عشقت قدري
#عشقت_قدري !!
ربنا مش بيعذبنا ، بيفضل يبعتلنا ف رسايل وتحذيرات كتيييير ولما بنصدها كلها بيبعتلنا #ابتلاء اكبر ، بس بيكون اللي ورا الابتلاء دا رحمه اكبر واكبر م ربنا ....
#قصص_واقعيه_لهدير_ابراهيم 💌
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
حكايتي ممكن تكون مستفزه لبعض الناس والبعض الآخر ممكن يشوف نفسه فيها او حد يعرفه مر بأحداث مقاربه ...
حكايتي عن حُب #ابن_الجيران !!
مش عارفه هو عيب ثقافه ولا مجتمع ولا ظروف البيئه اللي حوالينا ، بس انا اتربيت ع كلمة ممنوع وعيب ، كل حاجه عيب وممنوعه ، ولأن الممنوع ف الغالب مرغوب ف انا كانت حياتي ماشيه بالنظام دا ، كل ممنوع عندي مرغوب ، وكان اولهم وآخرهم الاختلاط بابن الجيران ومش بس كدا انا كنت متخيله اني عشقته لدرجة انه كان والعياذ بالله بالنسبالي اعلى م الرب !!
بدأت احس بمشاعر ليه من المرحله الإعداديه .. هو اكبر مني بسنتين بس ، كان كلامه كله اوامر تنفذ بدون اي نقاش ، كبرنا سوا وحبي ليه بيكبر جوايا ع الرغم م قسوته في اوقات كتير عليا ، الا انه كان بيبرر قسوته بإنه بيخاف عليا !!
مش عارفه شوفت فيه ايه علقني بيه للدرجه دي ، يمكن لأني بعيده كل البُعد عن اهلي !؟
أب مشغول دايما بيجي م شغله ياكل وينام وينزل بالليل ع القهوه يطلع منها ينام وهكذا ، مفتكرش مره انه قعد يتكلم مع حد فينا انا او اخواتي ، وعلاقته بأمي كان اغلبها خناق وبس ...
أم معتقده ان كل وظيفتها ف الحياه هي انها تحضر الأكل وترتب البيت وبس ، لكن مفيش ف قاموسها انها تقرب م ولادها او تسمعلهم ولمشاكلهم ، كل اللي ع لسانها كلمة عيب في اغلب الاوقات وبس !!
اخوات كل واحد في وادي بعيد عن التاني والكل بيعمل اللي ع مزاجه وبس .... بإختصار اسره مفككه كليةً ك اغلب الأسر المصريه !!
ومن هنا كان تعلقي بابن الجيران اللي بدأت معاملته ليا بالاهتمام ، ودي كانت اكتر حاجه مفتقداها ، يكفي اني كنت بلاقي حد يسمعلي ويتكلم معايا !!
كبرنا سوا انا كل التغيير اللي حصلي ان حبه بيزيد ف قلبي اكتر ع الرغم اننا كنا كتير بنتخانق وننفصل عن بعض بس كنا بنرجع تاني ، وهو التغيير اللي حصله ان قسوته عليا وتحكماته كانت بتزيد اكتر واكتر كل م كبرنا ، وكنت برجع وابرر انا لنفسي دا ع انه حب وخوف ...
تخيلي وصل بيه التحكم والقسوه انه يتخانق معايا مره لاني نزلت اشتريت حاجه لوالدتي م كشك تحت البيت بدون م استئذن منه ، وياريته مثلا كان شافني ، دا انا اللي بنفسي قولتله اني نزلت جبت كذا ف وسط الكلام ، وهنا قامت الدنيا عليا ، وقال كلام كتير منه مكنتش قادره تماما استوعب ان هو اللي بيقوله منه مثلا انه قالي طالما عملتي الموقف دا يبقى عمالتي غيره وبتكدبي عليا وبتستغفليني !!!!
علشان نزلت جبت حاااجه م تحت البيت بدون م اقوله اعتبرني كدابه وبستغفله وبخدعه واكيد عملت الاسوأ ..
وعمل منها خناقه كبيره جدا ، وكان اكبر عقاب بيتبعه معايا هو انه ميكلمنيش فتره ، كنت ف الفتره دي بنهار لأني مقدرش استغنى عنه ، وهو كان متأكد م دا يمكن علشان تأكده دا ف هو كان بيتبع معايا العقاب دا ، لدرجة اني شكيت انه بيستلذ بإحساس ان في كائنه بالنسباله كل شئ بس هو بيستمتع بإذلاله !!!
مرت فترات صعبه كتير عليا لوقت م وصلت تالته ثانوي ، وهو كان دخل كلية #الطب ...
كانت امنية حياتي ادخل كلية الإعلام ، منها اكون معاه ف القاهره ومنها ان دا حلم حياتي م وانا صغيره ، وكنت متخيله انه هيفرح بكدا لاني هبقى قدام عينيه وتخيلت نفسي معاه واحنا مسافرين وراجعين سوا وخروجاتنا .... الخ وكانت سعادتي لمجرد التخيل لا توصف بس تخيلي انه رفض !!
رفض بحجة ان مفيش بنت محترمه تدخل كليه ف غير محافظتها وتنام بره بيتها ، ولما قولتله اني هروح وآجي كل يوم رفض رفض قاطع وقالي قدامك آداب او تجاره تختاري منهم !!
حتى احلامي كان بيتدخل فيها وبيهدها ، ورغم الفترات الصعبه اللي مريت بيها ف السنه دي بسببه الا اني تفوقت وجبت مجموع عالي اقدر بيه ادخل كلية الاعلام ، وظنيت انه ممكن يغير رأيه ويوافق ادخلها الا ان رفضه كان قاطع وخيرني بين كلية الاعلام وبينه ، وطبعا وبدون تفكير اختارته هو وقدمت في كلية تجاره !!!
م بعد دخوله للكليه كان بدأ يتغير معايا جدا ، بس م بعد دخولي انا كمان للكليه تغيره زاد اكتر ، بقى شكه فيا لا يحتمل ، كنت بنزل الكليه بمزاجه هو وبس ولو طق ف دماغه يوم اني منزلش يبقى خلاص مفيش نزول وممنوع اي نقاش ، وكنت بنفذ كل اللي بيقوله ، صدقيني معرفش ليه ، يمكن علشان كنت بدأت اتعود وجوده بما فيه م قسوه وتحكمات وتجبر ، كنت خايفه ان بعد السنين دي كلها معاه انه يبعد عني ، كنت بحس كتير انه بقى ادمان وبيجري ف دمي !!
كان لما يتقدملي حد اخاف اقوله ، لان لما كنت بقوله كان بيقلب الدنيا فوق دماغي ويقولي شافك فييين دا !؟ وعرفك منين !؟ وكلام كتير م هذا القبيل وبينتهي بإنه شايفني خاينه وبخدعه !!
ووصل بيه انه امرني مشوفش حد ابدا م اللي بيتقدمولي ولا اقعد معاه ،
خناقاتي مع اهلي بدأت تكبر وتكبر ، خاصة بعد معرفة امي للعلاقه اللي بيني وبينه ، الا اني كنت دايما بهدد #بالانتحار وفعلا كررتها اكتر م مره وحاولت انتحر !!
اهلي مكانوش بييأسوا م الزن عليا ، ولما قولتله اني تعبت م زنهم وانه بس يكلم والدي مجرد كلام علشان اخلص م الزن ، كان رده اللي صدمني هو ان اهله رافضين انه يرتبط قبل سن ال 30 ، تخيلي انا لسه ف اول العشرين ومضطره انتظر لاول التلاتين .. بس وافقت !!
قولي عني غبيه متخلفه اي حاجه لاني كنت افظع م اي وصف ممكن يقال !!
خلصت انا كليتي وهو كان لسه باقيله سنه ، وحتى بعد م خلصها بدأ ينشغل اكتر ، مكالمتنا ولقائتنا بدأت تقل اكتر ولو حصل واتكلمنا كان بيبقى كلاك كله خناق وبس ، كان ايه اللي مصبرني !!!؟
اللي كان مصبرني هو اني كنت ببررله ، اي حاجه مهما كانت قسوتها ليه كنت لازم اجيبله مبرر ، كنت بخاف اعترف بيني وبين نفسي انه مش بيحبني ، كان مجرد تهديده ليا انه هيسبني كان بيبقى معناه اعلان موتي وكنت بحاول انتحر ، اهلي تعبوا معايا جدا بس انا كنت شايفه اني بعاقبهم !!
مشاكل .. خناق .. فراق .. محاولة انتحار ، كانت حياتي ماشيه ع المنوال دا لوقت م وصل واخيرا لسن ال 30 وقالي انه فعلا هيخطب ، وقبل م قلبي يلحق يتهنى ويفرح كان صادمني بإن والدته رفضت ارتباطه بيا لأني مش دكتوره او كليتي زي م قالت دون المستوى وانها مصرفتش وتعبت وكبرت علشان ف الاخر يتجوز م واحده اقل م مستواه العلمي !!!
وكان رد فعله هو اللي المفرووووض متوقع بالنسبه لاي حد بيقرأ دلوقتي انه #هيخلع ودا اللي حصل فعلا وبطريقه هزليه جدا ، تخيلي انه قالي مقدرش اعصي اهلي علشان حد ، حراااام ولازم اكون #بار بيهم والا ربنا هيعاقبني ... ربنا !!!؟
افتكرت ربنا دلوقتي وبس !؟ ليه مش افتكرته وانت بتضيع مستقبل بنت !؟ هو كدا مش هيعاقبك !؟
قالي وبكل بجاحه انا مضربتكيش ع ايدك ف اي حاجه ، انا كنت كل م احاول ابعد تهدديني بإنتحارك وقولت بكره تكبري وتعقلي لكن واضح ان كلام امي صح وانك بنت مش #سويه !!
انا فعلا بنت مش سويه لاني علقت نفسي وقلبي بإنسان معدوم الرحمه وقلبه اشبه بالحجر !!
مريت بفتره اسوأ وأبشع ويوم خطوبته كنت ف المستشفى كالعاده بمحاولة انتحار جديده ، لدرجة ان كل اللي ف المستشفى حفظوا شاكلي وحالتي ، وبدأوا اهلي مؤخرا يقربوا مني ويعرضوني ع طبيب نفسي !!
وبدأت حياتي تتغير ؛
الدكتور قال لأهلي ان حل مشكلتي هو انهم يعرفوا ايه هي مشكلتي م الاساس !!
الجلسات اللي كان بيعملها دكتوري كان في شبهها لأهلي ، التزمت بيها اكتر والدتي ، يمكن لانها حست اخيرا اني فعلا بضيع منها واني محتاجه حد جانبي يهتم بيا ويفهمني ويراعيني ، مش حد يزعقلي ويشتمني ويهني ويمد ايده عليا بحكم انه بيربيني !!
بدأت امي تقرب مني اكتر واكتر ، ع الرغم م كبرها ف السن ، وسني انا كمان اللي كان وصل للـ 28 !!
ثمانيه وعشرين سنه ف مجتمع مبيرحمش ، مجتمع م بيصدق يمسك لحد غلطه وبيبدأ يجلده ...
لكن جلسات الدكتور وقرب أمي خففوا عني كتير ، واول نصيحه نصحني بيها طبيبي هي شغل #وقت_فراغي !!
هو فهمني ان اعراض انسحاب وخروج الشخص دا م حياتي اقرب لأعراض انسحاب المخدر م جسم انسان مدمن ...
انا كنت فعلا مدمنه للشخص دا ، وببُعده عني اكتشفت ان عندي وقت فراغ كبييير جدا لان وقتي كله كان للتفكير فيه ومحاولة اني ارضيه ، وكان مانعني م اني اشتغل ،
دكتوري شجعني اني اشتغل ، وفعلا بدأت ادور ع شغل ، وشويه شويه لقيت نفسي بدأت فعلا انشغل بالتفكير عن الشخص دا ، يمكن كانت اسوأ عقبه اننا جيران وممكن اشوفه او اسمع اخباره ف اي وقت ، الا ان م رحمة ربنا اني اكاد اكون ولا مره قابلته ف فترة التعافي بتاعتي ،
وخلال رحلة بحثي عن شغل لقيت شغل في صيدليه كانت بعيده عن منطقتي شويه ودي يمكن الحسنه اللي فيها لاني كنت بخرج م العالم دا بكل ما فيه وبفصل عنه ...
لوقت م جه اليوم اللي عرفت فيه انه يوم فرح الشخص دا !!
مقدرش انكر اني تعبت جدا اول م سمعت الخبر دا ، بس لأول مره اتعب واتضايق علشان نفسي !!
كنت بدأت استوعب ان اللي انا كنت فيه كان غباء متناهي مني واني كنت بعاقب نفسي قبل أي حد تاني ،
أمي نفسها استغربت حالتي ، لانها كانت متوقعه ان ردة فعلي هتكون محاولة انتحار ، لكني كنت ادركت رحمة ربنا بيا في ان رغم محاولاتي الكتير للانتحار ف ولا مره منهم نجحت ، ومن هنا بدأت علاقتي بربنا تزداد وتقوى اكتر ، بعد م كان في جفاء متناهي ف علاقتي بيه ، اصبح هو ملجأي طول الوقت ، بس كان خوفي الاكبر هو ان ربنا هيعاقبني ازاي ع معصيتي ليه طول ال 28 سنه :(
لكن حاشاه سبحانه يخذل ايد رفعت إليه بدعاء صادق .. وابتدى الفرج والأمل والفرحه تدق بابي !
صدقيني مفيش فرحه اكبر م احساس اللذه بالقرب م الله ، كان الدكتور بتاعي دايما يقولي جمله للنهارده بترن ف ودني وهي لا يقلق من كان له أب فكيف بمن له #رب !!!؟
وصلت درجة تعلقي بربنا اني كنت ع اتم استعداد لأي عقاب يعاقبني بيه ع معصيتي له بسبب مخلوق ضعيف زيه زيي الا اني كنت عَلِّيت وعظمت مكانته اكبر م الخالق ...
ربنا كان بيبعتلي رسايل كتييير ان اهربي ، امانك وراحتك وفرحة قلبك مش هنا ، الا ان شيطاني وبعدي عنه خلاني اضعف م اني اصدق او اصبر لوقت م بعتلي الابتلاء اللي كان في ظاهره شر الا ان باطنه كان ملئ #رحمه !!
وصل عمري التلاتين وكنت بسمع كلام من اللي حواليا بنبره كلها شماته انه بكره يجيلك عوضك ، ومكانوش متخيلين ان ربنا فعلا وحده قادر يبعتلي عوضي الحقيقي !!
تلت سنين م وقت انفصالي عن الشخص دا مريت فيهم بحاجات كتير وحسيت اني فجأه كبرت !!
كبرت ف العقل والتصرفات ، اكتشفت ان تفكيري كله كان محدود من فترة اعدادي لوقت م وصل عمري للـ 28 كان كله للشخص دا وبس ..
بدأت اكتشف نفسي ومباهج الحياه ...
الدكتور صاحب الصيدليه اللي اشتغلت فيها بدأ يثق فيا اكتر واكتر وبقيت مسؤله كليةً عن الصيدليه ، بدأت اعرف اكتر عن الأدويه ، ومش بس كدا انا كنت بتعلم كتير م الدكتور عن علم الأدويه وبدأت اقرأ فيه ، وشويه شويه لقيت نفسي بتعلم اكتر وبنشغل اكتر واكتر وبدأت جروح قلبي تُشفى ، لدرجة اني بقيت اشوف الشخص القديم قدام عيني وولا اي ردة فعل لدرجة اني كنت بندهش م نفسي ، لوقت م وصلت لمرحلة اني افكر ازااااي انا بصيت لواحد زي دا او كنت بالغباء دا والطاعه العمياء دي !؟
بس هو كان خلاص ولا يفرق معايا لدرجة اني لما عرفت انه #انفصل عن زوجته اللي والدته اختارتها بمعايرها الخاصه اللي هو لازم تكون دكتوره وكمان صغيره ف السن ، مش واحده زيي خريجة كليه لا تليق بحضرة الدكتور المبجل وكمان سني يكاد يقترب م الـ 30 ...
وفي النهايه هي اللي انفصلت عنه ، وصدقيني ولا شغلت بالي حتى اني اعرف السبب ، كنت حاسه انه فعلا ولا فارق معايا ولا حتى شمتانه فيه !!
وصلت لسن الـ 31 وألسنة الناس بتزيد ف الكلام اكتر واكتر ، وقلب أمي بيخاف م اني اكون اتعقدت م الرجاله والجواز وخايفه عليا م الوحده ، بس انا ف وسط كل دا كنت خلااااص سلمت أمري للذي لا يغفل ولا ينام وكنت متيقنه ان وجوده جنبي يكفيني ، وانه وحده القادر يبعتلي الخير والعوض م عنده وقد كان!!
يوم مرهق جدا ف الصيدليه دخلت عليا بنوته ف ابتدائي ومعاها روشتة علاج ، صرفتلها الدوا اللي فيه ع اد الفلوس اللي كانت معاها واستغربت ازاي حد يبعت بنته الصغيره تجيب الدوا وباعت معاها مبلغ بسيط جدا كدا !!
مفيش ساعه ولقيت واحد داخله الصيدليه وباين م ملامحه ان عفاريت الدنيا بتتنطط قدامه ، ولقيته حط روشته قدامي ، شوفتها افتكرت انها نفس الروشته اللي كانت مع البنت الصغيره وقولت هتمالك اعصابي واتكلم معاه بهدوء لقيته هو اللي بيتخانق..
قااال ايييه ازاي تدي لطفله صغيره دوا !؟ وان البنت اخدت الدوا اللي اديتهولها وكانت هتديه للقط بتاعها !!
وانا احاااول افهم فيه ان طبيعي ان في ناس ممكن تبعت حد م ولادهم ، وان البنت كان معاها رووووشته وفلوووس ، وهو انا هشم ع ضهر ايدي يعني انها لقيتها ف البيت وان القط بتاعها مريض وانها اخدت اول روشته علاج قدامها وفلوس ونزلت م وراهم..
وافهم فيه ودا مبيفهمش ولا راضي يفهم ابدا ، ف قولتله ان الطفله اللي تعمل كدا م ورا اهلها تربيتها مش مظبوطه او فيها حاجه غلط !!
وهنا كنت حاسه انه خلاص شويه وهيمد ايده عليا ، وع آخر لحظه دخل الدكتور صاحب الصيدليه وطلع اصلا يعرف الشخص دا ،
المهم ان صاحب الصيدليه يا عيني حاول يهدي فيه ويهدي فيا بس الموضوع كان خلاص ، انا مرهقه وتعبانه وع اخري وحضرته داخل ناوي ع الخناق م الاول وبس مش فاهمه ليه !!
واول م صاحب الصيدليه قاله معلش يا #دكتور كريم انا بدون اي تفكير قولتله دي طريقة كلام دكتور دا دكتور بهايم شكله !!!
وعند الجمله دي كانت عنيه بتطلع شرار وسابنا ومشي
دكتوري حاول يتكلم معايا بس انا قولتله بكره لاني فعلا خلاص مش قادره اتكلم ، وفعلا تاني يوم اتكلمنا وحكالي انه كلم الشخص بتاع المشكله ، وكل م يقولي انه شخص مهذب ومحترم ارد عليه انه شخص قليل الذوق ولا يفهم في طريقة الحوار !!
لكني كنت فهمت اللي حصل وهو انه اكتشف ان البنت كان القط بتاعها هي شيفاه تعبان ولما مامتها رفضت تديله دوا الا بعد م يروحوا للدكتور نزلت هي بدون م تقول لحد وجابتله دوا باباها ، ع اساس انه طالما بيخفف باباها ف هو اكيد هيخفف قطها ، ولما عرفت انها اخت الشخص دا الصغيره قولتله مش مستغربه جايبه طريقة التفكير دي م مين ؟!!
انا كنت مستغربه نفسي جدا ، انا مش م النوع اللي بيعادي حد ، بالعكس كنت حاسه ان الميزه اللي مازالت فيا هي اني الى حد ما لسه بدي للناس عذرها ...
بس اشمعنى دا مش قادره اديله عذره !!!؟
مر اسبوع تقريبا او ازيد ع الموضوع دا وفي يوم لقيت نفس البنت داخله الصيدليه ولسه هاخد رد فعل لقيت بسلامته وراها ف كان رد فعلي انه باااااااااس هو دا وبستعد للخناق م تاني ، بس لقيته بيضحك ، كنت عاوزه اقوله بطل تضحك انا مش هعرف اتخانق معاك وانت بتضحك
بس لقيت البنت اعتذرت ع اللي عملته وانها سببتلي مشكله ، قولت تمام بيضحك علشان مش قادر يبص ف عيني م اللي عمله ، والاحساس بالزهو كدا ف نفسي واخدتني الجلاله لقيتلك دا بيقولي يلا دورك .. قولتله دوري ف ايه !؟
قالي تعتذري !! قولتله لمين !!!!؟ قالي ليا .. قولتله لييييييه ان شاء الله ، واللي هو خيرا تعمل شرا تلقى ويا قاعدين يكفيكوا شر الجايين ، لقيته فاصل ع نفسه م الضحك وبدأ هنا ضحكه يعصبني او بمعنى اصح يوترني !!!!
وطلبت منه يمشي وهو ماشي قالي ليكي يوم يا ام لسان طويل ...
كنت مضايقه ف الظاهر بس م جوايا كنت بضحك جداااا ، بس صدقيني ولا فكرت فيه م اي ناحيه تانيه خالص ، او م جوايا كنت خلاص رفضت التفكير ف اي راجل ليه علاقه بالطب م قريب او م بعيد حتى ولو كان دكتور بهايم !!
شهر ونص بالظبط مروا ع الحوار دا وكنت قربت انساه ، او دا اللي اعتقدته لوقت م لقيته ف وشي ف الصيدليه ، واول م شوفته مش عارفه حسيت احساس غريب ، وقولتله نعم !!؟
قالي هو انتِ لسانك دا مبينطقش بكلام عدل ابدل ولا بتعرفي تتكلمي براحه خالص !؟
قولتله انها حاجه متخصهوش وان الموضوع خلاص خلص ، ولو جاي يصرف دوا يديني الروشته ولو بيسأل ع الدكتور صاحب الصيدليه ف هو مش موجود .. لقيته بيقولي ان اللي كان عاوزه اخده خلاص ومشي !!
مشي بكل بساطه وخلاني انا بضرب اخماس ف اسداس واتيقن انه انسان م كتر معاشرته للبهايم بقى زيهم مع اعتذاري للبهايم طبعا ..
وصل دكتوري وطلب مني ارجع البيت بدري لانه عازم نفسه هو وزوجته عندنا وانها متفقه مع والدتي بما انهم بقوا اصدقاء ، ووالدتي كانت بقالها فتره مريضه ، طبعا قولتله تنوروا ومالوش لزوم تتعبوا نفسكوا وكلام م هذا القبيل ، بس ورجعت البيت ، بالليل رن الجرس بفتح الباب لقيته ف وشي ، ايوووون دكتور البهايم !!!
اول كلمه طلعت مني هي : يخربيييييييتك ايه اللي جايبك ، حتى هنا كمان تطلع ف وشي !!!؟
لقيت دكتوري وراه ميت م الضحك وبيقوله ربنا يصبرك وبس ودخلوا وانا مش فاهمه حاجه !!
اكيد تبادر لذهني انه ممكن يكون جاي يتقدملي بس صدقيني قلبي كان خايف يفرح واستكترت عليه الفرحه ....
بس طلع فعلا انه جاي يتقدملي ، ولما بدأ يعرف نفسه وانا قاعده مزهوله قدام اهلي قال انه طبيب قلب ، قولتله ايييه دا انت مش دكتور بهايم !!!!؟
قالي تسكتي تسكتي وتطلعي دبش اسكتي احسن ، وبص ع دكتوري وقاله انت مش قولتلها اني دكتور قلب !؟
قاله هي مدياني فرصه اتكلم ، كنت كل م اجيب سيرتك يركبها ميت عفريت ف كنت بسكت ...
وانا م جوايا بردد دكتور بهايم دكتور قلب دكتور عيون انا فعلا عاوزاه !!!!
وجات اللحظه اللي سابونا فيها نقعد مع بعض ، كان عندي كلام كتييير واسأله كتير جدا ، بس اول سؤال سألته اشمعنى انا !؟
قالي : علشان اعمل عمليه جراحيه للسانك واقصه 😀
قولتله بس انا عمر م كان لساني طويل مع حد !!
قالي م انا عاااارف وهقصه مخصوووص علشان مطولش غير عليا انا وبس !
قالي عندك سؤال تاني !؟ قولتله دا مش رد ع الاولاني بس ماشي اه عندي ... قالي ها اسألي !!
قولتله امك عارفه انك هنا !!!؟
كان هيشد ف شعره وقالي انا غلطان اني سايبلك الفرصه انك تسألي وافتكرتك عقلتي شويه ...
وبدأ يتكلم هو وقالي ان بعد اول خناقه هو اتكلم مع دكتوري وفهمه اللي حصل ، ودكتوري اعتذر بالنيابه عني بردو وبدأ يحكيله عني ، وقدر ربي انه كان في مرحلة البحث عن زوجه ، ودكتوري رشحني ليه ، بس قبل اي شئ حكاله كتير عن حياتي ، وعن الفترات اللي مريت بيها ، وهو بدوره سأل عني وعن أهلي اكتر ، بس قالي انه سبحان الله حصل عنده يمكن راحه نفسيه اكتر بعد م دكتوري اتكلم عني واكد دا بإنه شافني تاني ف الصيدليه قبل م يجي البيت ...
كل الناس بما فيهم اهلي كانوا شايفين العلاقه م بره ان طبيب شاب صديق لطبيب كبير ف السن صاحب صيدليه ورشحله عروسه وسأل عنها وعن اهلها واتقدملها وبس ع كدا ...
مفيش حد يعرف بكل التفاصيل اللي فوق دي غير قليل جدااااا ...
ارتبطنا وصدقيني والله بفتكر ابتلائي السابق بردد الحمد لله الف مره ، ان ربنا فعلا كان مقدرلي الأفضل بكتيييير بس الانسان فعلا #جهول وبيستبق الأحداث ومعندهوش صبر !!
دكتوري انا بقى اللي هو زوجي حبيبي اللي يا عيني لحد انهارده بيعاني م ويلات لساني وطوله ومفيش اي عمليه جراحيه نفعت في قصقصته 😂
الا انه دايما يقولي ان طولة لساني هي #البهارات اللي بتجمل حياتنا ، وبنحب نشكر القط وصاحبته ومن قبلهم قدر الجابر للخواطر ع كل اللي حصل ، وبعد الخناق اصبح الحب والود حتى الممات..
حبيت اشارك حياتي معاكم بجزئها المأساوي لعل وعسى ان بنت تشوف نفسها فيا ، ولو كانت لسه ع البر تبعد وتهرب ، ولو خلاص دخلت جوه نفس الحاله بقولها شوفي بنفسك دي النهايه #المأساويه لكل علاقه محرمه وتغضب الله ، انا عمري م تخيلت ولا حتى ف احلامي اني ممكن اعيش يوم سعيد تاني ، بس جبر ربنا حقيقي أنساني كل ما مر... وصدقوني حلال ربنا افضل كتيييير ومتعته افضل وألذ ..
ومقدرش ابدا ابدا انكر
فضل والدته عليا بإنها عاملتني ع اني كائن حي وانثى طبيعيه ، بعيدا عن نظرة المجتمع اللي بينهش ف بنت لمجرد انها عدت سن التلاتين ...
ولا اقدر انكر فضل زوج بيتعامل مع كل مساوئي وعيوبي ع انها مميزات وأقصى اهدافه ان الضحكه تفضل مرسومه ع وشي دايما.
زوج ربنا بعته ليا علشان يداوي جروحي وينسيني كل السنين اللي عيشتها في ألم ومراره ، ولأننا ف حلال ربنا ف كان تيسير ربنا ف كل شئ وكرمه محاوطنا ..
والفضل كل الفضل لأهلي خاصةً أمي انها تداركت خطأها ف تربيتي ومكابرتش ولا سمعت للمجتمع اللي بيشوف ان كل من اتعرض ع طبيب نفسي ف هو #مجنون ...
بالعكس انا شايفه ان بداية علاجي الفعليه كانت عن طريق جلسات الطبيب النفسي ...
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
من ارضى المخلوق ع حساب رضا الخالق سلط الله عليه هذا المخلوق 👌
دا المختصر لقصة النهارده
مؤمنه بإن كل ابتلاءات ربنا لينا ما هي الا #تهذيب_ورحمة !!
#الزواااااااج وخاصةً م زوج صالح بعتبره هو البدايه لكل جميل ف حياتنا وفوق كل دا مكمل معانا للجنه بإذن الله
حبوا الجواز يا جماعه المهم تختاروا #صح 👌
واستنونا في معادنا وقصة جبر جديده ❤
رزقكم الله من يريح قلوبكم ويطمئنها ويشعرها بكل جميل في #حلاله ❤
#حكاوي_هدير
#هدير_ابراهيم
لينك القصة علي قناتنا علي اليوتيوب
سمعتها فيديو امبارح والنهارده وداخله اقراها كمان 😆 والله لو نزلتي عشر قصص كل يوم هشوفهم برضه
ردحذفربنا يجازيكي كل خير يا هدير 🥰
جزاكم الله خيرا وبارك الله فيكم واكثر من امثالكم فعلا كلها قصص للعظة والعبرة والحمدلله كلها من واقع تجربه الحياة
ردحذفنفسي اصدق ام دا فعلا بيحصل حقيقي من كتر مالناس ربنا جبر بخاطرها ف قصصك اني بقت بقف ف حالة ذهول معقول ربنا بيغفر وبيسامح ويعوض عوض حلو اوي اوي اوي كدا
ردحذف