سارق النظر

 #سارق_النظر

#قصص_واقعيه_لهدير_ابراهيم 💌

من اسماء ربنا #اللطيف ..

بنمر في حياتنا بمواقف كتير كلها لطف ورحمة من ربنا لكن مش كلنا بنقدر نميز دا ولا نحس بقيمة نعم ربنا غير لما بنشوف ابتلاءات غيرنا..

قصة النهاردة قصة عجيبة كل ابتلاء فيها مصاحب للطف عجيب..

ف تعالوا نشوف اللطف المُصاحب للابتلاء..

🎀🎀🎀🎀🎀🎀🎀

انا يمني 29 سنة قصتي غريبة شوية لأن كلها ابتلاؤات مستمرة بس العجيب انها متصلة بسلسلة لطف بردو مستمرة..

ابتلائي ابتدا من اول ما نزلت الدنيا واتشخصت بمرض اسمه #جلوكوما او ما يُطلق عليه "سارق النظر" ودا بيكون زي سحابة زرقا على العين وبيسحب النظر منها..

عيني الشمال اللي كانت مصابة بالمرض..

والدي ووالدتي مقصروش معايا وعملت عمليات كتير لعل وعسى يكون في علاج..

كنت بستغرب والدتي اوقات كتير لما الاقيها تاخدني في حضنها وتبكي.. كنت صغيره لسه ومش فاهمة ولا عارفه اللي همر بيه لما اكبر..

وفجأة حصل الابتلاء التاني في حياتي..

تعبت والدتي ودخلت المستشفى وهي على فراش الموت وكأنها كانت حاسة بقرب أجلها حضنتني لآخر مره وقالتلي نظري هينفعني بإيه وانا ميتة ياريت يا بنتي كان بإيدي تاخدي عيني وتشوفي بيها..

واتوفت أمي وانا واخواتي لسه اطفال.. ولاننا أربع اطفال صغيرين اضطر والدي بعد إلحاح كتير انه يتزوج بعد أمي.. وكان هنا لطف ربنا بينا..

زوجة والدي غير أي مرات أب بنسمع عنها .. مكانتش شريره بالعكس كانت لطيفة جدا معانا وكانت بتساعدنا واتعلقنا بيها وكأنها أمنا..

مرت الأيام عليا بين العلاج والعمليات والحياه مستمره.. وفي ثانوية عامة احتجت لعملية جديدة وقدرا اكتشفنا ان عيني السليمة عليها مياه رزقا هي كمان ودا ابتلاء بس كان فيه لطف وهو ان الحمد لله لون عيني الخارجي متأثرش..

عملت العملية واتحملت كل التعب النفسي بعدها لأن مفيش استجابة لعيني المصابة للأسف.. بس كان لطف ربنا بيا اني رغم كل اللي مريت بيه دا الا انه وفقني في الثانوية العامة وطلعت الأولى في القسم الأدبي على مدرستى ودخلت كلية من كليات القمة..

ملحقتش افرح بدخول الجامعة وكان جايلي ابتلاء اكبر وهو وفاة والدي الحبيب الله يرحمه هو وأمي..

اتمنيت بعد وفاته لو أموت ومكنتش متخيلة اني ممكن اقدر اتحمل اعيش في الحياه دي بعده.. بس زي م ربنا صبرني بعد أمي صبرني بردو ولطف بيا بعد وفاة والدي..

زوجته الأصيلة بنت الناس رفضت انها تسيبنا وقسمت كل وقتها بين رعايتنا ورعاية والدتها..

وكأن ربنا سخرها سند لينا لحد م أخويا كبر وبقى ضهر لينا هو كمان..

ربنا كرمني واشتغلت بعد ما خلصت جامعة هو شغلي بعيد عن مجال دراستي لاني اشتغلت مدرسة.. بس كان دا في حد ذاته لطف من ربنا لأن حب الأطفال ليا وبرائتهم بتعوضني عن وجع كتير ونظرات شفقه بشوفها في عيون الناس..

دي أمثلة بسيطة من مواقف الابتلاءات واللطف الكتيره اللي مالية حياتي..

حبيت ابعتلك يا هدير واشارك انا كمان بقصتي لاكتر من سبب..

اول سبب-الناس تخلي بالها من مرض المياه الزرقا وخاصة عند الاطفال لانه كل ما يتشخص بدري يكون أفضل..

تاني سبب- ياريت يا جماعه اللي يلاقي حد تعبان يبطل يإذيه بالكلام يعني مثلا مريض المياه الزرقا  بتبقي احيانا عينيه حمرا من القطرة وتعبان وفيه اللي مكفيه متجيش انت تسأله عينيك حمرا كدا ليه ؟

تالت سبب- مريض المياه الزرقا في ناس بتبقى عندها سحابه زرقا وفي اللون الازرق نفسه بيبقي مخبي نن العين  ف متجيش تقوله ايه دا انت ازاي عينيك لون ولون كدا ؟

رابع سبب-المياه الزرقا دي ممكن تيجي  للشباب فأي حد يحس بأي حاجه  يكشف ع طول قبل فوات الاوان..

خامس سبب-مش كل الناس ينفع معاها ليزك او عملية تصحيح نظر.. فمتروحش تقول لحد اعمل ليزك علشان تقلع النضاره.. بلاش توجعوا بكلامكوا الناس وتفضلوا تفكروهم بمرضهم كل شويه..

انا نفسي اتقالي اقلعي النضاره والا مش هتعرفي تتجوزي.. وللاسف لحد دلوقتي م اتجوزتش فعلا ودا السبب الأخير لاني بعتلك قصتي

طالبه من كل حد هيسمعها يدعيلي ربنا يشفيني ويرزقني انا واخواتي ازواج صالحين ويرحم والدي ووالدتي ويبارك في عمر زوجة والدي ويجازيها عنا كل خير..

ادعولي لعل ربنا يستجيب ويشفيني انا من يوم ما اتولدت وانا عمري ما شوفت بعيني الاتنين ولا مره في حياتي واتعرضت لمواقف احراج كتير زي ان ممكن حد يشاورلي وماخدش بالي خالص ولا اشوفه.. وممكن اتخبط في حاجه من غير م اشوفها..

للأسف مفيش حد من اللي حوالينا في القرية اللي عايشة فيها يعرف حقيقة مرضي.. الخوف من جهل المجتمع صعب أوي..

انا واثقة وعندي حسن ظن ويقين ان لطف ربنا مكمل معايا رغم كل الابتلاءات اللي مرت عليا.. حبيت اشارك علشان اقدر افضفض مع حد بصوت عالي واخرج كل اللي في قلبي..

ادعولي ربنا يرزقني باللي ميشوفش دا عيب فيا..

وربنا يشفيني انا وجميع مرضى العالمين..

ورمضان كريم ع الجميع..

🎀🎀🎀🎀🎀🎀🎀🎀🎀

من أساسيات دينا "فلتقل خيراً أو لتصمت"

ف اتمنى يجي اليوم اللي الناس تتعلم فيه انها تفكر مره واتنين وتلاته قبل ما يطلقوا لسانهم على الناس..

ربنا يشفي مرضانا وجميع مرضى العالمين...

واستنونا في قصة جديدة❤

#حكاوي_هدير

#هدير_ابراهيم

لينك القصة على قناتنا على اليوتيوب

سارق النظر - YouTube