عوض الجبار

 #عوض_الجبار ❤

اصعب احساس بجد ان يكون نفسك جدااا تسعدي قلب بنت م المقربين لقلبك ، وقلبك بيبكي دايمًا لمجرد حزنها او انها تمر بلحظة يأس ...

لكِ صديقتي العزيزه تلك القِصه وكُلي يقين بأن قِصتكِ ستنير صفحتي قريبًا وسترى عيوني دموع فرحتك عوضًا عن دموع حزنك ويأسك وسأعيش معكِ لحظات عوض الجبار لكِ ...

#أُحِبُكِ 💚

🎀🎀🎀🎀🎀

هاشتاج باقي قِصصنا

#قصصواقعيهلهدير_ابراهيم ❤

🎀🎀🎀🎀🎀🎀🎀🎀🎀🎀🎀🎀

قِصتي ممكن تتشابه مع قِصص ناس كتير ، المهم كل واحده ربنا بيعوضها ويجبر خاطرها بطريقه غير التاني !!

انا طبيبه لأسره أغلبها أطباء يعني سواء والدي او والدتي او اخواتي واعمامي وهكذا ، ودي في حد ذاتها كانت م اسباب تعاستي ...

في الغالب لما طبيبه بيتأخر زواجها هنا بتكون مبررها او مبرر اهلها مثلا انها انشغلت بالدراسه لسنوات طويله وما بعدها وانشغلت بيها عن الزواج ،

لكن انا المبرر دا كان مستحيل بالنسبالي لأن مفيش طبيبه في أسرتي تأخر زواجها باستثنائي :(

احنا ثلاث بنات وولدين ، سواء اخواتي البنات او الولاد كلهم تزوجوا .. والبنات تزوجوا في سن صغير نوعًا ما ..

ترتيبي كان التاني بعد اخويا الكبير يعني انا البنت الكبيره ودا زاد الوجع اوجااااع :(

متخيله كل م يحصل وحد يتقدملي ومجرد م يعرف هو او والدته #سني يخرجوا وميرجعوش تاني :(

مش عارفه ازاي رغم مكانة اهلي العلميه كانوا شايفين اني مسببلهم #فضيحه وسط العيله .. فضيحه بسبب تأخر زواجي !!؟

طيب وانا ذنبي اييييه دا كله مش بإيدي وكله في علم علام الغيوب :(

كنت بعيش حاله م عدم الثقه في النفس ، تخيلي كنت بقف قدام المرايه واكره ابص ع شكلي واقول اني اكيد #وحشه جدا ..

ثقتي في نفسي كانت مهزوزه جدا جدا ، ف كانت بتخرج في هيئة #عصبيه ...

والدي ووالدتي كانوا احيانًا يخففوا عني واوقات اكتر كانوا بيحملوني الهم زياده لوقت م وصل بوالدي الامر انه جمع اخواتي واتفق معاهم انه يكتب الشقه اللي انا عايشه فيها مع والدتي ووالدتي #بإسمي لأنه فقد الامل اني اتزوج وكان عاوز كل دا يكون برضى اخواتي كلهم ..

مكنتش اعرف كل اللي حصل دا ووقت معرفتي بيه حسيت ان الدنيا كلها ضلمت قدامي لدرجة فكرت في #الانتحار تخيلي .. !

ولو في حد هيردد في سره دلوقتي ان ايماني ضعيف وان ازاي افكر  في انتحار ... الخ

احب اقولكم ان ابشع واصعب تعب ومرض هو المرض النفسي وخاصةً لما يكون الانسان وحيد ومفيش حد جانبه يخفف عنه بالعكس كل اللي حواليه يا بيشفقوا عليه يا بيقللوا م شأنه دايما ..

الطريقه نفسها اللي عرفت بيها حوار شقة بابا وجعتني اكتر ..

تخيلي لما اسمع  بنت اخويا الصغيره وهي بتقولي يا عمتو جدو هيديكِ البيت علشان ماما وعمتو وعمو محمد وعمو مصطفى قالوا انهما هيتنزلوا عن حقهم ليكِ وعمتو قالت انه كدا احسن م تيجي تعيشي عند حد فيهم علشان مهما كان الانسان مش بيحب حد يتقل عليه او يعرف اسرار بيته !!!

البنت سردتلي اللي حصل كله وانا محستش بنفسي غير وانهار م الدموع نازله ع خدي ..مش متخيله ان اختي يكون دا تفكيرها ، مش متخيله انهم فقدوا كل الأمال لزواجي للدرجه دي ..

في الوقت دا كان عندي 37 ، وتخيلي كل م اتعصب ع حد م اخواتي والدتي تطيب خاطرها وتقولها معلش اصلها قربت ع ازمة منتصف العمر !!

كنت بسمعها بودني وقلبي كان بيبكي ..

انتِ مش متخيله المعاناه اللي كنت عايشه فيها

عارفه يعني ايه تكرهي يوم معين في الاسبوع لمجرد ان اخواتك هيكونوا موجودين فيه هما واطفالهم !؟

ممكن تعتقدي م كلامي اني بكره اخواتي او هما بيكرهوني ،

انا والله العظيم عمري م كرهتهم وكنت بتمنالهم الخير دايما ووالدتي كانت دايما تقولي ان الحياه مشاغل وان اخواتي اصبح ليهم حياتهم الخاصه ..

كانت والدتي وقت م تبقى حنينه اوي معايا وتحاول تخفف عني كانت تقولي عوضك هيبقى عند ربنا !!

للدرجه دي وصل بيها اليأس انها فقدت الامل اني ممكن اتجوز في الدنيا !!

عارفه انا اتألمت كتييير اووي وقلبى بكى كتيييييير اووووي ...

مع ولادة كل طفل لإخواتي كان بيبقى جوايا احاسيس متضاربه ، فرحانه علشان اخواتي وبعيط علشان نفسي احس الاحساس دا انا كمان واكون ام :(

اسعد اوقاتي لما كنت بضم الطفل لحضني اول م يتولد ، بس كانوا ياخدوه م ايدي ويدوه لوالدته وكنت بحس في نظراتهم ليا بإنهم خايفين عليا احسد اطفالهم :(

لما بنعزل عنهم بيقولوا غيرانه او يا عيني عليها او ... او .. او ...

ولما بكون معاهم بيخافوا مني او بيشفقوا عليا بس باردو شفقه وراها خوف ...

في ناس بتقدر تظهر خوفها م اللي قدامها وناس بتقدر تتحكم في نفسها ومتظهرش دا ، لكن انا اخواتي كانوا بيظهروه جدا وعادي ..

اصبحت وحيده لا اخت تتكلم معايا ولا ام ولا صديقه ...

اخواتي في شغلهم وبيتهم واطفالهم واصدقائي كلهم تزوجوا وانشغلوا هما كمان وانا بقيت لوحدي :(

حتى لما كنت بجتمع مع اصحابي كان معظم كلامهم عن البيت والاطفال وحياتهم الزوجيه كنت بحس نفسي نشاذ وسطهم :(

علاقتي بربنا كانت عاديه بصلي وبصوم وعادي ، حاولت اقرب فتره بس كنت بزهق بسرعه ، اللي هو ايه دا انا دعيت والدعاء مش استجاب في وقتها ، ف ارجع ابعد تاني ..

سمعت جمله م شيخ كان بيقول كلام فيما معناه ان عوض ربنا لما بييجي لإنسان بينسيه كل المر اللي شافه في حياته ، وان ع قدر ابتلاءه وع قدر الكرب بيكون الفرج ...

كنت بسأل نفسي امتى هيحصل معايا كدا ولا انا مش هيحصل معايا اصلا ولا ايه !؟

وليه انا م دونًا عن اخواتي واصحابي وقرايبي اللي يختارني للابتلاء دا .. انا مش قويه انا ضعيفه وتعبت 😭

مر عليا وقت كانت ضاقت اوووووووي عن اي مره بس تخيلي في المره دي كان #العوض 😍

وتخيلي اللي حصل معايا كنت بعتبرها محنه لكن اللي ظهر بعد كدا انها اجمل #منحه ربنا عوضني بيها ...

جالي انتداب لمستشفى في مكان بعيد عني جدا لمدة شهر واعتبرتها #عقوبه وكنت مضايقه جداااا ، لدرجة اني والله بكيت وبصيت للسما وقولت يارب انت مطلع وشاهد يرضيك كل اللي بيحصل فيا دا :(

المهم روحت المستشفى وخلص الشهر ع خير ورجعت البيت وانا معرفش ان رب الخير بيدبرلي كل الخير ...

اللي حصل اني عرفت ان متقدملي عريس بعد اسبوع بالظبط م رجوعي ، وعرفت انه عن طريق طبيبه كانت في نفس المستشفى اللي تم انتدابي ليها ...

تخيلي اني خوفت افرح !! ومش بس انا اهلي كمان ،

الكل كان فاقد الامل لدرجة ان ولا حد م اخواتي فكر يحضر للما الشخص دا يكون موجود ، حتى والدي ووالدتي كانت استعداداتهم للزياره فاتره وبارده وكأنهم متأكدين انها مش اكتر م ساعات وهيسمعوا الرفض وينتهي الموضوع زي اللي قبله ...

لحظه م الشخص دا وصل والمفروض اخرج اقعد معاه دعيت ربنا وقولت يااارب م #تخذلني ... وخرجت

نسمع عن الحب الأول م اول نظره في الافلام والروايات ، مش هقولك اللي حصلي كان حب بس اقدر اقولك وانا واثقه انه كان احساس بالأمان والاطمئنان ،

شخص تحسي بس بمجرد انك تبصي ع وجهه اللي عليه ابتسامه جميله مزينا وجهه وتحسي للوهله الاولى انك مش عاوزه تبعدي عيونك عنه ...

انتهت الزياره ودقات قلبي بتدق جامد جدا ، واصبحت كل حواسي حاضره ورايحه جايه مستنيه رنة التليفون اللي معاه هيكون هلاكي او سعادتي ...

ورن فعلا وكانت #سعادتي 😊

ربنا رزقني بـ زوج حتى لحظتنا دي بحسد نفسي عليه ...

اولا لا طبيب ولا مهندس زي ازواج اخواتي ، لكن درجته العلميه ومكانته في عمله كانت بفضل الله مرموقه وعاليه جدا ، والجمال انه كان اكبر مني #بشهرين بس وولا مطلق ولا ارمل ولا عنده اطفال ولا عمره عدى الأربعين  😍

زي م كان كل اللي حواليا يقولوا اني معليش سقف طموحاتي ...

عوض ربنا ليا كان في حاجات كتيييير جدااا لدرجه لا تتخيليها ...

اولا زوجي كان عايش حياته بره مصر ولما قرر انه يتزوج ، قرر يتزوج م مصريه ...

انتِ متخيله كنت بحس ازاااي بالفخر وهو بيحكي الكلام دا قدام اهلي وان انا البنت اللي هو اختارها تحديدًا 😍

انا م اسره ميسورة الحال الحمد لله بس فكرة السفر بره دي كانت مش متوفره اوي ، ف انتِ متخيله اني كنت بسبب طبيعة زوجي كنت بسافر بره مصر كتير واكتر م دوله 😍

متخيله ان ولادي اللي هما في حد ذاتهم كانوا اكبر فرحه وعوض م ربنا ليا 😍 بيقضوا اجازتهم دايما في بلد مختلفه وزوجي مصمم انهم يتعلموا ثقافات مختلفه ....

انا بقولك كل الكلام دا علشان اي بنت بتمر بنفس الظروف اللي كنت فيها مش تستسلم وتنتظر عوضها بكل تفاؤل وحسن ظن ويقين ان ربنا هيعوضها خير ووالله ع اد صبرها ع اد م عوضها هيكون خيالي 😍

عاوزاكِ تعيشي معايا احساس ولادة اول طفل م ولادي الثلاثه 😍

بدايةً م معرفتي إني #حامل 😍 والله كنت كل م احس بأي ألم احمد ربنا واشكره ع احساس الألم دا لانه بيأكدلي انه فعلا حقيقه واني حامل بجد 😍

اول م سمعت صوت بُكاء بنتي كانت لحظه بالدنيا وما فيها ، احساس ميحسش بمتعته اي حد ...

اول ضمه مني ليها 😍 وانها طفلتي انا ومفيش هيجي ياخودها م ايدي علشان يديها لمامتها ..انا مامتها 😍

أبنائي اللي لمسه واحده او نظره واحده ليهم كفيله تغسل قلبي م كل المر اللي مر بيه ...

انا زوجي اول م بيدخل البيت بيُقبل ايدي ، ولما بقوله المفروض انا اللي اعمل كدا بعد كل النعيم اللي انت معيشني فيه ، يرد ويقولي لا تستحقي اكتر م كدا لأنك صبرتي كل السنين دي لحد م اصبحتى ملكي انا مش ملك حد تاني ...

وبس يا ستي واصبحت قِصة زواجي حديث العيله كلها لفتره طويله ، واصبحت مثار للحسد بدل الشفقه :)

ويااااا سعادة وفرحة قلبي لما بسمع م حد تعليق اني #احلويت بعد الزواج 😍

الحقيقي ان الهم والحزن بيزيد م عمر الانسان اضعاف واضعاف ، والفرحه والسعاده والاطمئنان بيرجع الكهل طفل برئ عيونه بتلمع م السعاده والأمان ...

فاللهم بقدر عوضك لي ارزق جميع بنات العالمين ازواجًا صالحين ❤

🎀🎀🎀🎀🎀🎀🎀🎀🎀🎀

تعليقي المرادي مختلف 😐

القُرب م ربنا اساس كل جميل دا طبيعي ، بس بردو قُرب الأهل خاصةً الأم ووجودها ودورها في حياة ولادها لازم يظهر اووي في التوقيت دا ،

المفروض الأم هي اللي تكون الصاحب والمعين بعد ربنا لبنتها لأنها مصدر أساسي للإحساس بالأمان ❤

واخيرًا وليس آخرًا جميل اووي عوض ربنا اللي بينتهي بفرحه وسعاده تملأ القلب وتجعله يسجد شكرًا لجابر خواطر المنكسرين ...

#حكاوي_هدير

#هدير_ابراهيم