اكتشفت زوجتي في حمام الرجال
#اكتشفت_زوجتي_في_حمام_الرجال !!🤔
#قصص_واقعيه_لهدير_ابراهيم 💌
نبعد شويه ونفصل عن جو الكآبه اللي حوالينا ونركز مع بعض شويه وندخل عالم #الخيال_الواقعي!!
دا اسم قصة انهارده ، يمكن الاسم ملفت شويه وناس تستغربه لكن اعمل ايه دي الحقيقه تعالوا نبدأ سوى احداث قصتنا
🎀🎀🎀🎀🎀🎀🎀🎀🎀🎀🎀🎀🎀🎀🎀
احب اعرفك ع نفسي انا اسمي سها دكتوره صيدلانيه ،،
حبيت اشارك معاكي حكايتي لكذا سبب
انا مش متابعاكي من زمان ع فكره ، بس قرأتلك قصه واقعيه نزلتيها قبل كدا شدتني ادخل صفحتك واقلب فيها لدرجة اني تقريبا وصلت لاول بوست فيها ،،
بهرتيني بكل حاجه خاصة في قصصك بإسلوبك وتفاصيل سردك ليها ،
لكل شخص منا حكايه ، بس الجميل ان حد يقدر يخرج الحكايه دي بكل اللي فيها من وجع وفرح ، لكن بتمكنه واسلوبه بيخلي صاحبها ينسى كل الوجع ويعيش لحظة السعاده اللي انتي كتبتيها والمفروض انها ع لسانه ،،
اسفه ع المقدمه الطويله دي بس هي هتختصرلي حاجات كتير عاوزه اقولهالك ،
بصي يا بنتي – واسمحيلي اقولك يا بنتي – لأن انا نسيت اقولك ان عمري تقريبا ضعف عمرك او اكتر ،،
هحكيلك دلوقتي ع تفاصيل بجد اول مره اخرجها لشخص !!
بدأت معاناتي بدري اوي م وقت م كنت صغيره لسه ، وكان كل اخواتي وقرايبي البنات في الشكل ماشاء الله عليهم كلهم حلوين الا انا ،،
كنت الوحيده اللي الكل تقريباً اجمع ع اني ابشع واحده في العيله ،
من الشكل والجسم مش بس الشكل ،
حتى لما دخلت الكليه معظم بنات العيله دخلوا طب بشري وانا دخلت صيدله ، ودي عندهم اني مش بس حظي في الشكل وحش لا في التعليم كمان
اه والله اعتبروا ان كلية صيدله دي بالظبط زي اللي واخد دبلوم او اعداديه واخره يقعد في محل يبيع ،
مع ان اصلا البياعه دي في حد ذاتها مش مهنه معيبه ،
بس نقول ايه بقى ،،
ظل الحال ع ما هو عليه ، معايره من هنا ع كلمه من هنا وكل دا بيخلي حالتي النفسيه توصل للصفر او اقل ،،
والدتي موجوده بس هي نفسها جالها حالة يأس مني تقريباً وسلمت بإن قدري اعيش واموت من غير زواج !!
مكدبش عليكِ علاقتي بربنا كانت بعيده الى حد ما ، ووقت م بقرب بيكون بغرض الدعاء بإني اتجوز ،
اي بنت في الدنيا مهما كابرت وعاندت هي من جواها بنت .. نفسها تكون ام وليها بيت مستقل واسره تأسسها بنفسها وتحس فيها ان ليها كيان بجد ،
نفسها في زوج يتقي الله فيها ويحسسها انها بني آدمه بجد ،،
الطبيعي ان بنات العيله والجيران وجيران الجيران يتجوزوا ويخلفوا وانا في مكاني مبتحركش ،،
حتى لما كان شيطاني يوزني واقول هداري قُبح شكلي بالمكياج ، كنت باخد كمية كلام وتريقه تخليني افكر جدياً اني يا انتحر يا اعتزل الناس كلها !!
لحد م وصلت ل 40 سنه وتخيلي بقى واحده يوم ذكرى ميلادها اخوها بدل م يقولها كل سنه وانتي طيبه مثلا قالي
انتي بقى عندك 40 سنه من غير جواز — انا لو ينفع اتجوزك كنت اتجوزتك — !!
وياريته قال كدا مثلا علشان يطيب خاطري او حاجه لا دا ختم الجمله ب _ بدل كلام الناس اللي اكل وشنا _ :)
40 سنه يا هدير في هم وحزن ووجع قلب ، ودموع بتملى مخدتي كل ليله قبل م انام ،
يأست من اني اعيش زي اي بنت ، وبقيت قبل م انام افكر في حلم احلم بيه لعله ينسيني الواقع شويه !!
تخيلي اني حتى لما حاولت اقرب من ربنا ، وربنا هداني للنقاب ، اول كلمه اتقالتلي اني لبسته بس علشان استخبى وراه واداري #قُبحي !!
الكلمه وجعتني جدا ، بس بردو لبسته كنت وصلت لمرحلة انه خلاص طالما الدنيا كدا كدا ضايعه يبقى بلاش اضيع الاخره كمان ،
تعرفي اني كنت باخد قوتي من النقاب ،،
والله العظيم حسيت بيه اني فعلا بنت ، بقى عندي ثقه في نفسي ، مش بس علشان داريت شكلي او جسمي ،
لا علشان حسيت ان نقابي بيطبطب عليا ، لما بعيط وبضعف بيمسح دموعي وبيخبي ضعفي ،،
مقدرش اقول اني بطلت افكر في الجواز ،
بس ع الاقل بقى تفكيري هنا مختلف ،
اصبح عندي يقين كبير وثقه في الله ، انه اكيد هيفرحني مش شرط في الدنيا المهم اني هفرح حتى لو في الاخره بس ،،
بالي بقى مطمن جدا بالقرب من ربنا ، انشغلت عن التفكير السلبي بالذكر والاستغفار واني اتعلم اكتر عن ديني وازاي ارضي ربي !!
كنت كل يوم قبل م انام افكر في الحلم اللي هحلمه ،
بدأت اتخيل شكل جوزي وبيتي حتى اسماء ولادي ،،
كنت بدعي ربنا بالزوج الصالح والذريه الصالحه ، وكنت دايما ادعي ربنا لو تزوجت يرزقني #بتوأم ولد وبنت ، وكان الدعاء دا بقوله بإستمرار خاصة وانا بكبر في السن وكدكتوره عارفه انه صعب شويه موضوع حمل بعد ال 40 ، ولو حصل بيكون مُجهد جدا !!
بقيت اكتب في مفكره عندي كل اللي بحلم بيه وبتمناه ،
كنت بتخيل نفسي وانا مخطوبه وبكتب مشاعري كلها في مفكرتي ، يوم بيوم ولحظه بلحظه ،،
مرت الأيام وفي يوم كنت المفروض اسافر احضر فرح ،
تخيلي هحضر فرح بنت واحده قريبتي وفي نفس سني تقريبا ،
لا مش صاحبتي بنتها :)
خوفت جدا اروح ويا هتصعب عليا نفسي ويبان ضعفي ، يا الاكيد اني هسمع كالعاده كلام كتير من اللي حواليا ، كلام حقيقي يسم البدن ،،
المهم اني قررت افوض امري لله واحضر ،
سافرت فعلا من بلدي مع اخويا ومراته وولاده ، وحضرت الفرح وسمعت اللي فيه النصيب ،
وقبل م ارجع بيوم ، روحت مع اخويا وصاحبه وزوجاتهم وولادهم النادي ،
كنت حاسه نفسي غريبه وسطهم ، بس كنت باخد جانب شويه كعادتي ممكن اقرأ كتاب او اذكار او اي حاجه تلهيني ، ومفيش حد كان بياخد باله من وجودي اصلا ف عادي ،،
وقت الصلاه مجرد م سمعت الاذان روحت اتوضا ، طبعا لوحدي مفيش حد اتحرك يقوم يصلي ،
وبما اني في مكان غريب فضلت شويه ادور ع مكان الحمام ، لحد م وصلتله ،
هنا كنت واقفه محتاره اي حمام فيهم حمام السيدات ، مفيش اي علامات ولا اي حاجه تفرق بينهم وهو كان في دور تاني ومفيش حد حتى يمر اسأله ،
المهم دخلت اي حمام بسرعه علشان الحق صلاة الجماعه ،
دخلت الحمام كان كله متقفل وباين بس الأحواض ، اطمنت هنا انه حمام سيدات ،
وبدأت ارفع النقاب علشان اتوضا ، وهنا بالظبط لقيت باب الحمام اتفتح
وواحد فضل متنح شويه وانا متنحه اكتر منه ،
كنت بدعي ربنا في اللحظه دي الارض تنشق وتبلعني ،
واول حاجه نطقتها هي انه انسان مش محترم يدخل حمام السيدات ،
كانت الصدمه الاكبر لما عرفت اني في حمام #الرجال 😃
انا تنحت اكتر وكنت هعيط ، لكن هو طلع شخص مهذب وخرج وقفل الباب وراه ،
ظبط النقاب بسرعه وخرجت ، لقيته واقف ع الباب علشان يمنع اي حد يدخل وانا لسه جوه :)
وانا خارجه وطبعا وشي في الارض قالي ابقى اسألي قبل م تدخلي بعد كدا لحد م تتأكدي انتي داخله ايه ، وحسيت انه كان بيتريق وهنا كل كلمات الشكر اللي كنت هقولهاله اتبخرت !!
دخلت الحمام التاني اتوضيت وكنت شويه وفعلا هعيط واندب حظي ،
نزلت صليت وفضلت قعده في المسجد بعدها راجعه للترابيزه اللي عليها اخويا وصاحبه ،
وهنا قلبي كان هيقف تاني لما لقيت الشخص اللي قاعد معاهم
ايون الشخص بتاع الحمام !
كنت حاسه ان كدا كتير وخلاص هيغمى عليا ،
ولما وصلت كانوا كلهم بيضحكوا ، اول حاجه خطرت ع بالي انه اكيد حكالهم الموقف وهما بيضحكوا عليا !!
بس لما قعدت ولا حد بصلي ولا وجهلي كلمه ، ف اطمنت ان الضحك مش عليا وانه مقالش حاجه ،
اخدت جنب زي م كنت ، وبدأت اكمل قراءة كتابي ، وسامعه صوتهم بيتكلموا ، وفجأه لقيت مفيش صوت ولما بصيت عليهم لقيت الكل بيبصلي !!
ومفيش حد بينطق واول شخص اتكلم كان الشخص بتاع الحمام ، سألني بقرأ كتاب ايه !؟
واللي فهمته انه كان بيسأل السؤال من فتره وانا مش سامعاه ،
لو كنت استغربت من ان حد وجهلي الكلام ف استغرابي الاكبر ان الشخص دا طلع عارف الكتاب اللي بقرأه ومش بس كدا لا دا بدأ يتناقش معايا فيه ،
لدرجة انه احيانا كان بيحصل بينا شد وجذب واختلافات ،
ولأول مره بردو انسى نفسي مع شخص في الكلام وان هو نفسه مينفرش مني ،
حسيت لأول مره اني #بنت او بمعنى اصح هنا بني ادمه #طبيعيه زي باقي البشر ،
سعادتي مكانش ليها وصف ،
لا والمفاجأه اللي بعدها لما عرف اني خريجة صيدله وطلع هو شغله في مجال الادويه ،،
الكلام زاد اكتر ، واتناقشنا هنا بشكل علمي في الادويه ودا مجالي اللي انا نفسي بحس اني متفوقه فيه وبحس بثقه وانا بتكلم فيه ،،
استمرينا كدا لفتره وانا روحي حاسه بالسعاده واني شويه وهطير في السما !!
خلص اليوم ورجعنا البيت ، وبدأت ارجع للعالم بتاعي الطبيعي تاني ، لكن كان بيخطر ع بالي كتير الشخص بتاع الحمام منكرش كدا اكيد ،
خوفت اسأل اخويا اي حاجه عنه ،
انا عرفت مجال شغله لكن معرفش سنه او هو مرتبط او لا ،
بس فكرت تاني وقولت ان سنه اكيد اقل مني وانه ابدا م يكون اكبر من 40 سنه وانه حقيقي اخره في اواخر ال 20 او بداية ال 30 ،
بعد اسبوع بالظبط ، لقيت اخويا بيقولي اكبر مفاجأه في حياتي
وهي ان الشخص دا اتقدملي !!
مقدرش اوصف احساسي في الوقت دا ، بس كل اللي فاكراه اني دخلت بهدوء اتوضيت وبدأت اصلي واول م راسي لمست الارض بكيت بكاء عمري م بكيته ولا حتى في اوقات شدتي !!
انا بقيت اكلم نفسي واقول خلاص بجد هعيش طبيعيه زي اي حد 😭 يعني بجد في امل حتى اني اكون ام وان يكون ليا اسره وبيت 😭😭
فضلت اصلي كتير وادعي ربنا يكون دا بجد واقع مش حلم وانه يفرح قلبي !!
دخل بعد شويه اخويا يسألني تاني ، وهنا لما سألته ع سن الشخص دا اتصدمت لان توقعي كان في محله ،
طلع عمره 36 سنه يعني انا اكبر منه ،
وفي الوقت دا معرفش جاتلي الشجاعه دي منين اني ارفضه ، مع كمان الكلام اللي سمعته واستغراب كل اللي حواليا ،،
اولا بالعقل ،، لو ع جمال الشكل ف الشخص دا فيه وسامه بجد الله اكبر عليه ، وطريقة كلامي تدل انه بردو فيه من جمال الروح كتيير ،
وسنه صغير ودا باين جدا عليه يمكن اصغر من كدا كمان ،
وانا واحده في جمال الشكل مفيش نسبه يعتبر وجمال الروح انا الكل بيقول عني انطوائيه ومبتكلمش ،
وعن السن ف حدث ولا حرج فرق السن بيني وبينه ،،
رفضته وانا قلبي خلاص مش مستحمل بس كنت شايفه ان دا اهون من اي كلام ممكن اسمعه ،
اخويا بالفعل وصله رفضي ، الادهش ان الشخص دا اتمسك ان يحصل رؤيه شرعيه الأول وبعدها هيحترم قراري اياً كان ،
استغربت كلامه وتمسكه دا ، بس قولت احسس نفسي ولو مره اني بنت عاديه وبيتقدملها ناس لا وفي حد متمسك بيها كدا فوق كل دا ، قولت هعيش اللحظه بلحظتها ،
وقبل م يحضر عملت استخاره ،
بس لما حضر دخلت بالنقاب ، اتحججت بإني اصلا رافضه فلا يجوز ادخل من غير النقاب ،
بس لو هتكلم بصراحه ف كان في سبب تاني وهو اني عاوزه اداري شكلي عنه ،، ومحسش ولا لحظه بنظرة استياء من شكلي ،
لما دخلت فضلت انا ساكته وهو بيتكلم ،
كل جمله كان بيقولها كانت بتدهشني اكتر ،
وع فكره مطلبش اني انزل النقاب ،، انا اللي نزلته لما شوفت اصراره وتمسكه بيا ،
وأول م نزلت النقاب مرفعش عينه عليا خالص ولا بنظره واحده ، وانا كنت متضايقه جدا وطول الوقت بصه للارض بس وهاين عليا افضل اعيط ، وبردد انه فعلا شايفني غير مقبوله وباين عليا اني اكبر منه ،،
ولما بصيتله علشان اقوله اني هقوم واني رفضته لقيته بيقولي ان اول حاجه محتاجه اني اتعلمها هي #الثقه_بالنفس واني مكونش محتاجه ولا منتظره تقييم من اللي قدامي ،
وإن ثقتي بنفسي هي اللي هتخليني جميله في نظري الأول ودا هيخلي اي حد قدامي يلمس دا فيا ،
قالي انه اللي شده ليا روحي معرفش هو شافها ازاي ولا جابها منين ،
بس يمكن ربنا قدرلي الشخص دا بالذات اني اكون في عينه بالشكل دا !!
كنت حاسه ان الشخص دا مجنون ، مفيش تفسير لكلامه وافعاله غير انه حقيقي مجنون ،
الشخص دا انا مديونه ليه بحاجات كتير جدا ،
منها انه اول شخص يديني ثقه في نفسي ، خاصةً لما قالي ان ثقة الشخص بنفسه واقتناعه بذاته وبنفسه اهم من اي حاجه ، اهم من الشكل والجسم وغيره ،
كمان ثقة الانسان بإن دا خلق ربنا وان ربنا مقدر كل شئ بتريح كتييييير !!
مش عارفه بجد احكي ايه ولا ايه عن الشخص دا وكلامه ليا ،،
يكفي بس اني اقولك انه حقيقي #ملاك من الجنه ربنا نزله ليا انا مخصوص تعويضاً عن صبري وكل تعبي ،
كان هو الجايزه الكبرى ،،
بفضل الله تزوجنا وعندنا من فضل ربنا توأم زي م تمنيت ، مش هقولك الحمل والولاده كانوا سهلين ،، بالعكس تماما ،
بس دا شئ بيخليني احس بقيمة ضُفرهم كل دقيقه !!
ربنا بعتلي زوجي واطفالي هديه مكنتش احلم ولا اتوقعها ابداً ..
زوج بيعاملني مش بس بحب لا بإحترام رهيب ودا بيجبر اي حد قدامي يعاملني بإحترام !!
ويشهد ربنا ان عمري ما حسيت معاه بفرق السن بالعكس رجعت مش شباب لا #طفله وانا معاه !!
ربناعوضني لدرجة ان كل شخص قالي كلمه سيئه او حتى نظرلي نظرة سوء ، حالياً بيحسدوني ع حياتي !!
عندي حالياً 46 سنه واطفالي 5 سنين وعمر زواجي 6 سنين ،
ولحد انهارده حاسه نفسي كأني في حلم ،،
بس الاجمل اني حاسه نفسي في #الجنه !!
ربنا يديمهم في حياتي نعمه يارب ،
ويبارك في الجميع ويرزق جميع فتيات المسلمين الازواج الصالحين ويرزقهم السعاده ..
🎀🎀🎀🎀🎀🎀🎀🎀🎀🎀🎀🎀🎀🎀🎀🎀
خلق ربنا كله #جميل اهتموا بنفسكوا وحبوها وزودا ثقتكم في نفسكم اكتر وتجنبوا اي حد ممكن يسمعكوا كلمه تضايق !!
ورفقاً بالبنات اللي سنهم كبير ولا حتى صغير ولسه م اتجوزوش ✋ كل شئ مقدر ومكتوب عند رب العالمين ف #اطمنوا ♡
#حكاوي_هدير
#هدير_ابراهيم
لينك القصة علي قناتنا علي اليوتيوب
قصصك جمييييله فوق ما تتخيلي بس عندي طلب ممكن تنزلي القصص زي زمان على الجروب من غير لينكات😇
ردحذفتسلميلي ❤
حذفصعب انزل قصص طويله ع الفيس تاني لانها حرفيا اتسرقت كلها 💔
عاوزة ابعتلك حكايتى
حذفالقصص وهميه ايه الجمال دا ربنا يرزق قلوبنا الاحساس بالفرح واليقين
ردحذفتسلميلي يارب❤ ربنا يسعد قلبك ❤❤
حذفأجمل حاجه فى قصصك الصبر الجميل وجزاء الصبر فى الدنيا🌸🌸
ردحذفهو ممكن تفتحى التعليقات بتعت الجروب اللى على التيليجرم بحبك اووووووى اووووووى والله ربنا يجبر قلبك
ردحذفايه يا هدير الجمال دا بكيت والله الله يحفظكوا ويديم عليكوا جبره ويجبرنا زيكوا💙
ردحذفالله الله على عظمة وجمال الجبر القصه دي حافظه كل كلمه منها في قلبي والله❤
ردحذفحلوه اوي من جمالها كل شويه ادخل اقراها🥺
ردحذففي نقطه مش فاهمها هي بتقول مرفعش عينه عليها
ردحذفيعني مبصلهاش خالص
وبصلها قاصدها فضل باصص ليها طول الوقت
هدير قصصك تدخل القلب وانتى تدخلى القلب بدون استئذان والله
ردحذفربنا يسعدك ويبارك لصاحبه القصه ويفرحها بزوجها وأولادها
قصصك مصدر املي في الحياة بعد الله
ردحذفعاوزه اكلمك ضرورى يا هدير اوصلك ازاى
ردحذفيا جمال قصصك وانا سعيدة اني بقيت اقدر اعلق من غير ما اي شخص يقرا تعليقي من اصدقائي. انا متابعتك نهاد من الجزائر استنا قصصك بفارغ ربنا يجبرك ويرزقك سعادة الدارين
ردحذف