليهم ولا لغيرهم..

وبس م بعد اللحظة دي واحنا بدأنا نحط خطط وندور ونسأل هنا وهنا وحطينا اسعار بكل حاجه وبدأنا التنفيذ..

 الدنيا مكانتش الطف حاجه ف الاول اكيد..

وتعبنا جدا.. وفي لحظات مرت كنت بعيط فيها من التعب والوقفه ع رجلي.. ومرات كنت اقول لا هبطل وكفايه لحد كدا.. لكن امي كانت تشجعني وتفكرني بكلام اخواتي.. لحد م بفضل الله ربنا رزقنا من وسع وبقى ليا زباين دايمين وبقوا يرشحوني هما لناس غيرهم..

 ولما الدنيا وسعت اوي معانا قررنا نوسع ع نفسنا واجرنا شقة دور أرضي في نفس العماره اللي ساكنين فيها وجبنا بنات وستات بيوت يشتغلوا معانا..

واللهم بارك الدنيا معانا كل فتره بقت توسع وربنا يرزقنا ويراضينا اكتر ف كنا دايما نقول ان دا بفضل الصدقه.. احنا الحمد لله كنا بنخرج يوميا عدد من الوجبات لوجه الله ف كان ربنا يراضينا بأضعافهم طلبات..

ف الفترة دي بقى واللي استمرت حوالي 5 سنين وبقيت في سن 34 سنه حققت اكتر من انجاز بفضل الله منهم اني ختمت القرآن كامل بالتجويد لمجرد اني كنت طول اليوم وانا شغاله بسمع قرآن ف لاحظت اني بقيت احفظ م كتر التكرار ف بقيت اركز اكتر وحفظت السور من غير ترتيب بس ف النهاية ختمته بالكامل ولله الحمد.. كمان التزمت بالصلاه لاني منستش ان دعوة فجر اليوم اياه ربنا استجابها وكان رزقه عليا واسع ف مفوتش بعدها صلاة فجر حتى يومنا هذا ربنا يديمها نعمه يارب.. كمان قدرت اهرب من فكرة الجواز وتأخيره اللي كانت بتملى قلبي يأس وعدم رضا.. وبقيت مسلمه أمري لله.. ولأن ربنا مقدرلي توقيت معين لزواجي ف الحمد لله قد كان وسبحانك ياربي جالي عن طريق شغلي وهحكيلكوا جالي ازاي..

لما ربنا وسعها علينا حد نصحني اني اعمل كروت ب اسمي وشنط وحاجات للدعايه ف قولت هبقى احاول ادور.. بس بعدها اول م فتحت الفيس لقيت ف وشي مكتب دعايا عاملين اعلان ليهم وطبيعي مستغربتش لان بتحصل معانا كتير اننا نتكلم عن حاجه ف نفتح نلاقيها ف وشنا..

المهم مكدبتش خبر وبعتلهم اسأل ع اسعارهم واتفقنا والدنيا كانت تمام ولما وصلتني الحاجه بعتلهم وجبات من شغلي تقديرا ليهم.. وم هنا بدأ شغلي معاهم وبقوا يطلبوا مني وجبات ورشحوني هما كمان لناس تانيه.. وكان في شخص منهم هو اللي دايما يتصل يطلب اوردر الوجبات وكمان كان دايما يقترح عليا افكار جديده لشغلي..

كنت مفكره انه بيتعامل كدا مع كل الناس لان دا شغله لحد م لقيت والدتي في يوم بتسألني عنه.. ف قولتلها بتستغراب: ماله؟ 

سألتني عن رأيي فيه ولان مكانش في بالي ولا كنت فاهمه.. فاجئتني بانها ردت ع الرقم الخاص بالطلبات وكان هو واتكلموا مع بعض واستئذنها انه يجي زياره.. مكانتش اول مره يتكلموا لان والدتي ربنا يحفظها ويبارك في عمرها تعرف كل الزباين وبتتعامل معاهم..

بس دا بالذات طلبه فاجئني وكنت متردده ومحتاره بس من جوايا كنت حاسه بمشاعر مختلطه ومتلغبطه.. بس كان احساس الفرحه اكبر..

 ومن كتر ما فاتت سنين ع اخر مره دخلت فيها رؤيه كنت نسيت الاحساس دا..

ولما والدتي كلمت الجوز اخواتي 😏 كان ردهم الرفض وانه اكيد طمعان فيا.. انا وقتها عيطت من كتر الضحك واللي هو شوفوا مين اللي بيتكلم.. مش دول اللي كانوا بيستعروا مني ولما لقوا ربنا فتحها عليا بدأوا يقولولي اني اسيبلهم فلوس معاش بابا بما ان ع قلبي فلوس اد كدا..

دا انا كنت ادعي واقول يارب يارب بارك في صحتي وافضل واقفه ع رجلي ولا تحوجني لحد فيهم ابدا.. وأمي كانت تدعي ان ربنا يبارك في عمرها لحد ما تسلمني لراجل يحميني ويقف ف ضهري.. أمي مكانتش خايفه عليا من حد أد م كانت خايفه عليا م اخواتي..

ورغم كل دا قولنا نكبرهم بردو ورجالتنا وكدا لحد م قالوا الكلام دا وعرفنا بعدين ان اي حد كان يحاول يتقدملي ويكلمهم هما الاول كانوا بيطفشوهم.. الله يسهلهم ويسامحهم ويديهم ع اد نيتهم.. بس م لحظتها وخرجناهم م حياتنا.. وامي كملت معايا للاخر وقابلت هشام وقامت بدور الاب والام .. وربنا رضانا الحمد لله بسند حقيقي زي هشام وطلع هو صاحب مكتب الدعاية والاعلان.. مكتب صغير بس ما شاء الله ربنا مبارك في شغلهم.. وبفضل الله في اكتوبر الجاي هنتم 7 سنين جواز ربنا رزقنا فيهم ب 3 صبيان وكان نفسي في بنت والحمد لله محرمنيش وحامل دلوقتي في بنت ادعولي اولد بالسلامه واهو انا دلوقتي داخله ف 43 سنه وبفضل الله عايشه حياه مستقره.. زوج يتمنالي الرضا ارضى ودايما يشجعني ع شغلي وماسك شغل الدعاية ليا وولا مره اخد ولا طلب مليم م شغلي.. 

ودايما يهزر معايا ويقولي انتِ طبقتي المثل بتاع اقرب طريق لقلب الراجل معدته واكلك جابني ع ملا وشي 😂 بس دايما يقولي اني ماليه كرشه وقلبه وعقله ف مش سايبه فراغ في ولا واحد فيهم الحمد لله 😂

وربنا رضاني وعندي اطفال ربنا يباركلي فيهم ويرزقني برهم يارب ويتم حملي ع خير.. ووالدتي ربنا يبارك في عمرها يارب كبرت ف السن وعايشه معانا وواخده بالها من ولادي وعندي شغل مستقر فاتح بيوت ستات كتير الحمد لله...

ف تخيلوا بقى كل دا ولا كان هيحصل لو م اخدتش بنصيحة البنت وكنت استسمت لليأس والاكتئاب.. وتوفيق ربنا وكرمه ورزقه الواسع كان معايا في كل خطواتي..

ف فتشوا جواكوا لحد م تدوروا ع موهبتكوا واحلموا واتمسكوا بحلمكوا.. باب واحد بس قادر يفتح قدامكوا ابواب كتير كانت متقفله..

وربنا يراضيكوا ولا يحوجكوا لحد ابدا يارب ❤

#حكاوي_هدير

#هدير_ابراهيم