الدعاء و القدر

 #الدعاء_والقدر

#قصص_واقعيه_لهدير_ابراهيم 💌

هل الدعاء بيغير القدر ؟

سؤال بيخطر على بال ناس كتير قبل ما تدعي وبيفضلوا يسألوا نفسهم هل يا ترى لو فضلت ألح في الدعاء ممكن حاجه تتغير ؟!

اخترت قصة تعتبر مثال بسيط ومعبر جدا عن حقيقة ان الدعاء بيغير القدر..

فتعالوا نشوف قصة النهارده..

🎀🎀🎀🎀🎀🎀🎀

موقف بسيط ممكن حد يشوفه هايف بس بالنسبالي هو موقف كان متوقف عليه كل حياتي

أنا متزوجه وعندي بفضل الرحمن 3 بنات ولسه والده من اسبوع الطفل الرابع

مجتمعنا مجتمع زي الزفت مجتمع جاهل ومتخلف بمعنى الكلمة

تخيلي كل ما كنت اعرف اني حامل في بنت كانت حماتي ترقع بالصوت في وشي وتفضل تصوت وتفضل تقولي أنا وجوزي ان الناس بتعايرها بان خلفة ابنها الوحيد كلها بنات وتفضل تقولي كلام كله جهل وتخلف زي يا مخلف البنات يا شايل الهم للمات وان البنات خلفتها عار وكلام يحرق الدم ومع ولادتي للبنت التالته كانت عايزه زوجي يطلقني متخيله ؟!

رغم ان حماتي عندها ولد وحيد اللي هو وزوجي وبردو 3 بنات !! 

زوجي ابن حلال واتحمل كتير علشاني وعلشان بناتنا وجاله الضغط وهو لسه يا حبيبي صغير وكل دا لمجرد انه خلف بنات اومال الناس اللي بتعيش وبتموت من غير خلف يعملوا ايه ؟!

كانت حماتي ترد وتقول بدل خلف البنات الي بيجيب العار!!

الوقت كان بيمر علينا بصعوبه وتعبنا نفسيا وبقينا نروح انا وزوجي لدكتور نفسي

انا كنت مرعوبه ان كتر الضغط والزن يوصلنا اننا نكره بناتنا ومنحسش بقيمة النعمة اللي ربنا رزقنا بيها..

واكتر من مره وصل بيا اليأس لطلب الطلاق وهو كان يتمسك بيا وأهلي يقولولي مش هتلاقي حد يحبك اده فاستحملي كلام أمه اللي زي السم

تخيلوا بقى ان هي بتعمل كل دا وهي مش عايشه معانا في نفس العماره اصلا اومال لو كانت عايشه معانا كانت عملت فينا ايه😅

المهم علشان مطولش عليكوا حملت للمره الرابعه وكان الحمل من عند ربنا 《مش عايزه اقول انه كان غلطه لان مفيش حاجه بتيجي من عند ربنا اسمها غلطه》مركبه لولب وواخده كل الاحتياطات وخلاص مقرره مفيش حمل تاني بس قدر ربنا قولت مش هعمل سونار فضلت زن زن علشان اعمله.. قبل ما اروح العياده فضلت ادعي ربنا يجبرني انا وزوجي ب #ولد مش علشان التفكير المتخلف بإن الولد افضل من البنت.. ابدا والله بس علشان يبقى سند وضهر لاخواته البنات وعلشان زينة الحياة الدنيا البنين والبنات..

 المهم روحت عملت السونار وطلع الجنين بنت.. رظ فعل حماتي انها تفت في وشي وفي وش امي وفي وش زوجي مش تفه واحده علينا كلنا لا دي تفت 3 تفات في وش كل واحد فينا قدام الدكتوره 😅

خرجنا من عيادة الكشف وهي عماله تصوت وفرجت علينا الناس وفضلت تشتم فيا وفي أهلي وتقول لجوزي انه لو مطلقنيش لا هي أمه ولا تعرفه وهتفضل غضبانه عليه ليوم الدين

وحلفت ماهي داخله لزوجي بيت لو مخلنيش اسقط الجنين.. تخيلي انها قالتله ان طالما عنده بنات كتير يبقى حلال نجهض البنت الجايه.. مش عارفه شرع ايه دا اللي بتحلل وتحرم فيه ع مزاجها..

جوزي فضل يحاول يسكتها وهي مفيش فايده فرجت الناس كلها علينا..

رجعت بيتي وانا قلبي مكسور وعماله أبكي وجوزي مفيش في ايده حاجه اصله هيعمل ايه مهما كان دي أمه وهو ابنها الوحيد ؟بس كان بيحاول على أد ما يقدر يهون عليا ويأكدلي ان كلام والدته ولا فارق معاه..

والدته قطعت بينا فتره فعلا ومبقتش ترن علينا ولا تيجي الزياره ولا بترد عليه ولو راح يزورها مبترضاش تفتحله.. نظام لوي دراع من الآخر..

بس في يوم رن جرس الباب وجوزي كان لسه في شغله.. فتحت لقيت حماتي واختها.. مجرد م دخلوا من الباب شدوني من شعري وضربوني وبهدلوني قدام بناتي متخيلة الجبروت يا هدير 💔

فضلت اصرخ لحد ما الجيران اتلموا وبعدوهم عني..

وقعت في الأرض وانا حاسه اني بين الحياه والموت مش فاكره أي تفاصيل غير اني فوقت لقيت نفسي في المستشفى وجوزي قاعد جنبي وبيبكي ومجرد م فتحت عيني ميل عليا ضمني وقالي حقك عليا والحمد لله ان انتِ وبنتنا بخير..

بنتنا ؟!! هي بعد كل دا لسه متمسكه بالحياه ومنزلتش ؟

بقيت افضل ابص على بطني واكلم البنت واقولها هو انتِ متمسكه بالحياه اوي كدا ع ايه ؟ دا انتِ هتعيشي في وسط مجتمع جاهل متخلف شايف ان خلفة البنات عار ..

ارحمي نفسك وارحميني معاكِ وموتي 💔

وفي لحظة حسيت بقبضة في قلبي لمجرد تخيل ان حماتي أثرت بالسلب عليا لدرجة تخليني اتمنى موت بنتي اللي لسه مشافتش نور الدنيا..

فضلت اعيط وحطيت ايدي ع بطني وقعدت اعتذرلها واقولها والله غلاوتك هتكون نفس غلاوة اخواتك واتمنيت لو اضمها لحضني واطمنها..

كنت في كل سجدة وانا بين ايدين ربنا ادعي يارب انت وحدك قادر تغير القدر نفسي بناتي يكون ليهم أخ.. نفسي جوزي يكون ليه ولد من صلبه..

وبعدين ارجع تاني اقول يارب لو انا كدا طماعه او مش راضيه فلا والله ياربي انا بس قلبي مكسور وموجوع  بس يارب لو انت شايف ان الخير لينا ان يكون عندنا ولد غير القدر..

مرت شهور الحمل بكل الصعوبات اللي فيها وجوزي كان بلغ بواب العماره انه يمنع أي حد يطلغ شقتنا طول ما هو مش موجود ف من آخر موقف مشوفتش حماتي تاني..

وهلت بشاير الولادة دخلت اوضة العمليات وجوزي معايا علشان نكتشف ان الجنين طلع #ولد مش بنت..

ربنا غير بدعائي القدر واستجاب.. مؤمنه ان لا يكلف الله نفسا الا وسعها ومتأكده ان ربنا عالم بإن نفوسنا تعبت ومكانتش متحمله علشان كدا رزقنا اخيرا باللي يخرس ألسنة الناس عنا.. وسبحان الله تحسي ان ربنا رزقني زي حماتي ب 3 بنات وولد علشان يختبرني هل في يوم هكون زيها وهعمل نفس تصرفاتها وهفكر نفس تفكيرها او لا..

بس هقولك حاجه وربنا شاهد على كلامي انا مستحيل هتغير في المعاملة بين ولادي.. كلهم عندي نفس المحبة..

زوجي منع والدته تلمس الطفل نهائي غير برضايا وقالها لو منعتي زيارة البنات ليكِ يبقى لا بنات ولا صبيان هتشوفيهم وانه بيشهد ربنا انه كان بار بيها لكن هي اللي عاقه بيه وببناتنا.. متخيلة اصلا ان بجبروتها طلبت انها تاخد ابننا وتربيه هي ؟!! انا مش عارفه بجد هي بتفكر ازاي ؟

وطبعا جوزي رفض تماما ومن وقتها وهو بيروحلها زيارة لوحده كل فتره رغم ان جحود وقسوة قلبها وصلوها انها تسيبه واقف على السلم لحد ما يتعب ويمشي.. وكان بيطمن عليها من اخواته البنات..

بدعي وبتمنى من ربنا انه يهديها علشان راحة جوزي اللي ميستحقش البهدلة دي.. وكان نفسي تكون جده طيبة مع ولادي..

ادعولي واحنا في شهر الخير يريح قلوبنا ويهديها ويهدينا جميعا.. ويباركلي في زوجي وولاي ويرزق كل مشتاق البنين والبنات ❤

🎀🎀🎀🎀🎀🎀

بقى الرسول صلى الله عليه وسلم يقول على البنات انهن المؤنِسات الغاليات.. وقال فيما معناه ان اللي عنده 3 بنات آواهن ورحمهن وجبت له الجنه

وتيجي ناس جاهله بالدين ومفيش في قلوبهم رحمه ولا يعرفوا يعني ايه انسانيه ويقولوا ان خلفة البنات عار !

انا هتجنن ازاي الكلام دا في الغالب بيخرج من ست اصلا !

ربنا يرحمنا من الجهل ويبعد عنا قساة القلب.. ويحفظ كل البنات..

ونشوفكوا في قصة جديدة استنونا 💙

#حكاوي_هدير

#هدير_ابراهيم

لينك القصه علي قناتنا علي اليوتيوب

https://youtu.be/E4Kdqj6ZtLw