ما ضاقت الا لتفرج

 #ماضاقت_إلا_لتُفرج !!

النهارده معانا قصتين مش قصة واحده.. ف يلا بينا نتعرف ع ابتلائهم وازاي ربنا جبر قلوبهم..

هاشتاج قِصصنا👇

#قصص_واقعيه_لهدير_ابراهيم 💌

🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀

قِصتي تقدري تعتبريها م القِصص اللي بتمثل خير مثال لـ " ما ضاقت إلا لتُفرج .. ومكانش والله أي فرج، دا كان الفرج اللي يبكي القلب قبل العين ❤

انا المرادي جيبالك قِصتين في بعض مش قِصة واحده واللي جمعهم #جبر الرحمن !!

من وأنا صغيره وانا متعلقه بخالتي اللي هي أصغر واحده ف اخوات أمي.. بصي كنت ع طول لازقه فيها مفيش مكان بتروح فيه إلا وأنا معاها ولأن جدي وجدتي متوفيين وهي مش متزوجة ف أنا كنت أغلب الوقت عندها في البيت وببات معاها..

خالتو من النوع اللي هو اللهم بارك #القرآن بيمثلها كل حياتها حرفيا.. كانت بتحفظ قرآن في مقرأه وع اديها ختمت بفضل الله القرآن انا وكتير غيري ما شاء الله..

كان كل م حد يسألني نفسك تطلعي ايه لما تكبري اقولهم بدون تردد نفسي اطلع خالتو !!

بسببها لبست #النقاب بفضل الله م وانا في الاعدادي رغم رفض والدي الشديد بس اصريت واتحملت منه كل كلامه ومعاملته الجافه ليا..

كبرت ع حب القرآن وكل حاجه تقرب لربنا بفضل الله ثم بفضلها..

أنا كنت بكبر وخالتو كمان بتكبر ف السن ومحصلش نصيب ليها ف الزواج.. وللأسف والدي بمجرد م دخلت الجامعه منعني من اني أبات عندها واني اقلل زياراتي ليها وكنت بروح المقرأه اللي بتحفظ فيها القرآن بالعافيه..

خالتو مرت في حياتها بمعاناه كبيره وتفاصيل وكلام بشع بسبب تأخر سن زواجها وكانت بتستحمل كنت بتعجب م قوة تحملها ولما اسألها تقولي "المؤمن دايما مبتلى" وانها راضيه وعندها حسن ظن ف الله إنه هيجبر قلبها وهيعوضها خير لو مش ف الدنيا ف اكيد الجنه اكبر عوض ودا كل مناها..

كنت شيفاها سوبر هيرو بجد وعمري م شوفت وشها غير وهو عليه ابتسامة رضا .. واجمل اوقاتي كانت اللي بقضيها معاها لحد م وانا في تالته كلية اتقدملي عريس واهلي كانوا شايفينه عريس لقطة.. في الحقيقه انا كان بيتقدملي ناس كتير بس كنت كل مره لازم استشير خالتو ف تقولي صلي #استخاره وشوفي وسبحان الله بعد كل استخاره الموضوع مكانش بيتم،

لكن المره دي بمجرد م قولت لوالدي هصلي استخاره بهدلني وقالي مفيش استخارات ولا في رأي خالتك تاني... خالتك #العانس اللي بتغير منك علشان اصغرها منها في السن وهتتجوزي وهي عاوزاكِ تعنسي جانبها

الصدمه ان كانت خالتو معايا ع الموب في الوقت دا وسمعت كلام والدي.. انا فضلت اعيط واعتذرلها بس وزي م اتعودت منها دايما كان صوتها ثابت وقالتلي سيبك مني أنا وصلي بردو استخاره وربنا ييسرلك الحال وقفلت..

كنت شايفه خالتو جبل مبيتهزش ونسيت انها بشر وعندها قلب واتصدمت لما شوفتها تاني يوم وعنيها وارمه وباين ع وشها البكاء والحزن رغم انها كانت بتحاول تداريهم بـ ابتسامتها الهاديه،

مكنتش عارفه اعمل ايه، مفيش بإيدي حاجه اقولها ولا اعملها..

كل اللي فات كان وجع واللي جاي وجع تاني خالص

بعد الاستخاره كنت بصحى م النوم ع صريخ وكوابيس وصممت اني ارفض الشخص دا الا ان والدي كان مصمم ع رأيه، وخلاني قللت خالص من مقابلة خالتي لانه كان شايف انها هي اللي بتأثر عليا وفوق كل دت منعها من زيارتنا ف البيت..

كنت حاسه اني من غيرها بموت وكنت كل م اكلمها ع الموب تقولي الزمي الدعاء والاستغفار وان شاء الله خير

لكن اللي حصل ان الانسان اللي ارتبط بيه كان أبشع شخص مر عليا في حياتي كلها

ع الرغم اني قولتله ف #الرؤيه_الشرعيه ع ضوابط الخطوبة خاصة وانب منتقبه يعني مش هيشوفني م غير النقاب غير بعد العقد ووافق، الا انه بعد فتره بدأ يقول انه حاسس انه غير اصحابه المخطوبين واني معقداها اوي، وفضل يزن انه يشوفني من غير النقاب، وفي مره وفي لحظة غضب قالي انه بعد الزواج هيقلعني النقاب.. طبعا انا اتصدمت وروحت لوالدي وقولتله اني مش هكمل ف الخطوبه دي وحكيت كل اللي حصل

عارفه يا هدير كان رد والدي ايه؟!!

قالي الراجل حقه يحس انه خاطب بنت مش لوح تلج.. متخيله!!

وفوق كل دا قالي انه بقى متمسك بيه اكتر علشان هيقلعني القرف اللي ع وشي!!!!!

اتصدمت بعد كلام والدي وكنت خايفه احكي لخالتو ف تقف قصاد والدي ووقتها كان هيحرمني منها نهائي ف سكت وكنت بموت م جوايا، ولاني اتربيت ع اديها كانت حاسه ان فيا حاجه وكانت بتحس بوجع قلبي ف كانت تقولي متنسيش الاستغفار والجأي لربنا واحكيله...

كنت بستغفر واحكي وادعي بس كانت النتيجه انها بتضيق اكتر والمفاجأه اتحدد يوم الفرح وكنت حاسه وكأن اتحدد يوم موتي!!

كنت شبه الاموات بالظبط وحاولت كتير اخلي الشخص دا هو اللي يسيبني الا ان تحسي انه كان واخدها عند معايا وكان دايما يقولي مناخيرك اللي رفعاها عليا دي في يوم هجيبها الارض لحد م جه ابشع يوم في حياتي

بعد كتب الكتاب بيومين بالظبط حاول يتهجم عليا!!

 كان عارف ان مفيش حد ف البيت ولما رفضت نكون لوحدنا دخل بالغصب وحاول يعتدي عليا ولما كنت بقاومه ضربني وشتمني بأقذار الالفاظ ورمى عليا يمين الطلاق !!

مجرد م سمعت الجمله منه ورغم ألم جسمي كله الا اني حسيت وكأني واخيرا اتحررت ومكنتش عارفه الكارثه اللي جيالي وهي ان بمجرد م اهلي رجعوا البيت لقيت والدي دخل اوضتي

وجابني من شعري وفضل يضرب فيا ويقولي عرتيني وكنتِ بتمثلي كل دا الشرف!!

مكنتش مستوعبه ولا فهم حاجه لحد م فهمت بعدين ان اللي ينتقم منه ربنا كلمه وقاله اني كلمته وقولتله يجي البيت ضروري وبمجرد م دخل وملقاش حد ف البيت قال انه هيمشي لكن انا اصريت وكنن لابسه لبس مكشوف واني حاولت أغويه بس هو صدني وكدا هو مش مآمنلي وان طلع وشي مكشوف و....الخ

طبعا كلام ميدخلش دماغ طفل صغير لكن والدي اتعامل معايا ع اني عريته وان اللي زيي يستاهل القتل خاصة بعد م الحيوان التاني طلقني وطلع عليا سمعه زي الزفت وخاض في عرضي.. ووالدي بدل م ياخدلي حقي منعني اكمل اخر سنه ف الكليه ومنعني من النزول وكان كل م يشوفني يشتمني ويضرب فيا

واخد مني الموب ف بقيت لوحدي تماما لحد م خالتو جات البيت وهو كان بره

مجرد م سمعت صوتها قومت م ع السرير ووقعت ع الارض وكانت رجلي مش قادره اقف عليها ف كنت بسحف ع الارض علشان اوصل للباب ومجرد م هي فتحته وشافتني جريت عليا ولاول مره بدل م كنت انا بس اللي ببكي في حضنها بقينا احنا الاتنين حاضنين بعض وبنعيط

خالتو ي هدير كانت بتمسك ايدي وتبوس الكدمات اللي عليها ودموعها مغرقاني وتقولي هتفرج والله وهتعدي

وانا اقولها مفش فرج ربنا سابني خلاص.. تقولي ربنا مبيسبش حد محسن الظن فيه

كنت بقولها وانا ببكي اني ضعيفه واني مش زيها

ليه بيبتليني بحاجه انا مش ادها وفوق طاقتي

كانت تقولي هتعيطي من جبره والله قريب دي لما بتضيق اوي بتفرج اوووي

قولتلها ومفرجتش عليكِ ليه وبعدين تداركت خطأي وفضلت ابكي واعتذر الا انها ضحكت وقالتلي انها بتشوف جبره كل يوم مش شرط الجبر ف الزواج وانها متأكده ان حتى جبر الزواج دا هيجي بس في وقته..

وبمجرد م حسيت ان قلبي بدأ ويهدى ويتطمن م تاني سمعت صوت والدي وهو بيزعق جامد ودخل الاوضه وبدأ يبهدل ف خالتو ويعايرها وكمان شيلها ذنبي وان كل اللي حصلي بسبب الافكار المسمومه اللي زرعتها جوايا

وللأسف يا هدير والدي الله يسامحه م اكتفاش ان حد خاض ف عرضي لا دا هو كمان ف عز غضبه قال لخالتو ان اكيد كان رفضها للناس اللي اتقدمتلها انها اكيد غلطت مع حد وخايفه م الفضيحه م هي واحده عايشه في بيت لوحدها !!!

انا كنت بمسك ف حضن خالتو اكتر واعيط واقولها بالله م تسبيني وهي من الصدمه كانت ساكته ومبتتحركش لحد م والدي شدها م لبسها وجرجرها لحد باب الشقه وحلف بالطلاق ع امي ان خالتي م تدخلش م باب بيتنا تاني وحلف بالطلاق عليا اني هقلع النقاب وهنزل الشارع م غيره

عمرك شوفتي قسوة بالشكل دا؟!

الأيام بعدها كان كل يوم فيها اسوء م اللي قبله خاصة اليوم اللي والدي نزلني فيه الشارع من غير النقاب كنت اقسم بالله حاسه ان جسمي كله عريان مش بس وشي.. كنت ببكي وببص للسما وبقول لربنا انت فين م كل اللي بيحصل دا، وارجع افتكر كلام خالتو ف استغفر واقوله سامحني وافرجها عليا واجبرني...

وفي يوم كنا معزومين ع فرح وانا مكنتش بحضر خالص افراح الا ان والدي كالعاده حلف بالطلاق ع امي اني هروح معاهم،

صليت ومكانش ع لساني دعاء ف الصلاه غير يارب افرجها واجبرني..

نزلنا الفرح وكنت عامله حسابي وواخده معايا كتاب وبمجرد م والدي انشغل مع الرجاله خرجت بسرعه م قاعة الفرح وأمي كانت بدأت واخيرا تتعاطف معايا ف قالتلي ان لو والدي سأل هتغطي ع غيابي بأي حجه..

وقعدت بره اقرأ ف الكتاب، وشويه لقيت طنط كبيره جات قعدت جانبي، كانت ساكته وشويه ولقيتها بتقولي انتِ بتعملي ايه؟!

بصيت للكتاب وبصتلها تاني وقولتلها بتعجب بقرأ كتاب 

قالتلي ايوه م انا واخده بالي انا مش عاميه، بس كتاب ايه اللي بيتقري في قاعات الافراح دا؟!

قولتلها لا انا بس ماليش في جو الافراح ف طلعت م الفرح اقرأ الكتاب.. وبمجرد م قولت كدا لقيتها لفت بجسمها كله ناحيتي وبابتسامه ماليه وشها وعين بتطلع قلوب وقالتلي #معقده يعني 😍

قولتلها نعم؟!!

م ادتنيش فرصه اخد نفسي وفضلت تسألني انا تبع العريس ولا العروسه ومرتبطه ولا لا وساكنه فين وخريجة ايه وبشتغل ولا لا...الخ

انا كنت برد عليها احتراما لسنها ليس الا وعلشان تبطل تزن عليا بس وشويه وموبايلها رن وكانت بتكلم حد وقالتله لا خليك بره انا طلعالك

وقامت وقفت ومشيت خطوتين وانا لسه هاخد نفسي لقيتها رجعت تاني وقالتلي انا حاسه اني تعبانه ودايخه اوي معلش ي حبيبتي ممكن تسنديني لحد بره بس

قومت بسرعه وسندتها وهي فضلت تكمل اسئلتها لحد م خرجنا وبمجرد م قربنا م عربيه لقيت واحد نزل منها بسرعه وجاي ناحيتنا و مخضوض جدا وبيقولها مالك ي أمي فيكِ حاجه ودي لقيتها الله اكبر عليها الصحه والحيويه رجعتلها وفجأة وقالتله ايه رأيك في البنت دي حلوه لا وكمان #معقده !!

طول عمري اعرف ان معقده دي بتتقال كـ سُبه او شتيمه لكن طريقة طنط ف ترديدها حسستني انها مدح مش ذم 😃

هو كمان ضحك وباس اديها وقالها طيب اركبي خلينا نروح

هي بصتلي وقالتلي مش اخر مره هشوفك وابتسمت ومشيت..

انا الموقف دا قعدت شهرين بعدها كل م افتكره اضحك لحد م في يوم والدتي قالتلي ان في حد كلم

 والدي علشان يتقدملي ووالدي حدد معاه معاد

ورجعت تاني للهم والخوف، خاصة وان م بعد طلاقي مفيش حد دخل بيتي كان كل اللي يسأل علينا يتقال ف سمعتي كلام مش كويس ف كله كان بيهرب م بره ودا يعتبر اول حد يدخل البيت م بعدها

ف كنت متأكده انه سواء كان كويس او لا فـ والدي م هيصدق يخلص مني وهيوافق.. صليت ونفذت كل الوصايا اللي كانت خالتو دايما تنصحني بيها

وعملت استخاره قبل م يجي البيت وسبحان الله ع الهدوء والاطمئنان اللي كنت حاسه بيه ف قلبي، طبعا مرضيتش اعشم نفسي وقولت لعل ربنا هيدبرها م عنده انه لو مش كويس هيبعد

لحد م وصل البيت ودخلت قعدت معاه وانا ببص ف الارض هو بيتكلم وانا برد ع اد السؤال وبس وحتى م رفعتش عيني عليه، لحد م موبايله فضل يرن كذا مره ف قولتله يرد ولما رد لقيته بيضحك وبيقولها يا أمي ارحميني والله بمجرد م هخلص هكلمك وبعدين لقيته بيقولها قولتلك بطلي تقولي كلمة #معقده

ودا اول م قال الكلمه دي رفعت عين وشاورت بصابعي عليه وانا ساكته وفاتحه بؤي

هو قفل معاها وقالي مالك في حاجه؟!

قولتله هو احنا اتقابلنا قبل كدا ؟! قصدي يعني شوفنا بعض قبل كدا

قصدي هو انت بتاع الفرح ومامتك المعقده

قصدي اللي كانت بتقول عليك معقد ولقتلك المعقده اللي زيك

قصدي...

قعد يضحك قولتله م انت م طلعتش معقد وبتضحك عادي اهو

قالي زي م انتِ شاكلك دمك خفيف ومش معقده بردو اهو

بصي بصراحه ابتسمت وهو كان بصراحه مسهل عليا الموضوع جدا وكان في سلاسه ف الكلام

قالي ان والدته عملت تحريات عني لحد م وصلتلي وعرفت كل حاجه عني

طبعا انا سكت ومستنيه اسمع منه الكلام اللي بيتقال ف حقي وف سمعتي

بس العجيبه اني لقيته بيقول عكس الكلام وبيقول ان الناس كلها اجمعت ع انها تشكر ف اخلاقي وخاصة اني تربية المُعلمه فلانه اللي هي خالتي

ف قولتله هو انتوا سألتوا علينا فين؟

قالي ف المقرأه اللي قولتي لوالدتي انك كنتِ بتحفظي قرآن فيها،

قولتله ومسألتوش عندي ف شارعنا وجيرانا؟

قالي لا

سألته ليه ؟!

قالي ان الجيران كلامهم مش بيكون صح ف الغالب وكل واحد بيقول بهواه وبدرجة حبه او كرهه للناس دي

لكن أهل القرآن مش بيكدبوا !!

كنت حاسه ان قلبي بيرقص م الفرحه.. قولتله طيب واتأخرتوا كل دا ليه دا الموقف بقاله شهرين

لقيته بيضحك وبيقولي شاكلك وقعتي من يومها ولا ايه

قولتله بسرعه والله ابدا انا حتى مكنتش اخدت بالي من شاكلك

ضحك وقالي انه بيهزر علشان يزيل التوتر اللي ف الجو .. وقالي ان كان حصل عندهم ظروف وبعدها مامته فضلت تعمل تحرياتها وهكذا

قولتله هي اللي كانت بتكلمك ع الموب م شويه؟!

قالي اه كان بتطمن انك فعلا طلعتي معقده

قولتله ع فكره مش فاهمه حاجه

قالي معلش متزعليش منها بس انا والدتي شيفاني معقد بسبب ان انا الوحيد ف العيله اللي نوعا ما بحاول اكون قريب من ربنا بالتالي كانت مواصفاتي ف شريكة مختلفه

بالمناسبه كنت عرفت انك كنتِ منتقبه وخلعتيه مش هسأل عن السبب بس هل عندك النيه او الرغبه انك تلبسيه م تاني ولا لا

هنا ي هدير قلبي بدأ يدق جامد جدا وقولتله انت عاوزني البسه؟

قالي بصراحه اه مش هجبرك بس انا من أهم مواصفات شريكة حياتي انها تكون منتقبه او تنتقب..

اقسملك بالله بمجرد م قال كدا وانا كل اللي نزل عليا عيااط وبس

ودا ي قلبي مش فاهم حاجه واتخض جامد

ف قولتله م وسط دموعي بالله عليك لو وافقت عليا قول لوالدي انك مش هتلبسني دبله غير وانا بالنقاب

وسيبته وجريت ع الاوضه بتاعتي سجدت لربنا وقولتله دا حتى لو طلع فيه كل العبر كفايه انه جايبلي #الستر معاه !!

وفي الحقيقه ي هدير هو مكانش جايب الستر ليا لوحدي دا ربنا جعله سبب ف #جبر قلب خالتي وبعد معاناااه متخيله!!

تمت خطوبتنا بفضل الله وزي م قولتله نفذ كلامي وكان نقابي ع وشي وانا بالبس دبلته ❤ وبعد شهرين كتبنا الكتاب وبعد استخارات كتير الحمد لله واصلا كتب الكتب بسرعه كدا كان سببه الاستخاره لان ربنا يير الحال جدا..

وفي مره كان عندي في البيت وقال ان صاحبه اللي شوفته ف اخر زياره ليا انا واهلي عندهم ف البيت مصمم يدبسه ويجوزه قبل م يسافر تاني لانه عايش بره طول عمره هو واهله ومطلع موضوع الجواز م دماغه خالص رغم ان سنه خلاص بيعدي

مكنتش مركزه ف الكلام اوي بس قولتله بيعدي ايه دا شاكله صغير خالص خليه براحته

قالي براحته اكتر م كدا ايه دا سنه وشهرين وهيتم الاربعين

هنا لقيت نفسي نطيت قعدت جانبه وقولتله انت بتتكلم جد هو سنه كدا فعلا

قالي انتِ مضيقه عينك وانتِ بتتكلمي كدا ليه

قولتله قول بجد

قالي اه والله بس المشكله ان مواصفاته تكاد تكون مستحيله ودا بقى أمي بتقول عليه التعقيد ذات نفسه 😂 وفقدت الامل ف جوازه

سألته هو ايه شروطه وهل م ضمنها انها تكون صغيره ف السن؟

قالي لا عادي هو تفكير غير خالص دي لو اصغر منه بشهر حتى بس فيها المواصفات اللي عاوزها وهي الالتزام والتدين اللي مفيش حد ملتزمه اساسا هيوافق

قولتله طلبك عندي واصغر منه بشهر

قالي انتِ مسكتي ف الكلمه 😂 قولتله لا بجد والله وبالنسبة للتدين ف خالتو تقدر تسأل عنها بس أي حد ومتأكده انه هينبهر بيها

قالي مش خالتك فلانه دي اللي هي قالوا انها اللي مربياكِ مشوفتهاش ولا مره ليه؟

قولتله موضوع طويل وبلاش نتكلم فيه المهم قوله عنها

قالي حاضر وفضلت ازن عليه ومن كتر زني هو كمان زن ع صاحبه اللي وبمجرد م شافها وحصل رؤيه وكانت في بيت والدة زوجي بالمناسبة 

يكفي اقولك ان بفضل الله بعد اقل من سنه كنت أنا وزوجي وخالتو وزوجها ايوووه اللي هو صديق زوجي كنا سوا ف #العُمره

وخالتو بتذكرني بكلامها لما كانت تقولي هيجي يوم وهكون قدام الكعبه

ايوه معنديش مِحرم يطلع معايا بس هي مسألة وقت وربنا هيحقق مُنايا...

خالتو الجميله بأحلامها ودعواتها الاجمل ربنا جبر قلبها بعد م كل الناس وكل الظروف المحيطة بيها كانت بتقول ان مستحيل تتزوج وفوق كل دا يكون زواجها م شخص بالمواصفات الرائعه دي اللهم بارك..

طولت عليكِ اوي ي هدير وع قرائك بس لو حبيتي هبقى اكملك انا احداث قصة خالتو وزواجها

وبالمناسبه انا بفضل الله ربنا رزقني ببنوتين .. وخالتو اللهم بارك ربنا رزقها بولدين وبنت

ايوووه رغم انقطاع كل الاسباب ربنا رزقها من فضله ولله الحمد ❤

والدي حلف ع خالتو م هي داخله م باب بيته وحرمني منها .. بس ربك بكرمه رزقني باستقرار زوجها ف مصر وبفضله يسر الحال وبقى باب بيتها قصاد باب بيتي.. وبستقوى بيها وكل م اقع اتسند عليها وجبر قلبي بيها وبزوجي اللي طلع مش معقد ابدا بفضل الله لكنه بيخاف الله في كل شئ 

ربنا عوضني انا وخالتو عن كل مُر ووجع مر ع قلوبنا ...

#ملحوظة الشخص اللي كان عقد عليا عرفت قدرا بعد كذا سنه انه اتسجن طليقته رفعت عليه قضية انه سرق العفش واتسجن بالقايمة وحياته كانت جحيم..

لما عرفت وقولت لخالتو قالتلي ممكن انتِ تنسي او تتناسي ظلم حد ليكِ لكن ربك ابدا م بينسى ..

وانا حبيت اذكرها مش للشماته ابدا يا هدير وربنا يعلم.. بس علشان اطمن قلب كل بنت اتظلمت ان ربك ابدا م بينسى وهيجيبلك حقك عاجل ام آجل ..

وشكرا انك سمعتيني بجد وشاركتي قِصتي مع الناس  واسفه لو طولت عليكم ❤❤

🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀

هكتفي بالأبيات دي لان فيها الخُلاصه :

ولرب نازلةٍ يضيق بها الفتى -- ذرعاً وعند الله منها المخرج 

 ضاقت فلما استحكمت حلقاتها -- فرجت وكنت أظنها لا تفرج 💜💌

قربوا من ربنا هو بس اللي عنده مفتاح الفرج..

ربنا يجبر بقلب وخاطر كل البنات ويراضيهم ويرزقهم أزواج صالحين وذرية صالحة..

واشوفكوا في قصة جبر جديده ❤

#حكاوي_هدير

#هدير_ابراهيم

لينك القصة علي قناتنا علي اليوتيوب

ما ضاقت الا لتفرج - YouTube