اكتشفت زوجتي أمام الأسانسير
#اكتشفت_زوجتي_أمام_الأسانسير !!
اوقات كتير بنبقى متضايقين ومحبطين ومتلغبطين وفاكرين ان الدنيا كلها جايه علينا في حين ان ف نفس التوقيت دا بيكون ربنا بيهيألنا الأسباب لمعجزة تفرح قلبنا..
يلا بينا نشوف قصة النهارده..
🎀🎀🎀🎀🎀🎀
مبدئياً حبيت احكي عن الملاك اللي ربنا أوجده في حياتي #زوجي
انا كنت عايشه في السعوديه مع اهلي زي اغلب الاسر المصريه ،،
معروف ان السعوديه في تدريس وتطبيق الدين غير مصر ،،
بس ممكن حد يتأثر او لا ،، انا من الناس اللي اتجهت للدين جدا ،،
بدأت احفظ القرآن واهتم بدراسة الفقه والسنه والعقيده وكل ما يمت للدين بصله ،،
كنت مختلفه عن اهلي ،، احنا بنتين وولد انا بس اللي اتغيرت ،،
لبست #النقاب في اعدادي ودي كانت صادمه لاهلي لان مفيش حد اعرفه متدين او ممكن يوصل للنقاب ،،
بالنسبه لمصر كنت بكره انزلها مفيش حد ليا فيها انزله ،، اهل بابا وماما شبه منقطعين عنا او احنا اللي منقطعين النتيجه واحده ، حتى لما كنا بنزورهم كانوا دايما يضايقوني ويقولوا عني #ست_الشيخه !!
بس عادي مش فارق معايا انا كنت بنزل كل 3 سنين مثلاً ،، لوقت م وصلت لاكبر كارثه وهي #الثانويه يعني خلاص هنزل مصر لا واستقرار لفترة الكليه ،،
كنت مضايقه جدا ودعيت ربنا اني اموت ولا اني انزل مصر ،،
المهم انه حصل ونزلت ونقلنا من شقتنا ومن المنطقه كلها ،،
سكنا في منطقه من المناطق اللي بيقولوا عليها #منطقه_راقيه ،،
اغلب اللي حوالينا كانوا بعيد جدا عن اقل وصف للالتزام والله اعلم طبعا بس كنت بكره نظرات الناس لنقابي وحسيت اني دخيله ع المنطقه دي ،
قدمت ورقي في كلية اداب ،، وبدأت السنه الأولى
بصي يا هدير في الاول كان كل حاجه تقريبا ممله لان نفس الاحداث بتتكرر ،، بما فيهم موقف كان بيغيظني جدا مع جاري !!
كان في شاب في الشقه اللي في الدور بتاعي كان دايماً يخرج في نفس وقت خروجي واول م يشوفني يجري ع الاسانسير كنت بحس انه بيدخل ويطلعلي لسانه اللي هو لحقته وانتي لأ
كنت بستغربه جدا وكنت بحس ان فيه حاجه مش مظبوطه وتصدقي اني ولا مره لاحظت ان دا كان بيحصل معايا كل يوم في معاد الكليه !!
شويه واخوات الشخص #البنات دا بدأوا يزورونا ويقربوا مننا ،، بس هما اصلا يتحبوا جدا وكانوا بيقفوا معايا وكنت اول م بتعب بلاقيهم جايين بالدوا في ايديهم ،، م انا نسيت اقولك ان اخوهم كان في اخر سنه #صيدله وبباهم دكتور معروف ،،
كانوا بيتكلموا ع اخوهم دا دايما ،، بس انا كنت بكرهه اصلا او كنت فاكره اني بكرهه من موقف الاسانسير ،،
بس ولا مره حصل بيني وبينه كلام ابدا ،، ليوم م كنت في الامتحانات وكنت راجعه متأخره
نسيت اقولك كمان ان الاحداث دي كانت سنه 2011 اكيد عرفتي احوال وظروف البلد وقتها ،،
في اليوم دا انا كنت مع اصحابي واتأخرنا جدا بعد الامتحان ،،
راجعه البيت تعبااانه جدا الاقي اللي مستنيني في مدخل العماره وعماله يزعق جامد ،،
مفهمتش منه ولا كلمه ولا اهتميت اصلا اللي هو وانا مالي اكيد مش بيكلمني انا ،، بس لقيته بيقولي هو انا مش بكلمك !!
تخيلي منظري بقى ،، هو عمال بيتخانق واني اتأخرت والمفروض معاد امتحاني خلص من بدري وان البلد في خاله زفت وقلق ،،
وانا كل اللي بعمله فاتحه بؤي وبس لحد م خلص كلام وروحت طالعه في الاسانسير ولااااا كأن كان في حد بيتكلم اصلا ،،
طلعت البيت حكيت لاختي في الطريق من باب الشقه للسرير اللي حصل كأني بتكلم عن واحد مجنون ،،
بس اختي قالتلي كلمه حسيت بعدها قلبي بيدق جدااا ،،
اختي كانت ملاحظه ان جارنا دا فيه حاجه جواه من ناحيتي بس انا كنت دايما اقول مستحيل دا شخص رخم وبيحب يرخم عليا ،، بس هي كانت مصممه ان جواه مشاعر حب ليا ،،
في اليوم دا قالتلي انتي ضيعتيه بإيدك انا لو منه م ابصش في وشك تاني اصلا ،
هو اه غلط انه كلمك بس كنتي وضحي حتى وانتي طالعه انه مينفعش يكلمك ،، المهم انه خلاص كدا بح !
ودي بصراحه كانت اول مره احس بإن الشخص دا ليه حاجه جوايا ايه هي معرفش بس قلبي انقبض جدا واستنيت معاد تاني امتحان علشان اشوفه كالعاده وهو بيجري قبلي ع الاسانسير
بس في اليوم دا مخرجش ورجعت وباردو مش شوفته واتكررت بعد كدا في الامتحانات لحد اخر يوم امتحانات ،، كنت حاسه ان في حاجه مهمه جدا في يومي ناقصه ،،
اخر يوم امتحانات رجعت البيت متكدره جدا وعماله ابص ع باب شقتهم ،، واول م دخلت شقتنا
لقيته في وشي
تخيلي بقى اول ما شوفته قلبي دق بطريقه رهيبه كنت حاسه ان نفسي مش قادره اخده ووشي طالع منه دخان !!
ماما سمحتلي اقعد معاه وانه عاوز يقولي كلمتين وهيمشي ،
بصراحه بصراحه يعني انا اصلا م صدقت شوفته تاني ف انا اللي كنت همسك فيه انه ميمشيش دا انا حسيت ان روحي رجعتلي والله بدون مبالغه ،،
قعدت معاه وفضلنا احنا الاتنين باصين في الارض اللي هو معرفش في ايه
وبعدين لقيتلك اللي فجأه راح واقف وفضل رايح جاي وعمال يتكلم وانا مش فاهمه منه حاجه اصلا
انا قولت بس الواد دا اتجنن رسمي !
وبعدين قعد فجأه تاني وقالي : بصي انا عارف اني غلطت يوم م وقفتك في مدخل العماره بس والله وربنا العالم كنت هموت من القلق عليكي ازاي واول م شوفتك فقدت السيطره ع نفسي وحصل اللي حصل دا ،،
انا جيت انهارده وطلبت من مامتك انك متعرفيش اني جاي لأني عارف انك بتكرهيني ف كنت حابب اعتذرلك واحاول اغير فكرتك عني ،،
خوفت انك تعرفي اني جاي ف ترفضي حتى انك تقعدي معايا ،،
انتي ليه طيب بتكرهيني !!
انتي ممكن تحاولي مع نفسك تاني وتحاولي تعرفيني كويس !!
ممكن تديني فرصه واحده بس واوعدك مش هخيب ظنك !!
هو انتي بصالي كدا ليه !!
طبعا انا اصلا متنحه لكل كلامه اللي هو انت انا مش فاهمه انت بتتكلم ع ايه ولا مين ولا مين بيكره مين !؟
وهنا اتأكدت انه عنده خلل في دماغه وانه مجنون
بصي هو انا مش دبش والله ولا بحدف طوب بس في الحاله اللي انا فيها دي لقيت نفسي بقوله :هو انت ايه اللي جابك
قالي نعم !؟ قولتله قصدي يعني جاي تعمل ايه اللي هو قصدي بص انا بصراحه مش فاهمه حاجه اسألني اسئله وانا ارد طيب يمكن افهم اي حاجه في الليله دي
ولقيته يا هدير بيقولي بصي من الاخر وبكل صراحه هو سؤال واحد بس ولقيتلك اللي بيغمض عينه وكأنه هيرمي قنبله
ولقيته بيقولي : #تتجوزيني !!؟؟
طبعاً انا تنحت اكتر ووشي طلع دخان اكتر واكتر وحسيت من ضربات قلبي ان الشارع كله سامعها !!
فضلت ساكته مش قادره حتى ابلع ريقي
هو خمن سكوتي بإنه رفض
ورجع تاااني يقولي اني اديله فرصه واحده وبلا بلا بلا
وانا اصلا والله شويه وكنت حاسه اني هقوله فين المأذون يابني
قولتله ممكن تسكت شويه وتديني فرصه اتكلم ،،
انت اصلا لحد دلوقتي مشوفتش وشي متمسك بيا ع ايه !؟
قالي : مش هقولك الجمال هو جمال الروح لانك هتقوليلي وانت اصلا عرفت روحي منين واحنا عمرنا م اتكلمنا
هقولك تسمعي عن الحب من اول نظره !؟
ياستي حتى لو مش موجود ف انا اتكعبلت من اول نظره ... ولما لقى انه هيبدأ يخبط في الكلام قالي انه ممكن قدر او نصيب المهم انه مستني ردي ويرجع تااااني لموضوع بس بالله عليكي حاولي تديني فرصه واحده ... الخ
انا طبعا كنت شاكه في سلامة قواه العقليه !
ماهو مفيش حد عاقل يعمل كدا بصراحه وفي موضوع جواز اللي هو عمر تاني !!
قولتله اللي بابا وماما يقولوا عليه ،،
واول م نطقت بالجمله دي لقيت اللي وقف وفضل يقولي بجد يعني انتي معندكيش اعتراض يعني لو وافقوا هتوافقي !؟
انا مع طريقته دي شكيت فيه انه مجنووون حرفياً ، مين اللي بيعمل كدا مع بنت اول مره يكلمها ولسه اصلا مشافش وشها ولا عرف طبعا ولا شخصيتها ولا اي حاجه فيها ،،
المهم اني قولتله الله المستعان وهعمل استخاره ،، وياريت انت كمان تعمل استخاره وتستنى لما تعرفني اكتر
قالي :اللي عرفته عنك لحد دلوقتي يكفيني ،،
قولتله : ثواني وانت تعرف ايه عني اصلا قصدك يعني من كلام اخواتك البنات
قالي :لا دي قصه طويله
قولتله :معلش احب اعرفها
اللي فات بقى حماده واللي جاي حماده تاني خااالص !!
اول مره شوفتك كانت قدام #الاسانسير كنت انا راجع من بره ولسه في مدخل العماره لقيتك واقفه هتطلعي وواحد دخل الاسانسير وقالك تدخلي عادي لان الاسانسير فاضي
الدهشه انك رفضي بحجة انه مينفعش وخلوه غير شرعيه
طبعا جمله دي دي في العماره عندنا يعني القيامه قامت انا لقيت نفسي بقول هو الاسلام دخل العماره عندنا امتى
ويااااا سلاااام بقى لما وقفت بقربك ولقيتك لابسه #نقاب والله حسيت اني شايف وشك او شايف قلبك ووالله دا مش #محن انا بس مش عارف اعبر !!
طبعا انا مازلت متنحه وولا بعلق بكلمه
كمل كلامه : ويا سعادتي وفرحتي لما عرفت بعدها انك مش بس من سكان العماره لا دا انتي طلعتي في الشقه اللي قصادي كمان ،
ومن وقتها بدأت اراقبك حرفياً
عرفت انك كلية اداب جبت الجدول بتاعك وظبط مواعيدي كلها ع جدولك
انتي مش متخيله ازاي كنت كل يوم في وقت نزولك افضل واقف باصص في اللي بيسموها العين السحريه دي علشان اشوفك واول م تخرجي من باب شقتكوا كنت بفتح الباب بسرعه واجري ع الاسانسير قبلك والله م بغرض اني اضايقك بس كنت بحاول الفت انتباهك وكفايه اصلا نظرتك ليا اه كانت بتحسسني اني حد مختل عقليا بس عادي كنت ببقى مبسوط جدا !!
ويا سلام بقى لو في يوم منزلتيش كنت بخلي اخواتي البنات يكلموكي في الموبايل ولما كنت بعرف انك تعبانه كنت ببقى هتجنن ،
ازاي عمرك م خطر ع بالك ازاي كل مره هما بيدخلوا عليكي بالأدويه
ولا لما كنت بروحلك الكليه ، كنت بستغل اي وفت عندي فاضي واروح بس اشوفك ولو 5 دقايق ،،
ولا حتى لما كنت بسيب عربيتي في البيت مع اني بكره الزحمه والمواصلات مخصوص علشان اركب معاكي سواء بقى كان باص ولا مترو ولا حتى ميكروباص وكنت باحمد ربنا انك لاغيه فكرة انك تركبي تاكسي لوحدك ،،
وكان معايا جدول الامتحانات بتاعك وعلشان امتحاناتي باردو ومذاكرتي مكنتش بعرف ارجع معاكي كنت بنزل الصبح معاكي بس وبعدين ارجع استناكي في البلكونه لحد ترجعي ،
لوقت اخر مره لما رجعتي متأخره وكنت قلقان عليكي جدا خاصةً في ظروف البلد دي ،
مقدرتش امسك نفسي وانتي جايه متأخره حسيت انك من عالم تاني ولا حاسه باللي بيحصل في البلد من حوالينا واول ما لمحتك ع اول الشارع نزلت جري ع السلم وحصل اللي حصل كله ،،
ولما شوفت رد فعلك هديتي جوايا اي امل انك تكوني اصلا خدتي بالك مني قبل كدا ،
حسستيني انك اول مره اصلا تشوفيني ،
طلعت مكسور ووالله وبدون مبالغه فضلت اصلي وادعي كتير ربنا انك تكوني من نصيبي وحتى لما والدتي قالتلي ادعي لو خير ليك تكون من نصيبك ولو شر ربنا يبعدها عنك
دعيت ربنا حتى لو شر ربنا يبطل الشر بس باردو تكوني من نصيبي وقولتلها الالحاح في الدعاء يغير القدر ،،
حاسس من نظرتك انك شيفاني مجنون ،،
بس والله دا اللي حصل معرفش ازاي وليه بس هو دا اللي حصلي من اول مره قابلتك عند #الاسانسير
ودلوقتي هسألك تاني توافقي : موافقه تتجوزيني !؟
طبعاً انا كنت مع كلامه لقيت نفسي روحت في عالم تاني ،
فجأه لقيت نفسي بفتكر شكله في الباص او في الكليه او اني لمحته في البلكونه ،،افتكرت كل مواقف اخواته ومواقف الاسانسير مر عليا شريط شوفت فيه حاجات ولا مره ربطها ببعض ،،
لاني بصراحه عمري ماتوقعت اقابل حد يعمل معايا كدا ،،
لقيت نفسي اقسم بالله يا هدير برد عليه وبقوله : احنا في عيلتنا في شرط ممكن ترفضه
قالي ايه هو !؟
قولتله : الخطوبه وكتب الكتاب في ليله واحده
والله بقولك الكلام دا وبفتكر رد فعله اللي والله م حد يتوقعه اصلا وافطس ع نفسي من الضحك والاهم اني #احبه اكتر
لقيته وقف وزغرد زي البنات
قالي انا هقول لبابا يكلم خالك لحد م والدك ينزل مصر ،،
وهووووب لقيت اللي راح واخد مامته وقالها بسرعه قبل ما تغير رأيها !!
قولتله استنى مش هتشوف طيب شاكلي من غير النقاب
قالي : المره الجايه انا عارف البنات حتى لو هما اصلا مش بيحطوا ميك اب او كدا مش بيحبوا باردو ان حد غريب يشوفهم فجأه وهما مش مستعدين ،،
سابلي الجمله دي ومشي ،، وانا فضلت افكر فيها كتير ،،،،،
بس تفتكري الاندهاش وصل لهنا وبس لا طبعاً ،،
حضرته طلب ان كتب الكتاب والخطوبه يكونوا في خلال اسبوع واحد والفرح بعد م نخلص امتحانات الترم التاني
معرفش ازاي اهلي وافقوا ولا انا اصلا وافقت ع السرعه دي ولا ابويا اللي حجز ونزل مخصوص علشان كتب كتابي ،،
كل اللي اعرفه ان ربنا بعتلي هديه من السما احنا مع بعض من 2011 ولحد انهارده مفتكرش انه في مره زعلني ،، دا انا حتى لما كنت بزعله والله كان هو اللي بيجي يصالحني ،،
ويقولي جمله واحده كل مره " انا عارف ان قلبك بيوجعك علشان مزعلاني وخايفه من رد فعلي ف حبيت اقولك اني لا مش زعلان خلاص بس بصراحه جعان "
عودونا في مجتمعنا ان حب الراجل بيذله او الحب عامةً بيذل ،
بس هو علمني ان الحب بيقوي وبيزود الاحساس بالثقه والامان ،،
هو كان دايما يرددلي ان اهم من الحب كمان ان يكون بينا #موده و #رحمه
لدرجة اننا لما ربنا قدرلنا نجيب توأم سميناهم #موده و #رحمه
وكان دايما يقولي اهو بقى فعليا مابينا موده ورحمه
هدير المعروف ان البنت هي اللي بتدي حب واهتمام اكتر ،
بس انا عاوزه اقولك ان الفكره دي اختلفت تماما مع زوجي ،
اوقات كتير كنت بحس انه كتير عليا ، او اني مثلا عملت ايه استحق عليه المكافأه دي ،،
انا زوجي يوم كتب الكتاب لقيته جايبلي جيست بوك كاتب فيه كل حاجه من يوم م شافني قدام الاسانسير وكل مواقفه معايا واحساسه ناحيتي بالتاريخ والدقيقه كمان !!
انا زوجي معايا طفل صغير وانا امه ،، وقدام الناس الراجل اللي بحتمي فيه وعاملي كرامه وشخصيه قدام كل الناس ،،
انا زوجي بالنسبالي #قطعهمنالجنه ..
🎀🎀🎀🎀🎀🎀
مين قال ان النقاب بيمنع الجواز.. زي م الجواز رزق ف النقاب كمان رزق وطبيعي مفيش رزق ممكن يمنع رزق تاني.. وف الاول والاخر كله مقدر ومكتوب عند رب العالمين.. ف اتطمنوا ❤
واشوفكوا في قصة جبر جديدة ❤❤
#حكاوي_هدير
#هدير_ابراهيم
لينك القصة علي قناتنا علي اليوتيوب
♥️♥️ قريتها قبل كدا وحبيتها جداااااا
ردحذفجميلة اوى اوى
ردحذفقرأتها قبل كدا من اجمل القصص اللي بحبها❤
ردحذفجميلة قوى قوى قوى ربنا يسعدكم يااااارب 😘😘😘
ردحذف❤️❤️❤️♥️
ردحذفمتعرفيش يا هدير قصصك دى بتعمل فى إيه...بجد ربنا يسعدك ويحققلك كل اللى بتتمنيه ..ربنا يرزقنا جميعا ازواج صالحين يكونوا قطعه من الجنه
ردحذف..حقيقى.ما أجمل الحب الحلال
جميله
ردحذفربنا يجبرنا كل بنات المسلمين بازواج صالحين ويكونوا معجزه لقلوبنا
حذفقريتها قبل كدة بس كل حاجه فيها جميله لدرجه لو قرأتها ١٠٠ مش هزهق منها اللهم بااارك الله يسعدهم ديما ويبعد عنهم العين
ردحذف