ذات الرداء الأبيض (حياء)
#ذات_الرداء_الأبيض_حياء ❤
أول قِصة نزلتها والوحيدة اللي هيفضل أثرها ف قلبي لحد م اموت 💜 لأن احداث قصتها حصلتلي انا ف هي مش مجرد قصه جاتلي وكتبتها.. لا دي احداثها اتكتبت بدموع قلبي قبل عيني..
هاشتاج قصصنا 👇
#قصص_واقعيه_لهدير_ابراهيم 💌
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
الاثنين 2015\05\25 يوم لن انساه مدي حياتي .....
شوفت حلم غريب صحيت منه مش بس خايفه لا كنت مرعوبه، لان معظم احلامي بتتحقق ....
حلمت بشخصية كانت مقربه مني جدا لكن حصل خلاف بينا وكنا بعدنا قبل الحلم دا بشهور ...
بس جاتلي في الحلم 4 مرات في نفس الليله وبنفس احداث الحلم مفيش حدث واحد منه اختلف ...
اول مره صحيت ع اذان العصر وانا بردد الشهاده وصاحيه ع بكاء شديد وفجأه ضحكت وشويه ورجعت ابكي م تاني .... قعدت ع سريري وبدأت افتكر احداث حلمي واللي كان كالتالي :
جاتلي صاحبتي وهي مبتسمه وبتقولي :
هدير انزلي بكره اشتري بيشه " تقصد بيهل التُل الخفيف اللي بينزل ع النقاب وبيداري العيون" ...
قولتلها : كدا كدا انا ف نيتي اشتري واحده جديده للنقاب بس مش ف يوم امتحاني لانه بيكون يوم متعب جداااااا امتحان ودرس وصيام وحر فهجيبها ان شاء الله يوم تاني ...
قالتلي : بكره يا هدير هاتيها بكره يا هدير ...
قولتلها اشمعني بكره يابنتي بس فرقت ايه م انا عندي نقاب نازل منه بيشه اصلا !!
قالتلي : روحي بس سنتر ف شارع كذا ووصفتلي مكان سنتر اول مره اعرفه ...
قولتلها : بس انا معرفش المكان دا واصلا في مكان تاني هجيبها منه ...
قالتلي : اسمعي مني وروحي المكان دا وهتلاقي مفاجأه فيه مستنياكي 😉
قولتلها : الله مفاجأه طيب هي ايه !!!!؟؟؟
قالتلي :وهتبقي مفاجأه ازاي يا ذكيه !
قولتلها : بالله تقولي او حتى عرفيني هعرفها ازاي دي؟
اول م اروح هلاقيها ف وشي يعني ؟!
يعني هلاقيها ف السنتر دا ولا مكان قريب منه !!؟؟ فضلت اسألها كتير
بس قالتلي : بكره يا هدير بكره ...
قولتلها : طيب هعرفها ازااااااي قولي اي حاجه طيب..
قالتلي : بصي اول م تلاقي نفسك قلبتي طفله وهبلك وجنانك اشتغل اعرفي انك وصلتي للمفاجأه ... بس خدي بالك يا هدير هي ليكي وف نفس الوقت مش ليكي.
قولتلها : نعم ؟!! عروستي ؟؟!! ايه الالغاز دي يا بنتي فهميني طيب قولي حتي كلمه واحده بس افهم اي حاجه ...
قالتلي : موت ....
قولتلها : موت؟! المفاجأه موت !! انا مش فاهمه حاجه !
قالتلي : بكره يا دودو بكره متستعجليش ...
قولتلها : طيب دا موتي انا ولا موت حد اعرفه طيب ؟؟!!
قالتلي : بكره يا دودو بكره ....
قولتلها : انتِ وحشه ورخمه ....
ضحكتك وقالتلي باااردو بكره وقالتلي : اه صحيح دودو قوليلها تدعيلي ..
قولتلها : هي مين دي ؟؟!!!
قالتلي : اوعي تنسي بس قوليلها تدعيلي اكيد يا دودو ومتنسيش بالله ....
قولتلها : طيب بس هي مييييييييين فهميني ؟؟!!
قالتلي : بكره يا دودو بكره ....
وبعدها صحيت ع صوت الاذان وانا بردد الشهاده ببكاء شديد وبعدها ضحك وبعده بكاء اشد ....
اتكرر الحلم قبل صلاه المغرب والمره التالته كانت قبل صلاه العشاء بنفس الاحداث بالظبط اصحى ع صوت الاذان وترديد الشهاده ونفس البكاء والضحك ....
والمدهش ان في كل اوقات الحلم دت كنت قاعده بذاكر اصلا لامتحاني لكن كنت بغمض عيني واغفو م غير م احس بنفسي الا ع صوت الاذان ....
كتر التفكير في الحلم دا تعبتني جدا وخاصه انه تكرر ثلاث مرات ...
كلمت اصحابي حكيتلهم الحلم وشغلتهم معايا وتعبتهم لان الكل كان متوقع كلمة موت دلاله ع موتي انا لان قبل الحلم دا بحوالي 3 شهور كانت حياتي اتغيرت تماما ورجعت للإسلام مره تانيه بعد فترة إلحاد استمرت سنين!
فضلت تعبانه وعقلي تعب م كتر التفكير لوقت صلاه القيام قلبي ارتاح بمجرد م صليت بس للأسف م غير م احس ميلت ونمت ع سجاده الصلاه لقبل اذان الفجر وحلمت نفس الحلم للمره الأخيره 😞
صحيت ونزلت لامتحاني وانا مش مستعده ابدا ولا مُهيأه لدخول الامتحان ... بس اتحاملت ع نفسي ودعيت ربنا انه يمدني بقوه من عنده ....
مر وقت الامتحان وخرجت ع درس التجويد ...
حاولت قدر الامكان اني اكون طبيعيه بس ظهر عليا اثر التفكير وعدم النوم ...
سألتني مُعلمتي عن اللي شاغل عقلي لان باين عليا جدا اني تعبانه ومتوتره وقلقانه ؟؟!!
فحكيت لها حلمي وان احلامي دايما بتتحقق ودا اللي راعبني....
قالت لي انها زيي بالظبط وهي كمان احلامها كلها بتتحقق وانها حاسه باللي فيا..
وبدأت تهديني وتقولي حاولي متشغليش تفكيرك كتير وارجعي البيت خدي حباية مهدئ ونامي ....
قولتلها لا هشتري الحاجه اللي ف الحلم الاول ....
قالتلي تمام بس طمنيني عليكِ بمجرد م تخلصي وترجعي البيت ....
خرجت من المقرأه ولقيت رجلي وخداني للمسجد
صليت ودعيت ربنا كتير بالصبر والثبات ....
واستجمعت قوتي وخرجت م المسجد علشان اروح المكان المجهول ....
بدأت اسأل ف الشارع اللي دلتني عليه صاحبتي عن سنتر للمنتقبات لحد م لقيته ... وكل م قربت منه كل م كانت ضربات قلبي تزديد لحد م وصلت ودخلته .....
بمجرد دخولي سألت هل في بيشه للنقاب ؟؟!!
ردت عليا بنت كانت مشغوله في حاجة بتظبطها ف ركن من المحل ... وقالتلي: ايوه في ثانيه واحده..
وبمجرد م اتحركت لاقيت وراها حاجه خلتني واقفه متنحه م المنظر
كان في نقاب ابيض عليه تاج ..... نقاب اول مره اشوف زيه ف حياتي بيخطف العين م الوهله الاولى حتى التاج اللي كان عليه تحس انهم بيكملوا بعض وبيمثلوا سوا تحفه فنيه..
وقفت جنبه وقولتلها بصي دا عاوزاه... عاوزه دا لو سمحتي .... لو سمحتي عاوزه دا....
ف البنت بصتلي باستغراب وضحكت جدا وقالتلي بتفكريني بالاطفال لما يشوفوا حاجه ويشبطوا فيها ...
كررت عليها طلبي تاني واني عاوزاهم
فقالتلي ان حظي حلو وان دي القطعه الوحيده ومفيش زيها تاني في المحل ..وع حظي كانت لسه بتخرجهم من اكياسهم علشان تحطهم مكان العرض معنى اني اول واحده شوفتهم والحقيقه اني وقعت ف غرامهم م الوهلة الاولى لدرجة اني اصلا نسيت اني رايحه المكان دا علشان اشتري بيشه للنقاب مش نقاب وتاج !
المهم اني ف النهايه اشتريت النقاب الابيض والبيشه والتاج ومشيت وبدأت استرجع احداث الحلم تاني ..
انا اشتريت البيشه اهو ف هل النقاب الابيض والتاج هما المفاجأه ؟! .... ولو فعلا هي طيب ازاي انها ليا وف نفس الوقت مش ليا ؟!
طيب هل ههادي بيها واحده صاحبتي ؟ اسئله كتير خطرت ع بالي.. لحد م لاقيت نفسي بقرب م المسجد علشان صلاة العصر.. وبمجرد م قربت م الشارع اللي قبل المسجد ع طول سمعت صوت بنت بتصرخ.. روحت بسرعه اشوف في ايه ؟ وانصدمت لما لاقيت بنت وفي شباب بيضايقوها لدرجة انهم خلعوا عنها الحجاب وشعرها كان باين ورقبتها وهما مصممين يتحسسوا جسمها وبيضحكوا باستمتاع وهي بتصرخ والادهش بقى ان كان في ناس رايحه جايه عادي.. هو ايوه شارع جانبي بس الناس كانت بتمشي وتبص ناحيتهم وبعدين يكملوا طريقهم عادي ! للأسف دي كانت من اصعب السنين اللي مرت بيها مصر وكانت الفوضى منتشره في كل مكان ومفيش أمان في الشوارع والكل بقى خايف ع نفسه م البلطجيه وبيقول يلا نفسي..
والالعن بقى لما تلاقي حد معدي وبدل م يسكت زي غيره او يساعد لا يقول بكل بجاحه ان البنات اللي زيها يستاهلوا يتعمل فيهم كدا واكتر بسبب لبسهم المستفز !
وانا في وسط كل دا واقفه قريب منهم مفيش في ايدي حاجه غير اني واقفه ببكي ع حالها وع حالي وبتخيل نفسي قبل 3 شهور بالظبط كنت زيها في تبرجها وفي طريقة لبسها ... تخيلت نفسي مكانها وازداد بكائي 💔
وفجأه لقيت نفسي بجري ناحية مسجد الدماطي اللي كان اقرب مسجد ف المكان ولقيت مجموعه من الشباب بيستعدوا للدخول لصلاة العصر ف جريت ع واحد منهم وشديته م غير وعي او تفكير من كم التي_شيرت بتاعه .... وكنت بعيط بطريقه هيستريه ...،
استغرب الشباب حالي وخاصة اللي انا متشعلقه بكم تيشرته وكل اللي طالع عليا اني كنت بشده علشان يجي ورايا ... وفعلا لقيتهم كلهم جم ورانا لحد م وصلنا لمكان البنت .. وبمجرد وصولنا فهموا الموقف وبسرعه جريوا ع البنت خلصوها م ايديهم واتجمعوا عليهم ضربوهم وانا جريت عليها بسرعه وطلعت النقاب الابيض اللي لسه شارياه ولفيته عليها وبدأت اهديها واحنا الاتنين اصلا بنعيط !
اخدتها وبعدنا وقولتلها تعالي معايا نطلع المسجد.. مسكت ايديها وضميتها ليا وهي بترتعش جدااااا ....
طلعنا المسجد وقولتلها ادخلي اتوضي علشان تبدأي تهدي وتطمني .... وقفت تتوضا وكنت بسندها علشان متقعش لانها لسه تحت تأثير الخوف والصدمه لحد م خلصت وضوء وقعدت علشان تصلي لان رجليها مكانتش مساعداها انها تقف عليها .. جبتلها اسدال صلاة م الخاصين بالمسجد.. ساعدتها تلبسه وبعد م خلصت صلاه وبدأت تهدى شويه وتطمن بدأنا نتكلم وسألتني انا ليه لابسه النقاب ؟؟!!
ف قولتلها ان حكايتي مع النقاب تعتبر روايه في حد ذاتها.. روايه من عالم الخيال والاساطير لاني كنت قبل 3 شهور بالظبط بنت ملحده خرجت م الاسلام وفي خلال 18 يوم بس م قراري اني ادي لنفسي اخر فرصه وادور ف الاسلام مش بس رجعتله لا دا في اليوم ال 18 كنت لابسه النقاب.. وم وقتها ولحد يومنا دا وانا معجزات كتير بتحصل في حياتي..وكل حاجه ف حياتي اتغيرت سواء لبسي او تفكيري او حتى اصحابي ! قولتلها ان قصتي باختصار كانت دعوه بالستر ... وبدأت احكيلها كل التفاصيل.... وبعد م خلصنا كلام صلينا العصر.. ولاحظت انها لسه لابسه الخِمار الخاص بالنقاب ولما بدأت اساعدها انها تخلعه خاصة لو مضايقها اندهشت لما لاقيتها متمسكه بيه وقالتلي ممكن تسيبيني لبساه شويه !!؟؟
ضحكت وقولتلها ماشي افرحيلك بيه شويه دا نقاب ابيض ربنا يرزقك لبسه ياااارب بس ابقي اعزميني وانا البسهولك 😉 فقالتلي انتِ فعلا لبستيهولي خلاص ...
قولتلها: مش فاهمه؟ ... فقالتلي: ممكن اطلب طلب ... ؟؟!!
قولتلها: طبعا اتفضلي ...
قالتلي: وب انتِ شاريه النقاب دا لفرحك ؟!!
قولتلها: لا انا تقريبا حلمت بيه ....
قالتلي: حلمتي بيه ازاي مش فاهمه؟
قولتها: موضوع طويل المهم ايه هو الطلب ... ؟؟!!
قالتلي: ممكن اشتريه منك حابه اني م اخرجش من هنا غير وانا لابسه النقاب ...
طبعا انا تنحت!!!!
سألتها وانا كلي اندهاش:انتِ بتتكلمي جد ؟؟!!! يعني هتلبسي النقاب بجد ؟؟!!! طيب ايه السبب ؟؟!!
قالتلي: يكفي انه سترني وكمان علشان اتأثرت جدا بقصتك انتِ كمان وازاي لبستيه وكدا ...
وطول م انتِ بتحكي اتمنيت لو كانت قصتك الغريبه العجيبه دي حصلت معايا انا كمان..
رديت عليها ان قصتها هب الاغرب..
فضلنا نكرر لبعض ان كل واحده فينا قصتها اغرب وضحكنا كتير
وبعدين سألتني هو انا هخرج بيه م المسجد كدا ازاي ع لبسي دا ؟
قولتلها استني هستأذن م مشرفة المسجد اننا ناخد الاسدال ونرجعه بكره ان شاء الله.. بس افتكرت حاجه تانيه وهي ان النقاب لونه الابيض ملفت جدا ف هتنزل بيه الشارع ازاي هو كمان وف لحظتها افتكرت البيشه وكان لونها اسود وطويله.. اول مره اشوف زيها في طولها خاصة اني عارفه ان حجمها ع النقاب بيكون بسيط لان مهمتها تغطي العين بس.. لكن سبحان الله وكأن دي وجدت مخصوص للنقاب دا وللموقف دا !
قولتلها بصي هتلبسي دي لحد م ننزل دلوقتي ونروح نتشريلك سوا نقاب اسود.. وبمجرد م خرجت البيشه م الشنطه ظهر التاج اللي كنت نسياه هو كمان وبمجرد م هي شافته اتمسكت بيه وانها عاوزه تشتريه هو كمان وهنا افتكرت الحلم وان المفاجأه ليا وف نفس الوقت مش ليا ... ف قررت اني ههاديها بيهم وكنت مبسوطه جدا م جوايا وحاسه براحه غريبه..
واخترت لها اسدال لونه غامق وظبطلها النقاب وعليه البيشه والتاج وفضلت اضحك ع شكلها فسألتني :هنزل زي الهبله كدا ازاي؟😃
قولتلها دا انتِ عروسه زي القمر وربنا
وقعدنا نضحك لحد م افتكرت حاجه فقولتلها :
تعالي هنا يا ذات النقاب الابيض ..... علقتي مني النقاب الابيض بتاعي وكمان البيشه وفوقيهم التاج ولسه لحد دلوقتي معرفتش اسمك 😏
قولتلها: انا هدير 😉 فقالت لي وانا حياء :)
قولتلها: نعم هنهزر بقى ! اسمك ايه بجد والله !!
قالتلي والله حياء انتِ ليه مستغربه💔 علشان لبسي يعني 😞
قولتلها لا والله العظيم ابدا بس دا لاني اول مره اقابل بنت اسمها حياء كمان دا الاسم اللي بتمني اسميه لبنتي ان شاء الله لما ربنا يرزقني :)
ضحكت وقالتلي يا بختها بيكِ 😉
قولتلها:اتلهي دا انا هبقي ام مجنونه وهكون طفله اكتر من بنتي 😂
وانتِ ربنا يرزقك الزوج الصالح والذريه الصالحه ياااارب ....
فظهر ع وشها الحزن فجأه 😞 سألتها باستغراب: مالك ؟!
فقالت انها كانت مخطوبه لواحد اسمه عمار بس مات الله يرحمه من شهور في حادثة عربية..مات وهو صايم 💔
فقولت لها يااااااا بخته يابنتي نحتسبه عند الله شهيد ان شاء الله .....
ع فكره بحب الاسم دا جدا عمار بن ياسر ❤
فضحكت وقالت انها كانت بتنادي عليه دايما بعمار بن ياسر بردو..
كلمتني عنه كتير وانه كان شخص متدين وكان بيحاول معها كتير علشان تغير طريقة لبسها ونظام حياتها... بس هي كانت بترد عليه وتقوله مش هتغير دلوقتي هتفير في جنتك ان شاء الله " تقصد بيها بيت الزوجية"
ولكن القدر وكلمة الله كانت فوق كل شئ ....
وسألتني فجأة: ايه اكتر دعاء بتدعي بيه لنفسك وبتتمنيه ... ؟؟!!
قولتلها : اني اموت شهيده :)
فسألتني:تموتي شهيده ازاي يعني؟ انتِ بتنزلي مظاهرات وكدا ولا ايه ؟ 😃
قولتها لا من موت الشهاده : انك تتوفي وانتِ بتدافعي عن عرضك او اهل بيتك او كنتِ ف طلب العلم وتوفيتي وبردو لو اتوفت بنت ومكانتش اتجوزت فهي بإذن الله شهيده وفي امثله تانيه مختلفه ....
قالتلي ادعيلي دايما بنفس الدعاء دا ... قولتلها ليه عاوزه تعملي حادثه وتبقي شهيده وكمان متجوزتيش ف الدنيا ف تتجوزي عمار ف الجنه وغمزتلها بعيني 😉
فقالتلي بجد ينفع اتجوزه ف الجنه ؟!
قولتلها ان شاء الله .... يلا بقي موتي علشان سيباه لوحده كل دا 😂
قالتلي طيب ادعيلي ادخل الجنه الاقيه فيه ونتجوز وافضل معاه للابد💔
قولتلها دعيتلك خلاص والله ....
ياااارب يا حياء يا بنت طنط ام حياء تتجوزي عمار ف الجنه عاجلا ليس بآجلا علشان نخلص منك ونرتاح 😀
ضحكت وقالت امييييين اللهم استجب ....
فقولت لها يلا ي حجه كدا هتأخر وانا صايمه وكمان لسه هنشتريلك نقاب وحاجات..
فسألتني: انتِ صايمة ليه ؟؟!!!
رديت اني صايمة علشان النهارده الاتنين وصيامه سُنه ...
قالتلي: طيب انا مأكلتش خااالص ينفع انوي الصيام واصوم ...!!؟؟ قولتلها مش عارفه ومش هقدر افتيكِ انا لسه معلوماتي ع ادي ف الدين..ف رنيت ع هاجر صاحبتي سألتها ف هي راحت سألت مامتها اللي كان ردها انه ان شاء الله صيامها صحيح .... ففرحت جدااا ....
نزلنا من المسجد وكل واحده فينا جواها شعور مختلف .... هي مبقتش نفس البنت اللي طلعت المسجد م دقايق.. وبالنسبالي ف انا حسيت ان قلبي ارتاح لتفسير الحلم .... وطبيعي اني فسرت كلمه الموت وربطته بموت خطيبها عمار ....
بس حصلت حاجه ضايقتني ان الكلام اخدنا واحنا في طريقنا علشان نشتري النقاب .... وعدينا جنب مستشفي الامريكان .... وكل المقربين مني عارفين اني بكره المستشفي دي جدااا.. وكل ما بعدي جنبها بحس اني شامه رائحه الموت ..... كمان اتوفت فيها اقرب الناس لقلبي جدتي العزيزه مريم 😞 ف م وقتها وانا بكرهه المكان كله...
ولسه هغير الاتجاه لشارع تاني لاقيت حياء فجأه قالتلي تعالي ندخل نسلم ع لولي اخت عمار هي دكتوره هنا وكمان اوريها المفاجأه دي هتفرح اوي ....
قولتلها بلاش يا حياء مره تانيه انا بكررره المستشفي دي ومش عاوزه اعدي من جنبها اصلا ..... تعالي نعدي الطريق الناحيه التانيه لو سمحتي ...
قالتلي حاضر حبيبتي خلاص تعالي بس متضايقيش نفسك.. قولتلها لا مش متضايقه تعالي بقى ناحية العربيات علشان انا بخاف
قالتلي هههههههه اصغر منك ب سنتين وحسيتك بنتي 😃 قولتلها طيب يلا يا مامتي :)
ولسه بنعدي ....
فجأه العبايه لانها طويله ولاني مكنتش لسه اتعودت ع لبس العبايات دوست بالكوتشي عليها من الضهر ورجعت خطوه لورا وكانت حياء متقدمه عني خطوه واحده بس بصتلي بسرعه اول م اتأوهت بصوت ومدتلي ايديها امسكها علشان م اقعش بس فجأه ايديها اختفت وفي ظرف ثواني لاقيت حياء ممده ع الارض
جريت بسرعه اتطمن عليها وقولت لها انتِ كويسه ؟! فضحكت وقالتلي الحمد لله ونزل صاحب العربيه اللي خبطها علشان يتطمن عليها ... فقالتله انها كويسه واعتذرت لان الغلط من عندها هي لانها كانت بتبص وراها ومكانتش منتبهه للطريق.. فعرض عليها انه يدخلها المستشفي بس هي رفضت لان كان معاه اطفاله في العربيه.... ف سابنا ومشي وهو بيدعيلها ....
بعدها قولت لها حاسه بإيه قالتلي هو في دم قولتلها لا مفيش..بس هو انتِ بجد كويسه ؟؟!!!
قالتلي الحمد لله بس مش حاسه بجسمي مش عارفه ليه ؟؟!!
قولتلها خلاص تعالي يلا ندخل المستشفي..
سندت عليا وبدأت اهزر معاها ولكن بمجرد دخولنا المستشفي ومع انها كانت ماشيه جنبي ع رجليها ومش بتشتكي م حاجه الا ان كلمه الموت اللي اتقالتلي ف الحلم فضلت اسمعها في ودني ... وبدأ قلبي يدفق بسرعه جدا لدرجة حسيته هيقف ف اي لحظه م كتر الخوف والتوتر..
فسألتها تاني وانا بحاول امسك نفسي اتي معيطش: حياء انتِ متأكده انك بخير ي حبيبتي ... ابتسمتلي وقالت انا كويسه جدا والله...
دخلنا المستشفى وسألنا ع اخت خطيبها الله يرحمه.. بس فجأه لاقيت حياء بتقول لولي اهي استني علشان مش هتعرفني وانا لابسه النقاب ..
ف نادتلها حياء وقالتلها انها مفاجأه غير متوقعه.. وقفوا يتكلموا وكانت بتضحك برغم ألمها اللي اخفته عننا 😞
وبعدين اخدتنا للدكتور علشان نتطمن عليها..
وصلتنا للدكتور واستأذنت انها دقايق وهترجع علشان تطمن عليها ودا بعد م حياء اكدتلها انها بخير..
وقفت وانا ع احر من الجمر مستنيه تشخيص الدكتور وبحاول ع اد م اقدر ابعد عن تفكيري الموت وريحته.. لحد م لقيت الدكتور قرب مني وقالي مش باقيلها كتير وهتمشي..
فحمدت ربنا وقولتله يعني هنمشي دلوقتي عادي؟!! يعني هي الحمد لله كويسه ؟؟!!
بس لقيته بيبصلي نظره كلها حزن وقالي روحيلها وساعديها تنطق الشهاده بما انكوا مسلمين !
رديت م غير وعي : اقوللها الشهاده ؟؟؟!!! شهادة ايه مش حضرتك لسه قايل اننا شويه وهنمشي؟؟!!!
ف قالي: لا انا قولتلك ان فاضلها هي شويه وهتمشي !
قولتله وانا حاسه اني هيغمى عليا وعقلي مش مستوعب الكلام : ازاي طيب وهي مش بتشتكي من حاجه؟!
رد وقالي: ربنا يصبرك ويصبر اهلها 💔
روحت اجري عليها وانا بعيط مش عارفه ازاي وامتى بس دموعي غلبتني وفضلت تنزل م غير م تقف.. ولقيتها بتسألني:بتعيطي ليه يا دودو .....
بصيتلها باندهاش وقولتلها: دودو !!؟؟؟
اه صح حياء ادعي لصاحبتي اللي جاتلي في الحلم..ادعيلها دلوقتي ....ف ابتسمتلي ودعتلها..
سألتها: حياء حاسه ب ايه دلوقتي؟
قالتلي: مش انتِ قولتيلي ان اول يوم لبستي فيه النقاب حسيتي وكأن الملايكه نازله الارض علشان تهنيكِ عليه.. انا بقى حاسه ان الملايكه نازله الارض علشان تزفني عروسة لعمار.. هدير مش دي دعوتك ليا مش مصدقه ان ربنا استجابها بالسرعه دي..
فضلت اعيط اكتر وقولتلها بس انتِ مش حاسه بألم ولا وجع صح؟!
سألتني : تفتكري ان دا معناه ان ربنا غفرلي ورضي عني يا هدير ف مخلنيش حاسه بأي وجع وكمان بعتك ليا بالنقاب وكمان تاج ولسه مصليه م شويه وناويه الصيام وعملت حادثه..هو انا بحلم يا هدير .... ؟؟!!!
قولتلها وانا بعيط:حلم ايه ياريتني م نمت ولا حلمت
فضلت اكررلها وانا بعيط اني بحبها في الله😭
قالتلي انها كمان بتحبني وفجأه لقيتها بتردد اسمه ! اسم اللي مستنيها فوق وهتجتمع بيه ف الجنه ان شاء الله.. فضلت تردد اسم عمار..
وقتها اتأكدت خلاص انها فعلا خلاص هتمشي😭
ضميتها لصدري وقولتلها وانا بكايا بيزيد انها تردد الشهاده ورايا 😭
قولي اشهد ان لا اله الا الله وان محمد رسول الله
بس هي كانت بتبصلي وتبتسم بس ..... وانا اكررلها وانا ببكي :
حياء بالله عليكي رددي ورايا يا حبيبتي 😭
كررتها اكثر من مره لحد م لقيتها بتقولي: انا بجد شايفاه
وابتسامتها بتزيد وباصه ف اتجاه تاني.. وانا اكررلها حياء رددي ورايا.. حياء قولي:
اشهد ان لا اله الا الله وان محمد رسول الله
وفجأه بصتلي وقالتلي:ربنا يسترك زي م سترتيني
اشهد ان لا اله الا الله وان محمد رسول الله ....
وف اللحظة دي فاضت الروح الى خالقها 😭😭😭 اتوفت وهي صايمه وترتدي رداء امهات المؤمنين ..... اتوفت وزفتها الملائكه عروس الى الجنه وإلى عمار !!
اتوفيت حياء بعد اتغيرت تماما في اقل من ساعتين ..... ف احسن الله خاتمتها ❤
وهنا دخلت الدكتوره اخت عمار وابتسمت وقالت انها كانت حاسه بوفاتها لان اخوها جالها ف الحلم م ايام وقالها انه منتظر حياء تروحله..
احلام تاني !!
خرجت اجررري من المستشفى وانا دموعي مغرقه وشي ونقابي..
طلعت اجري وكأني لما اهرب هنسى كل اللي حصل ويطلع كل دا وهم او حلم.. بس للأسف مكانش حلم💔
رجعت بيتي وماما اتخضت لما شافتني واقعه ع السلم ومن سبع سنين ولحد النهارده أختي الصغيره رِوان عمرها م نسيت المشهد دا ولا اتحذف م ذاكرتها رغم ان وقتها كان عندها اقل من عشر سنين.. الا انها دايما بتفتكر اليوم دا وبتذكرني دايما بحياء وبتدعيلها.. ومش بس رِوان اللي لسه فاكراها.. لا بنات كتير..
ودا لاني فتحت الفيس بوك في اليوم دا وم غير تفكير كتبت كل الاحداث دي مش عارفه ولا فاكره كتبت ازاي او قدرت استجمع قوايا اني اكتب.. بس كان كل همي ان الناس تدعيلها لان دي كانت اول ليله ليها في القبر 💔
خلصت كتابه ورفعت البوست وقفلت كل حاجه.. مكنتش عاوزه اتواصل مع اي حد.. اصحاب كتير حاولوا يوصلولي لحد م لقيت صاحبتي بتكلمني على التليفون الارضي وبتقولي افتحي الفيس بسرعه ناس كتير بتدعي لحياء وبنات كتير قرروا يلبسوا النقاب بسببها..وناس كتير قرروا يعملولها عمره.. مكنتش مصدقه نفسي.. واكتملت بإن اول جمعه بعد وفاتها في شيخ مشهور عرف قصتها وكانت خطبة الجمعه عنها.. شوفت كل دا ومكنتش مصدقه نفسي وفضلت اتعجب واقول سبحان الله اكيد في سر بينها وبين ربنا..
الله يرحمها هي وجميع موتى المسلمين 💔
🎀🎀🎀🎀🎀🎀
مر سبع سنين والناس لسه فاكره قصة حياء وعمار وفي بنات ربنا رزقهم توأم ف سموهم بأسمائهم.. وبنات كتير سموا حياء ع اسمها..
سبع سنين ولسه الناس بتدعيلها وبنات حياتها بتتغير بسببها وحتى أيام الكورونا اتعملها حج وعمره.. ف سبحان الله رزقها واسع وربنا يرحمها هي وجميع موتى المسلمين ويلحقنا بيها ع خير❤
بسأل نفسي لحد النهارده ايه اللي بينها وبين ربنا سواء هي او عمار علشان يحصل كل دا.. وبتمنى من كل قلبي ان ربنا يجمعهم ويكونوا زوجين في الجنه❤
🎀🎀🎀🎀🎀🎀🎀🎀🎀🎀🎀🎀🎀🎀
عمري م نسيتها طول ال7 سنين اللي فاتوا ولا لحظة ❤ معرفتي بيها كانت ساعات قليلة لكنها غيرت وبتغير لسه كل حياتي...
#حكاوي_هدير
#هدير_ابراهيم
لينك القصة علي قناتنا علي اليوتيوب
واخيرا ❤
ردحذفهي الكورونا بقالها سبع سنين الله اعلم
حذففاللهم حسن الخاتمه
ردحذفربنا يرحمهم ويغفر لهم ويجعلهم من أهل الفردوس الاعلى 💙💙
ماشاء الله تبارك الله بجد عمري ما تخيلت إن حاجه زي دي ممكن تحصل حقيقه كدا يارب اكتب لنا حسن الخاتمة يارب العالمين
ردحذفسبحان الله اللهم حسن الخاتمة اللهم توفني وانت راضى عني امين ربنا يرحمك يا حياء ويغفر لك امين
ردحذف❤❤❤❤❤❤
ردحذفربنا يهدى اولاد المسلمين جميعا
ردحذفربنا يرحمها ويغفرلها طول القصه وانا ببكى ربنا يجعل مسكنهم الفردوس الاعلي ربنا يسترنا احنا كمان😭😭😭😭😭😭
ردحذف