لعل كلما هو مُر قد مَر

 #لعل_كلما_هو_مُر_قد_مَر !!

هاشتاج باقي القصص 👇

#قصص_واقعيه_لهدير_ابراهيم 💌

🎀🎀🎀🎀🎀🎀🎀🎀🎀🎀🎀🎀🎀🎀🎀🎀

وقت م قررت ابعتلك قِصتي كان كل همي اني اوصل للي بيقرأها انه مهما كان همك وابتلاءك ف هو حقيقي ولا حاجه قدام ابتلاء غيرك.. ولو كان ابتلاءك صعب وشايف ان حله مستحيل ف لما تقرأوا اللي حصل معايا هتتأكدوا ان مفيش عند ربنا حاجه اسمها مستحيل.. 

من 9 سنين حياتي كانت ماشيه طبيعيه جدا..بدرس في كلية طب أسنان وعندي أخ في ثانويه عامة.. عايشين مع والدي ووالدتي وجدتي لوالدي.. ومخطوبة لإبن عمي...

مكانش في اي حاجه في حياتي متعبة ومكنتش اختبرت لسه اي ابتلاء لحد اليوم اللي اتأخر فيه والدي عن الرجوع للبيت م شغله!!

والدي ملتزم في مواعيده جدا ومش ممكن يروح مكان من غير م يبلغ والدتي علشان متقلقش الا اليوم دا واللي قلقنا اكتر ان موبايله كان اتقفل

يومين بالظبط مش عارفين عن والدي حاجه لحد م عرفنا انهم اعتقلوه وهو راجع م الشغل!!

الأحداث دي كانت وقت ثورة يناير 2011 ووقتها كان حال البلد كلها متبهدل واعتقلوا ناس كتير

بس كان خوفنا ع والدي اكتر لانها مكانتش اول مره يعتقلوه..

والدي كانت كل تهمته انه ملتحي وبيصلي في المسجد!!

كنا عارفين القسم اللي هو فيه بس مش قادرين نتواصل معاه .. شهر كامل ووالدي محجوز ومفيش حتى اي قضيه محجوز تحت اسمها..

بدأت الكواث في حياتنا تزيد بوفاة جدتي اللي ماتت حزن ع والدي ومقدرتش تتحمل خاصة ان كل اللي حوالينا بدل م يطمنونا كان بيرعبونا بإن المرادي غير وبسبب ظروف البلد ممكن ميخرجش!!

فات شهر اتنين تلاته وكانت الكارثه التانيه وهي ان ابن عمي اللي انا م لحمه ودمه بعت يطلب #شبكته وانه مش هيقدر يكمل وانهم عاوزين يتجنبوا المشاكل.. لا دول كمان طلعوا كلام زي الزفت ع والدي وان بسببه اي حد ف العيله عاوز يدخل شرطه او خلافها اتأذى بسبب دخول والدي المعتقل كذا مره

تخيلي دول قرايب !!

تفتكري كدا المصايب وقفت!! 

هي أيام بالظبط عدت واتبلغنا بخروج والدي ... والدي خرج اه بس حبيبي خرج ع #قبره!!!

احنا من كتر الخبطات اللي بقينا ناخدها واحده ورا التانيه مكناش قادرين نستوعب... هو دا حقيقي اللي بيحصلنا دا؟!!

والدتي قالتلي لا يكلف الله نفسا إلا وسعها.. وربنا أعلم بحال جدتي ووالدي علشان كدا مخلهومش يعانوا في المحنه دي كتير..

والأهم اني اكون متأكده ان والدي معملش حاجه غلط او تعيبه زي م قرايبنا بيرددوا .. الزمن بس هو اللي اتغير وبقى في ناس كل تهمتها انها بتصلي في بيت ربنا!!

ويظهر ان والدتي هي كمان كانت قدرتها ع التحمل خلصت بما ان ربنا قبض روحها هي كمان بعد 4 ايام م وفاة والدي!!!!!

انا كنت قاعده جانبها وبقولها حتى انتِ سبتينا.. لما بكل الايمان اللي كنا بنشوفه منكم قدرة تحملكم تنتهي طيب انا ولا اخويا هنتحمل ازاي وهنروح فين ولمين بعدكوا!!

انتوا متخيلين حالي أنا وأخويا !! فجأة وفي اقل م 5 شهور حياتنا الهاديه الجميله المستقرة اتقلبت تماما وع النقيض...

بعد م كنت بنت بتدرس في كلية طب وبتجهز لفرحها اللي كان باقي عليه فتره قليله

لبنت اتوفت كل اسرتها وخطيبها سابها بدل م يقف جانبها ..وعايشه مع اخوها اللي اصغر منها واللي المفروض ياخد منها القوه ويتسند عليها..

بس الحقيقه ان انا مكانش عندي اي ذرة قوة او تفاؤل بالعكس انا كتير فكرت في #الانتحار واللي كان بيمنعني م التنفيذ هو التفكير ف اخويا.. هسيبه لمين واحنا كل قرايبنا اتخلوا عنا وكأننا بلاء او مرض مُعدي خايفين منه!!

دا حتى لما اتعمل اعلان وراثه م اخدناش منهم حق ولا باطل ولا فهمنا اي حاجه

انا كنت عارفه ان والدي ووالدتي كل واحد فيهم عنده ميراث م اهله، وكمان والدي كان شايل فلوس في البنك لجهازي وتعليمي انا واخويا... ف ازاي عمي يبلغني ان والدي اتوفى من غير م يسيبلنا اي حاجه؟!!

كنت قليلة الحيلة تماما والفلوس اللي كانت في بيتنا خلصت ولان مفيش حد م قرايبنا فكر يبص ف وشنا حتى قعدت م الكلية ومقدرناش ندفع مصاريف دروس اخويا ف قعد هو كمان!!!

مكانش في غير جارتنا اللي ع اد حالها وكانت بتحاول تبعتلنا كل يومين تلاته حاجه تتاكل !!

جرعات الشجاعه اللي الشعب كله كان واخدها ف الوقت دا كان اهلي واخدين قصادها جرعات جُبن ومفيش حد منهم بص في وشنا ومقدرتش حتى اتواصل مع أي محامي انه يرجعلنا حقنا اللي اكلوه قرايبنا ونسيوا انه مال يتامى...

يعني ولا بقى في أهل ولا تعليم وبدأنا نبيع في دهب والدتي علشان نقدر نصرف ع أكلنا ومتطلبات البيت...

في الفتره دي كنا ملتزمين جدا بالصلاه وبوصايا والدي لينا ان مهما ضاقت اكيد هتفرج.. بس احنا عمرنا م جربنا الضيق قبل كدا انا أو اخويا علشان فجأة نُبتلى بالشكل دا ومطلوب مننا نتحمل ونستنى الفرج!!

كنت في كل سجده بسأل ربنا ايه اللي عملته انا او اخويا او حد من اسرتي اللي اتوفوا علشان يحصل فينا كل دا.. كنت بسأله هل في فرج او مخرج من كل اللي احنا فيه دا؟!!!

وحتى لو في مخرج ف هو مش هيرجعلي اهلي ف خلاص مش عاوزاه وبقى كل دعايا اني اموت واحصل اهلي، وبعدين افتكر اخويا وكلام والدي عن ان المؤمن مبتلى وان بقدر ايمانك هيكون ابتلاءك...

كنت في حالة تخبط رهيبه جدا مفيش بشر يتحملها.. واخويا مكانش بيعمل اي حاجه غير انه يا بيصلي يا بيقرأ في كتب والدي وفي المكان اللي كان بيقعد يقرأ فيه

لا شوفته بكى في وفاة جدتي ولا والدي ولا حتى وفاة والدتي.. ولما كنت احاول اتكلم معاه كان يتكلم زي والدي بالظبط ويقولي دا وقت ابتلاءنا ولازم لما الملايكه تنزل تتفقد احوالنا وترجع لربنا يقولوله انهم وجدونا #صابرين مُحتسبين .. وانها دار ابتلاء في الاساس.. واننا نعمل اللي علينا في الطاعه وربنا عليه فك كربنا

وبما ان مفيش حاجه مضمونه في الدنيا ولا حتى عمرنا ف احنا هنحاول نعمل اي حاجه نرضي بيها ربنا ومتغضبهوش منا علشان يجمعنا بأهلنا في الجنه..

دا كان كلام وتفكير أخويا اللي لسه ف الثانوي واللي بسبب المحنه دي عمره زاد اضعاف ومكناش حتى عارفين حد فينا هيكمل تعليمه ولا ايه هيحصل في حياتنا لسه!!

سنه كامله مرت كانت من اصعب السنيين اللي مرت في حياتنا ولسه بردو مش باينلها فرج.. لا حد بيسأل عنا م قرايبنا ولا عارفين نكمل في دراستنا لحد م فجأة نزل علينا شخص اعتبرناه #ملاك من عند ربنا وظنينا ان خلاص الازمه بدأت تتحل لكنها كانت بداية فصل جديد من المعاناه!!!

الشخص دا هو صاحب والدي اللي رجع من السفر .. كنا بنسمع اسمه كتير م والدي لانهم سافروا زمان مع بعض بس والدي بسبب تعلقه بجدتي مقدرش يكمل ورجع مصر وع النقيض صاحبه دا اتجوز هناك وكون عيله ومكانش بينزل مصر كتير...

المهم انه بطريقة ما عرف بجزء م اللي حصلنا وبوفاة والدي ف قرر انه ينزل مصر واتأخر شويه بسبب ظروف البلد واول م الظروف سمحت كان ف اول طياره راجعه مصر،

وكانت صدمته كبيره لما عرف بوفاة والدتي وجدتي واللي قرايبنا عملوه فينا واننا قعدنا م التعليم..

هو قالنا ان والدي كان من اهم الاسباب اللي وصلته للي هو فيه دلوقتي لان هو اللي وقف جانبه زمان وساعده في سفره علشان كدا قرر انه يردله الجميل فينا وانه مش هيسافر من غير م يطمن علينا

وبدأ فصل جديد من المعاناه والمشاكل مع عيلة والدي من ناحيه وعيلة والدتي من الناحيه التانيه وكل دا بسبب الميراث وانه يرجعلنا حقوقنا... الموضوع كان صعب جدا لدرجة انه استمر لفتره في المحاكم

انا بس مش متخيله والله ايه القرايب دول؟! معقوله عندهم قلب؟! سايبين كل حاجه وجايين يمسكوا بإديهم واسنانهم في مال يتامى وبيدافعوا عن حقهم فيه وبكل بجاحه؟!!

المهم ان في الوقت دا عمو صاحب بابا أصر إن أنا واخويا نكمل دراستنا وانه هيتكفل بمصاريفنا ولما اعترضت قالي اعتبرهم دين لوقت م ناخد ميراثنا .. وبالفعل خلال الفتره دي كان اخويا الحمد لله كمل السنه الباقيه ف الثانوية ودخل كلية وانا كملت دراستي...

في الوقت دا كان عمو بيسعى بكل طاقته انه يوفرلنا كل سُبل الامان والراحه لدرجة انه عرض عليا اني اتجوز ابنه الكبير وان دا هيخليه متطمن اكتر عليا كمان علشان كان عمو قرر ان ملناش قعاد في البلد دي لوحدنا وكان بيجهز لسفري انا واخويا

بس كانت الصعوبه ف ان ابنه مرتبط اصلا ونازل مصر مخصوص علشان يتجوز.. ف عمو عرض علينا يكون الزواج صوري لحد بس م نخرج من مصر

بس كان لابنه شرط وهو انه هيعقد ع البنت اللي مرتبط بيها الاول علشان تكون هي زوجته الاولى

انا وافقت لان معنديش مشكله اصلا وكنت شايفه ان زواجي منه مجرد حبر ع ورق بس هيخلصنا من المشاكل اللي احنا فيها بخروجنا م مصر

لكن تأتي الرياح بما لا تشتهي السفن والبنت اللي مرتبط بيها رفضت رفض قاطع وخيرته بيني وبينها ومفيش اي وسيلة اقناع نفعت معاها.. وكان طبيعي انه يختارها هي ... وبصراحه كنت شايفه ان دا حقهم هما الاتنين ومش ذنبهم يشيلوا هم غيرهم!!

ورجع تاني الهم يزيد ع عمو وبقى عمال يتواصل مع الناس اللي م الجاليه المصريه هناك ويسألهم عن شباب مقررين يتجوزوا مصريات وهما رشحوا اكتر م شاب كان منهم واحد ظروفه كانت الى حد ما نفس ظروفي م ان والده اعتقل قبل كدا بس كان م زمان واتوفى بردو في المعتقل وهو واهله مهاجرين م زمان

بس عمو رفض الشاب دا بالذات وقالي انه عاوزني ارتبط بشخص بعيد عن كل الحوارات دي علشان اقدر بعدين انزل مصر بسهوله وعلشان الامان و.. و.. هو كان ليه اسبابه وكان كل همه مصلحتي ومستقبلي

بس سبحان الله فضلت تضيق لحد م وصلنا ف النهايه للشاب دا بردو

وقدر ربنا ان المرحله دي كانت وقت م الاخوان مسكوا الحكم ف اتيسر امر نزوله الحمد لله لمصر وفتره قليله وكنا كلنا استقرينا بره مصر

تعرفي يا هدير اني بعتبر ان نص رزقي ف الدنيا كان في ابويا وامي وتربيتهم الصالحة ليا انا واخويا والنص التاني كان في زوجي اللي ربنا بعتهولي في وسط كل الظروف دي وبعد كل اللي مريت بيه دا..

كان اختيار ربنا ليا وجبر بيه قلبي اللي كان اتكسر تماما!!

عُمر ربنا بعته نجده ليا ولأخويا اللي ساعده انه يكمل دراسته في الدوله دي وكان ومازال بيتعامل معاه ع انه اخوه من لحمه ودمه..

عيلتنا اللي احنا من لحمهم ودمهم رفضونا ورمونا ف ربنا جبر قلوبنا وبعتلنا عيلتين بيعملوا المستحيل

علشان يشوفونا مبسوطين

عيلة عمو صاحب بابا الله يرحمه وعيلة عُمر ❤

يكفي اني اقولك ان عُمر اول مره شوفته فيها وكان عرف م عمو طبعا قبلها كل حاجه عني.. طمني بإن العقد هيتم بس علشان سهولة السفر لكنه ابدا م هيقرب مني بدون رغبتي واننا هنعمل فترة خطوبة لحد م اتعود عليه واعرفه كويس

ولأني قولتلك انه كان اختيار ربنا ليا ف كان كل تصرف منه بيقربني وبيجذبني ليه اكتر

اتجوزت من غير فرح ولا فستان ابيض.. وحتى لما عُمر عرض عليا نعمل فرح وسط الجالية المصرية رفضت

مكنتش متخيلة ان بعد كل الترتيبات والاحلام اللي كنا بنرتبلها انا وأمي حد تاني اللي ياخد مكانها في تفصيله واحده منهم وهي كانت أمي واقرب اصحابي.. ودعيت ربنا ان لو ليا اختيار ف حاجه ف الجنه هتكون ف ان أمي تلبسني فستان فرحي بإديها في الجنه ووالدي اللي يوصلني لعمر بنفسه...

لما قولت لعمر عن امنيتي دي ظنيت انه هيتريق عليا او يشوفني نكديه او تفكيري مش منطقي

لكنه قالي انه هيفضل يدعي ربنا هو كمان بإنه يحقق امنيتي، ولما سألته مالك مبسوط اوي كدا ليه؟!

قالي علشان معنى كدا اني بتمناه من ربنا زوج ف الجنه كمان❤

عُمر دايما يطمن قلبي بإن تدبير ربنا كله كان خير لوالدي ووالدتي لانهم كان ممكن يعيشوا بس كان والدي هيتعذب ف السجن ووالدتي هتتعذب ف البهدله في الزيارات وان ربنا عالم بقدرة تحمل كل شخص ف بيبتليه ع اد تحمله.. ولان قدرة تحمل اهلي انتهت ف عمرهم كمان انتهى !!

وكان تدبير ربنا خير ليا أنا واخويا

انا رزقني بزوج احسبه من الصالحين ولا ازكيه ع الله ورزقني منه الذريه والأهم رزقني الأمان بقربه

واخويا بيكمل دراسته في جامعه ولا كان يخطر ع بالنا في يوم انه ممكن يدخلها...

حياتنا الحمد لله مستقره ونسينا مصر باللي فيها واللي شوفناه وشيلنا اهلنا في قلوبنا وهيفضلوا جواها لحد م ربنا يقدر باللُقا...

🎀🎀🎀🎀🎀🎀🎀🎀🎀🎀🎀🎀🎀🎀🎀🎀

اتعلمت م القِصة دي ان أي ابتلاء ممكن نمر بيه طالما مش في الدين ولا في فقد حد من الأهل ف هو حقيقي #هين..وان ربنا بيبتلي كل واحد منا ع اد قوة تحمله.. اللي إيمانه قوي بيصبر ويحتسب ف بيلاقي الجزاء والجبر

واللي ايمانه ضعيف للاسف بتكون نهايته مأساوية وبيفضل ف وجع قلب غير منتهي !!

كمان مش كل الجبر بيكمل في الدنيا.. في جبر بيكون تمامه واكتماله في الجنه !!.

الفكره كلها ف ان ربنا يراضي قلوبنا ويلهمها الصبر ❤

#حكاوي_هدير

#هدير_ابراهيم