ليلة القدر
#ليلة_القدر ❤
ربنا بيدبرلنا جبر وعوض يعوض بيه قلوبنا عن كل الأحزان اللي عليها وقادر في غمضة عين يبعتلنا فرحه يرمم بيها كل كسر حصل في قلوبنا..
تعالوا نشوف دا ازاي حصل مع بطلة قصتنا النهارده..
#قصص_واقعيه_لهدير_ابراهيم 💌
🎀🎀🎀🎀🎀🎀🎀
في البداية يا هدير احب اعرفك بنفسي وازاي وصلت لقصصك..
انا ريم عمري الحالي 35 سنه..
عرفتك عن طريق قصة نزلت عندك اسمها معجزه لقلبى..
بسببها دخلت عندك وقعدت كتير اقرأ فى القصص.. عجبتنى وشدتني جدا خاصة انها قصص واقعيه وان مهما نمر بإبتلاء ربنا بيراضينا ويجبر قلوبنا بس احنا نصبر ونرضى ومفيش حاجه اسمها #مستحيل..
ولما قولتى قبل رمضان انك بتجهزي لقصصه وان اللي عنده قصه متعلقه برمضان يبعتها كنت محتاره ابعت ولا لا وبقيت اكتب وامسح.. لحد ما لقيت نفسي فتحت الشات بتاعك وصندوق ذكرياتي كله بيتكتب..
قصتى متعلقه ب #ليلة_القدر
الليله دى غيرت حياتى كلها مع ان الظاهر فيها انها ابتلاء بس بحمد ربنا على اللي حصلي لانه كان ابتلاء يكمن فيه خير كبير وهتعرفي ازاي دلوقتي..
حياتي مع أهلي كانت كلها حب وود وتفاهم الحمد لله.. اتربيت على الصلاة وحفظ القرآن وتعلم الدين..
دخلت الجامعه..وكنت زى اى بنت عندى مواصفات فى فتى احلامي واهمها يكون ملتزم ويا سلام لو ملتحى يعاتبنى لو اخرت الصلاه ويشجعنى على الطاعه ياخد بإيدى للجنه وكنت اقول لاصحابى فى الكليه اهل جوزى دول هيبقوا عيلتى التانيه ومش هقولهم غير حاضر ونعم.. ف كدا مش هيبقى في مشاكل..
طبعا كان ردهم انتِ عايشه حياه ورديه.. الواقع غير كدا خالص كنت اقول لا بإيد الواحده تخلي حياتها كويسه او وحشه ..
قالولى لما تتجوزى هتشوفى وجالى النصيب وانا لسه بدرس.. اه مكنش ملتحى بس محترم وكويس وكان بيقبل الكلام منى تعالى نصلي الفجر يقول ماشى نقرأ ورد من القرآن يقول حاضر نسمع برنامج ديني او اي حاجه اطلبها عامة كان بيعملها معايا فعلا وكان مبسوط بكدا وبينفذ علطول لدرجة حفظ اسامي معظم الشيوخ وكان يرن عليا يقولى افتحي قناة كذا في برنامج ديني حلو شغال.. وبعدين م نسمع نتناقش سوا..
غيرت فيه كتير بشهادة اهله بفضل الله لحد ما اتجوزت ودي كانت بداية الابتلاء والاختبار..
للأسف اتجوزت وانا لسه في رابعة جامعة وف بيت عيله.. مكانش عندي مشكلة في كدا نهائي.. بس المشاكل كلها كانت من عند اهله.. بسبب اني منتقبه وخريجة أزهر كانوا دايما يتريقوا على كلامي وعلى اي فعل ليا ويقولولي #ست_الشيخة والكلام اللي بيتقال لبنات كتير منتقبه او ملتزمة عامة..
المهم اني كنت مركزه مع زوجي وانه طيب معايا وحنين عليا وكانت والدتي مع أي مشكله مع أهل زوجي تقولي اسمعي وعدي والمهم زوجك معاكِ كويس..
عدا اربع شهور من جوزاي حلوين جدا وربنا انعم عليا بحملي الاول.. وخلاص هروح اكشف حماتى قالت لا بعد شهرين عشان يكون الحمل بان.. استغربت كلامها بس قولت ماشى وماله نستنى.. كنت فرحانه جدا بالحمل وان حياتى ماشيه تمام زوج كويس جدا وهكون أم ❤
بس للأسف بعد اربعين يوم من حملي نزل عليا دم جريت بسرعه على الدكتوره اللي قالت للأسف الجنين نزل💔
حماتى وزوجى كانوا معايا..بكيت كتير بس قولت الحمد لله مليش نصيب فيه ودعيت ربنا يعوضني..
قعدت بعدها سنه كامله مفيش حمل و اجري على الدكاتره وكله يقول مفيش مشكله.. المنع م عند ربنا.. وبدأت مشاكل بيت العيله كنت عايشه حرفيا خدامه من 6الصبح لحد12بالليل ومشاكل على اتفه الاسباب لا داعي لذكرها لاني مش عاوزه افتكرها واتوجع زياده اللي شوفته وعيشته..
حماتى جوزها متوفي وولادها التانين قاعدين معانا في نفس البيت بس كل واحد شقته مقفوله عليه.. انا الوحيده اللي كنت قاعده معاها..
ووالله لما كان يحصل مشكله وجوزى يدافع عني كانت تزعل منه وتاخد جنب ومع ذلك مكنتش اسيبه ينام غير لما ينزل يصالحها واقوله رضاها اللي هيدخلك الجنة..
كنت بعدي علشان جوزى كويس معايا وبيدافع عني بس كان قلبى حزين ومش ببطل عياط من الظلم اللي بشوفه م حماتي رغم اني بحاول اتقي الله فيها بس للأسف كانت دايما تيجي عليا أنا.. ولما كنت اشتكي لأمي كانت تقولي معلش استحملي.. واعتبريهم اهلك..
عمرها مقالتلي كلمه وحشه عليهم بالعكس كانت تهديني..
امي طيبه اوي وحنينه اوي كنت بحبها جدا وكنت بحس بيها لو تعبانه..
و في يوم مرات اخويا الكبير كلمتنى اروح معاها تشترى شوية حاجات علشان مسافره لأخويا بره مصر.. قولتلها حاضر واتفقنا ع معاد..
تانى يوم صحيت نشيطه علشان اخلص اللي ورايا واقابل مرات اخويا.. وفجأه لقيت اخت جوزي بتنادي عليا وبتقولي انزلي بسرعه حماتك تعبانه ويلا علشان هنروح نكشف عليها دخلت لحماتي قولتلها سلامتك وهنروح للدكتور وان شاء الله مفيش حاجه وهتكوني كويسه ولبستها الطرحه عشان نروح للدكتور.. فجأخ لاقيت جوزي رجع من الشغل اللي فى محافظه تانيه اصلا واخواته البنات واجوازهم كمان داخلين..استغربت هو في ايه كل دول جايين علشان حماتي تعبانه شويه ؟! مع انه شكلها كويس ومش بتشتكي م حاجه... قولت خير يارب
اخدنا عربيه علشان نروح نكشف عليها بس كنت خايفه وقلقانه وقلبي مقبوض مش عارفه م ايه..
لاقيت تليفونى رن ومرات اخويا.. ياربي انا نسيت اعتذرلها عم معادنا..
رديت عليها ولقيتها بتسألني انتِ مش جايه ؟ قولتلها لا مش هعرف لان حماتي تعبانه ورايحين نكشف عليها
وفجأه الزمن وقف بيا اول ما قالتلي امك واخوكي الصغير ماتوا يا ريم 💔 قولتلها انتِ بتقولي ايه فضلت تكررلي الكلام وانهم ماتوا😢 حسيت ان الزمن وقف وعقلى طار مبقتش مستوعبه حاجه وفهمت كل اللي بيحصل الكل عارف ومخبيين عليا💔
جريت على باب العربيه عايزه انزل على اساس انى هكون اسرع من العربيه واوصل عندهم وبقولهم امي واخويا امي واخويا 😢
منعوني انزل..
قعدت ونزل عليا هدوء غريب دموعى نازله وبدعى ربنا الصبر وان يؤجرني فى مصيبتي ويخلفني خيرا منها وقعدت افتكر كل لحظه ليا معاهم حضن امى اللي ملحقتش اشبع منه 💔
حنيتها الى هتحرم منها..ضحكتها اللي كانت بتقابلني بيها وتقولي البيت نور.. كنت لما ابات عندهم تسيب اوضتها وتيجى تاخدني فى حضنها وتدعيلي..
عمرها ما شبعت نوم طول عمرها شقيانه من الفجر تجري على اكل عيشها فى السوق الصغير والكبير بيحبها..
واخويا.. اخويا اللي اصغر مني اللي شجعنى اعمل ندوات دينيه واتكلم مع الناس فى الدين كان بيصوم اتنين وخميس طول السنه مات ي حبيبي وعنده 19سنه الناس.. كانت بتحبه وتحب قعدته علشان لسانه دايمًا في ذكر ربنا..وينصح دا ويعلم دا كان من جماله الناس تقول دا ابن موت💔
كنت اما اروح زياره ياخدني تحت باطه ويبوس راسي ويغمزلى ويضحك.. كل دا مش هشوفه تاني خلاص💔
وصلت قبل الدفنه ع نفس حالي ..عنيا نازل منها دموع وبس..
وصلت وانا مستنيه انهم يقابلوني بضحكتهم الحلوه 💔
قعدت فتره كبيره حاسه ان دا مش حقيقى امي واخويا ماتوا في حادثه مع بعض اخويا مات صايم لأنهم ماتوا يوم الاتنين صلوا مع بعض الفجر ونزلوا للسوق اخويا بيوصل امى ويرجع للبيت.. بس اليوم دا رجعوا الاتنين #جثه جسد فارقته الروح وخدوا روحي معاهم💔
ربنا يرحمهم بعد وفاة امى واخويا حياتي الزوجيه بقى فيها مشاكل اكتر.. تخيلي في العزا خالتي بتوصي حماتي عليا وبتقولها خلي بالك منها.. انتِ دلوقتى زى امها.. مش فاهمه بصراحه ايه المشكله في كلامها دا بس حماتى معجبهاش الكلام وقالتلي خالتك بتقولي كذا وكذا.. قولتلها وفيها ايه قالتلي انتِ اكيد بتشتكيلهم مننا..
متخيله انا في ايه وهي في ايه ! يعني حتي زعلي على اهلي مكانوش محترمينه ولا مقدرين حالتي النفسيه 💔
كنت ببكي ليل نهار .. بعد كدا رجعت احاول تاني في موضوع الحمل علشان اجيب ونيس ليا..
روحت لدكاتره كتير وكله يقول معندهاش حاجه والتأخير مش لسبب طبي..
ومع كل اللي بمر بيه دا الاقي حماتي بتشكك اصلا في حملي الاول وبتقول دا مكانش حمل مع انها سامعه بنفسها الدكتوره وهي بتقول ان حصلي #اجهاض ..
بقت تقول عليا دي عمرها ما هتخلف لو بتخلف كانت خلفت من زمان.. مع ان سبحان الله اللي عرفته ان هي نفسها قعدت 3سنين من غير حمل وانا يادوب سنتين اللي مروا ع جوازي.. حسستمى اني بقالي 10سنين ولا اكتر وحتى لو..
المهم شوفت دكتور مشهور على التليفزيون..قولت بس هو دا اللي هيعرف المشكله فين..
روحتله وانا كُلي امل ان ربنا هيجعله سبب في حملي بس للأسف قالي لو مستعجلين اعملوا #حقن_مجهرى ..
جوزى يومها كان وشه مش قادره افسر ملامحه..
رجعنا البيت وهو ساكت بس م وقتها وبدأ كلام اهله طلقها واتجوز بحق العمليه احسن..
وحماتي تقولي سيبيه انتِ ماسكه فيه ليه انتِ عمرك م هتخلفي 💔 مقدرتش تعبي ومرمطي تحت رجليها طول جوازي..
اخويا قال لزوجي انه هشيل معاه في مصاريف العمليه.. بس زوجي رفض وقاله لأ وشد معاه في الكلام ومن وقتها وزوجي اتغير في معاملته ليا ووقفت على الطلاق كذا مره بسبب الحمل وانا اتمسك ببيتي واصبر لحد في يوم كنت صايمه جوزي اتصل وقالي افطري لوحدك علشان هتأخر قولتله هستناك وشربت مياه وخلاص..
حماتى كل شويه تقولي روحي افطري قولتلها اني هستنى جوزي افطر معاه وانا فطرت على مياه ومش جعانه..
ودي مصممه مش فاهمه مالها..
اول ما جوزي وصل قالي حضري الأكل على ما اغير لبسي وطلع..
حضرت الاكل وقعدنا ناكل حماتي مرضيتش تاكل وقعدت تزعق واترمت على الارض !!
اتخضينا وجوزي بيسألها مالك يا امي؟
قالتله متقوليش امي انا مش امك لا تاكل ولا تشرب معايا اقعد لوحدك..
ونزل ابنها الكبير جري على الصوت ودخَّلها الاوضه وبعدها عنا علشان تهدى..
جوزي قاله شوف امك عايزه ايه وانا هعمله
واخدنى وطلعنا شقتنا وقالي احنا خلاص هنقعد لوحدنا ومتنزليش تحت من الصبح..
تاني يوم نزل ملاقاش والدته فى البيت سابت البيت وراحت عند بنتها طلع قالي ونزلت تاني عملت شغل البيت..وقولتله طب وبعدين ايه الحل انا معملتش حاجه علشان يحصل كل دا قالي عارف قولتله طيب رمضان داخل ولو ربنا ما رزقنيش بالحمل بعد رمضان نعمل حقن مجهرى يمكن المعامله تتحسن عن كده قالي مش هتفرق انا عارف امي..
لاقيته مش متمسك بيا ولا عارف يبعدني عن المشاكل قولتله خلاص بدل ما اطلع شايله اطلع فاضيه احسن..سألني يعنى ايه ؟
قولتله كل واحد يروح لحاله وروح هات امك بيتها بس قولها حسبي الله ونعم الوكيل فيكِ علشان تخرب بيتي كدا💔
وسابني بكل بساطه اطلع م البيت ورجعت بيت اهلى.. والدي كلمه قاله يومين وهرد عليك..
مر وقت ودخل رمضان واحنا لسه زي ما احنا ولما جالنا حد من طرفهم قالوا انه مش هييجي بيت والدي وهيطلق وهو فى بلده عاجبكم ماشى مش عاجبكم هنلم عفشها فى اوضه وهيتجوز.. لا وانا اللي كان لسه عندي أمل فيه للاسف كسر قلبي هو ووالدته 💔
قولت لوالدي ماشى انا عايزه اخلص لاقيناهم حددو ليلة 27 رمضان كله بقى يضرب كف على كف ويقولوا يعني ما لاقوش غير اليوم ده ويطلق فيه وفعلا حصل الطلاق واخدت عزالى وطبعا ناقص بس قولت خليهم يقبلوها على نفسهم مجاتش على دي يعني.. بس اخدت المؤخر بتاعي وشيلته ودعيت ربنا يعوضني بالخير وبقيت حامله لقب مطلقه بعد سنتين ونص جواز وانا عندى لسه 23سنه💔
ليلة طلاقي واللي كانت زي م قولت ليلة 27 رمضان منمتش فيها طول الليل ادعي وابكي لربنا وانا عندي يقين انا ربنا هيعوضني وينسيني كل اللي حصلي..بس كنت محتاجه امي اوي في اليوم دا💔 كنت محتاجه اترمي فى حضنها واشكلها وهي تخفف عني💔
حمدت ربنا ان والدى عايش الحمد لله بس ابويا شخص طيب جدا ومش بتاع مشاكل ولا كلام كتير انا شوفت فى عنيه نظرة كسره وحزن على مراته وابنه اللي ماتوا وعلى بنته اللي اتطلقت..
نظرة حزن عمري ما شوفتها في عنيه ابدا قبل كدا..كنت ادخل عليه وهو لوحده الاقيه بيبكي على أمي💔
امي دي كانت عمود البيت من اول ما اتجوزت والدي وهى شايله المسؤليه .. ابويا كان بيزرع في الارض وياكل من خيرها لا كان موظف ولا عنده معاش لما اتجوز امى كانت ظروفه الماديه صعبه.. قالتله لا كدا مينفعش انت ازرع وانا هبيع ومن ساعتها ابويا يزرع الخضار وامي تروح السوق وتبيع..
احنا 4 اخوات ولد وبنت اكبر مني وانا واخويا الصغير الله يرحمه💔
أمي الله يرحمها ربتنا وكبرتنا وعلمتنا من شغلها فى السوق.. ابويا كان يقول محتاجين كذا يلاقيه عنده مكانش شايل هم حاجه..الناس كانت بتحسده ع أمي.. كانوا يقولوله انت معاك واحده تحول التراب دهب.. طول عمرها شقيانه ومعيشانا احلى عيشه عمرها ما ارتاحت.. ولو تعبت تاخد التعب على رجليها وتقول انا كويسه..
اما والدي بقى ف هو اصلا اساس التزامي وقربي من ربنا.. كانت الصلاه عنده اهم من الاكل والشرب.. اول ما يدخل يقول اللي مصلاش ميقعدش معايا على الاكل.. والبرامج الدينيه دايما شغاله..
اول ما اتطلقت قالي متزعليش ربنا ان شاءالله هيعوضك خير.. ولما كان يجيلى عريس كبير في السن كان يقوله معنديش بنات للجواز.. من غير ما اشوفه حتى بس كان سايبلى حرية الاختيار في حياتي وعمره ما اجبرني على حاجه ربنا يباركلي في عمره يارب❤
وزي ما قولتلك بفضل الله ربنا رزقني بعيلة حنينة..اختي الكبيره كانت بتهون عليا من اللي انا فيه وكانت معايا فى كل مرحله مريت بيها.. كانت تكلمني تلاقيني بعيط تقولى هتموتي نفسك من كتر العياط ..ما تخليش حد يكسر عينك.. انتِ مفكيش حاجه ولما ربنا يأذن هتخلفي..
كانت هي امي بعد وفاة امى الله يرحمها..بعد الدفنه كنت بدور فى وشوش الناس عليها عشان اترمى فى حضنها واول ما شوفتها بقينا حاضنين بعض وبنبكي..اختي الحمد لله حنينه اوى واخده كل حاجه من امي الله يرحمها مش عارفه من غيرها كان ايه اللي حصلي بس ربنا كريم ❤
مرت الايام وبقى يجي العرسان اللي مطلق ومعاه اطفال واللي ارمل واللي عاوز زوجه تانيه ومع كل عريس تصعب عليا نفسي واقعد اعيط خاصة لو العريس في عمر والدي💔
ومن كتر اللي سمعته م حماتي صدقت فعلا اني مش هخلف وقررت اني مش هتجوز تانى ولا عاوزه اكرر التجربه دي تاني..
قربنا ندخل رمضان اللي بعده وقررت اني اعمل عمره بفلوس المؤخر اللي كنت شيلاها..
جهزت ورقى وورق والدى وفعلا طلعنا عمره روحنا فى اخر شعبان عملت عمره في شعبان وعمره في رمضان..
كانت اسعد ايام فى حياتي.. لكِ ان تتخيلى رمضان كله حزن وابتلاء ورمضان اللي بعده فرحه مابعدها فرحه❤
بقيت متعلقه فى كسوة الكعبه وابكي وادعي ربنا يعوضنى خير عن كل أذى شوفته..
وعملت عمره لأمي واخويا ..مكنتش عايزه ارجع احساس جميل اوي وانتِ في الروضه الشريفه ووانتِ واقفه قدام الكعبه.. مكنتش مصدقه اني فعلا هنا دلوقتي قدام الكعبه بعمل عمره والسبب ايه طلاقي !!
طلاقي خلاني عملت عمره واتحول من نقمه لنعمه كبيره بحمد ربنا عليها..
بعد ما رجعت عرفت من خالتي ان طليقي اتجوز وان حماتي بنفسها قالتلها انها ندمانه على اللي عملته فيا وانها مش هتلاقي حد زيي تاني.. الحمد لله ربنا ردلي حقي..
مرت فتره ورجع يجيلي عرسان من تاني بس واحده قريبتى قالتلي في عريس عايز يشوفك قولتلها مين قالتلي فلان مكنتش مصدقه اول ما قالتلي اسمه..
هو قريبى اصلا وشاب عازب واصغر منى بسنه !!
قولتلها لا دا انا بعتبره اخويا قالتلي بس هو عايزك وموافق على اي حاجه تقوليها..
كنت رافضه الموضوع رفض قاطع خاصة اني شايفه انه اصغر مني وعازب ومن حقه يتجوز واحده مسبقش ليها الجواز واني ممكن ما اخلفش..
بس اقنعوني اقعد معاه ولو م حسيتش براحه خلاص..
وقعدت معاه فعلا واتكلمت فى كل حاجه وقولتله انا ممكن ما اخلفش.. سألته ليه عاوز تربط نفسك بيا ؟! قالى انا عارف وراضي وموافق.. وسواء ربنا رزقنا الحمد لله او مرزقناش بردو الحمد لله على كل حال.. وانتِ كفايه عليا..
كنت مستغربه كلامه ومش قادره اصدق ولا استوعب لحد م عرفت بعد كدا انه كان عايزني اصلا م قبل م اتجوز.. وانه متعلق بيا من زمان وكان م قبل زواجي بيدعي ربنا يجمعني بيه..
وربنا حقق دعائه واستجابله واتجوزنا
علشان بعد 6 شهور من جوازنا تحصل #المعجزه وابقى حامل مكنتش مصدقه وفرحانه اوي وجوزي كان طاير من الفرحه لفرحتي..
وبقيت ادعى ربنا يكملي حملي على خير بس بعد شهرين الجنين نزل 💔
انهارت من العياط وجوزى يهدي فيا ويقولى الحمد لله.. انا عايزك انتِ مش مهم اي حاجه تانيه..
جوزي كان واقف جانبي وساندني وبيخفف عني..
كنت حزينة جدا بس كنت راضيه وبدعي ربنا انه اكيد هيجبر قلبى ويعوضنى وبعدها ب6شهور حملت تانى وبقيت خايفه ليحصل اجهاض تانى وكل ما ادخل الحمام افتش فى هدومي ليكون فيها دم بقى عندي وسواس ورعب للاسف💔
وفي الشهر التالت الدكتور قال النبض وقف والجنين ميت قولت الحمد لله اللهم أجرني في مصيبتي واخلف لي خيرا منها ودموعي نازله وحاسه ان قلبي انكسر حملت 8مرات مره ينزل فى التانى ومره فى التالت ومره فى السادس اللي كانت في السادس كانت بنت اتعلقت بيها اوى لما عدت اول 3شهور وسميتها مريم كانت لما تتحرك ابقى فرحانه واقعد اتكلم معاها بس فى الشهر الرابع الدكتور قالي فيه #تشوهات ولازم تنزل حسيت بحزن كبير اوي في قلبي بعد ما اطمنت ان اول 3شهور عدوا ع خير يحصل كدا ؟
بس بردو كنت راضيه وصابره على اللي ربنا بيدهولي..روحت المستشفى نعمل اجهاض بس قالوا دي فيها الروح ومينفعش تنزل لأنها كملت الرابع قولتهم يعني لو كملت هتعيش قالوا حتى لو استنت للتاسع اول ما تنزل هتموت لأن خلايا المخ مش موجوده احتسبت اجري على الله 💔
وكل يوم بيمر كنت بتعلق بيها اكتر واصلي وادعي ربنا ان يحصل معجزه وبنتي تعيش لحد ما وصلت لآخر السادس وحركتها وقفت روحت اكشف قالولي ماتت💔 قولتلهم انا حاسه بيها بتتحرك اتأكدوا قالوا دي تهيؤات للأسف..
وولدتها قيصري وجوزي اخدها دفنها كنت حاسه بالحزن فى عنيه بس مش راضي يبينلي وبقى يقولي قوميلي بالسلامه وانا مش عايز عيال كفايه عليكِ كده صحتك اتبهدلت..
زوجي حنين وطيب اوي وسند حقيقى فى الشده بالرغم ان كل حمل كان مُكلف جدا لأني باخد علاج غالي.. بس عمره ما اشتكى وهو شغله على اده اصلا وفي وسط كل ده ربنا رزقنى وفرح قلبى ب ابنى الوحيد الكل كان فرحانلي ومفيش حد كان مصدق المعجزة اللي حصلت وبالنسبالهم ف دا حقيقي #معجزه..
اول ما عرفت اني حامل تابعت مع دكتور بس فى الحمل دا بالذات مكنتش خايفه زى كل مره قولت ربنا لو كاتبلي اكمل هكمل كنت بحاول على اد ما أقدر موترش نفسي لحد ما الجنين اتحرك فى بطني وبقى يكبر يوم بعد يوم وانا ادعي ربنا يكملي على خير المرادى.. لحد ما وصلت للتاسع يا فرج الله.. بقيت بحمد ربنا وارتحت شويه جالي طلق الولاده بالليل استحملت لحد بعد الفجر وطلعت انا وجوزي على الدكتوره قالتلي هي ولاده بس مش هينفع تولدي طبيعي لازم قيصري ودلوقتي ع طول..
طلعنا على المستشفى بسرعه وفعلا ولدت الحمد لله وفرحتي اللي بجد بقى كانت اول ما شوفت ابني وسمعت صوت بُكاه..
احساس اني خلاص بقيت ام وهيتقالي خلاص يا ماما 😭
وجوزى اللي كان راضي بيا حتى لو مخلفتش..خلاص بقى اب ومش هحس بتأنيب الضمير على جوازه مني❤
لما رجعت من المستشفى اخدت ابنى في حضني وبقيت ببصله وفرحانه واقول الحمد لله يارب انك عوضتنى اخيرا شيلتك على ايدي وضميتك لحضني❤
عارفه لما كان ينام شويه كنت اروح اقريف فيه علشان الاعبه وافضل بصاله كتير احساس الامومه ده حاجه حلوه اوى بالذات للي قعد سنين محروم منها💔
عايزه اقولك ان اهل جوزى عمرهم محسسونى بحاجه ولا اتكلموا معايا في موضوع الحمل بالعكس لما كان بيحصل اجهاض كانوا هما اللي بيخدمونى وكنت مرتاحه وسطيهم كأني بنتهم..
ابنى ملا عليا حياتي وزادها بهجه وبقيت ام بعد ما كان بيتقال عليا مبخلفش بحمد ربنا وبشكر فضله ونعمه عليا مريت ب ابتلاءات كتير ونعم اكتر ربنا انعم عليا بزوج حنين وابن كنت فاكره انى مستحيل هشوفه.. ربنا كريم❤
🎀🎀🎀🎀🎀🎀🎀🎀
في الغالب بيكون عندنا قصر نظر.. ف بنشوف كل ابتلاء بيمر علينا شر مع ان الابتلاءات هي اقدار ربنا.. واقدار ربنا كلها خير بس انتوا قربوا منه واكيد اكيد هيداوي قلوبكوا وهيبعتلها الفرحه والأمان
واشوفكوا في قصة جبر جديده 💙
#حكاوي_هدير
#هدير_ابراهيم
لينك القصة علي قناتنا علي اليوتيوب
تعليقات
إرسال تعليق