الرجاله لما تحب
#الرجاله_لما_تحب !!
الرجاله لما بيحبوا بجد يا ترى بيكون حبهم دا عامل ازاي ؟
دا اللي هنعرفه في قصة النهارده.. يلا بينا..
#قصصواقعيهلهدير_ابراهيم 💙
🎀🎀🎀🎀🎀🎀🎀🎀🎀🎀🎀🎀🎀
بنتولد طبيعيين وعلى فطرتنا وشويه شويه بنلاقي روحنا بتتشوه وبنعاني من اكتئاب وامراض نفسية كتير وللأسف بيكون في الغالب اللي بيوصلنا للمرحلة دي هما اقرب الناس لينا او اللي كنا بنعتبرهم كدا ...
انا واحده كان ليا نصيب كبير من الطيبة، بس في حالتي مسمهاش طيبة
اسمها #غباء!
اغلب قصصك بتكون بدايتها معاناه وبعدين بيبتدي الفرج،
أنا العكس شويه.
حياتي كانت بفضل الله حلوه جدا ومستقره.
عايشة وسط أسرتي الصغيرة - والدي ووالدتي وأخ أكبر مني -
اتربيت ع ايد أب وأم ع قدر كبير من التدين والتفهم ودا اللي ساعد في استقرار حياتنا.
كانوا في ضهري دايماً ولما ظهرت نتيجة التنسيق وجالي كلية #تربية_طفوله كنت متضايقه جدا لانها مش الكليه اللي كنت بحلم بيها، لكن فاكره كويس كلام والدي ليا بإن لعل الخير كله يجيلي بسبب الكليه دي،
وفعلا جالي من وراها خير كبير وبردو معاناه رهيبه مكنتش اتمناها ابدا.
لبست النقاب في تاني شهر من سنتي الأولى في الكلية، ومن وقت م لبسته وانا بسمع كلام كتير يضايق م اصحابي.
هو مش الفكره انه يضايق، الفكره ف ان عندي عيب رخم جدا في شخصيتي وهو اني #ودانيه!
يعني اي حاجه بسمعها بتأثر بيها جدا سواء صح او غلط، تقدري تقولي ان كنت بمشي ورا كلام الناس، ورغم محاولات اهلي ف تغيير العيب دا فيا بس كان صعب خاصة بعد دخولي الكليه واني بقيت بقضي معظم الوقت مع اصحابي مش مع اهلي، بالتالي بقى ليهم تأثير كبير في حياتي.
ولأني كنت الوحيده المنتقبه فيهم كانوا دايما يتهكموا عليا وع فكرة لبسي للنقاب وانا لسه صغيره، واني بكدا حكمت ع نفسي بالإعدام م صغري.
عارفه كانوا يفضلوا يتريقوا عليا مجرد م يشوفوني وينادوني ب #مدام #ستالحجه #ستالشيخه وكلام م هذا القبيل اللي غالب المنتقبات بيسمعوه...
كانوا بيقولوا اني آخر واحده #هتجوز فيهم !
كلامهم كان بيأثر فيا بس الفكره هنا اني لبست النقاب بإرادتي وكان حلمي م صغري ف مقدرتش اخلعه.
مرت اول سنه في الكليه بحلوها ومرها بس كنت لسه بكره الكليه، بحب اصحابي ومقدرتش ابعد عنهم او اكون صداقات جديده لاني م النوع #المتردد ودا تاني عيب فيا وهو اني مبقدرش اخد قرارات او ابعد عن حد لازم هو اللي ياخد الخطوه ويبعد.
أول اسبوع في السنه التانيه م الكليه كنت بجر رجلي جر للكليه ومش عاوزه اروح لكن مع بداية الإسبوع التاني اتغير كل حاجة!!
انا عايشه في بلد أرياف وبروح الكليه غالبا بالقطر لانها في محافظو تانيه،
وفي يوم واقفه مستنيه القطر لمحت #شاب وسبحان الله م اول م شوفته اتشديتله جدا معرفش ليه
يمكن لان واضح انه مش م نفس بلدي لاننا كلنا هنا نعرف بعض،
او لان فيه حاجه غريبه انا مقدرتش افسرها
اول م دخلنا القطر كنا ف نفس العربيه وقاعد قدامي،
حاولت كتير ابعد نظري عنه اولا علشان غض البصر، وثانيا لانه كان بدأ يلاحظ اني متنحاله م واحنا ع رصيف القطر😃
نزلت انا في المحطة بتاعتي والشخص دا فضل مسيطر ع تفكيري،
قعدت اتخيل يا ترى هو منين وايه اللي جايبه بلدي ورايح فين الصبح بدري كدا وليه راكب القطر المعفن بتاعنا دا رغم ان باين عليه ابن ناس اوي ومش وش بهدله،
محكتش لاصحابي حاجه لاني عارفه انهم هيتريقوا عليا.
تاني يوم شوفت نفس الشخص وركبنا نفس العربيه بس مش في نفس الكرسي، الفكره ف ان ايه الحظ دا ؟ بس لا لا دماغي مش هتوديني لحته تانيه لا خاصة بعد م حكيت لإصحابي وقعدوا يضحكوا عليا ويقولولي ان الروايات لحست مخي واللي هو فوووقي انتِ منتقبة ومفيش منتقبات بيحصل معاهم قِصص اصلا!
تالت يوم الصبح كنت نسيت كل حاجه وكالعاده صاحيه بالعافيه ورايحه الكليه بضرب الجزم والقطر كان هيفوتني ركبته ع آخر لحظه لقيتلك مين في وشي 😃
هو بالظبط كدا نفس ذات الشخص 😂
انا شوفته م هنا وقولت بااااااس دا اكيد #القدر بقى وفضلت ارسم أحلام وأماني خاصة لما لقيته بيبصلي ويبتسم انا قلبي وقع ف رجلي ولقيته نطق وياريته م كان نطق!
البيه قالي تعالي اقعدي يا #حَجّه تخييييييلي انا كان منظري ايه كنت حاسه ان وشي بيطلع دخان م الكسفه،
الاستاذ علشان العربيه كانت مليانه حب يعمل واجب ووقف علشان يقعدني بداله ع اساس اني واحده كبيره ف السن،
روحت اقعد مخصوص علشان اخليه يقف ويتمرمط اكتر.. يسكت ابدااااا
الاقيه بيقولي اتفضلي يا #أمي اقعدي،
اول م قعدت كنت حاسه اني شويه وهقوم اقتله ، ولقيت نفسي بقوله قعدت عليك عقربه ان شاء الله.
لقيته بيبصلي باندهاش معرفش هو سمعني ولا لا بس يستاهل دا انا بسببه احلامي وامنياتي مش بس اتكسرت دي اتدشدشت.
حكيت لاصحابي اللي حصل زي الهبله ومسكوني تريقه بردو،
الغريبه بقى اني فضلت اشوف الشخص دا بردو كل يوم وفي نفس التوقيت ع رصيف القطر،
بقيت فجأه نشيطه ومبقتش انام بعد الفجر وافضل صاحيه ابص ف الساعه وانزل جري م البيت وكأن بقى لينا معاد يومي انا وهو نتقابل فيه.
كنت بستنى لما هو يطلع الاول واركب معاه في نفس العربيه، ولو الدنيا زحمه بمشي م قصاد وشه تماما علشان ميكررش اللي عمله تالت يوم تاني،
بس في أيام كنت بقعد قصاده، كنت ببقى متطمنه انه مش ملاحظ ان انا نفس البنت علشان النقاب،
كنت بحاول اغض نظري عنه قدر المستطاع وانشغل في قراءة الكتاب اللي في ايدي بس غالب الوقت كنت بلاقي نفسي غصب عني عيوني متبعاه.
كنت كل يوم بتزداد جوايا الرغبه ف اني اعرف هو مين وايه اللي حدفه ع بلدي وبيروح فين كل يوم،
كنت عارفه انه بينزل القاهره لان دي المحطه اللي بعدي، بس يا ترى رايح لمين وكان عند مين،
فضولي كان بيقتلني ولاني مكنتش قادره اسكت كنت بروح احكي لاصحابي اني بقيت بشوفه كل يوم.
كانوا بيحبطوني واسمع كلامهم بس مجرد م اشوفه تاني يوم تتجدد حاجه ف قلبي،
كنت حاسه اني بغلط،
تخيلي بقيت ادعي ربنا بيه في صلاتي، شخص معرفش عنه اي حاجه وبقى بالنسبالي دعوه ثابته ف صلاتي،
وفي يوم دعيت ربنا لو كل دا شر يبعده عني
تاني يوم لقيته اختفى؟!!
فضلت مستنيه كتير يظهر زي كل يوم ع رصيف القطر لكن مظهرش، فاتني القطر قولت هستنى للقطر اللي بعده يمكن حاجه اخرته بس مظهرش بردو
تاني يوم وتالت يوم فات اسبوع ومظهرش!
بعد م كنت يوميا بشوفه عدا يوم الجمعه ولمدة ثلاث اسابيع، دا انا كنت بنزل في ايام معنديش فيها كليه لمجرد اني المحه.
زي م ظهر فجأه اختفى فجأه.
افتكرت الدعوه اللي سبقت اختفاءه وربطها بإن يا ترى كان فعلا شر ؟
اوقات كتير ف الصلاه كنت بدعي ربنا ارجع اشوفه تاني او يجعله خير ويكون حلالي،
فضلت فتره متأثره بيه جدا وكانوا اصحابي كالعاده يتريقوا وقالولي : قولنالك اخرتها هتقعي ع جدور رقبتك وتتكسر م كتر الرويات اللي ألفتيها،
قولنالك مفيش الحب الخيالي اللي رسمتيه ومفيش اصلا حب بين منتقبه وبين اي حد، اخرك جواز صالونات وتحمدي ربنا لو حصل وغالبا هيجي عن طريق حد يعرف اهلك لكن انسي ان حد يجي علشانك تحديدا!
تخيلي انهم قالولي: وبعدين انتِ عاوزه تحبي وتتحبي وتعيشي قصة حب زي البني آدميين ولا ايه يا #ست_الشيخه هو مش عندكوا الحب حرام بردو ؟!
اكيد سؤالك دلوقتي ليهم كملت في صداقه مفيش م وراها غير وجع القلب هقولك اني اصلا كنت اقتنعت بإن معاهم حق وان ايه فعلا اللي انا بعمله ولا بفكر فيه دا
لا وفوق كدا قولت ان قلبهم عليا وبينصحوني واكيد اكيد هما الصح.
فات تلات شهور كان الترم الاول خلص، ومصدقت اخدت الاجازه لاني كنت رجعت اكره الكليه م تاني.
وفي يوم كنت انا ووالدتي رايحين زياره لاقرب صاحبة لوالدتي وكنت كتير بروح معاها عندها وبحبها جدا، هما يقعدوا يتكلموا وانا اقعد اقرأ ف الكتاب اللي باخده معايا
في اليوم دا ابنها قالنا انها عند جارتهم وانها قالتله يبلغنا اول م نوصل نروحلها هناك، وجه معانا وصّلنا.. رنينا جرس الباب لقيتلك مين بيفتح 😃
انا فضلت واقفه مكاني وكأن في حد دلق عليا جردل ميه ساقعه فضلت متنحه
اللي هو ياااه دا انا كنت قربت افقد الامل تماما اني اشوفك تاني في حياتي والاقيك ف الاخر هنا.
والدتي استغربت وقفتي وجات شدتني م ايدي دخلتني،
عرفت بعدين ان اللي احنا عندها دي خالته وانها لسه ناقله جديد م القاهره بعد وفاة زوجها علشان تكون قريبه م بنتها اللي زوجها بيسافر وبيرجع شهر ف السنه، وان أخينا واللي طلع اسمه #حسام الفتره اللي شوفته فيها كان قاعد مع خالته لحد م زوج بنتها سافر وبعدين رجع هو القاهره لانه ساكن وبيشتغل هناك.
هو انا ف الغالب وخاصة طول علاقتي بيه كنت #غبيه الا اليوم دا يعتبر م الايام القلائل اللي تقدري تقولي عليا كنت ذكيه ودا لاني لاحظت بعد شويه انهم قعدوا في مكان قريب منا بس بعيد كفايه انهم يسمحولنا نتكلم مع بعض ف فهمت انه تخطيط من اياهم بتوع طنط صاحبة ماما وانه #عريس،
كل مره كنت بزعل منها لكن المره دي كان هاين عليا اقوم اخدها بالحضن وابوسها م بؤها والله 😂
قعدنا انا وهو واتكلمنا وكنت هموت واقوله ع اني اعرفه اصلا وكنت بشوفه في القطر، بس قولت بلاشمنه.ط نفسي في موقف وحش وقولت المهم انه قدامي دلوقتي 😍
بس لقيته بيبص ع الكتاب اللي في ايدي وبيقولي : هو انتِ خلصتي باقي السلسله ف دخلتي ع روايه جديده ولا ايه دا انتِ كنتِ بطيئه جدا ف القراءه. وابتسم بعفويه
فضلت متنحه مش مستوعبه لحد م لقيته بيقول : من حوالي تلات شهور تقريبا يعني وقت م خالتو نقلت كنت مضطر افضل معاها علشان متكونش بالليل لوحدها، ف كنت باخد القطر كل يوم للقاهره وشوفتك.
قولتله: انت بتتكلم جد؟!
طيب عرفتني ازاي
– كل يوم كنتِ بشوفك وفي ايدك نفس العدد م سلسلة ما وراء الطبيعة مغيرتيش العدد دا ولا مره طول التلات اسابيع اللي شوفتك فيهم.
– اها علشان كدا قولت ان قرايتي بطيئه
بس ع فكره دي اول مره تحصل بس علشان كان في حاجه حصلت بسببها مكنتش عارفه اركز في حاجه تانيه وكانت واخده كل تفكيري.
– اكيد هتعرفها بس بعدين :)
صحيح بما انك فاكر كل حاجه كدا، فاكر تالت مره شوفتك ؟
– مالها؟!
اه علشان قولتلك ي حجه 😃
– يعني كنت عارف وقاصد😈
– اول م دخلتي لا والله بس طلعت عفويه مني، بس اول م قعدتي افتكرتك
– اه علشان لمحت الكتاب ؟!
– مش بس كدا بس مش عارف.
– اه علشان كدا بصتلي بإستغراب، الحمد لله وانا اللي افتكرت انك سمعت اللي قولته 😃
– اللي هو
ايه ؟!
– ولا حاجه بس نصيحه حسك عينك تشوف منتقبه وتقولها حجه دي تاني ولا يا أمي حتى لو هي أمك فعلا.
–نعم!!؟
–اسمع بس الكلام دا لمصلحتك والله 😂
خلصت المقابله وصدقيني والله لو قولتلك اني اتمنيت الزمن يقف وافضل معاه، كنت حاسه انه مش شخص غريب عني بالعكس.
اول م نزلنا قولت لوالدتي
– عريس صح ؟! صح؟!
– اه صح ومن غير م تتعصبي زي كل مره انا شايفه الولد كويس جدا وباين عليه محترم وابن ناس ف ادي لنفسك فرصه تقعدي معاه تاني.
– اتعصب ايه كلمي طنط اسأليها هما جايين البيت امتى😃
– مالك؟! مش عادتك يعني
يوم م يجيلك عريس وتشوفيه بره البيت عقدتك تتفك،
خلاص بعد كدا تشوفيهم بره الاول
– لا بره ولا جوه كدا جبرت خلاص.
– بتتكلمي جد؟ يعني حاسه براحه المره دي؟!
–جدا
–ربنا يتمها عليكِ بخير ويراضيكِ يارب....
دا كان حواري مع والدتي ومن فرحتي روحت جري اول م دخلت البيت فتحت الشات بتاعي انا واصحابي وكنت مستنيه اشوف دهشتهم بإن الحمد لله ربنا جبرني وطلع الحب للمنتقبات مش في الروايات بس،
حكيتلهم كل اللي حصل بالنص وكل حرف قولناه وان هو كمان كان ملاحظني حتى لو عن طريق كتاب،
تخيلي بدل م اسمع كلمة مبروك سمعت #خازوق
اه والله، قالولي مفيش حاجه بتحصل وبتمشي بسهوله كدا ابدا ف هو اكيد خازوق، فوقي ي بنتي م اوهامك احنا حذرناكي،
سألوني لو كان شافني م غير نقاب ولا لا ولما قولتلهم انه لا ولسه لما يجي البيت ويحصل رؤيه شرعيه،
قالولي نصيحه متوافقيش تقعدي معاه، دا ع حسب وصفك لشكله هيرفضك وكمان بتقولي م القاهره وابن ناس
– وانا يعني مش بنت ناس
– القصد ان بتوع القاهره بيشوفوا اي حد بره القاهره فلاحين ف هيعقدك في نفسك، ثم فكري فيها ايه اللي يخليه يسيب القاهره ببناتها ويخطب م الارياف، الموضوع مقلق ونصحناكِ وبدل م يرفضك بعد م يشوفك م غير النقاب حافظي ع كرامتك وارفضيه.
بصدمه – هو انا وحشه اوي كدا ؟!
مجاش رد وكلهم سكتوا
ضيعوا فرحتي وقعدت افكر في كلامهم وزي م قولتلك لاني ودانيه ومعنديش ذرة ثقه في نفسي قولت ان اكيد معاهم حق.
نمت متنكده بعد م كنت طايره م الفرحه وتاني يوم بعد العصر والدتي قالتلي ان حسام كلم والدي وهيجي بعد المغرب لانه لازم يرجع القاهره ع طول ف مستعجل،
مقدرتش اقولها لا خاصة وانا شايفه الفرحه ف عنيها، بس فضلت بطني توجعي لوقت م رن جرس الباب وسمعت صوته،
مش عارفه ليه اول م سمعت صوته حسيت بأمان غريب ومش بأڤور والله، كنت حاسه ان الشخص دا حاجه اكبر مني ومنه اللي ربطتنا ببعض، ومجرد م افتكر كلام اصحابي ارجع اخاف
فضلت واقفه قدام المرايه ابص لشكلي وعيوني عماله تدور ع اي عيب في شكلي،
طلعت الصاله قعدت معاهم ولما سابونا وبعدوا فضلت بصه ف الارض وهو ساكت وانا حاسه اني عاوزه اعيط
لقيته بيقولي
– تصدقي اني ولا مره تخيلتك م تحت النقاب عامله ازاي!
– ؟!
– اقصد اني قعدت فتره اشوفك بالنقاب ف حفظت شكلك بيه هو، مكنتش اتخيل في يوم اني ارتبط بمنتقبه بس بحمد ربنا دلوقتي ع انك وقعتي في طريقي
– ؟!
– قصدي يعني ان سبحان الله النقاب فعلا بيحفظ البنت، مبسوط اوي ان مفيش راجل هيشوفك بالنقاب غيري :)
– ؟!
– هو انتِ ليه نظراتك كلها استغراب ومش بتردي عليا ؟!
– هو انت لما شوفتني عند خالتك كنت عارف ان في عروسه جايه ودا تخطيط وكدا؟!
– بصراحه اه، وكنت رافض بس لما خالتو قالتلي انك منتقبه كان عندي امل ضعيف تكوني انتِ، مش عارف ليه افتكرتك اوي وقتها ووافقت ومكنتش عارف اسألك ازاي عن موضوع القطر لتطلعي مش هي
بس مجرد م شوفتك لقيت معاكِ كتاب لدكتور أحمد خالد توفيق ف اتجدد عندي الأمل وكمان وقفتك ونظراتك وكل حاجه اكدتلي انها انتِ
متتخيليش كانت سعادتي عامله ازاي،
انا اول مره يحصل معايا كدا
حكايه ولا الافلام والروايات مش كدا ؟!
معاه وبكلامه وابتسامته نسيت اصحابي وكلامهم، اتفق مع والدي في نفس اليوم ع كل حاجه وانه هيجيب والدته المره الجايه وننزل نجيب الدهب بس كان عنده رجاء وهو اني اعمل استخاره انه يكون العقد في نفس يوم الخطوبة.
عملت استخاره وكنت مرتاحه ومبسوطه جدا متخيلتش بجد ان كل دا بيحصل معايا انا ومش روايه بقرأها،
كل حاجه حصلت بسرعه وعزمت اصحابي وقولت اكيد لما يشوفوه هيعرفوا ان كلامهم كان غلط ومكنتش اعرف اللي هيحصل بعد كدا.
من يوم خطوبتي واصحابي اتغيروا معايا، كنت كل م احكيلهم ع حاجه يرددوا انهم مش مرتاحين للموضوع دا
كانوا بيدققوا ف كلامي لحد م يطلعوا منه اي حاجه تدينه وخلاص زي ان والدته مش بتيجي تزورنا وان اكيد هي مش بتحبني، كنت اقولهم بس بتكلمني دايما يقولوا اكيد ابنها ضاغط عليها
اقولهم يبقى المهم انه بيحبني يقولوا مفيش حد بيفضل مراته ع امه،
ويرجعوا يحكوا تاني ف ان اكيد في حاجه غلط في الموضوع دا،
كنت معاه بنسى اصحابي وكلامهم ومعاهم بقول ان اكيد هما صح،
ست شهور مخطوبين مشوفتش فيهم منه حاجه وحشه وكانت خالته دايما اللي توصيني عليه وتقولي خدي بالك منه دا ربنا رزقك جوهره واحد خام وملهوش ف البنات
احكي لاصحابي وادافع شويه
يقولولي ملهوش ف البنات ازاي وهو هاريكي هدايا ورسايل وحب في التليفون،
وشويه يقولوا دا شكله ملهوش ف البنات يبقى عنده عيب وحذرناكِ منه.
قبل فرحي بشهر وبعد م شقتنا جهزت وكل حاجه فيها خلصت طلبت #الانفصال!
كنت تعبت مفيش حد كان متخيل الصراع النفسي اللي كنت فيه،
حسام كان كويس معايا جدا ودي كانت المشكلة،
قالولنا دايما ان دا مبيحصلش غير في الافلام والروايات، يبقى اكيد اصحابي اللي معاهم حق واكيد هيتغير بعد الجواز.
طلبت الانفصال وسط دهشت حسام ومن قبله اهلي اللي كانوا شايفني طايره بيه
حرفيا رفست نعمة ربنا اللي بدل م احمده عليها ضيعتها م ايدي بغبائي وعلشان صحاب كنت متخيله ان فعلا قلبهم عليا ومكنتش اعرف ان غيرة البنات ممكن تدمر حد بالشكل دا.
سنتين عدوا بعد انفصالي وحالي اتغير وبطلت احكي ورفضت ادخل رؤيه مع اي حد،
سنتين واصحابي اللي كانوا بيقولوا مفيش بنت عاقله ترتبط وهي في الكليه بعد انفصالي بدأوا يرتبطوا واحده ورا التانيه وفضلت فعلا اخرهم م غير جواز وفي كل تجمع كانت نظراتهم تقولي ايوه هو دا مكانك اخر واحده تتجوز،
صدقيني والله م اعرف هما كانوا بيكرهوني لشخصي ولا بيكرهوا نقابي، بس اللي اعرفه ان مفيش واحده فيهم كانت تيجي تقول كلمه حلوه ع خطيبها وكل مره تشتكي وانها هتفركش وهوب نلاقيها بتعزمنا ع الفرح،
كلهم كانوا كدا
كلهم كانوا بيداروا ع شمعتهم
انا الوحيده اللي عرضت شمعتي للهوا ف انطفت بسرعه ومنورتش تاني
سنتين كنت بدعي ربنا فيهم يجبر قلبي ويرحمني
سنتين وحسام مخرجش م بالي ولا قلبي ولا لحظه،
سنتين وهو بيحاول يوصلي بأي طريقه ويتكلم معايا يفهم ايه اللي حصل وانا كنت بتجنبه
سنتين وهو ميأسش مني وكنت عارفه انه بيكلم والدي دايما وبيطمن عليا منه
سنتين وانا بلمحه عند سور الكليه في نفس اليوم والوقت والمكان اللي كان بيستناني فيه وياخدني منه واحنا مخطوبين
سنتين وانا زي الغبيه اقول مفيش راجل بيحب كدا او مفيش حد ممكن يعمل كل دا علشاني اصحابي معاهم حق
بس الحق فعلا انهم ضيعوني
اتخرجت من الكليه وبقى اللي يربطني بإصحابي هو الشات اللي بيفضلوا فيه يشتكوا م الجواز والحمل والخلفه، كنت بتابع كلامهم وساكته.
ليوم م عرفت ان خالة حسام اتوفت،
شوفته في العزا ودي كانت اول مره اشوفه بالقرب دا من يوم انفصالنا.
كان متغير وكأنه كبر ف السن سنين وسنين، قولت اكيد دا بسبب وفاة خالته لانها كانت مقربه ليه جدا.
تعرفي الغريبه اني حسيت اني نفسي اضمه جدا واطبطب عليه،
ليه في الغالب بنشتهي الحرام، ولما كان حلالي وشوفت قهرته يوم انفصالنا مصعبش عليا بنفس القدر؟!
فضلنا طول اليوم مع بنت خالته وقبل م نرجع البيت لقيته ف وشي.
فضلنا واقفين في وش بعض، حاولت امشي وقولت اكيد مش هيفتكر شكلي بالنقاب لقيته وقف منعني م الخروج وقالي مش كفايه هروب لحد كدا ؟!
ريحيني طيب وعرفيني السبب المفاجئ لطلبك بالانفصال، فين كلامك بإني هدية ربنا ليكِ وان قِصتنا ولا ألف ليلة وليلة ؟! ليه كل كلامك ليا اتبخر في ثانيه؟!
مكنتش لاقيه رد اقوله، اسبابي كلها ف الوقت دا مكانتش مقنعه ليا خاصة بعد م كبرت حتى لو كبرت سنتين بس
اتعلمت فيهم كتير
بس الاهم ان اللي اتعلمته ف اليوم دا تحديدا هو اني لسه بحب حسام،
بس كنت خايفه.. خوفي المره دي كان م اني أأذيه بقربه مني، انا لسه عيوبي موجوده
لسه ودانيه بسمع وبتأثر بالناس .. لسه غبيه ومتردده في قراراتي.
سيبته ومشيت م غير م انطق بحرف وانا سمعاه بيقولي لو في ذرة أمل اننا نرجع عرفيني بأي اشاره المهم اديني فرصة تانيه ..
كل اللي عملته م بعدها اني فضلت ملازمه الصلاه ودعاء الاستخاره، كنت بدعي ربنا ان لو انا اللي خير ليه يقرب المسافات ولو شر يخرجني من قلبه ويخرجه من قلبي.
أسبوع كامل وانا بدعي
سمعت والدي بيكلم حد وكنت عارفه انه حسام ف اول م خرجت م الاوضه لقيت والدي بيقفل ف الكلام وبيغير كلامه علشان معرفش انه حسام،
ميعرفوش اني كنت م بصدق اسمع اسمه ع لسانهم وبفضل متابعه كل حرف بيقولوه
قولت لوالدي ف هدوء يبلغ حسام لو لسه مرجعش القاهره يجي ف اي وقت
كنا قبل المغرب بعد العشا بالظبط كان عندنا وعرفت انه جالي م القاهره،
اول م قعدت معاه
– قولتله اشمعنى انا ؟!
مفيش حد بيعمل كدا مع حد؟!
– انتِ اللي بتقولي كدا ؟!
فين كلامك عن النصيب وعن ان القلوب بإيد ربنا وهو اللي قادر يزره جواها الحب ؟!
– باردو ليه انا ايه المميز فيا؟! وايه اللي شوفته فيا خلاك تحبني للدرجادي؟!
– لانك ع طبيعتك.. طيبه ومش بتتجملي
فاكره لما عرفتي اني عندي عربيه ف قولتيلي انك كنتِ متأكده علشان شاكلي ابن ناس مش وش بهدلة القطر
ولما ضحكت وقولتلك ابن ناي علشان عندي عربيه بس
قولتيلي لا وكمان بتقول ع خالتك خالتو مش خالتي
يومها فضلت اضحك وانتِ فاكره اني بضحك استهزاء بيكِ لكن والله كنت بضحك ان مفيش حد كدا لسه
ولما عقدنا وقربت منك اكتر حبيتك اتعلقت بيكِ وبعفويتك
بكلامك عن مستقبلنا وولادنا وهنربيهم ازاي
خلتيني ابني احلام كتير وفي لحظة هدتيها بدون م تذكري ولو سبب واحد ؟!
– انت متأكد انك مش هتندم بعدين لو اتجوزنا ؟!
–اللي متأكد منه ان لو اتجوزنا عمري م هفرط فيكِ ولا هسمحلك تبعدي عني تاني
ما خاب من استخار، وانا من يوم م قعدت معاكِ مبطلتش استخاره ودي ممكن تعتبريها سبب ف اني قاعد دلوقتي قدامك..
اتجوزنا بعد المقابله دي بفتره قليله خاصة ان والدته قالتله ان دا اللي يفرح خالته الله يرحمها وكفايه تأجيل لحد كدا.
اتجوزنا وانا كنت لسه خايفه بس المره دي وبعد اللي شوفته منه كنت خايفه اخسره،
محكتلهوش اي حاجه عن اصحابي ولا عن اللي حصل بس هو كان ذكي واكتشف لوحده.
في يوم لقيت النوت اللي مبتفارقش ايده فتحتها ولدهشتي لقيت فيها اسماء اصحابي وجانب كل اسم مكتوب تفاصيل عن تعاملي معاه بعد كل مكالمه مع واحده فيهم،
اكتشف هو عيوبي لوحده وبدأ يعالجني منها بإنه بقى يشغل وقتي كله بيه ولما ربنا رزقنا وحملت كنت خايفه يحصل اجهاض، وحصل للأسف
انهارت وقولتله انا كنت متأكده ان دا هيحصل، قالي علشان فكرتي ف الشر حصل
صبره عليا احتواءه الأمان اللي بحسه في قربه،
كنت بقول يارب هو في كدا بجد؟!
لحد م قرأت في يوم ان لعل رزف ربنا يجي كله في #زوج_صالح
بالظبط دا اللي حصل معايا، ربنا عوضني وجبر قلبي بشخص اصبح هو بالعالم وما فيه، وبقيت احمد ربنا ع نعمته لاني اتعلمت ان اللي مش بيحمد ربنا ع النعمه بتزول م وشه ...
ناس كتير بيكون عندها وسواس قهري بمختلف اسبابه،
وانا كان وسواسي يا هدير ان مفيش حاجه حلوه او #مميزه ممكن تحصل في حياتي،
ورغم كل دا ربنا رزقني بالشخص اللي حاول وبيحاول يعالجني منه وسبحان م مصبره عليا.
كلنا فينا عيوب بس يمكن مميزات حسام خلت عيوني معميه تماما عن عيوبه.
طولت جدا بعتذر، بس نصيحه لكل بنت .. مفيش حاجه اسمها مبتحصلش الا في الروايات،
لا بتحصل والله وبتكون اجمل كمان بس كل الفكره اننا بنخاف
لما بتحصلنا حاجه حلوه بنخاف وبنجري منها ونقول دا خازوق،
البنات اللي ربنا مرزقهاش بصُحبة صالحة صدقوني دا خير لان الرزق كله هيطلع في زوج هينسيكِ الدنيا كلها بقربه...
احلموا الاحلام مش بفلوس ومفيش مع ربنا مستحيل،
احلموا هتلاقوا القصص اللي بتقروها وعيونكم بتطلع قلوب قادر ربنا يجعل قصتكم واحده منهم.
ربنا يسعد الجميع ❤
🎀🎀🎀🎀🎀🎀🎀🎀🎀🎀🎀
احلموا ي جماعة وكفاية اكتئاب وكآبه
احلموا دا الاحلام السعيده تعتبر من حسن الظن في الله
وفي النهايه دي الرجاله لما بتحب بجد؛
وسلمولي ع الحجج والاعذار 😉
واشوفكوا في قصة جبر جديده
#حكاوي_هدير
#هدير_ابراهيم
لينك القصة علي قناتنا علي اليوتيوب
جمال ودلال والله ايه القصه القمر دي
ردحذفكل حكاويكي بتطبطب علي القلب وتبهجه وتطمنه ربنا يفرحك ويطمنك زي ما بتطمنينا يا هدير والله
ردحذفجميلة قوس اللهم بارك يارب اوعدنا احنا كمان ��
ردحذفاللهم بارك، لبيك إن العيش عيش الأخرة، أسال الله أن يكون زوجه كأن سببًا فى تغيرها من أجلها ومن أجله للصالح ولما يحب الله ويرضى
ردحذفهدير أنا بحبك فى الله أوي وبحب صاحبة القصة، ربي يجزاكِ خير كل الخير البعثيه للناس، ويرزقك بالزواج الصالح يعوضك قلبك خير، وتيجي تحكى قصتك أنتِ كمان لينا، ونفرح لينا لأنك تستاهلِ الخير يا ست الحلوين .