فضل الصدقه

 #فضل_الصدقه !

هحكيلكوا موقف حصل معايا بيبين فضل #الصدقة وحبيت اشارك الناس بيه علشان يتيقنوا من ان (مَا نَقَصَ مَالُ عَبدٍ مِن صَدَقَة ) و ان (وَمَا أَنفَقْتُم مِّن شَيْءٍ فَهُوَ يُخْلِفُه) ويستشعروا معية الله في السر والعلن وألطافه الخفية بعباده...

اللي حصل ان والدي بيشتغل بره مصر  وباقي أسرتي موجودة في مصر.. ووالدي بيشتغل في التجارة.. فالطبيعي أنه لما بيجيب بضاعة لتجارته بيشتريها بكل ما يملك على اعتبار انه لما يبدأ يبيعها يجيب منها المصاريف.. يعني فلوسه كلها ف الشغل..

 وجات ظروف كورونا ومكانش حد يخطر ع باله اللي هيحصل ..

 وللأسف تاني يوم اشترى فيه البضاعة كل البلد وقفت تماما بسبب #فيروس كورونا  !!

ومعروف في بلاد الغرب أنه القوانين والتعاملات صارمة في الحظر فكان كل شئ متوقف تماما في البلد اللي فيها والدي.. حتى الخروج لانه يشتري احتياجات البيت كان صعب جدا...

ومن هنا كانت المشكلة؛ اخر ما يملكه والدي هو مبلغ بسيط جدا اللي بالكتير يعيشه #اسبوع واحد!!

وهو مريض سكر وضغط ومحتاج لعلاج وشرايط قياس السكر.. وفي وسط الظروف دي مكانش عارف يشتريهم  بسبب ان الفلوس اللي معاه مش هتكفي حاجه 💔 

بس حال اسرتي هنا في مصر كان نوعا ما كويس الحمد لله وكان معانا اللي يكفينا لمدة 3 شهور تقريبا.. وأنا بفضل الله بشتغل وبيكون معايا دخل فكان معايا مبلغ.. بس مكناش عارفين نبعت لوالدي اي فلوس.. لان احنا مش ضامنين الظروف وكمان المبلغ اللي هيتبعت هيتخصم منه فلوس كتير..

ومن هنا بقيت في حيرة لأني بخرج جزء من المبلغ صدقة ولكن في ظل الظروف ديه وان والدي -لا قدر الله- ممكن وضعه يسوء اكثر كنت محتاره هل اخرج صدقة ولا اسيب اللي معايا لعل اسرتي تحتاج.. بس ارجع تاني واقول طيب ووالدي هيعمل ايه!!

ولكن يشاء الله أن واحدة من معارفي تتصل بيا وتقولي عن حالتين محتاجين جدا للصدقة وموثوق فيهم فلو أعرف حد عايز يخرج صدقة اقولها عليهم...

وهنا فكرت كتير واحترت لأن والدي في الوقت ده كان أحوج الناس ولكن مش متاح ليا اني ابعتله فازاي اتصدق هنا ووالدي مش لاقي ياكل هناك!!! 

وسبحان من يُلهم عباده بفعل الخيرات! فألهمني بآية  ﴿ وَيُؤْثِرُونَ عَلَى أَنْفُسِهِمْ وَلَوْ كَانَ بِهِمْ خَصَاصَةٌ ﴾

مفكرتش بعدها..

 لبست ونزلت وخرّجت نصف المبلغ اللي معايا للبنت اللي عرفتني عن الحالتين 

من غير ما اعرّف والدتي ولا أي حد من أسرتي بالموضوع (لأني خوفت لو والدتي عرفت، خوفها من الظروف يخليها ترفض) 

بعدها بيومين بالظبط كان #الفرج من ربنا !

كانت والدتي بتكلم والدي وفضلت تشكر ربنا وظهر عليها الفرحة فلما سألتها حكتلي أن واحد عرف بالصدفة من صاحب والدي بالمشكلة اللي اتعرضلها فبعت له مبلغ (يكفيه لأكثر من #شهرين) 

ولما سألت والدتي المبلغ كام تخيلي بقى الدهشه!!

طلع نفس المبلغ بالظبط اللي تصدقت بيه قبلها بيومين👌

أول ما سمعت الرقم قمت بسرعة واختفيت عن نظرهم لأني ماتمالكتش نفسي من البكاء...

ومش بس كدا ، المبلغ اللي حصل عليه والدي هو نفس الرقم ولكن بعملة البلد اللي هو فيها.. يعني بيُعادل أضعاف مضاعفة من عملة مصر !

فسبحانه الكريم المعطي الرزاق..!!

وفعلا والله آمنت ان "ما نقص مال عبد من صدقة"!.

🌸🌸🌸🌸🌸🌸🌸🌸🌸🌸🌸

تطبيق ومثال بسيط ع فضل الصدقة وان مفعولها فعلا #سحر لو قدرنا نسيطر ع جشع نفوسنا ونتغلب عليه واحنا متيقنين ان ربنا هيرده اضعاف مضاعفه..

#حكاوي_هدير

#هدير_ابراهيم