رفيق الروح
#رفيق_الروح !!
لما ربنا يخلق ل روحنا رفيق خاص بينا قلوبنا تتعلق بيه وتطمن بوجوده تبقى النتيجة اللي هنشوفها وهنعيش تفاصيلها في قصة النهارده ..
هاشتاج باقي القِصص 👇
#قصص_واقعية_لهدير_ابراهيم 💌
🎈🎈🎈🎈🎈🎈🎈🎈🎈🎈🎈🎈🎈🎈🎈
عرفت الأكونت بتاعك من فتره وبعد م قرأت حوالي 3 قصص لقيت نفسي بفتح الشات بتاعك وبكتب..
مقدرش أقول ان القِصة #مختلفه عن باقي القصص بس انا متأكده انها هتكون رساله لناس معينه تطمن قلبهم ❤
انا يا ستي حياتي كانت ماشيه طبيعي جدا.. بنت وحيده لأب وأم مقدرش اقول ان علاقتهم ببعض كانت واو بس هقولك جملة والدتي اللي كانت بترددها دايما وهي "احنا عايشين بستر ربنا"
لحد م والدي اتوفى وهنا بدأت حياتنا تاخد منحنى مختلف تماما!!
والدتي دخلت في اكتئاب حاد واللي زوده اننا ملناش اشخاص مقربين مننا وهنا بدأت والدتي يجيلها #وسواس_الوحده لحد م نزل ع دماغنا خبر وفاة جاره لينا في العمارة ودا حرفياً وصَّل أمي للجنون لأن جارتنا للأسف اكتشفوا وفاتها بعد 3 ايام م الوفاه !!
ماتت لوحدها رغم ان عندها ولاد كلهم متزوجين بس تخيلي ولا واحد منهم سأل عنها لاكتر م 3 ايام وبواب العماره اللي اكتشف وفاتها!!
هنا أمي كانت حالتها بتزيد سوء يوم بعد يوم..
كان كل خوفها اني اتجوز ف اسيبها لوحدها واهملها ف تموت وحيده زي جارتنا.. ي خايفه ان تموت هي وتسيبني وحيده واعاني لوحدي لحد م اموت وحيدة بردو !!!
الأيام كانت بتعدي علينا صعبة جدا خاصة بعد م أمي طلبت مني استقيل من شغلي بسبب هاجس الوحده وانها خايفه تموت لوحدها وانا بره البيت او تتعب ومفيش حد يلحقها...
كنا متابعين مع دكتور نفسي وبتاخد ادوية بس مكانش في اي جديد ولا أي تحسن..
مع العلم ان والدتي كانت ملتزمه في الصلاه الحمد لله !
تعرفي ان اللي خلاني انا كمان التزم في الصلاه هو مرض أمي بالوسواس دا، مش بس علشان ادعيلها ربنا يخفف عنها
بس كمان علشان شبح الموت اللي كان بيطاردني في كل كلام أمي !!
كنت حاسه ان حياتنا دي ملهاش حل خلاص وكنت يأست تماما من ان يمر ولو يوم واحد علينا واشوف فيه أمي بتضحك !!
الدكتور كان بينصحني اخرجها م جو البيت واخليها تتعرف ع ناس جديده، بس هي للأسف كانت بترفض مجرد الخروج حتى.. ولو حصل وخرجنا مبتتكلمش مع حد نهائي قاعده سرحانه ومهمومه وبس..
لحد م في يوم ربنا هدهالي ووافقت اننا نخرج
في اليوم دا اشترينا حاجات ودخلنا مكان علشان ناكل، ولأن المكان كان زحمه جدا لقينا شاب ووالدته بيستأذنوا يقعدوا معانا ع نفس الترابيزه.. بصيت لوالدتي وكنت عارفه انها هترفض.. الغريبه بقى انها م اتكلمتش حتى بعد م انا سمحتلهم يقعدوا معانا،
بس الأغرب حقيقي كان ف إن أمي بعد ربع ساعه تقريبا انطلقت ف الكلام مع طنط اللي قعدت معانا وكان السبب ان الاوردر بتاعهم اتأخر وبدأت كل واحده فيهم تشتكي من اكل بره وان مفيش زي أكل البيت
وكل الكلام اللي كل الأمهات المصريه بتردده..
انا مكانش فارق معايا بهدلة أمي ليا قدام ناس غريبه لأني كنت لسه مش قادره افوق م صدمة ان أمي بتتكلم مع حد غريب وبتتجاوب ف الكلام
واللهم لك الحمد مخلصش اليوم الا والاتنين واخدين أرقام بعض وبيتفقوا انهم لازم يتواصلوا مع بعض
طبعا صاحبة المبادره دي كانت طنط مش أمي خالص بس الحمد لله جداا ان أمي وافقت .. مش عارفه كان ايه المميز ف طنط دي انها قدرت تخرج أمي من قوقعتها كل اللي متأكده منه انها كانت نجدة ربنا لينا❤
بدأ تواصلهم يتنقل من مجرد مكالمات لاتفاق بإنهم يتقابلوا خاصة وان ظروفهم تكاد تكون متشابهه الاتنين أرامل..
وطبيعي كنت ببقى موجوده انا والشاب ابن طنط اللي هو بردو ابنها الوحيد...
تواصل الامهات مع بعض سمحلنا اننا نتقرب من بعض اكتر وبعد فتره كانت خطوبتنا وبعدها زواجنا..
بس انا مش بكتبلك خالص علشان احكي قصة ارتباطي بزوجي لانها ممكن تكون حصلت وهتحصل مع ناس غيرنا كتير
الفكره كلها ف اللي حصل بعد زواجنا !!
اتفاجئنا بقرار من والدتي ووالدته انهم اتفقوا هيقضوا شهر سوا في بيت واحده فيهم !!
يعني أمي وطنط يعيشوا سوا في شقة أمي لمدة شهر والشهر اللي بعده يعيشوا ف شقة طنط وهكذا...
حياة امي اتغيرت 180 درجه.. بقت مقبله ع الحياه وحياتها بفضل الله سعيده،
حتى علاقتها بربنا اصبحت اقوى ودا كان بفضل طنط بعد ربنا
طنط كانت بتشد أمي لكل حاجه كانت بتعملها ومنها انهم كانوا بيخصصوا فترة من العصر للمغرب يوميا يقضوها في المسجد..
وصلت انهم يحفظوا القرآن سوا ويسمعوا لبعض..
تخيلي حتى ان مامتي بسبب حبها للقراءه ودا كانت اكتسبته من عشرتها لوالدي بسبب عشقه للقراءه كانت بتقرأ كل يوم بالليل لطنط بصوت عالي لان طنط كان نظرها بدأ يتعبها من انها تفضل مواصله القراءه لوقت طويل..
علاقتهم كانت كل مدى وبتدهشنا!!
اللي كان يشوفهم ويتكلم معاهم كان مستحيل يصدق انهم اصحاب كان بيتقال انهم توأم او ع الاقل اصحاب من صغرهم ومفيش حد كان يتوقع ان معرفتهم كانت م فتره قليلة !!
ربنا بعت كل واحده فيهم للتانيه بمثابة #الأمان في حياتها..
أمي وسواس الوحده عندها زال بفضل الله رغم ان قلبي انا كان بيوجعني كل م اتخيل حال واحده فيهم بعد وفاة التانية !!
حياتهم سوا حلوووه جدااا
بيصحوا سوا الفجر يصلوا ويقرأوا قرآن ويشربوا لبن ويقعدوا شويه ويرجعوا يناموا ساعتين وبعدين يصحوا يفطروا .. يرتبوا الشقه سوا او يعملوا اي حاجه المهم يعملوها سوا وبعدين يجهزوا الغدا ياكلوا وينزلوا المسجد يرجعوا بعد المغرب نكون احنا عندهم نقعد معاهم لبعد العشا وننزل وهما يبدأ ترتيب قبل النوم ليهم بقراءة أمي لكتاب ويناموا علشان يصحوا الفجر
وتخيلي كانوا بيناموا ع نفس السرير سوا ولا مره م اول م عاشوا مع بعض بعدوا عن بعض الا مره واحده كانت حماتي نازله بلدها لسبب ما وأمي فضلت في القاهره وكان من اصعب الأيام علينا بصراحة بسبب المعاناه والقلق والتوتر النفسي اللي كانت فيه أمي وكانت حماتي نفس الحال مع زوجي لانه كان مسافر معاها..
وبدأ خوفي أنا وزوجي يزيد اكتر وتعبنا م التفكير هنعمل ايييه في حالة وفاة واحده فيهم وهما الاتنين روحهم في بعض
دا لما واحده بتتعب التانيه بتتعب معاها وكأنهم قرروا يشاركوا بعض كل حاجة بما فيها #المرض !!
ونسينا او تناسينا رحمة ربنا واللي كانت سبب م البداية اصلا في تعارفهم
لحد م حصلت حاجه انا شيفاها حرفيا #معجزة رغم انها كانت صدمه لينا وهي وفاة الاتنين !!
ايوه زي م قرأتي الاتنين اتوفوا والطب الشرعي اثبت ان توقيت الوفاه بين الاتنين كانت دقايق
الاتنين اتوفوا سوا ع سرير واحد وكأن الروح حست ان الروح اللي جانبها راحت ف اصرت إلا وتطلع وراها
أمي وحماتي اتشاركوا في كل حاجه في حياتهم من يوم م عرفوا بعض.. اتشاركوا النَفَس الواحد .. واتقطع بردو ف نفس الوقت عند الاتنين !!
مدة معرفة حماتي وأمي كانت بالظبط 8 سنين ونص عمري م شوفت أمي سعيده ولا مرتاحة القلب والبال غير في الفتره دي ويمكن دا اللي هون عليا كتييير بعد وفاتها انها ولله الحمد اتوفت مرتاحة وسعيدة❤
رحمة ربنا حرفياً وسعت كل شئ وغيرت حياتي مش بس حياة أمي،
رحمة ربنا بعتتلي زوج بفضل الله بيراعي ربنا فيا وفي ولادنا م اكيد م هو تربية سيدة فاضلة زي حماتي الله يرحمها ويمكن انا اتعلمت منه اكتر معنى البر بأمي... وسعيدة ان ظهوره هو ووالدته غيرت حياتنا انا وأمي تماما ..
ربنا يرحم والداته ووالدتي وجميع امواتنا يارب العالمين ويلحقنا بيهم ع خير ❤
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
اتعلمت من القِصة دي إن #رفيق_الروح مش لازم يكون م الجنس الآخر.. ربنا بيبعت لقلوبنا الناس اللي بتهون عليها وتطبطب عليها
ف اللي مكانش ليه/ا نصيب في زوج/ة صالح/ة اكيد اكيد ربنا هيبعت لقلوبهم رفقة تهون عليهم...
والناس اللي بتدي الحب بدون مقابل دي الناس الصادقة بجد 💜
اللي معاهم صحاب زي دول يمسكوا فيهم جامد لانهم بقوا نادرين جدا...
ربنا يهون على قلوبنا ويبعتلنا اللي يطبطب عليها ويحبنا حب لله وفي الله ... حب بدون قيود ولا شروط 💚
#حكاوي_هدير
#هدير_ابراهيم
لينك القصة علي قناتنا علي اليوتيوب
ربنا يرزقنا يارب❤
ردحذفالقصه روعه بجد الله يرزقنا رفيق لروحنا ❤
ردحذف