فقرة عرايس تراويح رمضان
#قصص واقعية لهدير_ابراهيم 💌
-هو أنا ممكن فعلا اتمنى وادعي بدعوة معينة في رمضان وتتحقق على العيد ؟
= ايوه طبعا وممكن تتحقق قبل ما رمضان نفسه يخلص اصلا.. بس دا ليه شرط واحد ودا اللي هنعرفه من خلال قصة النهارده ..
🎀🎀🎀🎀🎀🎀🎀
اسمي سمر عندي 38 سنه.. حبيت اشارك قصتي معاكوا لأن تحقيق معجزتي مرتبط بشهر رمضان..
عايشين في مجتمع صعب وقاسي وظالم للبنات.. البنت من أول ما تخلص الثانوي وتدخل الجامعة بتحس انها داخله في سباق.. مش سباق في التعليم لا لا سباق في مين هتتجوز اسرع..
ويا سلام بقى على اللي تخلص جامعة وهي لسه متخطبتش بتلازمها كلمة بقيتي #عانس وقطر الجواز بيجري وهيفوتك..
سباق سباق سباق حياه صعبة مجهدة كلها سباق..
انا من ضمن البنات اللي خلصت جامعة وقعدت في البيت.. لسه ما اتخطبتش ووالدي مانع اني انزل اشتغل..
كان كل تفكيري اني عاوزه اشتغل بس لمجرد ان الناس تشوفني يمكن حد يتقدملي..
دماغي كانت زي بنات كتير مفيش فيها غير التفكير في الجواز.. ولأن مكانش في حد للأسف بيتقدملي كنت بخاف وبترعب من فكرة اني ممكن اوصل لسن التلاتين من غير جواز.. ف قررت اني هنزل في شهر رمضان لصلاة التراويح يوميا..
هنزل لصلاة التراويح مش علشان اقرب من ربنا ولا ادعي ولا فرصة بقى استغل ليالي مش بتتكرر غير مره واحده في السنه.. لا انا كنت نازله علشان الناس تشوفني يمكن اطلع بعريس..
بقيت انزل كل رمضان واللي بعده واللي بعده ومفيش أي جديد لحد هوب ما فجأة بقى عمري 30 سنة..
عمري 30 سنه ولسه مدخلش بيتي عريس واحد حتى.. في ناس كانت بتيجي بس من بره بره لكن جوه البيت لا..
مجرد ما وصلت لسن التلاتين لقيت نفسي بفكر هو انا ايه اللي انا بعمله في حياتي دا ؟!
ليه رابطه ومعلقه حياتي كلها بفكرة الجواز وقلبي من كتر الخوف والرعب حاسة انه فجأة ممكن يقف !
ليه كنت خايفة اوي كدا ومرعوبة من رقم 30 !!
في وسط ما انا بفكر وبعيد حساباتي مع نفسي كان رمضان بيقرب ولقيت بنات بيسألوا بعض عن الخطة اللي مجهزينها لرمضان..
اكتشفت ان كلنا بنجهز خطط بس كل واحد خطته غير التاني.. وانا كانت كل خطتي اني اطلع بعريس..
اكتشفت مدى البشاعة والجريمة اللي عملتها في حق نفسي وهي ان فكرة الزواج عمتني عن القرب من اللي بإيده يرزقني الزواج وغيره..
بدأت ابكي واكلم ربنا لأول مره.. لأول مره ارفع ايدي بالدعاء مش علشان ادعي بالزواج لا علشان اعتذر لربنا على جهلي وقلة صبري..
اخدت اول قرار عملي في مرحلة تغيير تفكيري وهو اني هحذف حساب الفيس بوك وهعمل حساب جديد.. حذفت القديم لأنه كان بيسبب تعب لقلبي غصب عني لما بشوف واحده نزلت عن خطوبتها او فرحها او حملها.. كنت بحسدهم وبتضايق وبقول هو انا ناقصني ايه عنهم علشان يحصل معايا دا انا كمان زيهم 💔
ف قررت ابدأ صفحة جديدة بحساب جديد مضيفتش فيه أي حد غير صفحات متعلقه بالدعاء وخطط رمضان.. قولت قبل م اضيف حد لازم اخلي قلبي يتعافى الاول من حسده للناس..
بدأت التزم بالصلاة والاذكار.. خصصت ورد يومي للقرآن..
اتغيرت حياتي تماما على مدار 10 ايام بالظبط وهلّ رمضان..
كنت مستنياه وفي استقباله بقلب جديد..
قررت مش هنزل تاني لصلاة التراويح وهصلي في البيت .. قررت اصلي لربنا من اجل العبادة مش علشان عاوزه عريس..
اهلي استغربوا هدوئي وصمتي بس مفيش حد اتكلم معايا ولا سألني.. مر نص رمضان وانا حاسه كأني اتولدت من جديد.. دعيت ربنا يلهم قلبي الصبر فنزل على قلبي سكينة ورضا عمري ما وصلتلهم قبل كدا..
بنقرب خلاص من الليالي العشر.. هداني ربنا للتفكير في اني انزل لصلاة التهجد والميزة ان المسجد قريب من بيتي.. بس كنت خايفة اوي والدي يرفض..دعيت ربنا ان هو وحده العالم اني اخترت صلاة التجهد من أجل العبادة ومش نفاق ولا رياء لاني اخترت وقت مش كل الناس هتنزل فيه..
دعيت يارب لو انا استحق ثواب صلاة التهجد في المسجد خلي والدي يوافق..
ووافق والدي بكل بساطه ودي كانت اول مره في حياتي آخد بالي اني عمري ما دعيت ربنا بحاجه من قلبي ف ع اي اساس كنت مستنياه يستجيب قبل كدا !!
هلت الليالي العشر وكأنها ليالي العيد.. كنت بستعد للنزول وانا قلبي فرحان جدا.. واللي فرحني اكتر ان مكانش في حد بيصلي معايا في المسجد غير ست كبيره في السن..
اول الليالي كان كلامي انا وهي بسيط.. شويه وبدأنا نتكلم اكتر وبقيت اتمشى معاها لبيتها اسندها لو حد من احفادها مجاش ياخدها..
كنت مبسوطة اوي بقربي منها لاني عارفه ان قربي منها مش لغرض معين زي ما كنت بعمل قبل كدا..
كنت مبسوطه كمان علشان اتمنيت في قلبي ودعيت ربنا اني اكون زيها في حبها وتعلقها بالصلاة في المسجد وتحمل مشقة الوقفة الطويلة في صلاة التهجد..
قرب رمضان ينتهي وانا حاسه ان كل همومي وألمي ووجعي بينتهوا معاه..
عارفه يا هدير كنت في البداية بستحي ادعي ربنا بالزواج لكن لقيت نفسي ببكي وبقوله ان فطرتنا بتشدنا للتفكير في ان يبقى عندنا بيت واسرة وزوج واطفال..
دعيت ربنا ودعيت ودعيت ودعيت وطلبت منه ينقي قلبي من الغل والحقد والحسد.. سلمت لله كل أموري واتأكدت اني كنت معيشة نفسي في جحيم بسبب الخوف من العنوسة ومن كلام الناس..
وقت بس م اتيقنت ان الزواج رزق والرزق بإيد الرزاق قلبي ارتاح.. وسبحانه الكريم المعطي الرزاق علمني الدرس وقربني منه ورجعني لطريق الحق والصواب
وقتها بس #استجاب وحل عيد الفطر ومعاه الفرحة والبهجة لقلبي ورزقني بزوج فيه مواصفات مكنتش اقدر احلم بيها.. كان كل ما سني يكبر اقلل من طموحاتي واحلامي.. بس اتعلمت ان مع ربنا مفيش سقف للأمنيات طالما بدعي وانا كلي حسن ظن ويقين انه هيستجيب..
الشخص دا جالي في التوقيت دا بالذات لان دا الوقت اللي ربنا كاتبلي فيه نصيبي من قبل ما اتولد..
مكمله حياتي من غير خوف ولا قلق من المستقبل لاني متيقنه ان اللي عند علام الغيوب كله خير..
بعتلك علشان انبه البنات اننا بنتحاسب على نوايانا ف متبقيش نزلتي وتعبتي نفسك لصلاة التراويح واتحملتي المشقة وبعد كل دا متاخديش ولا حسنة..
اخلصوا النية لله واتمنوا واحلموا بس خلوا سعيكوا كله لرضا الله وقتها هيراضي قلوبكوا..
اتجوزت بعد التلاتين وأنجبت اطفالي بعد التلاتين.. اللي بيرزق المال والزواج والاطفال هو الرزاق وفي حسابات الرزاق مفيش وجود لفكرة انت عمرك كام ؟
رمضان كريم على الجميع وان شاء الله عيد الفطر يجي ومعاه الفرحه لقلوب كل البنات ..
🎀🎀🎀🎀🎀🎀🎀🎀🎀
كنت بفضل افكر هل مجتمعنا ممكن يتعافى في يوم من تفكيره المتخلف وضغطه على البنات؟ وبعدين افتكرت انه ابتلاء من ضمن الابتلاءات اللي ربنا بيختبرنا بيها..
ف لكل بنت بتمر بالابتلاء دا اصبري واحتسبي انتِ قوية بحسن الظن واليقين ومتقلقيش نصيبك هيجيلك مهما اتأخر توقيته..
دومتوا بألف صحة وعافية واستنونا مع قصة جبر جديدة ❤
#حكاوي_هدير
#هدير_ابراهيم
لينك القصة على قناتنا على اليوتيوب
