وصية رسول الله

   #وصية_رسول_الله !

هاشتاج باقي القصص 👇

#قصص_واقعيه_لهدير_ابراهيم 💌

🎀🎀🎀🎀

بلاحظ ان قليل في قصصك يا هدير لو اتكلمتي عن حياة ما بعد الخطوبة والجواز نفسه..

 ف حبيت اشارك معاكوا بقصتي، خاصة ان ف بدايتها كنت بنت عادية.. حتى ابتلائاتي كلها كان سببها عصبيتي الزايده عن الحد والمُنَفِرَه زي ما اهلي كانوا بيقولولي..

 بالتالي لا كنت قريبه من حد من اهلي ولا كان ليا اصحاب مقربين.. 

كنت وحيده تماما.. وعندي انعدام للثقه واحتياج زي اي بنت للاهتمام والأمان..

 يمكن احساسي بالوحده اصلا كان نتيجته عصبيتي .. او لاني بنت حساسة جدا.. مبقدرش اعبر عن اللي جوايا.. ف مع اي مشكله حتى لو بسيطه صوتي بيبقى عالي وبعدها ع طول بعيط..

 ف ع طول انا اللي غلطانه م وجهة نظرهم.. 

وصدقت دا وبقيت اكره نفسي وحياتي والهوا اللي بتنفسه..

 تقوقعت ع نفسي وبقيت منعزله عن الناس..

وزاد ع كل دا اني اترفضت من عرسان كتير، ف ثقتي ف نفسي ضاعت تماما، لحد م اتقدملي شخص.. دخلت الرؤيه بعدم اهتمام ومستنيه عادي اني اترفض زي كل مره.. وكنت مقرره اني مش هعلق نفسي بأي أمل تاني..

ومع ذلك عملت اللي عليا زي ما بعمل في كل مره وصليت استخاره.. علشان اتفاجئ تاني يوم الرؤيه ع طول انه كلم والدي ومستني ردنا !! ف عرفت بعدين حكمة ربنا من اني اترفضت من كل اللي فاتوا وهي ان بكل بساطه ولا واحد فيهم كان نصيبي وان نتيجة الاستخاره انهم بيرفضوني لان بصراحه لو الاختيار كان ليا ف انا كنت بوافق ع اي حد والسلام.. ودا سببه ان اهلي كانوا وَلِّدوا جوايا احساس اني هفضل منبوذه ومفيش حد هيوافق عليا..

لحد ما جالي أحمد.. وسيبكوا بقى م الألش ع ان كل اللي اسمهم احمد غدارين.. لان الاسم ملهوش علاقة.. وتعالوا احكيلكوا عن جمال أخلاق وصفات وتعامل أحمدي ..

بدايةً من الخطوبة لاحظت انه مكانش بيتكلم معايا كتير زي م بشوف المخطوبين.. ولا بنخرج ولا عمره قالي كلام فيه اي مشاعر.. وطبعا كان كل تفكيري انه مش مُتقبلني وكنت بنام معيطه من كتر القلق والخوف من انه يفركش الخطوبة رغم ان مفيش جوايا مشاعر ليه اصلا.. بس انا كان نفسي احس اني زي كل البنات وان في حد بيهتم بيا.. لحد م بدأت تجيلي نوبات هلع واصحى من نومي مفزوعه وبعيط 💔 وطبعا ماليش حد الجأله وافضفضله.. ف ربنا ألهمني اني اصلي استخاره تاني.. وكان الرد السريع ولاقيت أحمد تاني يوم جاي البيت وقت الزياره المعتاده بس جايبلي معاه هديه !

كانت اول مره ع مدار عمري كله حد يهاديني بحاجه.. ومش بس كدا المفاجأه الاكبر كانت لما فتحت الهدية ولاقيت جواها اكتر من حاجه وكلهم انا بحبهم.. ولما فكرت كتير هو ازاي عرف اني كنت عاوزه الحاجات دي تحديدا ؟!

افتكرت اني احيانا ف وسط الكلام كنت بقول اني بحب نوعية كتب معينه او بحب اقرأ لكاتب معين..

 لا وحتى انواع الشكولاته اللي كانت في البوكس نفس الانواع اللي انا بحبها لاني مش م مُحبيها بس بحب انواع معينه منها..

ومع مرور الوقت اكتشفت ان احمد من النوع اللي بيعمل ومش م النوع اللي بيقول..

 واتكررت هداياه وكان بيكتبلي ورقه فيها جزء من كتاب قولت مره اني بحبه مثلا او مقوله لكاتب بحبه.. ومش دا بس كان اكتشافي الوحيد لا انا بردو اكتشفت اني كل م احب اطمن قلبي اجري اعمل استخاره.. وبعدها كان رد ربنا بيجيلي اسرع مما اتخيل..

ومرت الخطوبة ويوم كتب الكتاب اكتشفت اني ارتبط بشخص في قلبه حنان الدنيا كله.. أول ضمه ليا في حضنه حسيت ببراح الدنيا كله.. وان الكون فاتحلي ابوابه كلها..

كان احساس غريب والفعل نفسه كان غريب وغير متوقع منه ولاحظت ان الكل اتفاجئ مش انا بس..

كان الكل بيتريق ان أحمد شخص هادي جدا ف احنا عكس بعض ومش هيقدر يتحمل عصبيتي واحيانا كانوا يقولوا عليه بارد..

لكن من يوم العقد وهو غير فكرتهم دي تماما..

اكتشفت ان أحمد ببساطه كان بيطبق ضوابط الخطوبة الشرعية ..وكان شايف ان ما بُني ع باطل ف هو باطل.. ف كان حابب يبدأ حياته برضا ربنا...

كمان بدأ يفتح عيني ع حاجات كتير.. خرجني م عزلتي.. رجع ثقتي بنفسي والاهم قربني من ربنا اكتر..

في اول جوازنا كنت لسه خايفه.. خايفه من عصبيتي ودا كان للاسف بيزودها اكتر.. بس كانت المفاجأه في رد فعل أحمد لما لقاني في مره متعصبه ف قرب مني.. خوفت يمد ايده عليا زي م والدي واخواتي كانوا بيعملوا معايا .. ف رد فعل تلقائي ان جسمي رجع خطوه لورا.. لكن اللي حصل بَكّاني ودا لما لاقيته قرب مني وضمني وفضل يطبطب ب ايده ع ضهري بهدوء.. ف البداية عقلي مستوعبش رد فعله.. لكن بعدها بدأت ابكي وبدأ صوت بُكايا يعلى اكتر وهو مستمر في الطبطبه ع ضهري لحد م بُكائي بدأ يقل واختفى بالتدريج..

وقتها بصلي وسألني: بقيتي احسن دلوقتي ؟

هزيت راسي انه اه..

 ومعلقش ع اي حاجه ولاقيته دخل المطبخ جاب حاجه نشربها وقعد جنبي حكالي ع حاجه حصلت ف شغله واخد رأيي فيها وبعد شويه لاقيته اتكلم معايا ف الموضوع اللي اتعصبت بسببه وبدأنا نتناقش بكل هدوء..

وفي كل مره كنت اتعصب كان يحصل نفس الموقف ولو حتى قدام أهلي كان بسرعه يقف جنبي ويطبطب ع ضهري .. كنت بحس نفس الاحساس ف تلقائي بقيت اهدى...

أحمد على فكره لا هو شخص عصبي ولا شخص بارد ولا هو هادي بردو.. هو بس بيحاول يتعامل مع الأمور بعقلانية وبيقدَّر ان مشاعري اغلب الوقت هي اللي بتحركني..

الكل استغرب اني بعد الجواز بقيت مُشرقه اكتر ومُقبله ع الحياه.. أحمد ساعدني اخرج من قوقعتي ورجعلي ثقتي في نفسي.. واهتمامه بيا خلاني مش بس حبيته لا اصبح هو الهوا اللي بتنفسه.. وكل دا وهو مش شايف انه عمل حاجه مستحيله او مش طبيعية بالعكس هو ف كل كلامه بيقولي انه دا اللي المفروض كل الشباب يعمل بيه لوصية الرسول عليه الصلاة والسلام..

ف هو بيعاملني بكل موده ورحمه..ولا يوم شتمني ولا مره مد ايده عليا.. وعمره م اتأفف من الأكل لو مكانش مظبوط .. ولا اشتكى ف يوم ان الاكل مش عاجبه.. والايام اللي كان بيلاحظ فيها اني مريضه كان يشتري اكل وهو راجع م الشغل او يعمل هو بنفسه وبيساعدني في كل شغل البيت.. 

وحتى لما اتأخر الحمل مكنتش متضايقه.. خدنا بالاسباب وكشفنا بعد مرور 6 شهور تقريبا ولما طلع ان مفيش عندنا ما يمنع الحمل الحمد لله صبرنا لحد ما ربنا عوض صبرنا خير ورزقنا بطفلين.. وحقيقي مكنتش اتمنى ف حياتي أب ليهم غير أحمد.. ولا انا اصلا كنت احلم او اتخيل ان يكون ليا زوج زيه..

ف يا جماعه الزواج حلو فعلا.. الفكره ف اختياركوا لشريك حياتكوا.. الحياه مش بمبي بس ع الاقل هتلاقوا اللي بيساند وبيعين وبيطبطب وبيهتم وبيقدر.. ف اختاروا صح وضروري ضروري تصلوا استخاره وكمان تلتزموا بضوابط الخطوبه.. وقتها ان شاء الله هتلاقوا الامان والراحه والاستقرار..

وياريت يا هدير تكتري من القصص دي علشان البنات بقت تاخد بالمظاهر وحياة الانستجرام والسوشيال ميديا.. البعيده كل البعد عن تعاليم دينا وبقوا ينبهروا بيهم.. لكن انا اهو واحده ولا ظهرت ب اسمي ولا عاوزه اتشهر ولا حاجه.. وعايشه في هدوء واستقرار ولله الحمد..

 حبيت بس اشارك قصتي لعل وعسى تدي امل للبنات وتطمن قلوبهم وتخليهم يختاروا صح..

#حكاوي_هدير

#هدير_ابراهيم