ضوء الفجر

 #ضوء_الفجر !!!

قصتنا النهارده على اد ما فيها وجع وألم وحزن على أد ما فيها جبر وعوض وحب ❤

#قصصواقعيهلهدير_ابراهيم 💌

🎀🎀🎀🎀🎀🎀🎀

كل انسان لازم تمر عليه فتره ف حياته بيكون اقصى احلامه هو #الموت !!

ف تخيلي لو كانت الفتره دي بتمر بيها #طفله لسه بتبتدي تتعرف ع الحياه ، وفجأه تلاقي نفسها وحيده #يتيمه !!

كتير تلاقي ناس بتتأفف م حياتها وفاكرين ان مفيش حد اسوأ م حالهم ودا طبعا غلط تماما ، بحس ان الانسان ف الفتره دي اكتر حاجه ممكن تعالجه فعلا هو انه يشوف او يسمع #بلاوي غيره ، ومتأكده جدااا ان هتهون عليه بلوته ....

ارجع واحكيلك عن حياتي ك طفله ، اتوفى ابوها قبل م تفتح عنيها ع الدنيا ، ولما فتحت عينيها وبدأت تفهم وتستوعب اتمنت لو كانت ماتت ولا انها كانت تيجي للدنيا دي !!

أم لا حول لها ولا قوه قدام عم جشع بكل ما تحمله الكلمه م معنى ، استولى ع حق ابويا وحقنا كله ، كان بيعذب امي علشان يديها فلوس كل اول شهر ع الرغم ان الفلوس دي حقنا وبتاعتنا اصلا ، بس لأن أمي مكانش ليها حد ف ضهرها يحميها منه عذبها ووراها جميع الوان الذل والعذاب ، واستمرت حياتنا ف الويل دا 6 سنين !!

ست سنين وأمي بتتحمل فيهم اللي مفيش مخلوق يقدر يتحمله ، كنت بشوف عمي بيضربها قدامي ، كنت بشوف دموعها وكسرتها وتأوهاتها طول الليل وللصبح ، كنت بحضنها واطبطب عليها ، كانت تقولي انها مستحمله كل دا علشاني انا ، وان عمي ربنا هيورينا فيه عجائب قدرته يوما ما ...

أمي كانت بتحاول تتفادى اني اشوفها بالمنظر دا وفي الحاله دي ، بس انا كنت كل م بكبر اكتر كانت بتزيد جوايا رغبة اني #اقتل عمي علشان بس أمي ترتاح ، لوقت م مره بالليل عمي كان مزود جرعة الشئ اللي كان بيتعاطاه والليله دي مش بس اعتدى ع أمي بالضرب ، لا كمان اعتدى عليها جنسيًا ، وكأن دي القشه التي قسمت ظهر البعير ، وأمي مقدرتش تتحمل وكانت النتيجه الحتميه لكل دا هو انها #انتحرت !!!

أمي انتحرت قدام عيني وهي وخداني ف حضنها وبتبكي ، وكل اللي فاكراه صوتها وهي بتقولي #سامحيني !!

 وصدقيني انا مش عارفه للنهارده هل كدا امي ماتت #كافره !!

بس انا عارفه ان رحمة ربنا وسعت كل شئ ، وعارفه ومدركه جدا باردو ان أمي كانت بعيده عن ربنا ، مش عاوزه اتطرق لكلام كتير انا نفسي مش فهماه وبيوجعني عدم فهمي ليه ، وكمان مش عاوزه اشتتكم معايا 💔

اللي حصل بعد وفاة أمي هو ان عمي وبكل قسوة قلب وجبروت عرض ع اي حد م اهل امي او جيراني انهم ياخدوني اعيش معاهم ولما الكل رفض دخلني #دار_ايتام !!

لكِ انت تتخيلي طفله ف سني بدل م ورقها يكون بيتقدم للمدرسه ، تلاقي ورقها بيتقدم لدار ايتام !!

فضلت فتره طويله وصورة أمي وروحها بتنازع الموت قدامي ، صورة أمي وهي جثه ساكنه مش بتتحرك عمرها م فارقت خيالي ليومنا هذا !!

كنت رافضه الكلام والأكل ، عيشت ف الدار حوالي سنتين ، طفله منطويه مش بتلعب ولا بتتكلم واكلتها ضعيفه جدا ، وبالطبع كل دا اتعكس ع مظهري الخارجي وملامح جسمي ووشي ، كنت احيانا بحس ان عظام وشي ظاهره ف المرايه ، لدرجة ان انا نفسي كنت اوقات كتير بترعب ابص ع شاكلي ف المرايه !!

سنتين في معاناه وبُكا ووجع قلب وكوابيس ودخول في هيستريا بكاء لحد م ادخل ف غيبوبة نوم م الالم والتعب !!

كانوا بيعلمونا ف الدار ، وكنا بناحد حصص دين ، وبعد كل حصه كنت بسأل نفسي فين ربنا دا اللي معلمتي بتقول عنه عادل ورحيم وحكيم ... الخ

فين العدل والرحمه والحكمه من انه يخلقنا ف الدنيا دي علشان يعذبنا وبس ، أم تموت منتحره وطفله تتيتم وتعيش حياتها كلها ف تشرد ومعاناه ، وعم يتسبب ف كل دا بكل جبروت ويعيش حياه هاديه ومرتاح وسعيد !!! فييييين العدل !!!!!!!

تميت ال 9 سنين ف الدار والحياه بتتعقد اكتر ، صدقيني #كذاب اللي يقولك ان في دار ايتام ع مستوى العالم الاطفال اللي فيها سعداء ، بإستثناء كل اللي بيحصل فيها ف في الاول او ف الاخر اسمها دااااااار للأيتااااام !!

عيشت ف معاناه ... معاناه ... معاناه ...

لوقت م بدأ القدر يضحك ف وشي ولأول مره ودا كان يوم م واحده ست حلووووووه اوووي جات زياره للدار ،

عرفت انها كانت بتيجي كتير بس انا كنت برفض اظهر وقت اي زياره للدار ، واليوم دا قدرًا نزلت وشوفتها ،

فاكره تفاصيل اليوم دا اكتر م اي حاجه ف حياتي ، فاكره ملامح وشها وضحكتها ، متذكره جدا ريحتها اول م ضمتني ليها ،

كانت ريحه مميزه جدا حسيت اني شمتها قبل كدا بس فييين !؟

ااااه صح دي ريحة #أمي !!!!!

مش عارفه ازاي دا حصل بس قلبي وروحي وكل كياني اتعلقوا بيها جدااا ، كل زياره ليها للدار بقيت استعد ليها م قبلها ، درجة تعلقي بيها اصبحت مرضيه !!

كل اللي ف الدار استغربوا حالتي ، بس انا كنت ف حاله م السعاده اول مره احسها ف حياتي وقولت اخيرا القدر ابتسملي ، لكنه رجع م تاني واداني ضهره ودا كان يوم م عرفت انها هتسافر مع زوجها وابنها الوحيد بره مصر ..

ايوه هي كان ليها ابن واحد بس ، وقدر ربنا بعد ولادته انها تعمل حادثه كبيره لدرجه انها فقدت فيها #الرحم ، وكان امنيتها يكون عندها اطفال كتير ف كانت بتزور الدار بتاعتنا ودور تانيه غيرها !!

انا كنت عارفه ان كدا صلتها بيا هتنتهي لان حتى لو فكرت تاخدني معاها مش هينفع الا بإذن م عمي بما انه وصي عليا ومازال ع قيد الحياه ...

بصي لغبطه وتعقيدات كتير حصلت م يعلم بيها الا ربنا ، ربنا !!

انا كنت بدأت اقرب م ربنا بسببها ، علمتني الوضوء والصلاه وعلمتني احب ربنا ، واني لما اكون عاوزه اطلب حاجه اطلبها منه هو وهو مش هيخذلني ، طول م هي جانبي وبشوفها حتى لو مرتين تلاته ف الاسبوع بس ع الاقل بغمض عيني وانا عارفه ان في وقت هفتحها الاقيها قدامي كان بيسعدلي قلبي ،

لوقت م عرفت خبر سفرها ، افتركت كلامها عن ربنا وجريت اتوضيت ووقفت اصلي ، سجدت ودعيتله ولأول مره ...

دعيت انه ميحرمنيش من وجودها ف حياتي ، انا كنت م صدقت انسى طعم اليتم مش عاوزه ارجع اعيش ف الحاله دي تاني 

دعيت كتيييير وبكيت اكتر ، كانت اول مره ادعي بس هو فعلا مخيبش ظني زي م قالتلي  ومسافرتش هي ، عرفت ان والدتها تعبت جدا وهي رفضت تسافر علشان تفضل جانبها ،

حسيت بالذنب ان ممكن بسبب دعوتي كنت انا السبب ف تعب والدتها ، حسيت ان ماليش عين ابص ف وشها ، ولما قولتلها كل اللي ف بالي دا ضحكت وقالتلي ان بالعكس ربنا قدر دا علشان هي كمان تحس إحساسي بإن أمي بعيده ، ووعدتني انها ابدا م هتسبني 

زوجها اللي اصبح أبويا وسندي وضهري وكل ماليا كان بيسافر دايمًا وبنشوفه زيارات ، هو اللي كان بينزل وهي كانت بترفض تسافر علشان متسبنيش لوحدي ،

وكأن في رابط قوي جدا جدا ربنا خلقه يربطنا ببعض ، كانت دايما تقولي اني كنت مرتبطه بأمي البيولوجيه بالحبل السُري ، بس دلوقتي انا مرتبطها بيها بحبل اقوى منه 😍

اتنقلت معاها ف بيتها واحتضنتني دخلتني مدرسه خاصه ، كانت بتذاكرلي بنفسها وبتهتم بكل حاجه تخصني ، ولأنها كانت دكتورة أطفال كانت شيفاني دايمًا طفله ، كانت دايمًا تقولي مهما كبرتي هتفضلي دايمًا طفلتي ♥

كنت بروح معاها العياده وكنت بساعدها وبتعلم منها حاجات كتير ،كنت بعمل نفسي دكتوره وبكشف ع الاطفال 😃 كانت تقولي اني هبقى دكتورة اطفال شاطره جدا ، بس انا كان ليا حلم تاني خالص ، كان نفسي اكون دكتوره #امراض_نفسيه !!

ماما حياه ، اللي هي فعليا اديتني الحياه اول حاجه عملتها بمجرد تعرفها عليا وعلى حكايتي عرضتني ع طبيب نفسي ، كانت متأكده اني محتاجه علاج نفسي اهم م اي حاجه تانيه ،

كانت بتحاول تداوي كل الجروح اللي كانت ف قلبي ، كانت بتتعامل معايا ع اني بنت كبيره واعيه لكل اللي حصل وبيحصل حواليها ، وفي النقطه دي بالذات عمرها م اتعاملت معايا ك طفله لا تدرك شئ زي م كل اللي ف الدار كانوا بيرددوا ، هي كانت عارفه ان كل اللي مريت بيه كفيل انه يتعمق جوايا لحد م اكبر ووقتها اتحول لبنت مشوهه نفسيا ... ودا بفضل الله ثم وجودها واسرتها جانبي محصلش ، بالعكس تماما بدأت اكبر وانا بتحول لطفله سويه نفسيا وخلقيا ،

وحلمي كان اني اصبح طبيبه نفسيه لعلاج الأطفال الأيتام بالذات ، كنت عارفه ان مهما حصل ف مفيش حد ممكن يحس بيهم ولا بمعاناتهم غير حد عاش نفس ظروفهم ...

احنا ف الدار كنا بنسمع بنفسنا كلام زي اننا ولاد #حرام وكلام كتير يسم البدن ، المفروض اننا عايشين ف مجتمع اسلامي والرسول وصى ع اليتيم وبشر كافل اليتيم ، الا ان نظرة المجتمع لينا ع مر العصور هي اننا اطفال غير شرعيين وعاله ع المجتمع !!

ودا كفيل انه يخرج م الدار اجيال مش بس فاقده للهويه لا كمان اطفال مشوهين نفسيًا !!

ولأن ربنا قدرلي ان حياتي تتبدل تماما ، ومش بس عرفت لاااا انا كمان لمست رحمته وعدله وحكمته ..

كان رحيم بيا انه بعتلي ماما حياه اللي هي كل الحياه بالنسبالي وبابا اللي بيخاف عليا م النسمه وكان كل اجازه يجيبلي كل م تتمناه وتحلم بيه اي بنت ... وأحمد !!

أحمد دا بقى يا ستي ليا معاه حكايات مش حكايه واحده 😃

هو ابن ماما وبابا وهو عشقي الأبدي 😍 بالرغم ان ف طفولتي كنت بكرهه جدا لاني كنت بغير منه ان بابا وماما حياه يحبوه اكتر مني ، ف كنت بتعامل معاه بغلظه ، وربنا رحمه م تحت ايدي انه كان بيكمل تعليمه بره مصر مع بابا ،

كنت بكره وقت الاجازه لاني بضطر اروح عند مامت ماما حياه بحكم ان حضرة الاستاذ كبر وانا كمان كنت بلغت ف #حرام تواجدنا ف مكان واحد علشان كمان ميخنقش حريتي ، كمان اتعلمت ان بابا مش من #محارمي ، ف كانت اجازتهم ف مصر بالنسبالي متعبه لاني مش بقضي الوقت كله مع ماما حياه كعادتي ، بس كانوا بيحاولوا يعوضوا دا بإننا نخرج كل يوم تقريبا ومفيش يوم بيعدي الا واشوفهم ماعدا بسيادته حضرة الأستاذ #الدكتور اللي سرق حلمي ودرس طب نفسي 😣 وكان ضيقي منه بيزيد لانه مش بس اخد حلمي لا كمان كنت شايفه انه برفضه يخرج معاهم ف وجودي انه بيكرهني وشايفني طفله يتيمه متشرده اخدت والدته منه ، وبالتالي كنت شيفاه لا يصلح للطب النفسي وهو غير قادر انه يعاملني معامله نفسيه صحيحه !!

هتصدقيني لو قولتلك اني مشوفتهوش ولا مره م اول م دخل مرحلة الثانوي لوقت م خلص الكليه ، هو درس طب خاص بره مصر ،

ولما رجع كنت انا كمان دخلت كلية الطب وهدفي بيتحقق قدام عيني ، وحياتي بفضل الله مستقره جدااا ...

زيارتنا لدور الأيام بتزيد ، وماما حياه وكل اللي حواليا كانوا معتقدين اني بروح زيارات كتيره لاي دار ايتام علشان اتدرب ع فهم الطب والامراض النفسيه ع ارض الواقع بس اللي مفيش حد فيهم فهمه هو اني مازال جوايا آثار وبقايا م الماضي لسه ساكنه جوه قلبي ، ولسه الكوابيس اللي كنت بشوفها وانا صغيره بتزورني ف احلامي حتى لو نسبتها وحدتها قلت الا انها كانت لسه موجوده ، تخيلي ان اللي فهم كل دا هو آخر شخص كنت اتوقعه .. كان احمد فعلاً !!

شوفته !! واخيرا شوفته !! شوفت الشاب الوسيم اللي كل البنات م حواليا بتتكلم عنه وعن شدة جاذبيته .. كنت هموت واشوف ابتسامته اللي الكل بيحكي عن جاذبيتها ..

بس شاب مين ووسيم مين وجاذبية مين وضحكة مين اصلا !!؟ الولد الصغير دا بقى شاب خلاص !؟ الولد الرخم اللي قضى حياته كلها يتجنبني وكان اول م يلمحني وشه يقلب ويكشر ويتغير خالص !؟

بقى كل دا ازاي اكيد البنات دي بتبالغ كعادة البنات ف الكلام عن الشباب ...

وشوفته اخيرا وطلع فعلا كلامهم مش صح ، طلع كلامهم اقل م الواقع بكتيييير ، اللي هو اييييه الواد ابن الناس اللي قدامي دا 😍 تربية ولاد بره فعلا 😂

اللي كنت مستغرباه هو انه وافق يخرج معانا ومش بس كدا دا كان بيوجهلي انا الكلام 😍

دفاعاتي وكرهي ليه طول السنين اتهد ف لحظه ، لحظه ايه اتهد م مجرد نظره م عينيه 😍😍

بس لا كان متربي بره اها بس تربية بابا الملتزمه المتدينه ، وطبعا مامته ماما حياه ، ف كان شاب اقرب #للمثاليه ...

للحظه حبيت وجوده جدااا ، بس مجرد م حسيت ان كل خطوط دفاعي حوالين قلبي بتنهار قدامه عرفت اني داخله دوامه وعذاب اكبر لقلبي ،،

انا كنت معاهده نفسي اني عمري م هتعلق بحد ابدا ، لان ببساطه اللي زيي غير صالحين للزواج ، اي حد هيتقدملي هيتقدم علشان العيله اللي عايشه وسطها ، لكنه اول م هيعرف اني كنت ف دار ايتام اغلب الظن انه هيظن فيا اني بنت حرام ، وعلشان كدا رفضت تماما اني اتحط ف الموقف دا مهما كان ..

ودلوقتي جايه احب مين !؟ احب اكتر انسان بيكرهني لدرجة انه كان بيرفض يشوفني ازاي !؟ انا شاكلي اتجننت !؟

بس ولأن ربك زي م قولتلك عادل ورحيم مسابنيش ع الحال دا كتير وكانت مفاجأة ماما حياه ليا بإن احمد طالب انه يتجوزني وبتسألني عن رأيي !؟

رأيي !؟ رأيي انا !؟ واحمد !!؟ احمد احمد ولا احمد حد تاني !!!؟

مكنتش فاهمه حاجه خالص وكنت خايفه تكون دي رغبة بابا وماما حياه واجبروه انه يتجوزني !؟

هو كان طلب م ماما حياه انه محتاج يتكلم معايا وانا وافقت ....

بصي يا ستي اللي فات م عمري حاجه واللي حصل واتغير ف حياتي م بعد اللقاء دي حاجه تانيه خاااالص ، تأكدلك وتأكدلي وتأكد لاي مخلوق ان في خالق عيونه لا بتغفل ولا بتنام وقادر يمحي كل ذرة حزن مرت ع قلوبنا بوااااااسع رحمته وعظيم فضله وعطائه ...

هدير تخيلي ان احمد طلع بيحبني م واحنا صغيرين وم اول م شافني ، ومش بس كدا دا هو اللي كان طلب م مامته اللي هي ماما حياه انها تتقرب مني م البدايه ، قالي ان اول مره شافني شاف ف عيوني حزن كبير وحس اني #بنته !!

بنته واحنا ف العمر دا ازاي هو نفسه مكانش عارف ، بس حس احساس غريب ناحيتي ، وبعد م عرف م سمع ماما حياه وهي بتحكي قصتي لبابا وقالتله اني محتاج طبيب نفسي ، قرر م وقتها انه هيدخل طب نفسي علشان يعالجني وانه مستعد يدرس اي حاجه توصله انه يخفف م المي ومعاناتي ، كان خايف عليا يكون مصيري زي مصر أمي وهو الانتحار ..

كان عارف بالكوابيس اللي بتحصلي ، وقالي انه متأكد انها لسه بتجيلي حتى بمرور السنين دي كلها وتغير البيئه والظروف ...

هدير انا كنت بسمع الكلام منه وانا مش متخيله ان دا بجد هو عوض ربنا 😍😭 بس معقووول ، انا الطفله اللي شكت ف وجود ربنا ف صغرها ، ربنا بدل م يعاقبها بدل حياتها تماما للافضل ، بعتلي مش بس أب وام لا وزوج ولااا كنت احلم بيه ف حياتي ،

وفوق كل دا رومانسي اها احيانا بتقلب معاه رخامه 😕 بس لا ف المجمل هو زوج رومانسي جدااا وحنون فوق م حد يتخيل ، لدرجة اني دايما بقوله اني حاسه ان ربنا جمع كل الحنان اللي ف الدنيا كلها ووضعها ف قلبه ودايما يكون رده ان لو دا حقيقه ف دا علشاني انا وبس 🙈😍

بكل موقف بيعمله معايا بيزيد ف نظري اكتر واكتر ، ويكفي انه بيخليني ازور قبر امي دايما ، وبيخليني اتكلم عنها كتير وعملنا ليها حج وعمره لعل ان ربي يتقبل ، وبقى عندي امل ان ممكن تكون حالة وفاة امي مش انتحار او تكون عند ربنا مش كافره ....

بوجوده جانبي محى م قلبي وعقلي اللي ماما حياه وطبيب طفولتي النفسي مقدروش يمحوه ...

معاه وبوجوده فهمت وادركت حكمة ربنا من انه خلق لآدم حواء واهمية وجود كل منهم بالنسبه للآخر ....

أحمد اللي بحمد ربي كل لحظه ع وجوده ف حياتي ، لدرجة اني وصلت لفكرة اني اتمنيت لو كان بإيدي لحظة ميلادي اختار قدري لاخترت نفس القدر اللي اتولدت عليه ويكون جانبي احمد بكل حبه وحنانه ورعايته واهتمامه وكل ما فيه ....❤

فسبحان م زرع حُبي في قلبه منذ الصغر ورعا هذا الحب حتى يومنا هذا ورواه بماء المودة والرحمة والحب ♡

بابا وماما حياه بالنسبالي كانوا هما ضوء الفجر اللي بدأ يظهر ف حياتي فجأه بعد ظلاااااام وتيه وضياع ... وأحمد كان هو الضوء الكامل اللي مازال بيشع نوره ودفءه ف حياتي ❤

انا ينطبق ع حياتي تماما قول ربنا : لى: { وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُون َ} ...

اللهم بارك باااااارك بااااااااارك ف عمر ابويا وأمي حياه وزوجي احمد ع طاعتك وبارك لي في ابنائي واجعلهم ذرية صالحه لنا ف الدنيا والآخره ❤❤

#ملحوظه لكل ظالم نهايه سيئه يستحقها ، ودعاء امي ربنا استجابه ووراني فيه عجائب قدرته فعلا اللهم لا شماته ...

وطلب اخير مش عارفه هينفع ولا لا بس بتمنى تدعوا لأمي بالرحمه لعل الرحيم #يستجيب 

🎀🎀🎀🎀🎀🎀🎀🎀

كل شر ف حياتنا م هو ف الأصل الا خير بس ربنا قدره ف الوقت دا لحكمه لا يعلمها الا هو ... الله يعلم ولا احد غيره يعلم .. الله وحده يعلم حال قلبك يا مسكين ووحده القادر بكلمة #كن يكن كل شئ ف الدنيا تحت قدميك .. فبقُربه يتداوى جرحك .. 

بنسمع كتير ك نوع م المواساه عبارة ان ربنا ارحم بالوليد الرضيع م امه ، بس القِصه دي كفيله تخلينا نلمسها ع ارض الواقع ، واننا كلنا عبيد الله وفي كنفه ورحمته ❤

تأكدوا ان مهما اشتد الظلام ف لازم هيجي الوقت اللي هيبتدي فيه ضوء الفجر يظهر وينقشع الظلام وتنقشع معه كل اوجاع وآلام قلوبنا ..... 👌

#حكاوي_هدير

#هدير_ابراهيم

لينك القصة علي قناتنا علي اليوتيوب

ضوء الفجر - YouTube