جبر اللطيف

 #جبر_اللطيف !!

#قصص_واقعيه_لهدير_ابراهيم 💌

قصة النهارده عن رسايل واشارات ربنا اللي بيبعتها لكل واحد فينا.. طنشتها وكملت هتشوف نتيجة دا ايه فهمتها ومسكت فيها وعملت بيها هتشوف بردو نتيجتة ايه 

مثل بسيط ع كدا قصة النهارده يلا بينا نعرف ايه اللي حصل !

🎀🎀🎀🎀🎀🎀🎀

اعرفكوا بنفسي انا ساره قصتي فيها تفاصيل متأكده ان بنات كتير هتسمع وهتردد ايوه ايوه دا نفس اللي حصل معايا..

ف ركزوا معايا بقى علشان تعرفوا الطريق اللي انتوا ماشيين فيه نهايته ايه..

ربنا رزقني نعمة جمال الشكل وبناءً على كدا أهلي حددوا تسعيره لجوازي اللي يدفع اكتر يشيل !

من كتر ما بسمع كلمة انتِ جميلة من وانا صغيره اتغريت واتكبرت على الناس وبقيت ارفض دا ودا وحاطه رجل على رجل وبنقي..

كنت بمشي واقول يا أرض اتهدي ما عليكِ ادي مكنتش اعرف ان الارض دي هتتهد وتتطربق فوق دماغي !!

اتقدملي شخص مسافر بره مصر الفلوس عمت عين اهلي وفكرة اني هسافر زغللت عيني..

معملتش صلاة الاستخاره لسبب واحد وهو اني اصلا مكنتش بصلي.. ومع ذلك تفتكري ربنا سابني ! ابدا!!

بعتلي رسايل واشارات وعلامات على المصيبه السودا اللي انا رايحالها برجلي تفتكري اتلم واتعظ ابدًا.. وحتى لما حكيت لأهلي عن قلقي من تعامل والدته واخواته البنات معايا واني حاسه انه #ابن_امه ردوا عليا بإن ماليش دعوه بيهم وكدا كدا هسيبلهم البلد كلها وهسافر معاه..

مرت أيام الخطوبة اللي كانت تقيلة جدا على قلبي وكلها مشاكل وتحكمات من والدته.. واتجوزنا !

مكنتش حاسه بالفرحة زي أي عروسة..قلبي كان مقبوض جدا.. اجازة جوزي خلصت وسافر على وعد واتفاق من قبل الجواز انه هيجهز ورقي وهيبعتلي اروحله.. شهر والتاني والتالت وهو بيماطل.. وانا كنت تعبت من تحكمات والدته فيا.. تخيلي بقى ان من يوم ما جوزي سافر منمتش ولا مره في شقتي وكنت بطلعها قليل جدا وممنوع ابات عند أهلي.. كنت مقيمة في شقة حماتي اللي كانت بتعاملني بالظبط زي الخدامه.. كل مهمتي من اول ما افتح عيني لحد ما اغمضها هي خدمتها هي وبناتها اللي لسه متجوزوش .. اتهنت في البيت دا واتمرمط كتير على امل ان هانت وجوزي هيبعتلي لحد ما لقيت حماتي بتقولي يبعتلك تروحي فين انتِ عاوزه تخلصي فلوس ابني والست الشاطره تقعد في البيت تستنى راجعة جوزها كل سنه وتحافظ على ماله !

مكنتش مصدقه اللي سمعته روحت بسرعه كلمت جوزي اللي اكد على كلام والدته.. م الصدمه جريت على أهلي وحكيت اللي حصل.. بس للأسف اللي المفروض يبقوا سندي كان كل خوفهم من كلام الناس واني لسه عروسه مكملتش 4 شهور ازاي اغضب عند أهلي.. رجعوني البيت مذلوله ومنكسره ومش عارفه ولا قادره افكر.. لحد م حصلت حاجه مكانتش تخطر على بالي.. صحيت من النوم فجأه على صوت دوشه خرجت اشوف في ايه اكتشفت ان اخت جوزي وزوجها وولادها جايين ومعاهم حاجات وشنط كتير.. تخيلي بقى المشهد كدا.. كانوا ساكنين في شقة ايجار ولما المده خلصت مجددوش وقرروا مع حماتي المصونه ومع زوجي العزيز ان طالما في شقة فاضيه ف ليه يقعدوا في ايجار.. شقة فاضيه دي يقصدوا بيها شقتي !

شقة الزوجية اللي متهانتش عليها شهر ع بعضه لا هي ولا حاجتي.. حماتي تقولي بنتي وهتقعد في مال اخوها .. اكلم جوزي يقولي متبقيش بنت اصول لو رفضتي.. الكل حسسني ان العيب والمشكله فيا انا .

عقلي مش مستوعب رجعت لاهلي تاني وصممت انهم لازم يشوفوا حل يا يبعتلي اسافر يا اقعد على الاقل في شقتي يا خلاص يطلقني..

وهنا والدي بدل ما يقف في ضهري ضربني !!

قالي معندناش بنات تطلق.. انتِ عاوزه الناس تاكل وشنا.. وأمي نبع الحنان بقت تلطم وتقولي هنقول للناس ايه يا فضيحتنا وسط الناس !

للمره التانيه ارجع مذلوله ومنكسره علشان تحصل الكارثه الاكبر.. شديت في الكلام انا واخت جوزي على حاجه تافهه لقيت جوزها مد ايده عليا وضربني !

من الصدمه اتخشبت في مكاني وعقلي مش مستوعب الموقف مسكت الموبايل علشان اكلم الراجل اللي انا على ذمته لقيت امه جايه تجري ومسكت مني الموبايل وكلمته وتشتم فيا وتقوله اني بلوه جابهالهم وهانتني وجرحت فيا.. طلعت اخد لبسي اروح عند اهلي لقيت زوجي العزيز رن عليا وقالي هتروحي عند اهلك روحي باللي عليكِ ورجلك مش هتدخل البيت دا تاني غير لما تعتذري لاختي وجوزها.. يلهوي اعتذر لمين ! دماغي مش قادره تستوعب.. روحت لاهلي كلموه قالهم بنتكوا تستاهل تاخد بالجزمه كمان علشان تعرف حدودها ومكانها..

رد فعل اهلي جم عليا تاني وكل خوفهم كلام الناس م يولعوا الناس انا حقي فين ! اروح لمين ينجدني !

حاولوا يقنعوني ارجع من تاني للجحيم اللي كنت عايشه فيه بس انا صممت المرادي ودعيت ربنا لاول مره في حياتي انه ينجدني.. كل الابواب مقفوله في وشي تماما الموضوع معقد ومفيش اي مخرج ولا في امل.. جوزي وامه شوهوا سمعتي وسط الناس.. اخت جوزي بقت تتصور في مراية اوضة نومي وترفع الصور على الفيس بوك وانا شايفه دولابي مفتوح وانتهكوا كل خصوصيتي..

لجأت لربنا اللي بابه الوحيد اللي اتفتحلي.. كنت بدعي واقوله يارب ماليش غيرك انا غلطت بس انا مش عارفه اعمل ايه ولا عاوزه افكر في الانتحار واهديني وريح قلبي..

اتحملت كلام وضرب وشتيمه من اهلي بس فضلت صامده ولجؤي لربنا قواني معرفش ازاي شخصيتي اتغيرت كدا بس لقيت نفسي متمسكه بإن خلاص الجوازه دي كانت غلط من البدايه ولازم اتطلق..

طليقي واهله دوخوني السبع دوخات ومطولتش منهم لا ابيض ولا اسود بس اخدت اهم حاجه وهي حريتي وبقى اسمه طليقي..

والدي حلف ملهوش علاقه بيا نهائي ومش هيصرف عليا مليم وخلاص كفايه اللي صرفه اتجوزت تاني او لا ملهوش دعوه..

قررت اني من اللحظة دي هصرف على نفسي حتى لو اشتغلت في البيوت او مسحت السلالم المهم مش همد ايدي لاهلي اللي خذلوني وكسروني..

الكل ردني وقفلوا في وشي ابوابهم الا ربنا فتحلي باب الصلاه ومن بعدها فتح ف وشي ابواب كتير..

اشتغلت في كذا مكان واتعذبت شويه لحد ما الحمد لله ربنا كرمني بشغل في مكتب هندسة ديكور..

المهندس عصام صاحب المكتب كأن ربنا سخره لراحتي ومساعدتي.. اتعلمت منه حاجات كتير هو وبنته المهندسة هناء.. حكيتلهم كل اللي حصلي وعلشان عزة نفسي كانوا بيقدمولي اي مساعدات على شكل هدايا..

بدأت حياتي تستقر وقلبي يهدى ويرتاح.. مادياً الحمد لله بقيت افضل ومش بمد ايدي لحد وقادره اكفي نفسي وعلاقتي مع ربنا بقت افضل وبقيت استنى وقت الصلاه علشان اسجد واحمده على كل عطاياه ليا.. الحاجه الوحيده اللي كانت منغصه حياتي هما أهلي كانوا بياخدوا جزء كبير من مرتبي على اساس اني عليا دين ليهم ولازم اسدده اللي هي فلوس تجهيزهم ليا بما اننا مخدناش حاجه وقت الطلاق.. وياريتها جات على الفلوس وبس.. كلامهم ليا كان زي سكاكين بتقطع في جسمي وفي قلبي..

كلام الجيران والقرايب ونظرة المجتمع عن المطلقه.. خاصة اني مقعدتش مع جوزي شهر كامل ولا استمر جوازي نفسه غير شهور قليله.. الناس كانوا يقطموا فيا ويقولوا ما كنتِ ترضي وتعيشي واني كدا مش بنت اصول وان كل البنات عايشه وراضيه !

اعيش وارضى بإيه بجد ! زوج مفيش عنده ذرة نخوه ولا حما مفتريه وعقربه بمعنى الكلمه ولا بناتها اللي كانوا مستعبدني وكنت مباحه اي حد يهيني ويمد ايده عليا..

ندمت ندم عمري كله على كل رسايل واشارات ربنا اللي بعتهالي وقت الخطوبة وصدتها.. ربنا وحده بس اللي كان عالم بيا ولما روحتله ندمانه ومكسوره مردنيش عن بابه وطيب قلبي وسخرلي ناس تاخد بإيدي وتطمني..

جمالي اللي كنت بتغر بيه بقى باهت وبقيت زي الموميا جسم ماشي وبيتحرك بس مفيش روح..

في كل سجده لربنا كنت بستغفره على كل ذنوبي وعلى كبري وغروري واني مُقره اني كنت استاهل عقابه.. بس قلبي كان فيه جزء لسه حزين ومش متطمن.. جزء مفتقد لحب حقيقي وأمان واهتمام..

رجع يتقدملي عرسان من تاني بس المرادي اهلي مبقوش يتكبروا على الناس ما انا بقيت فرز تاني ومستخدمه ! ف بقى يتقدملي ناس كبيره ف السن وعاوزني زوجه تانيه واهلي رجعت عنيهم تزغللها الفلوس من تاني ورجعنا للاهانه والضعط والضرب والتهديد انهم هيرموني في الشارع واني فضحتهم وعرتهم قدام الناس ملقتش حد الجأله غير طبعا ربنا اللي مردنيش ولا رد دعوتي وجبرني!!

دعيت ربنا زي ما سخرلي ولاد الحلال اللي اشتغلت معاهم يبعتلي الزوج الصالح اللي هيعوضني الذل والمر وكل اللي مريت بيه.. #واستجاب

مهندس جديد اتعين في المكتب مكملش اسبوع ولقيت مهندس عصام بيقولي انه سأله عني وحابب يتقدملي.. انا كنت مصدومه وقولتله بس دا شكله صغير قالي ايوه وايه اللي فيها ما انتِ لسه صغيره ! اه صح انا لسه صغيره رغم ان اللي مريت بيه زود عمرين على عمري..

مهندس عصام اكدلي انه عرف عني كل حاجه وموافق ومستني مني رد.. مكنتش عارفه اتصرف مهندسه هناء قالتلي اصلي استخاره وارد عليهم.. كانت اول مره في حياتي اصلي صلاة استخاره..

صليت وعلى عكس ما توقعتوا الموضوع اتعقد تماما ومتمش.. ومزعلتش على فكره لسبب اني واخيرا الغشاوة اللي كانت على عيني اتشالت وبقيت اقدر استوعب واميز اشارات ورسايل ربنا.. رفضت عريس لقطه في نظر الناس بس متطمنه لاني استخرت ومشيت ورا علامات رب الناس..

حالي مع الله كان هو الحاجه الوحيده اللي بتطمن قلبي.. بقيت عايشه اليوم بيومه ومستنيه الموت علشان اروح عند ربنا.. بس ربنا برحمته وكرمه كان مقدرلي لطف كبير منه.. 

ربنا وحده هو مسبب الاسباب ف تخيلي ان راحة بالي تكون عن طريق قدر جمعني بشخص كانت العامله اللي في المكتب رجليها بتوجعها قولتلها ارتاحي وانا هنزل اجيب طلبات المكتب وهناك قابلت زوجي الحالي وأمان قلبي وسبب راحة بالي..

دا الشخص الوحيد اللي صليت استخاره باسمه من قبل حتى ما يتقدملي ولا اعرف عنه حاجه.. كان حب من اول نظره ودعيت ربنا لو هو نصيبي يبعتلي اي علامه.. اسبوع كامل بصلي استخاره يوميا مش فاهمه ولا عارفه ليه.. شقلب كل كياني ووقت ما خلاص هيأس لقيته ظهر فجأه قدامي وفين في مكان شغلي..

شوفي بقى واستمتعي بجمال ترتيب قدر ربنا..

طلع ان اسمه عمار محاسب منقول لفرع جديد للشركه اللي طلعت في نفس العماره اللي فيها مكتب شغلي ! وكان نازل يسأل على حاجه عندنا في المكتب ومش بس كدا طلع فاكر انه شافني من اسبوع.. يعني هو كمان اخد باله مني..

شهرين بشوفه تقريبا بشكل يومي والتعامل بينا عباره عن سلام او هزة راس..

تفتكري كنت ساكته طول الشهرين دول! ابدا يوميا صلاة استخاره ودعاء الاستخاره مش منقطع عن لساني.. لحد ما جات رجله الحمد لله وفاجئني انه عاوز رقم والدي كنت مصدومه من الفرحه وعاوزه اعيط.. حكيتله كل حاجه حصلت معايا بالتفصيل الممل.. جبر ربنا وترتيبه ابهرني .. الشخص دا طلع مطلق زيي بس وقت طلاقه دفع تمن القايمه وفضلت كل حاجه ف الشقه زي م هي وبعد خطوبتنا باع الحاجه كلها وجدد كل حاجه في الشقه ومهند عصام وبنته وزمايلي في الشغل هادوني بمبلغ قدرت بيه اجيب لبس وحاجات تانيه..

يوم فرحي السعاده كانت ماليه قلبي وحسيت وقتها بفرحة اني عروسه لاول مره وفرحة الفستان الابيض..

مش بس كدا دا شوفي عظمة الجبار بقى.. مكملتش شهر جواز وتعبت روحت اكشفت علشان اطلع حامل وبعدها بدأ الحساب للحمل من اول اسبوع في جوازي. يعني ربنا مقدرلي وكاتبلي ان ذريتي تكون من زوجي الحالي ف سبحان الله والحمد لله على جميل لطفه وجبره ونعمه..

لكل بنت ولكل شاب صلاة الاستخاره أهم مرحلة قبل الارتباط.. ولو ظهرت علامات وقت الخطوبه اعتبروها رسايل ربنا واياكوا تتجاهلوا خدوا من اللي حصلي عبره.. وكل عام والجميع بخير وسعاده ورمضان كريم ❤

🎀🎀🎀🎀🎀🎀🎀🎀

مسكين اللي شايف ان ربنا مش بيحبه او بيعاند معاه حاشاه سبحانه.. افهموا الاشارات ورسايل ربنا وامشوا وراها هتكون سبب في راحة قلوبكوا..

واستنونا في قصة جبر جديده 💙

#حكاوي_هدير

#هدير_ابراهيم

لينك القصة علي قناتنا علي اليوتيوب

جبر اللطيف - YouTube