موت و حياة
#موت_وحياه ؟!!
#قصصواقعيهلهدير_ابراهيم 💌
مين فينا ممرتش عليه لحظة حس فيها ان روحه #ماتت !!
بيعيش في تعب نفسي ويأس وفي لحظة بقدرة #الكريم بتتحول حياته وبيرجع بروح جديده تماماً وقِصة النهارده #مثال ع كدا 💜
🎀🎀🎀🎀🎀🎀🎀🎀🎀🎀🎀🎀🎀🎀
خدعوكِ فقالوا ان #الروح_الحلوة أهم من الشكل !!
المقوله في حد ذاتها سليمه لكن الناس خاصة البنات بدأت تستعملها كـ #مُسكن بالتالي اللي جسمها مليان ومعندهاش #إراده انها تخس او يأست بتبدأ تسكن ضميرها بإن المهم الروح الحلوه وكتير شكلهم حلو لكن دمهم واقف!
تمام بس بردو كتير شكلهم حلو ومظهرهم الخارجي حلو وكمان روحهم حلوه !!
بتكلم من خلال واقع قاسي وصعب جدا مريت بيه وهبدألك قصتي بإني بإختصار وكأي بنت جسمها مليان اتعرضت لـ #تنمر كتير من المجتمع
صحاب بقى قرايب ناس معرفهاش في الشارع،
الكل م بيصدق يلاقي واحده يقعد يضحك ويتريق عليها _ الا م رحم ربي _...
كانت النتيجه معايا وللأسف اني لما اكتئب #آكل أكتر.
كنت بطلع همي كله وعصبيتي في الأكل والمذاكره،
م انا مش هبقى #وحشه وتخينه وكمان غبيه!!
خدت قرار اني هقدر اثبت نفسي واثبتلهم ان البنت اللي جسمها مليان وتخينه مخها مش تخين وغبيه زي م بيرددوا !!!
كنت بتعامل مع المعلومات اللي في الكتب زي الأكل بالظبط،
وفعلا قدرت ادخل كلية من كليات القمه زي م بيتقال عندنا في مصر،
بدأت مرحله جديده من التنمر والسخريه وكمان الحاله النفسيه السيئه،
م هو معلش انا في الاول وفي الاخر بشر وكمان #بنت وشايفه البنات كلها بيتقالها كلام حلو وبيرتبطوا وانا مش بسمع غير السخريه والتهكم..
حتى علاقتي بإصحابي اللي في الكليه كانت علاقة #مصلحة بحته سواء مني او منهم !!
هما مصاحبني علشان انا البنت المعروفه ع مستوى الدفعه انها موس ودحيحة وان اي حد بيطلب مني حاجه بعملهاله وبساعده،
وانا كمان مصحباهم رغم معرفتي بنواياهم علشان م افضلش #لوحدي !!
حياتي كانت بشعه أوي يا هدير .. مشوفتش فيها يوم واحد حلو، ولا في خبر فرحني من قلبي.
حتى الكلية اللي كنت بحبها جدا بدأت ازهدها وكرهتها وكرهت المذاكره والناس كلها..
دخلت كلية #صيدلة رغم ان مجموعي أهلني لطب بشري وأي كلية انا عاوزاها،
بس انا كانت أمنيتي من صغري ان يكون عندي صيدلية،
كنت شايفه ان دي الحاجه الوحيده اللي اتمنتها وحصلتلي، ودا طبعا لاني سعيت ليها.
سعيت بردو لإني أخس واظبط جسمي وفشلت ويأست،
سعيت اني اتعلم احط ميك-اب ودا فشلت فيه فشل ذريع او الناس من كتر م اتعودوا ع التنمر ع جسمي بقوا شايفني شكلا #عفريته مهما عملت!!
بالتالي يأست واخدت قرار اني اكمل في اني اوصل لاعلى المناصب في مجال دراستي لان دي الحاجه الوحيده اللي كانت بترضي غروري وبتديني ثقه في نفسي حتى لو #مهزوزة ....
خلصت الجامعة واتعينت معيده فيها ووالدتي – الله يرحمها – ساعدتني بكل اللي كانت تملكه علشان افتح #صيدلية #حلم_عمري...
والدتي تعبت معايا جدا خاصة بعد وفاة والدي اصبحت انا وهي لوحدنا مفيش حد بيسأل عننا من الأهل والقرايب ولما بنقابلهم في اي مناسبة مكنتش بسلم م لسانهم وتجريحهم ليا وبالتالي لوالدتي.
كانوا بيسمعوا والدتي كلام بشع عن اني بجسمي دا وشاكلي هفضل قاعده جانبها وان مين هيرضى بيا؟!!
تعرفي كان نفسي اوي الاقي حد جانبي حد يشجعني حتى لو بمجرد #طبطبة.. انا كنت لوحدي تماما حتى والدتي كنت بشوف دايما ف عنيها حزن وخوف من اني من بعدها هكون فعليا لوحدي تماما !!!
علاقتى بقى بربنا كانت كلها لوم وعتاب !!
كنت بقوله معقول خلقتني بكل الابتلاءات دي ومفيش خالص حاجه تفرح ليه؟! ليه خلقتني في دنيا كلها شقاء وعذاب وضغط نفسي؟!!
ومع ذلك عمري ما بعدت عن #الصلاة ..
اعتقد دا الباب الوحيد اللي كان مفتوح بيني وبين ربنا، مكانش في حد في حياتي خالص اتكلم معاه ولا يسمعني ف كنت بروح اصلي واطلع اللي جوايا كله،
كانت النتيجة دايما #صمت مفيش جديد يفرح كله بؤس وكآبه وحزن وبس.. او يمكن انا اللي كنت عاوزه اشوف الوحش بس!!
بس انتِ متخيله طيب واحده من أول ما عرفت في حياتها الصلاه وعمر م #جبينها لمس الأرض ؟! متخيله واحده في عز شبابها وفي العشرينات م عمرها وبتصلي ع #كرسي ؟!
عمري ما جربت يا هدير احساس #السجود !! 💔
اكتر حاجه كان نفسي احسها في حياتي هي اني ابكي وانا ساجده، وحتى الاحساس البسيط دا كنت محرومه منه؟!
لولا وجود والدتي كنت اتخلصت من حياتي من زمان !!
حياتي اصبحت بين الجامعة والصيدلية والبيت، كنت عامله بالظبط زي #الراهبات،
افتكر اني اتقدملي في عمري كله لحد ما كنت ف التلاتينات 3 رجاله،
واحد منهم كان معاه دبلوم ولما رفضته علشان طبعه فعلا كان صعب طلع قال عني كلام زي الزفت هو واهله وأهلي كمان بكل بجاحه كانوا بيقولوا لوالدتي انها توافق واهو يكفي ان حد بصلي اصلا ؟!!!!
والتاني شافني في الصيدليه وقال للوسيط اللي قالتله عني : حرام عليكِ دي شبه الدرفيل، عاوزاني اتجوز #بقرة ؟!
الأعجب ان الست جات قالتلي كلامه وهي بتضحك؟!
متخيله الناس بشعه ازاي وشايفين ان اذى غيرهم مضحك بالنسبالهم؟!
لحد م جات اللحظة اللي كان لازم فعلا حياتي بعدها تتغير،
والدتي تعبت جدا ودخلت المستشفى، اينعم علاقتي بيها مش قويه اوي ومكنتش بقعد معاها كتير بحكم شغلي،
بس دي أمي.. السند الوحيد اللي ليا في الدنيا ولو راحت أموت..
بسبب وزني مكنتش عارفه اتحرك بسهوله ولا انقلها المستشفى بأسرع وقت ومفيش جار يساعد 💔
كنت ببكي وانا طالعه اجري في الشارع اجيب تاكسي قدام البيت وسامعه اصوات شباب بيتريقوا ع جسمي والارض اللي بتتهز وانا بجري واني هسبب #زلزال في الشارع !!
وصلت بأمي المستشفى وانا نفسي مقطوع تماما ومجرد م اتطمنت عليها جريت ع مكان الصلاه في المستشفى قعدت ع الكرسي علشان اصلي وكنت عاوزه اصرخ وانا بدعي ربنا،
كنت عاوزه #اسجد .. عاوزه اجرب احساس البُكا وانا ساجده بين ايديه لعلي احس #بقربه !!
دعيتله في اليوم دا يحفظلي أمي ويساعدني،
ومن اللحظه دي قررت اني هعمل المستحيل وهنزل جسمي وهخس !!
تابعت مع دكتور تغذيه من تاني لكن المره دي كان الاصرار عندي أكبر،
مش هسمح لحد انه يتريق عليا تاني...
مش هسيب نفسي للأكل واخليه يدمرني حتى لو هو الحاجه الوحيده اللي بحس بالمتعه وانا بعملها...
هوصل للوزن اللي يخليني اقدر ادخل اي محل لبس من غير م المح نظرات ضحك واستهزاء في عيون الموجودين..
هشتري اللي نفسي فيه مش اللي جسمي ووزني بيفرضوه عليا..
كنت بذكر نفسي بكل دا والأهم يا هدير ان كان نفسي زي أي بنت
نفسي في زوج وبيت وأطفال ...!
الحلم دا عمري م قدرت اخرجه من قلبي رغم ان عقلي كان بيقولي اتكسفي ع دمك مين دا اللي يتعمي في عينه ويبصلك ؟!!
خدت قرار اني أخس وانا عندي 32 سنه
اكتر من سنتين ونص فضلت اجاهد فيهم لحد ما قدرت فعلا احقق هدفي،
ومن بعدها الدنيا بدأت #تضحكلي ولأول مره بدأ قلبي يحس بمعنى #الفرحة !!
حياتي كلها بعد ما خسيت اتحولت وكأني كنت شخص ومات واصبحت شخص جديد.. شخص مختلف تماما.
كنت بمشي في الشارع وانا حاسه نفسي طايره زي الفراشة !!
كنت كل م اشوف محل لبس ادخل على اصغر المقاسات واصبحت متعتي لما الاقي البنت اللي واقفه تقولي ع ان المقاسات الصغيره هي اللي تناسبني
مبقتش درفيل ولا بقره في عيون الناس يا هدير، والاهم في عيوني أنا...
كنت ببقى مبسوطه لما بشوف الدهشه في عيون كل اللي يعرفوني واسمع الطلبه عندي يقولولي كنت مخبيه كل الجمال دا فين ؟
مش الخسسان اللي جمل وشي في عيون الناس يا هدير،
لا دي الراحه النفسيه والسعاده والامان اللي اتحرمت منهم طول عمري الاحساس بيهم هو اللي جمل وشي ❤
نيجي بقى ع #الصلاه واحساس اول مره #اسجد
عيااااااااااط كتيييير مكنتش عارفه ادعي ولا اقول حاجه بعيط وبس !!
متخيلين اول مره اسجد في الصلاه وجبيني يلمس الارض وانا عديت التلاتين من عمري ؟!!
مفيش حد هيحس بكلامي دا غير اللي جرب زيي 💔
علاقتي بربنا اتحسنت كتير الحمد لله، بس بقيت ادعيله ع استحياء بإنه يطمن قلبي وقلب والدتي ويبعتلي #السند اللي يكمل معايا باقي عمري..
واتحقق دا وانا في سن الـ 35 وكان تدبير ربنا العجيب..
الشخص اللي شركه معينه للادويه بتعامل معاها كانت بتبعتلي شخص معين وفي مره اتخانقت معاه وقررت ابطل تعامل مع الشركه دي تاني بس لأني عميله ملتزمه معاهم جدا وبتعامل معاهم من زمان وبكل احترام بعتولي اعتذار مع دكتور خاص بالشركه
وهو دا كان #نصيبي اللي من اول م عيني وقعت عليه لقيت نفسي بقول يارب م يكون #متجوز 😃
اتعلمت ان ربنا ابدا م بيعذب حد وهو مقلب القلوب وزي م زرع حبه في قلبي من اول لحظه زرع حبي في قلبه هو كمان ❤
اتكلمنا 3 مرات بس وبعدها طلب ايدي من والدتي واتجوزنا وربنا برحمته رزقنا الذريه اللي بندعيه دايما تكون صالحه...
مش بقولك حياتي اتبدلت تماما... وبطلت افتكر الشخصيه القديمه لانها حرفيا ماتت بالنسبالي نهائياً وبطلت حتى افكر هل زوجي كان هيحبني الحب دا كله او يعجب بيا من اول مره لو شافني زمان،
كنت بشوف ان الظن دا م الشيطان
وبدأت اعيش يومي الجديد واحمد ربنا عليه واهتم بنفسي وصحتي علشان اقدر اطيع ربي بالتالي اخد بالي من زوجي واطفالي وبيتي ❤
اهتمامي بصحتي أثر ع نضارة بشرتي وجسمي وع شعري اللي كنت بحزن عليه كل م اجي امشطه او اشوف نفسي ف المرايه وفروة راسي بتبتدي تبان من سقوط شعري..
بقيت بعرف أنااام من غير م صوت شخيري يصحيني من ازعاجه ومن غير م دموعي تملا مخدتي كل ليلة 💔
كل دا كان من الماضي وانتهى الحمد لله.. الحياه مش ورديه دي حقيقه بس بالنسبالي وجانب اللي شوفته زمان ف هي حرفيا اصبحت #جنه ❤
دُمتي بخير وسعاده هدير ❤
🎀🎀🎀🎀🎀🎀🎀🎀🎀🎀🎀🎀🎀🎀🎀
" الله جميل يحب الجمال " ...
الجمال #للنساء زي م هو للرجال ✋
اهتمي بشعرك ببشرتك بجسمك بمظهرك الخارجي كله.. لو قلبك جميل هيظهر جماله ع مظهرك الخارجي..
لو قلبك جميل هتتقي الله في نفسك وجسمك وصحتك ...
#حِبوا نفسكوا واهتموا بيها علشانكم في المقام الاول هتلاقوا الدنيا بتتغير من حواليكم 💜..
#حكاوي_هدير
#هدير_ابراهيم
لينك القصة على قناتنا على اليوتيوب
