قدر و لطف

 #قدر_ولطف !!

كلنا بلا استثناء بيحاوطنا #لطف_الله في كل لحظة من حياتنا بس اللي اكتشفته ان مش أي حد بياخد باله م دا.. يمكن علشان كدا بنفضل نلعن في حياتنا وكتير اوقات بتمر علينا بنتمنى فيها #الموت...

انا حياتي مثلا كان فيها لحظات لطف ربنا اكتر بس عيني مكانتش بتشوف غير لحظات التعاسة والموت بس لحد م ربنا بلطفه بردو بعتلي اللي يشيل الغمامة دي م على عيني وم وقتها وانا حياتي اتبدلت تماما...!

محبتش ابدأ قِصتي بداية مأساوية لأني أتمنى بجد تكون قِصة خفيفة عليكوا وتطمن قلوبكوا.. ونبدأ بقى في احداث القِصة...

كتير أهل بيرددو لولادهم في وقت غضب أو هزار انهم  مش ولادهم وجابوهم م على باب مسجد؛

الحقيقة إن الكلام دا كان بيتقالي بردو بس لأنه #حقيقي !!

انا عيشت طفولة حلوه ومبهجة جداً لحد م وصلت 8 سنين ومن وقتها تقريبا مشوفتش ولا يوم سعيد في حياتي ..

اهلي بعد م كانوا بيقولوا عليا دايما اني هدية ربنا ليهم بقوا بيكرهوني جدا م الوقت دا وبيتمنوا موتي او اني اختفي م حياتهم وخلاص،

كل دا حصل بعد اكتشاف أمي او يعني الست اللي عيشت في بيتها انها #حامل...

اللي عرفته انه بعد زواجهم اتأخروا في الحمل وفي يوم والناس خارجه م المسجد سمعوا بكاء طفل صغير الناس اتجمعت واقترحوا ان والدي (الشخص اللي اتربيت في بيته) ياخدني يربيني لحد م يشوفوا هيعملوا ايه

وبسبب تعلقه هو وزوجته بيا عملوا المستحيل علشان أعيش معاهم وآخد اسمهم.. وبسبب ظنهم انهم مستحيل يخلفوا كانوا بيقولوا عليا هدية ربنا ليهم..

حتى بعد م عرفوا خبر الحمل الناس كانت بتقولهم ان ربنا أكرمهم بلطفه بسبب رعايتهم ليا

بس انا م وقتها وانا كنت بردد ان دا لطفه بيهم لكن أنا فين من اللطف دا وليه حصل معايا كل اللي جاي دا !!

والدتي اتقلب حالها تماما ومبقتش بتطيق تلمسني ولا تشوفني.. الكل كان بيردد انه اكتئاب حامل وفتره وهتعدي لكن اللي حصل بعد الولاده كان أبشع..

طلبت من والدي انه يتخلص مني بما ان بقى عندهم #طفلة تانيه بس م دمهم

هو بصراحه كان بيحاول يهديها من ناحيتي وابدا م هنسى جميله عليا انه سابني اعيش في البيت معاهم حتى لو كانت حياتي في البيت دا كلها معاناه وألم.. بس لولا كدا كنت هرجع للشارع تاني..

تعرفي ي هدير إنها كانت دايما تقصلي شعري لمجرد ان بنتها قالت مره ليه شعري اطول م شعرها

م وقتها وكل م شعري يطول تقصه..

ملبستش ولا مره م عمر 8 سنين لبس عيد جديد

اصلا كان اعتمادي في الغالب ع لبس بنت جارتنا لما بيصغر عليها..

انا حتى فاكره وقت م بنتها سألتها ليه مش بتقولي اصلي انا كمان زيها تخيلي كان ردها عليها انها متعرفش #مِلة أهلي ايه م يمكن اهلي مش مسلمين وان اصلا #ولاد_الحرام مش بيتقبل منهم صلاة..متخيلة !!

انا كنت بفضل اعيط واسأل نفسي راحت فين الست اللي عمرها م شككتني لحظة طول سنين عمري ال 8 انها أمي !

دي كانت اوقات كتير بتنام جانبي وكانت تقولي ان مفيش حاجه بتسعدها اد حضني وانها تشم ريحتي !

إزاي في شخص عنده القدره العجيبه دي ع تحول كل الحب دا لكره بدون أي مقدمات أو اسباب !!

انا فضلت عايشه حياتي كلها احاول اعمل اي حاجه علشان ترجع تحبني وترضى عني تاني

كنت بدخل المطبخ معاها ومهما كانت قسوتها الا اني اتعلمت كل حاجه تخص الاكل والمطبخ وترتيب الشقه لمجرد انها تفرح اني بساعدها وبشيل عنها.. بس مفيش فايده !

كنت بجتهد جدا في مذاكرتي علشان ارفع راسها قدام كل قرايبنا وجيرانا زي م كانت بتقولي وانا صغيره بس بردو مفيش فايده

تخيلي انها عملتلي حفلة كبيرة لما اتخرجت م #الحضانة آه والله لكن لما طلعت من الاوائل ع مدرستي في ثانوية عامة ولا اهتمت اصلا ولا كانت شيفاني !

كنت كل م اسألها اعمل ايه طيب علشان افرحك وترجعي تحبيني من تاني كانت بتقولي ان مل امنيتها امي #اختفي من حياتهم..

انا بس كان نفسي أفهم ليه مقدرتش تحبني حتى لو بقدر بسيط..

ليه ربنا لما اداهم بنت من دمهم بلطفه سحب حبهم ليا كله م قلبهم ليه مكانش في جزء م اللطف دا ليا أنا كمان !

اكتر كلمه سمعتها ودني في البيت دا هي اني #بنت_حرام

طيب هو انا مكنتش بردو بنت حرام لما جابوني م الشارع

مكنوش يعرفوا يعني اني بنت حرام طول ال 8 سنين اللي كانوا بيرددوا فيهم اني هدية ربنا ليهم !

حياتي كان كلها وجع وألم وكنت شايفه ان مهما كان في حد حزين ف مفيش حد قلبه شايل كل الهم والحزن والوجع اللي قلبي شايله ومتحمله ..

حتى بعد م كبرت ودخلت الكلية مفيش ولد عرفته غير وكان عاوز يتسلى بيا بس..

والبنات كانوا بيشوفوا اني #دحيحة جدا ف مكانش في حد خالص قريب مني

كنت لوحدي تماما وبدأت م وقتها م استناش حب او اهتمام م حد ولا بقيت حتى اعمل حاجه علشان ابهر والدتي.. بالعكس دا انا بقيت اعمل اي حاجه علشان انفذ امنيتها وهي اني اختفي تماما م قدامها ف بدأت اشتغل من وانا في اولى جامعه واللي ساعدني ع كدا اني فعلا كنت حابه اوي المجال اللي دخلت فيه في كلية الإعلام ..

بدأت اشتغل واعتمد ع نفسي في مصاريفي وكل حاجه تخصني وكنت بتعمد ارجع البيت متأخر

في البدايه كنت بعمل كدا يمكن يقلقوا عليا بس للاسف زي م قولتلك انا كنت شبح غير مرئي

ف بقيت اتأخر علشان شغلي وعلشان اقلل من الاحتكاك بيهم

ولما كان بيحصل بينا ولو خلاف بسيط كانت تفضل تقولي اني فعلا بنت حرام لاني لا بشكر ولا بحمد ع انهم لسه سايبني في بيتهم ومرجعونيش للشارع تاني وان حتى اهلي الحقيقيين رموني !!

هي مره واحده بس بصراحه اللي فكرت فيها في #الانتحار بس مجرد م تخيلت اني هتشوي في نار جنهم فضلت استغفر ربنا واضرب نفسي وفضلت اردد ان لا نار الدنيا ولا اني اتشوي في نار الآخره

وم وقتها قررت اني اشغل نفسي بأي حاجه تهلكني عقليا وجسديا...

كنت شخص نشيط جدا في شغلي كان كل اللي معايا بيستغربوا نشاطي وبيقولوا عليا حمارة شغل.. 

دا اللي كان ماشي عليه نمط حياتي شغل وبس لحد م حصلتلي #حادثة من بعدها اتغيرت حياتي تماما..

بسبب الحادثة رجلي اتكسرت والدكتور منعني من الحركة وشغلي اللي كنت بديله كل مجهودي وطاقتي ووقتي اتخلوا عني بدل م يساعدوني ويقفوا جانبي.. ووالدتي كانت بتفضل تصرخ في وشي كل م اتحرك ف اوقع حاجه غصب عني

رجعت تاني في الوقت دا للصلاه رغم اني كنت بعيده جدا وقت م كان جسمي صحيح

بس فعلا كنت محتاجه اوي اتكلم واعيط واظن ان في حد سامعني 

كنت بقول ل ربنا يارب هو لطفك بيروح لكل الناس وبيجي عندي انا وبيقف ليه بس مكانش في رد !!

نسيت اقول ان عندي ميزه وهي #التحدي مش عارفه دي اكتسبتها م كتر م كنت بحاول اخلي والدتي ترجع تحبني ولا ايه وبرغم اني فشلت ف التحدي دا تحديدا الا ان مفيش اي تحدي تاني دخلته الا وكسبته، وبما ان قاعدتي في البيت كانت مطوله كنت محتاجه اشغل نفسي وعقلي في اي حاجة بس هي ايه مش عارفه

لدرجة اني والله م اليأس قولت بصوت عالي #لطفك بقى يارب ابعتلي اي حاجه م اللطف دا

لقيت اختي بصتلي وصرخت فيا اني اسكت شويه علشان تقدر تكمل اللي هي بتعمله

اختي كانت مهووسه بحاجه اسمها مسلسلات كورية او حاجه تخص كوريا عامة لدرجة انها بدأت تتعلم اللغة الكورية وبقى حلم ليها انها تسافر كوريا ولمجرد انها قالت ان اللغة صعبة أوي خاصة في الكتابة وقتها تحديدا عرفت ايه التحدي الجاي ليا 😃

وبدأت من وقتها اتعلم #اللغة_الكورية حتى بعد م اختي يأست وبطلت تتعلمها الا اني وبطريقة ما اتعلقت باللغة نفسها وكنت مصمم اكمل فيها

اينعم معرفش هستفيد منها في ايه ولا عمر كان حلمب اسافر كوريا الا اني كملت لحد م اخيرا اتعلمتها نطق وكتابة

كنت ببقى مبسوطه جدا وقت م اختي تشغل مسلسل كوري وانا اقعد اترجم من غير م ابص ع الشاشة

كانت سعادتي الحقيقية ان اختي لاول مره كانت تقع

 تضحك وتهزر معايا وكنا بنعمل دا طبعا من ورا والدتي...

نزلت شغل جديد وقولت هرجع تاني لحياتي القديمة وعادي انا راضية بس وقتها كانت والدتي اخدت قرارها بإني خلاص كبرت واقدر اعتمد ع نفسي واسيب البيت لان بنتها كبرت ومفيش حد هيتقدملها قبلي بما اني الكبيره

وهي كانت بتقولي انهم هيكونوا صاريحين مع اي حد هيتقدملي وهيعرفوهم اني مش بنتهم وانهم لقوني في الشارع وان اكيد مفيش ناس هترضى تجوزني لولادهم بالتالي نوفر ع نفسنا كل دا واني اكون ممتنه انها تغاضت عن كل السنين دي وسابتني عايشه معاهم واني خلاص لازم امشي...

امشي اروح فين بقى لا دا ولا يشغلها

وحتى لما حاولت استنجد بوالدي قالي انه كان بيحاول معاها كتير من وانا صغيره بس دلوقتي هو رأيه من رأيها واني فعلا لازم امشي وان حتى دور الايتام الاطفال مش بيعيشوا فيها طول حياتهم...

طلبت منهم مهله لحد م اشوف هعمل ايه

قالتلي قدامك اسبوع بالظبط كانوا مسافرين وقالتلي نرجع نلاقيكي مشيتي..

مفيش حد منهم اهتم حتى يسيبلي فلوس تساعدني ولا قالوا اسيب عنوان للمكان اللي هتنقل فيه ولا اي حاجه

بس انا اللي غبيه ناس ولا مره قلبهم اتحرك من ناحيتي م زمان هيخافوا عليا دلوقتي ليه !

اليوم دا قعدت اعيط جدا وزي م قولتلك لان ماليش حد احكيله كان دا السبب اللي بيخليني اروح اصلي

دعيت ودعيت واتوسلت وبكيت..

قاطع بُكايا رنة موبايلي.. مكنتش هرد بس احساس داخلي خلاني ارد والحمد لله فعلا اني رديت لانها كانت المكالمه اللي غيرت حياتي...

انا كنت نسيت تماما اني قولت في مره قدام حد في شغلي اني اتعلمت كوري

لقيت شخص بيكلمني يقولي انهم محتاجين حد ضروري يسافر شغل في كوريا وان في حد هو اللي رشحني ليه وبدأ يقول مميزات الشغل ع اساس يغريني اني اسافر وهو ميعرفش اني في الوقت دا وقعت ع الارض م كتر م كانت رجلي مش قادره تشيلني م الفرحة..

كانت دي أول مره في حياتي اسجد لربنا واصلي ركعتين شكر

كانت أول مره في حياتي يا هدير ادوق طعم البُكا في السجود من كتر الفرحة

والحمد لله مكانتش آخر مره ❤

كل حاجة حصلت بسرعه جداً وبلطف ربنا اتنقلت لمكان ولا كنت عمري احلم بيه اصلا واشتغلت في شركة من بداية م روحت وانا ملاحظه فيها اهتمام الكل بيا وتعاملهم معايا ب ود واحترام...

عارفه في تاني شهر ليا في شغلي كنت هعمل حادثة بس الحمد لله عدت ع خير وسمعت شخص لاول مره م وقت وصولي ل كوريا يتكلم بالعربي لا وتخيلي قال ايه

#قدر_ولطف !!

انا قعدت في الأرض وفضلت زي المجنونة اردد لطف !! لطف دي اللي هي من اللُطف !!

وبدأ شريط من لطف ربنا بيا طول حياتي يمر قدامي

م اول م وفرلي بيت اعيش تحت سقفه حتى لو اهله اتغيروا في معاملتهم معايا بس بطلفه حماني م الشارع..

لطفه بيا ان في عز الكسر اللي كنت بحس بيه في قلبي الا انه قواني واتعلمت ازاي اعتمد ع نفسي سواء في تعلم الطبخ او في دراستي وم بعدها شعلي..

لطفه بيا لما بعد عني اي شاب ممكن يإذيني خاصة وانا كنت في وقت محتاجه فيه اي ايد تطبطب عليا بس بلطفه قواني اني اتحمل واتجنب اي طبطبه مزيفة..

لطفه بيا وقت الحادثة واني اتعلمت وقتها اللغة اللي وصلتني للمكان اللي لمست فيه الراحة وبدأت احس بمعنى السعادة..

لطفة بيا في اللحظة دي حتى بإنه بعتلي شخص يذكرني بلطفه

وفي الوقت دا افتكرت الشخص اللي اتكلم بالعربي وفضلت ابص يمين وشمال بس كأنه اتبخر لدرجة اني شكيت انه مكانش موجود اصلا او ربنا بعتلي #ملاك من السما...

طلعت شغلي وانا نظرتي للحياة مختلفة وكلها تفاؤل وكنت عماله اردد ب ابتسامة اني كنت مغفلة تماما وعنيا معميه كل دا عن لطف ربنا اللي كان محاوطني في حياتي كلها لدرجة اني ضحكت وقولت بصوت عالي خلاص يارب انا هخجل اصلا بعد كدا اطلب منك لُطف جديد

بس طبعا مفيش دا مع ربنا وسمعت في اللحظة دي زميل ليا بينادي عليا وبيقولي اخيراً وصلتي تعالي بقى اعرفك ع الشخص اللي حكيتلك عنه

وبالظبط كدا طلع الشخص دا هو ذات نفسه بتاع قدر ولطف 😃

هو شخص لأب سوري وأم كورية علشان كدا بيتكلم عربي حتى لو العربي بتاعه مكسر بس ماشاء الله طلع خاتم القرآن كله وحقيقي وبفضل الله ولطفه طبعا اتعلمت منه كتير

ودا طبعا لانها كانت بالتأكيد فرصة لا تعوض واتجوزته 😃

لطف ربنا..لطف ربنا..لطف ربنا

لطف ربنا اللي خلاني اسافر ولوحدي من قارة لقارة بعد م كنت يأست اني فعلا ممكن الاقي ع رأي والدتي شخص يوافق يرتبط بيا وانا لا ليا اصل ولا نسب واحتمالة ان بنت زنا اكبر

خلاني اتحملت كل دا علشان في الآخر يوصلني للمحطة الأخيرة واللي فيها بدأت حياة جديدة ومختلفة ليا حتى لو حصل فيها عكوسات كحياة أي شخص إلا إن عيني كانت دايما تشوف كل اللطف اللي حواليا ومجرد تخيل قرب ربنا كان بيطمن قلبي...

وبلطفه بردو بقى عندي اطفال معروف نسبهم وربنا أراد ليهم أب صالح اللي هو بردو ليا نعم الزوج الصالح....

آسفه جداً لو طولت عليكوا بجد انا حاولت اختصر ع أد م اقدر انا نفسي بس تكون رسالتي وصلت واتمنى من ربنا قلوبكوا توصل لمرحلة الامان والاستقرار والراحة اللي وصل ليهم قلبي...

#حكاوي_هدير

#هدير_ابراهيم

لينك القصة علي قناتنا علي اليوتيوب

قدر ولطف - YouTube