عِفه ويقين
#عِفه_ويقين ❤
هاشتاج باقي قِصصنا 👇
#قصص_واقعيه_لهدير_ابراهيم ❤
🎀🎀🎀🎀🎀🎀🎀🎀🎀🎀
هدير انا كنت وعدتها ان قِصتنا في يوم م الأيام هتنزل عندك .. هنستناكِ زي م كنا بنستناكِ كتير قبل كدا ....
الحقيقه دي اكتر قِصه اتقال اسمي فيها 😂
هبدأ احكيلك قِصتي وان شاء الله تساعديني اني اكتبها بشكل يوصل لكل الناس حلاوة الصبر وجمال الدعاء وعوض ربنا اللي بينسينا كل صعب مرينا بيه !!
القِصه بتبدأ انها #بنت_خالتي ، وع الرغم من قوة صلة القرابه الا اننا كنا بعيد كل البعد عن بعض ، اولا هي عايشه في محافظه غير محافظتي ومش بنتقابل غير في المناسبات عيد .. فرح .. او اي ظرف ...
من صغرنا واحنا عمر م حصل بينا اي كلام اكتر من السلام والسؤال عن الدراسه لكن رغم كدا كنت دايمًا بحس ان في قلبي حاجه ليها !!
ثانيًا انا الحمد لله من بيت متدين نوعًا ما ، اللي هو احنا الحمد لله ملتزمين بالصلاه والصيام وحفظ القرآن المتقطع في وجود شيخ او لا ،
لكن هي كانت من بيت ما شاء الله متدين جدًا ، كانوا بيروحوا دار لحفظ القرآن وشرح علوم الدين ... كانوا ملتزمين جدًا في لبسهم ...
هي من طبعها كانت هاديه مش بتتكلم غير لما حد يفتح معاها موضوع للكلام ،
التزامها كان واضح جدًا عليها لدرجة ان كان طبيعي جدًا نسلم مثلا ع بنات خالاتنا الا بنات خالتنا دول ، كنا بنحس ان مينفعش نقرب منهم او نلمس ايديهم وكأن في هاله حواليهم ...
والدتها كانت اقرب الخالات ليا ، كنت بحبها جدًا يمكن علشان كدا كنت بتمنى كتير ان ربنا يرزقني بزوجه زيها ،
المهم اني كنت بستنى من مناسبه للتانيه علشان بس اشوفها !!
كل دا وانا لسه يعتبر صغير جدًا بس مشاعري اتجاهها كانت بتزيد اكتر واكتر كل م اكبر !!
لما خلصت الثانويه ودخلت الكليه بدأ تعلقي بيها يزيد اكتر بكتير ، لدرجة اني كنت بفكر فيها بطريقه غير طبيعيه ،
في فتره م الفترات كانت هي صديقه عندي ع الفيس لكن ولا مره اتكلمنا غير مره واحده بس لما باركتلها ع نجاحها في الثانويه ، بعدها هي حذفت كل الولاد قرايبها وطبعًا انا من ضمنهم ....
تعلقي بيها كان وصل لحد غير طبيعي في الوقت دا مكانش في ايدي اي حاجه اعملها غير اني الجأ لربنا وادعيله ...
#الدعاء ليه قِصص كتير معايا سبحان الله ، ومعاها كنت بدعي
اللهم ارزقني بزوجه صالحه وذريه صالحه .. اللهم ان كان زواجي بـ حبيبتي خير ف اجعلها من نصيبي وقدري واجعلني #اهل_لها يارب !!
ايوه كنت بدعي ربنا انه يجعلني اهل لها !!
الدعوه دي كنت برددها في كل صلاه وكل سجده لمدة – 6 سنين – !!
كنت بدعي وانا متيقن ان ربنا #هيستجيب ...
وفي يوم سمعت م مامتها اللي هي خالتي ، انها مش بتشجع ابدًا #زواج_الاقارب !!
يمكن السبب دا خلاني فضلت مكاني فتره ومأخدتش خطوه لوقت طويل ،
كانت دايمًا قدامي علاقة والدتي بخالتي واد ايه هما قريبين م بعض ،كنت خايفه اني اعكر صفو العلاقه دي او انها تتأثر بأي شكل م الأشكال ..
مع ذلك تخيلي ان والدتي وأختي كانوا دايمًا يتكلموا عنها قدامي بقصد لفت انتباهي ليها ، الا اني عمري م حسستهم بأي حاجه ، حتى هي لما كنا بنتجمع عند جدي كنت بظهر عكس اللي جوايا ،
تخيلي حاجه بدعي ربنا بيها في كل سجده وبظهر عكسها !!
المهم خلصت كليه ودخلت الجيش وهنا كان ليا قِصه عظيمه مع #الدعاء بس مش لازم تنزليها ،
المهم ان في فترة الجيش عرفت ان في عريس متقدملها ، ودا طبعا مكانش اول واحد ، حسيت انها ممكن في اي لحظه تضيع مني لو م اتحركتش واخدت خطوه ،
لجأت لربنا ودعيت كتير ان ربنا يرزقني بيها وييسرلي الموضوع لما اتكلم فيه ،
وكنت عرفت ان اخر عريس كان عن طريق خالتي الكبيره ، ف لومتها انها جات منها هي ، وهنا كان خلاص بدأ يظهر تعلقي بيها اللي الكل استغربه لان الظاهر اني عرفت اخفي مشاعري كويس جدا !!
طلبت من خالتي انها تبدأ هي وتدخلي في الموضوع ودي كانت اول خطوه اخدتها ..
طبعًا كلهم لما عرفوا اندهشوا جدا ، بما فيهم حبيبتي اللي هو كان كل اللي في دماغها في اللحظه دي – ايه دا هو أحمد ابن خالتي بيتقدملي !؟ أحمد اللي مش بيطيقني !؟ أحمد اللي دماغه وطريقة تفكيره مختلفه كل الاختلاف عني !؟ –
مكانتش تعرف ان بقالي #ست_سنين اسمها مرتبط بكل دعوه بدعيها في كل سجده !!
كنت بحافظ جدًا ع اوقات زي رمضان والليالي العشر من ذي الحجه وبعد التشهد والثلث الاخير من الليل واخر ساعه في نهار الجمعه ،
كنت بدعي بثقه جدًا ،
احساس حلووو اوووي واحنا بندعي وعارفين ان في رب رحيم كريم لطيف هيستجيب لنا ...
البدايه هي صلت استخاره وعرفت بعدين انها الحمد لله حست براحه ، وانا كمان صليت استخاره والحمد لله كنت مرتاح جدًا ...
يومين بالظبط ووصلنا الرد بإنها وافقت 😍
متتخيليش كنت مبسوط اد ايه ، حسيت بعوض ربنا ليا ع فترة صبري ، حسيت ان دعائي كله مكانش هباءً .. حسيت ان بعد صبر سنين كتير خلاص حلمي بدأ يتحقق قدام عنيا وكان اول لقاء !!
كنت في بيتها انا والدي وخالي مع والدها بيتفقوا ع كل التفاصيل ،
ولحظةم هي خرجت لمحت في عنيها نظرة #تساؤل !!
كنت حاسس انها للحظه دي مش مصدقه اني انا اتقدمتلها باردو اللي هو انت ازاي !؟
قعدنا مع بعض وتخيلي ان دي كانت المره الأولى في حياتي ان اتكلم معاها لوحدنا !! مكنتش مصدق نفسي ،
هن كمية الراحه اللي كنت حاسسها وهي قدامي وبتكلم معاها ،
قولتلها ان قعدتنا دي هي نتيجة دعوات سنين كتير فاتت .. قولتلها اني اتمنيتها م ربنا .. اني معجب بيها من سنين ومكنتش عارف اعبرلها .. حكيت لها عن كل موقف او تفصيله صغيره جمعتني بيها م واحنا صغيرين ، كنت حافظ كل موقف ليها وعمري م نسيت ابسط تفصيله .... كانت في حالة اندهاش !!؟
بس كانت مبسوطه .. انا كنت حاسس بكدا ...
سألتني سؤال واحد بس .. قالتلي #الزواج بيعنيلك ايه !؟
واتفقنا نجاوب المره اللي بعدها احنا الاتنين ،
بس حصل موقف في المقابله دي وهي اني لا شعوري نطقت اسم دلع ليها ، قالتلي ياريت متقوليش كدا تاني لما يحين الوقت وقتها هتقول كل حاجه !!
صراحةً بدأت اعيش احلى واجمل ايام حياتي ، بدأت اخد بالي اوي م ايه اللي ينفع وايه اللي مينفعش في فترة الخطوبه وقبل كتب الكتاب ...
تاني مره اتقابلنا جاوبتني ع السؤال اللي كانت طرحته اول مره ،
قالتلي ان الزواج بالنسبالها #سكن !!
كانت ردورها دايمًا بسيطه الا انها كانت بتحمل معاني كثيره ..
بالنسبالي كنت شايف الزواج #استقرار ...
تمت الخطوبه الحمد لله وطبعًا وقت لبس الدبل مفيش حد لمس ايد التاني 😃
بعد خطوبتنا اتفقنا مع بعض اننا هنصلي كل يوم ركعتين شكر لله ع وجودنا مع بعض ، كنا دايمًا فاكرين " ولئن شكرتم لأزيدنكم "
وفعلا شكر النعمه واجب وهي حقيقي #نعمه ربنا كرمني بيها ♥
بدأنا م بعدها نتكلم ونتعرف ع بعض اكتر وكان حبي ليها بيزيد اكتر واكتر ...
بدأ يكون في بينا مشاعر متبادله وعلشان منقولش حاجه لا تجوز عرضت هي عليا فكره حلو جدا وهي ان كل واحد فينا يعمل جروب ع الفيس يكتب فيه كل حاجه هو حاسس بيها وكل مواقفنا الحلوه اللي مرينا بيها سوا ، وبعد كتب الكتاب كل واحد يضيف التاني للجروب بتاعه ويقرأ كل اللي فيه ،
وبدأنا في تنفيذ الفكره ....
الجروب كنت بكتب فيه بإستمرار ، احساس جميل اننا نوثق مواقف حصلت م بينا ومشاعر شايلنها لبعض مقولنهاش .. وكان شعارنا ولأن الحلال اجمل سننتظر 🙌
كنت بتخيل وانا بكتب كل كلمه ان في يوم م الايام #حبيبتي هتقرأ كل حرف كتبته !!
عشت فترة خطوبه حوالي 8 شهور عرفنا فيها بعض كويس جدا ،
كنت بحلم باليوم اللي فيه هالمس ايديها ، اني اعبرلها عن كل اللي جوايا اتجاهها ...
فترة خطوبتنا كانت ممتعه جدًا ، اتفقنا نقرأ كُتب ونتناقش فيها ، وقرأنا كتب توضحلنا طريقة تفكير الرجل والمرأه زي – رجال م المريخ ونساء م الزهره –
سمعنا سلسلة دروس حلوه ومفيده جدا عن الارتباط اسمها عاطف وعواطف للدكتور محمد الغليظ ..
كان كل حاجه بنقرأها او نسمعها لازم نتناقش فيها ، وحقيقي كل دا فادنا جدا وقربنا م بعض اكتر ...
نيجي بقى ع لحظة #كتب_الكتاب 😍
مش هعرف اوصفلك فرحتي بيوم كاتب كتابنا لما ايديها كانت في ايدي .. مش هعرف اوصفلك احساسي لما ضافتني في جروبها وقرأت كل حرف وكل كلمه موجوده فيه .. عنيا كانت #بتدمع كل م اقرأ اكتر !!
وكانت اول مكالمه بعد دخولي للجروب ، اني شكرتها جدًا ع كل لحظه صبرتني فيها وقالتلي هقولك كل حاجه بس في وقتها الصح ،
هنعبر عن مشاعرنا بس بعد م نعدي نقطه معينه ...
الحمد لله عقدنا وبقينا مع بعض .. وربنا يجمعنا مع بعض دايمًا في خير وسعاده يارب ..
ووصلنا بفضل الله لبر الأمان وهو #الحلال ♥
شكرًا ليكِ ي هدير لأنك جمعتينا كتير وكنا بنستناكِ كتير م القِصه للقِصه اللي بعدها ، ربنا يجازيكِ كل خير عن كل رساله بتوصليها للناس عن الحب الحلال وعوض ربنا لينا ... شكرًا ي هدير ... بشكرك تاني واكيد بعد سنين كتير ان شاء الله نبعتلك باقي #قِصتنا ...
&&&&&&&&&&&&&&&&&&&&&
المفروض ان دا كان اخر الكلام ، لكن في موقف انا حبيت اسيبه للأخر خالص لاني وقفت عنده لحظات كتير وهو
نسيت اقولك ي هدير اني في فتره م الفترات كنت متابعها جدا ع الفيس رغم انها مش حد نشط تماما عليه ، رغم كدا كنت ممكن ادخل ع صفحتها وبكون متأكد اني هشوف نفس الحاجات اللي شوفتها امبارح وهي نفس اللي موجوده م شهر ، الا ان عمري م حسيت بملل ابدًا ، بالعكس كنت دايمًا بحس وكأني بشوفهم لأول مره !!
معروف ان الحركه دي البنات هما المشهورين بيها يمكن لان عندهم صبر بطريقه رهيبه اكتر م الولاد في الموضوع دا ، لكن وقت م بنتكعبل في شخص بالصبر دا مع كل اللي ذكرته فوق دا بيبين ان الحُب اسمى شئ في الوجود ...
🎀🎀🎀🎀🎀🎀🎀🎀🎀🎀
اللي لفت نظري اكتر هو ان اهوووو ي جماعه ممكن بنت متدينه هي اللي تاخد بإيد زوجها ، مش لازم تلزمي نفسك جوه حلقه ودايره مغلقه ع ان اللي يتقدملك شرط اساسي يكون اعلى منك في الالتزام ..
لا ي جماعه امثله كتيره وجميله جدا ع العكس وان البنت هي اللي تاخد بإيد زوجها والاكيد ان بعدها الاتنين بيعينوا بعض ...
ادعوا وحبوا وعِفوا نفسكم للحلال لأنه بالتأكيد #أجمل 😍
#حكاوي_هدير
#هدير_ابراهيم
جميلة القصة ربي يتمم لهم بخير لكن تعليق حضرتك فيه شيء إلا وهو أنهم لسه في البداية البنت وافقت وكتبوا الكتاب ، لكن فين في القصة بيقول انها اخدت بأيديه ، الموضوع ده نحكم عليه بعد سنين مش علشان هي صبرته في فترة الخطوبة ،الموضوع ده نحكم عليه بعد مايحصل مواقف بينهم ويكون كل واحد له وجهة نظر مختلف ، وفي الاخر كل واحد حر في رأيه طبعا 🌸
ردحذفيارب يجبر بخاطرك ويجبر قلبك ويجبر فلبى
ردحذفابله هدير انا نفسي اكلمك اوووى بس انا معنديش فيس اعمل اى نفسي نكون اصدقاء بالله لو شوفتى الرسائل متنسنيش
ردحذفالقصه جميله كالعاده هدير ممكن فضلا تكلميني بالله متنسيش 😍
ردحذفالقصة حقيقي اللهم بارك.. بس حقيقي مش كتير في الزمن ده اللي ينفع يكون الزوج أقل من الزوجة خاصة لو هي مش من بيت ملتزم بس في الاخر احنا بنعامل رب المعجزات واليقين
ردحذفاللهم بارك ربنا يحفظهم وتكمل فرحتهم ع خير وتكون دي بداية السعاده ف حياتهم ويجبر قلوب كل بنات وشباب المسلمين يارب
ردحذفوادعولي ربنا يراضي قلبي